Esdra 7:1-28
7 Tawamhã wahub ahâ na we ꞌre wahu mono pari, apito Artazesi Persia nhibꞌapito na ꞌre hâimana mono ré, ma tô Esdra na aibâ nhisi hã Babilonia hawimhã mo, Zeruzalẽ u hã. Ta hã, Arã sasedoti isiré norĩ ma isaꞌẽtẽ sipoto hawi aꞌuwẽ, Seraiaha ꞌra, Azariaha nhihudu, duré Hilquiaha ꞌra nhihudu.
2 Ihiꞌrata norĩ hâiba amo hã ãne: Salu, Zadoqui, Aitubi,
3 Amaria, Azaria, Meraiote,
4 Zeraia, Uzi, Buqui,
5 Abisua, Finéa, duré Arãhã ꞌra Eriaza, tisiré norĩ nhipai u sasedoti ipire uptabi.
6 Esdra hã rowaihuꞌu pese ꞌwa. Duré Uburé Danhibꞌapito, Izaraéu nhihudu norĩ te ꞌRe ihâimana uꞌâsi mono, Mozésihi ma, tinhimiroti na robꞌuiꞌéré hã te te tãma isõmri waihuꞌu wẽ ꞌwa, te ꞌre mo. Tawamhã ta hã ma tô apito Artazesihi u hã mo. Morĩ wamhã, ma tô uburé te te tiwi iwaptẽrẽzé hã tãma tisõ. E marĩ wa. Uburé Danhibꞌapito, Esdraha ma, iwẽ si te te tãma ꞌre apisutu mono wa. Ãne ma tô ta hã Babilonia hawimhã mo, Zeruzalẽ u hã,
7 nima norĩ Izaraéu nhihudu norĩ ꞌremhã, sasedoti norĩ ré, levita norĩ ré, isõꞌreꞌwa norĩ ré, duré ꞌRe ihâimana uꞌâsi mono nhorõwa ꞌmadâꞌâꞌwa norĩ ré, duré taha ꞌri ꞌre, romhuriꞌwa norĩ ré. Ãne hã ma tô tiromhâiba, Artazesi hã dama iꞌrãnhoꞌõmo na 7 na ãma iwahubzéb ãma.
8 7:8-9 Tawamhã Babilonia hawimhã aꞌamo imorĩꞌrata te na bâdâ isãnaꞌrata hawi ma tô wairé. Tawamhã ꞌRe ihâimana uꞌâsi mono te te ipawaptob zaꞌra zéb zarina, ma tô Zeruzalẽ u hã oto aihutu, aꞌamo 5 na isiꞌutõrĩ ãma, bâdâ isãnaꞌrata hawi.
9 ꞌMadâꞌâ 7:8
10 Esdra ma tô morĩ wana ré hã sisõ tô, Uburé Danhibꞌapito nhimiroti na si te te ꞌre romnhoré mono da, duré isarina si ꞌre morĩ wẽ da, duré Izaraéu nhihudu norĩ ma, duré uburé te te ãma dama ꞌre rowahutu mono da, isimiroti na hã.
Artazesihi nhimiromnhihâtâzé wasuꞌu
11 Ã hã, apito Artazesihi nhimiromnhihâdâ, sasedoti rowaihuꞌu pese ꞌwa Esdraha ma te te isõmri, Uburé Danhibꞌapito, Izaraéu nhihudu norĩ ma, tinhimiroti, te te isõmri waihuꞌu wẽ ꞌwai ma:
12 “Ã hã Artazesihi nhimiromnhihâdâ, tiꞌab ré, ĩsiré apito norĩ ma, isipaiꞌu zaꞌra ĩpire uptabi, wa sasedoti ipire Esdraha ma time, ꞌRe ihâimana uꞌâsi mono hâiwa ãma ꞌre isãmra mono nhimiroti waihuꞌu pese ꞌwai ma, ãne: Wa hã wa ãma asawi.
13 Wa hã wa ãhã na ĩnhimiroti hã dama tihi, daro ĩnhimiꞌmadâꞌâzé mono bâ uburé Izaraéu nhihudu norĩ te te sima irowẽ zaꞌra norĩ hã Zeruzalẽ u ãma asiré siꞌabaꞌré da, taré ꞌre ihâimana zaꞌra mono aꞌuwẽ hã duré sasedoti norĩ hã, duré levita norĩ hã.
14 Wa hã apito, 7 na timreme na te te siwi ꞌre ĩpawapto mono norĩ siré wa aima robꞌru, Zeruzalẽ u duré Zuda u aimorĩ da hã, ate ꞌRe ihâimana uꞌâsi mono tinhimiroti daꞌudâna te te aima isõmri hã da te ꞌre wapari pese zaꞌra mono zô, daꞌazabu da.
15 Danhoprubzé ẽtẽ waipo pré oru na hã duré ẽtẽ waipo prã prata na hã, maꞌãpé ãma asiré duri, wa hã timreme na te te siwi ꞌre ĩpawapto mono norĩ me, Izaraéu nhihudu norĩ te ꞌRe ihâimana uꞌâsi mono ma, wa te tãma sõmri zaꞌra da, wa te wasima iwẽ zaꞌra hã, Zeruzalẽ ãma tinhorõwa ꞌri ꞌre, ꞌre isãmra mono ma.
16 Uburé te za ẽtẽ waipo prã prata ꞌmanharĩ hã, oru ꞌmanharĩ me hã idu, Babilonia ãma dazaꞌrui waꞌõtõ hawi iwaibu hã, Izaraéu nhihudu norĩ, tisiré sasedoti norĩ me Zeruzalẽ ãma tite ꞌRe ihâimana uꞌâsi mono nhorõwa ma da, te te isõmri zaꞌra hã.
17 “Ã hã robꞌuiprazém na hã te za duré ãma ipibui pese zaꞌra waꞌwa za, ãma uipra zaꞌra waꞌaba da, powawẽ ibaꞌõmore norĩ hã, poneꞌẽrebâ zéré uzé norĩ hã, poneꞌẽrebâ zéré mapure norĩ hã, amnho norĩ hã, duré uwa ꞌrãi waꞌu isé norĩ hã, Zeruzalẽ ãma ꞌRe ihâimana uꞌâsi mono nhorõwa ꞌri ãma danhoprubzé zata nomrizé nhisiwi, tãma ãma asõprub zaꞌra waꞌaba da, izata na hã.
18 Tawamhã oru ꞌmanharĩ, duré ẽtẽ waipo prã prata ꞌmanharĩ siꞌatarẽme na hã te za a hã asiré norĩ me, tô marĩ hã ãma asima iꞌmadâꞌâ ze zaꞌra waꞌaba zéb zarina, marĩ siwaꞌru asima ãma iꞌuipra zaꞌra waꞌwa, ate zaꞌra waꞌwa ꞌRe ihâimana uꞌâsi mono te te sima iwẽzéb zarina si.
19 Marĩ mono bâ, da te aima isõmri zaꞌra hã ꞌRe ihâimana uꞌâsi mono nhorõwa ꞌri ꞌre, marĩ ꞌmanharĩ zéb da hã, te za a hã Zeruzalẽ ãma ꞌRe ihâimana uꞌâsi mono ma hã tãma isõmri zaꞌra za.
20 Uburé marĩ ihâiba amo norĩ hã ꞌri ꞌre romhurizéb da, sô irobaba mono hã te za apito te robꞌuiprazéb ubumrozém hawim na marĩ waꞌâbâ mono hã tihâimana zaꞌra.
21 “Wa hã apito Artazesi, dazaꞌrui waꞌõno Eufrati bâtâ zasizém niwĩ ãma, robꞌuiprazé ꞌmadâꞌâꞌwa norĩ ma, wa ãhã na hã tãma ꞌru zaꞌra, sasedoti ꞌRe ihâimana uꞌâsi mono hâiwa ãma ꞌre ĩsãmra mono nhimiroti waihuꞌu pese ꞌwa Esdraha ma, õne haré awaꞌawi te te tãma sõmri zaꞌra da isibꞌrata, uburé marĩ te te iwaptẽrẽ hã,
22 ẽtẽ waipo prã prata 3.400 na ipire pibuzéb u hã, amnho trigu 12.500 na ipire pibuzéb u hã, uwa ꞌrãi waꞌu isé 2 miu litru u hã, azeitona waꞌu to 2 miu litru u hã, duré dasaiwarĩrĩzé te te sima iwẽ zarina hã.
23 Uburé te za ãma iꞌuwaimra, ꞌRe ihâimana uꞌâsi mono hâiwa ãma ꞌre isãmra mono tinhorõwa ꞌri na hã te te ꞌre iꞌawaihuꞌu mono zéb zarina, ãne zarina niwa isitiꞌruzé hã ĩzada hâimana tõ da, duré niwa aptoꞌo ré ĩnhihudu norĩ da zama, hâimana tõ da, ĩꞌuirĩ na hã.
24 Uburé a norĩ waꞌwa hã sasedoti norĩ wi, levita norĩ wi, isõꞌreꞌwa norĩ wi, ꞌRe ihâimana uꞌâsi mono nhorõwa ꞌmadâꞌâꞌwa norĩ wi, ꞌri ꞌre, romhuriꞌwa norĩ wi, duré dahâiba amoi u aimawi norĩ, ꞌri ꞌre, te te ꞌre irobꞌmaꞌwamarĩ zaꞌra mono norĩ wi, dapawaꞌâbâ arĩ hã tiwi ꞌre waptẽrẽ zaꞌra waꞌaba mono õ di za.
25 “Esdra, a hã, ꞌRe ihâimana uꞌâsi mono aiꞌrãi waihu te te aima isõmri dâꞌâsina te za idaꞌapisu, daꞌmadâꞌâꞌwa da hã, duré daꞌãma rowairébéꞌwa da hã dazaꞌrui waꞌõno Eufrati bâtâ zasizém niwĩmhã, uburé aꞌuwẽ te te ꞌre ꞌmadâꞌâ zaꞌra mono da hã, ate, ꞌRe ihâimana uꞌâsi mono nhimiroti tãma iwaihuꞌu pese norĩ hã. Tawamhã a hã, ã tãma iwaihuꞌu õ norĩ ma hã te za ãma tãma ꞌre irowahutu zaꞌra mo.
26 Niꞌwa, ate ꞌRe ihâimana uꞌâsi mono nhimiroti duré dama iꞌrãnhoꞌõmo nhimiroti te te wapari õ wamhã, te za õne haré awaꞌawi tãma robꞌmanharĩ ni. Ãhã wamhã, te za wĩrĩ ni, niha wamhã tiꞌai waꞌõtõ nhoꞌõmo amoi u si morĩ da, te za dasiwi satõrĩ ni dasisiti. Duré niha wamhã, te za isimarĩ hã dasiwi tiwi waibu zaꞌra ni. Niha wamhã, te za dasiwi sẽrẽ ni, dazazéb ꞌre.”
Esdra, ꞌRe ihâimana uꞌâsi mono ãma iwatazé wasuꞌu
27 Tawamhã Esdra te ãne tinha:
— Uburé Danhibꞌapito, wahiꞌrata norĩ te ꞌRe ihâimana uꞌâsi mono ãma, wa ãma ĩwata, wẽ uptabi wa, niha na apito pẽꞌẽ ꞌremhã rosaꞌrata na hã te te ãma tiwi saprĩ wa, Zeruzalẽ ãma Uburé Danhibꞌapito nhorõwa ꞌri te te iwazézém na hã.
28 Wa hã, Uburé Danhibꞌapito ĩsiré ꞌre ihâimana mono zém na te ĩsina waihuꞌu wa, wa tô ĩnhiptete na ĩpahi ãna apito norĩ, timreme na te te siwi ꞌre ipawaptob zaꞌra mono norĩ me, isiré norĩ siptete na dama rotiꞌwa norĩ me, te te ĩwẽsãmri zaꞌra zé hã tãma ĩsina wazere zaꞌra. Ãne Uburé Danhibꞌapito, ĩte ꞌRe ihâimana uꞌâsi mono, ĩnhiptede te te ĩma isõmri zarina, wa tô Izaraéu nhihudu norĩ nhibꞌihâꞌa norĩ hã ahâ nherẽ ĩmreme na ãma aiꞌuté zaꞌra, ĩsiré siꞌabaꞌré da apâ, wanhiptiꞌa zaꞌra u hã.
