Esdra 6:1-22
6 Tawamhã apito Dariu ma tô dama tiꞌru, Babilonia ãma ibaihâ nhimiꞌwarazéb ãma dahiꞌrata norĩ wasuꞌu na romnhihâtâ mono na sô darĩtĩ zaꞌra da hã, Ciru hã ꞌri te te dama iꞌruzéb zô tinhimiromnhihâtâ na.
2 Tahawa, ꞌri nhoꞌu Ecbatana na isisi, dazaꞌrui waꞌõno Média na romnhisi ãma ꞌre ihâimana mono ãma, ma tô taha na romnhihâdâ isinhai ré hã dasiwi sõpẽtẽ ni. Ãne na ãma iromnhihâtâ ré hã:
3 “Apito Ciru isiꞌiꞌrãnhoꞌõmozém na imorĩꞌrata na ãma iwahub ãma, ma tô Zeruzalẽ ãma ꞌRe ihâimana uꞌâsi mono nhorõwa ꞌri apâ da te dasiwi iwahutu da hã dama tiꞌru, danhimizama na danhoprubzé da te iwa ꞌre izata zaꞌra mono zéb da hã. Tawamhã ꞌri naꞌrata pibuzé 27 metru na hâimo hã, duré 27 metru na ꞌri zadarata hâiba amoi u ipibuzé hã.
4 Tawamhã siꞌubdatõ ẽtẽ na ꞌri naꞌrata ꞌmanharĩ sisõré nhisiwimhã te za wedepoꞌo na misi isõré na hã dasiwi ꞌmanharĩ ni za. Duré uburé pese marĩ norĩ waꞌâbâzé hã za dama iꞌrãnhoꞌõmo norĩ hawip si.
5 “Uburé ẽtẽ waipo prã prata na duré ẽtẽ waipo pré oru ꞌmanharĩ na pizaꞌa norĩ hã apito Nabucodonozo Zeruzalẽ ãma ꞌRe ihâimana uꞌâsi mono nhorõwa ꞌri hawi te te isani zaꞌra, Babilonia u te te we iduri hã apâ wa za sõmri zaꞌra, ꞌri ꞌre, ꞌre isimiꞌwarazé mono bâ da te dasiwi saꞌra da apâ.”
Apito Dariu, ꞌri na romhurizém na te te dama iꞌruzé wasuꞌu
6 Tawamhã ãne te te ãma isadaꞌâbâ zaꞌra zé, ma te apito Dariuhu ma hã tãma me zaꞌra:
“Ã hã apito Dariu te te iwaihuꞌuzé, Tatenaꞌi dazaꞌrui waꞌõno Eufrati bâtâ zasizém niwĩ dama iꞌrãnhoꞌõmo ãma ma hã, Seta-Bozenaꞌihi ma hã, duré dazaꞌrui waꞌõno bâtâ zasizém niwĩ isiré dama ipire norĩ ꞌre ihâimana zaꞌra mono norĩ ma hã:
“ꞌRe ihâimana uꞌâsi mono nhorõwa ꞌri nhiti maꞌãpé aiꞌré zaꞌra waꞌaba.
7 Da te dasiwi iꞌri zaꞌra zé hã maꞌãpé dawi sawi zaꞌra waꞌaba tõ. Zuda ãma iꞌrãnhoꞌõmo norĩ ma, duré zudeu norĩ nhibꞌihâꞌa ma, maꞌãpé saꞌré zaꞌra waꞌaba, ꞌRe ihâimana uꞌâsi mono nhorõwa ꞌri, duréihã da te dasiwi iꞌri prubzéb ãma tô apâ te te siwi ꞌri nharĩ da.
8 Tawamhã romnhihâtâ na hã wa ãma aiwadaꞌuri zaꞌra waꞌwa, ꞌri na a norĩ waꞌwa hã dapawaptob zaꞌra waꞌaba da. Uburé ꞌri da, marĩ waꞌâbâ mono hã duré dasai waꞌâbâ mono hã te za õne haré we tihâiba, romhuri hã simizazâri tõ da. Ãhã da hã te za dama iꞌrãnhoꞌõmo te, robꞌuiprazé ubumrozém hawimhã da te ꞌre sani, dazaꞌrui waꞌõno Eufrati bâtâ zasizém niwĩ dapawaꞌâbâ arĩ, da te ꞌre iwaibui mono hawimhã, robꞌuiprazé hã.
9 Tawamhã sasedoti Zeruzalẽ ãma ꞌre ihâimana zaꞌra mono norĩ ma hã te za bâtâ bâre sô ꞌre roꞌwanhiꞌriti zaꞌra mono ãna, uburé marĩ te te ꞌre iwaptẽrẽ zaꞌra mono zéb zarina tãma ꞌre isõmri zaꞌra waꞌaba mo, ã norĩ hã: powawẽ ibaꞌõmo zapu hã, poneꞌẽrebâ hã, duré poneꞌẽrebâ ꞌra hã, ꞌRe ihâimana uꞌâsi mono hâiwa ãma ꞌre isãmra mono ma, ꞌre sõprub zaꞌra mono wa, te te tãma ꞌre izata zaꞌra mono da hã. Tawamhã amnho trigu zama te za duré tãma ꞌre isõmri zaꞌra waꞌaba mo, dasai warĩrĩzé sa hã, uwa ꞌrãi waꞌu isé hã, duré azeitona waꞌu to hã.
10 Ãne te za ta norĩ hã te te ꞌre ꞌmanharĩ zaꞌra, ꞌRe ihâimana uꞌâsi mono hâiwa ãma ꞌre isãmra mono ma, ꞌre isõprub zaꞌra mono zé te te ꞌre iꞌawẽsãmri mono zéb da hã. Duré ĩꞌãma ꞌre mreme zusi mono da, ĩꞌra norĩ ãma zama, rowẽ na ꞌre wahâimana zaꞌra mono da hã, te za te te ꞌre ꞌmanharĩ zaꞌra.
11 Niꞌwa, ã hã ĩnhimirobꞌruzé te te wapari õ wamhã, wa za dama hâiba ꞌru za, isõrõwa hawi wedepo da te iwazere ꞌrãꞌwa na da te ãma hâiba ꞌrazâri da hã, duré taha pari tiꞌa na da te ãma romnhihâtâ haré iré sab da. Tahawa, te za duré isõrõwa hã dasiwi ꞌmorõwĩrĩ ni, isõrõwa siprup si saꞌwari ꞌrãihâ na ꞌre saꞌwari mono da.
12 ꞌRe ihâimana uꞌâsi mono hã, Zeruzalẽ, ãma ꞌre idawata zaꞌra mono zéb da ꞌri hã te te pisutu siromo wa, siwaꞌru apito norĩ hã, duré siwaꞌru dawamri mono ꞌremhã ĩnhimirobꞌruzé te te ꞌre iwapari zaꞌra mono õ, te te ꞌre iꞌaꞌuprosi mono da si iwẽ hã, ꞌri te te ꞌre prub zaꞌra mono da, te te sima ꞌre ipibu zaꞌra mono norĩ hã. Wa hã Dariu, wa tô ãne dama robꞌru. Ã hã da te dasiwi ꞌre iwapari pese zaꞌra mono da si, iꞌruzahi hã.”
ꞌRe ihâimana uꞌâsi mono nhorõwa isiꞌutõrĩzém na, da te dasiwi isaiwĩrĩzé wasuꞌu
13 Tawamhã dama iꞌrãnhoꞌu Tatenaꞌi hã, Seta-Bozenaꞌi hã, duré isiré dama ipire norĩ hã ma tô apito te te iwaihuꞌuzéb zarina si siwi ꞌmanha.
14 Tawamhã zudeu norĩ nhibꞌihâꞌa hã ma tô ꞌri na romhuri na te te ãma siwi uzusi, wẽ na. Taha siwaprã ma tô ꞌRe ihâimana uꞌâsi mono zadawa ꞌmahârâꞌwa Ageu norĩ nhimirowasuꞌu, Idoho ꞌra Zacariaha nhimirowasuꞌu me hã tãma tipẽꞌẽ to zaꞌra. Tawamhã ma tô ꞌri hã siwi uprosi oto, Izaraéu nhihudu norĩ te, ꞌRe ihâimana uꞌâsi mono te te iwaihuꞌuzéb zarina, duré Persia nhibꞌapito norĩ Ciru, Dariu, Artazesi, ã norĩ hã te te iwaihuꞌu zaꞌra zéb zarina.
15 Ãhã wa, ada na aꞌamo nhisi ãma bâdâ siꞌubdatõ ihâimana ãma, ma tô oto ꞌri hã aiꞌutõrĩ pese, Dariuhu ãma 6 na ãma iwahubzéb ãma dama iꞌrãnhoꞌõmo na ꞌre ihâimana mono zém na hã.
16 Tawamhã Izaraéu nhihudu norĩ, sasedoti norĩ, levita norĩ, duré uburé isiré norĩ apâ Babilonia hawi isiꞌabaꞌré hã ma tô ꞌri te te siwi isaiwĩrĩzé hã siwi ꞌmanha. Ãhã wamhã, ꞌRe ihâimana uꞌâsi mono ãma ꞌre idawata zaꞌra mono zéb da hã ma tô dato sina tãma hã sõmri zaꞌra ni.
17 Tawamhã ꞌri saiwĩrĩzéb da hã ma tô 100 na powawẽ ibaꞌu hã, 200 na poneꞌẽrebâ hã, duré 400 na poneꞌẽrebâ ꞌra te te izata zaꞌra da hã sõmri zaꞌra. 12 na poneꞌẽrebâ zéré uzé siꞌaibâ, ãma tãma sõprub zaꞌra wa, dawasédé te te dama ãma iꞌapari zaꞌra zéb da hã, ma tô ta norĩ hã duré sõmri zaꞌra, Izaraéu nhihudu norĩ waꞌõtõ wamri mono bâ, poneꞌẽrebâ zéré uzé hã.
18 Tawamhã sasedoti norĩ hã, duré levita norĩ hã ma tô Zeruzalẽ ãma ꞌri ꞌre, te te ꞌre iromhuri zaꞌra mono da zama siwi danhisi nhihâtâ zaꞌra, Mozésihi nhimiroti na ãma iromnhihâtâzéb zarina.
Pascowa na dato nhisi na da te dasima iromhuꞌu zaꞌra zé wasuꞌu
19 Tawamhã Izaraéu nhihudu norĩ, Babilonia ãma sito pese na ꞌre ihâimana zaꞌra mono zém hawi apâ isiꞌabaꞌré norĩ hã ma tô Pascowa na dato isaꞌẽtẽ nhisi na hã sima romhuꞌu zaꞌra, bâdâ 14 na ihâimana ãma aꞌamo imorĩꞌrata te na.
20 Tawamhã uburé sasedoti norĩ, duré levita norĩ hã ma tô siꞌupsõ zaꞌra, ꞌRe ihâimana uꞌâsi mono ma, iwẽ na hâimana zaꞌra da hã. Taha pari levita norĩ ma tô abaze norĩ hã siwi simro, Pascowa na dato isaꞌẽtẽ wa ãma isõprub zaꞌra zéb da hã, uburé aꞌuwẽ te te sina isiri zaꞌra hâiba uꞌâbâmhã, isiré sasedoti norĩ apâ te te sina isiri zaꞌra zé hâiba norĩ uꞌâbâmhã, duré sihâiba uꞌâbâb zaꞌra zama hã.
21 Tawamhã uburé Izaraéu nhihudu norĩ, Babilonia hawi apâ te te sina isiri zaꞌra norĩ hã ma tô danhimizama na ãma ꞌre idanhoprub zaꞌra mono nhi hã tihu. Duré aꞌuwẽ iwasédé Canaꞌã ãma ꞌre ihâimana zaꞌra mono norĩ hâimanazé te te irẽme zaꞌra, duré Uburé Danhibꞌapito, Izaraéu nhihudu norĩ te ꞌRe ihâimana uꞌâsi mono ãma oto ꞌre wata zaꞌra mono da, tihâimanazém na te te isaprĩ zaꞌra norĩ zama hã ma tô duré romnhi hã dame tihu.
22 Tawamhã 7 bâtâ ꞌre, ma tô iꞌuꞌẽtẽ duptoiꞌõ na dato hã siwi ꞌmanha, to zaꞌẽtẽ zaꞌra sina. Tahawa, tãma hã rowẽ uptabi zaꞌra di, Uburé Danhibꞌapito hã, Asiriaha* nhibꞌapito, niha oto te te ꞌrãi piꞌrai wa, õ norĩ zawi na si oto ꞌre hâimana mono da, taha zarina ꞌRe ihâimana uꞌâsi mono nhorõwa ꞌri apâ te te siwi iwahutu na te te pawaptob zaꞌra da hã.
Ĩwaꞌõtõ piꞌreba watsuꞌu mono
^ 6:22 Taha ré, Persia nhibꞌapito ma tô duré Asiria na danhiptiꞌai waꞌõno hã te te ꞌre ꞌmadâꞌâ. Asiria hã Izaraéu nhihudu norĩ nhitobꞌru aré.
