Esdra 8:1-36
8 Ã norĩ hã, Izaraéu nhihudu waꞌõtõ nhibꞌihâꞌa norĩ Babilonia hawi Zeruzalẽ u apâ Esdraha siré isiꞌabaꞌré, apito Artazesi danhibꞌihâꞌa na ꞌre hâimana mono ré hã:
2 8:2-14 Finéaha hawi aꞌuwẽ, Gésõ; duré Itamahã hawi aꞌuwẽ, Daniéu; duré Secaniasihi ꞌra Hatusi, Dawihi hawi aꞌuwẽ;
Paroho hawi aꞌuwẽ, Zacaria, 150 na isibꞌaꞌuwẽ waꞌõtõ norĩ aibâ me (ã norĩ nhisi zaꞌrata na robꞌuiꞌéré iré hã);
Zeraiaha ꞌra, Elioenaꞌi, Paate-Moabihi hawi aꞌuwẽ hã 200 na isiré aibâ norĩ ihâimana zaꞌra siré hã;
Zaziꞌéhé ꞌra, Secaniasi, Zacuhu hawi aꞌuwẽ hã, isiré 300 na aibâ norĩ ihâimana zaꞌra siré hã;
duré Zonataha ꞌra, Ebede hã, Adĩhĩ hawi aꞌuwẽ hã isiré 50 na aibâ norĩ ihâimana zaꞌra me hã;
Atariasihi ꞌra, Zesaiasi, Elãhã hawi aꞌuwẽ hã, isiré 70 na aibâ norĩ ihâimana zaꞌra siré hã;
Micaéhé ꞌra, Zebadiasi, Sefatiaha hawi aꞌuwẽ hã, isiré 80 na aibâ norĩ ihâimana zaꞌra siré hã;
Zeiꞌéhé ꞌra, Obadia, Zoabihi hawi aꞌuwẽ hã, 218 na isiré aibâ norĩ ihâimana zaꞌra siré hã;
Zosifiaha ꞌra, Selomite, Banihi hawi aꞌuwẽ hã, isiré 160 na aibâ norĩ ihâimana zaꞌra siré hã;
Bebaꞌihi ꞌra, Zacaria, Bebaꞌihi hawi aꞌuwẽ hã, 28 na isiré aibâ norĩ ihâimana zaꞌra siré hã;
Hacatãhã ꞌra, Zuãna, Azgadehe hawi aꞌuwẽ hã, isiré 110 na aibâ norĩ ihâimana zaꞌra siré hã;
Eripéréti, Zeiel, duré Semaia, Adonicãhã hawi aꞌuwẽ norĩ hã, 60 na isiré zaꞌra aibâ norĩ ihâimana zaꞌra hã. Tawamhã ã norĩ hã ma tô daꞌrãsutu u si aihutu.
Duré Bivaꞌihi hawi aꞌuwẽ norĩ hã, Utaꞌi, duré Zabude, isiré zahuré 70 na aibâ norĩ ihâimana zaꞌra hã.
3 ꞌMadâꞌâ 8:2
4 ꞌMadâꞌâ 8:2
5 ꞌMadâꞌâ 8:2
6 ꞌMadâꞌâ 8:2
7 ꞌMadâꞌâ 8:2
8 ꞌMadâꞌâ 8:2
9 ꞌMadâꞌâ 8:2
10 ꞌMadâꞌâ 8:2
11 ꞌMadâꞌâ 8:2
12 ꞌMadâꞌâ 8:2
13 ꞌMadâꞌâ 8:2
14 ꞌMadâꞌâ 8:2
Levita norĩ zô, Esdra te te idaꞌmazatõrĩzé wasuꞌu
15 Tawamhã wa hã Esdra, ꞌrinhoꞌu Aava na isisi tẽme â hã ꞌre ipraba mono ꞌrata, wa tô uburé aꞌuwẽ norĩ hã ꞌrãꞌõtõ. Tame wa tô siꞌubdatõ bâtâ na wa te wasima iꞌri nhoré mono zéb ãma aiꞌubumro ni. Tawamhã duré tame aꞌuwẽ norĩ, atãma na te abꞌmadâꞌâ pese mono wamhã, wa tô sasedoti norĩ dawazari isiꞌubumro hã sãmri zaꞌra. Tane nherẽ, levita norĩ dasiré hã ꞌmaihâimana õ di.
16 Tahawa, 9 na dama iꞌrãnhoꞌõmo norĩ hã wa tô waibu, ã norĩ hã: Eriézé, Ariꞌé, Semaia, Elnatã, Zaribe, Elnatã ihâiba amo, Natã, Zacaria, duré Mesulã. Tawamhã duré maparane dama romnhoréꞌwa norĩ hã wa tô timra, Zoiaribe norĩ hã Elnatãhã me, rowaihuꞌu pese ꞌwa norĩ hã.
17 Tahawa, Casifia na romnhisi ãma danhibꞌihâꞌa Idoho zô, wa tô satõrĩ zahuré, sô rĩtĩ zahuré mono da, te te sõpẽtẽ zahuré wa, duré isiré ꞌRe ihâimana uꞌâsi mono ãma ꞌre idawata zaꞌra mono zé ꞌri ꞌre, te te aré ꞌre iromhuri zaꞌra mono norĩ ma, te te tãma nharĩ zaꞌra da, tô ãme ãhã ꞌri ꞌre romhuriꞌwa da, te te we watẽme ꞌmazatõrĩ zaꞌra da.
18 Tawamhã ꞌRe ihâimana uꞌâsi mono iwẽ na te te wapawaptob zaꞌra wa, ma tô aibâ Serebia na isisi marĩ tãma iwaihuꞌu pe hã wei watẽme satõrĩ zaꞌra, levita Malihi hawi aꞌuwẽ hã. Tahawa, ma tô 18 na iꞌra norĩ hã duré isisãnawã norĩ hã we isiré aiꞌabaꞌré.
19 Tawamhã ma tô we tãma robꞌru zaꞌra Hasabiasihi ma hã, duré Zesaiasi, Merarihi hawi aꞌuwẽ ma hã, duré 20 na iꞌra norĩ ma hã, duré isisãnawã norĩ ma hã.
20 220 na ꞌri ꞌre romhuriꞌwa norĩ zama ma tô isiré we aiꞌabaꞌré, apito Dawi duré tãma daꞌmadâꞌâꞌwa norĩ hã levita norĩ pawaptob zaꞌra ꞌwa da, te te ipisutu zaꞌra nhihudu norĩ hã. Tahawa, uburé ta norĩ nhisi na hã ma tô ãma robꞌuiꞌéré zaꞌra.
Dasai ãna dahâimana zaꞌra ré, idamreme zusizé wasuꞌu
21 Tawamhã Aava na panhoꞌõmo ꞌrata, wa tô wasai ãna misi bâtâ na wahâimana zaꞌra da hã dama pisutu, taha ré uburé wa norĩ hã wate ꞌRe ihâimana uꞌâsi mono nhoꞌremhã wahiꞌrãtitõ tãma wasisimro da, waꞌra norĩ ré, duré uburé wanhimarĩ ré, wasiꞌabaꞌréi ré we te te wanhimroi wẽ mono da, wa te tiwi waptẽrẽ zaꞌra da hã.
22 Wa hã wa tô apito ma tinha, wate ꞌRe ihâimana uꞌâsi mono, uburé te te sina ꞌre iꞌumnhasi zaꞌra mono norĩ te te ꞌre iꞌmadâꞌâ pese zaꞌra mono na hã, duré te te ꞌre irẽme zaꞌra mono norĩ da, isiptetezé, duré isitiꞌruzé sada ꞌre ihâimana zaꞌra mono na hã. Tahawa, wa hã ĩnhiséb di, apito wi, awaru na dasiꞌwapéi ꞌmanharĩꞌwa norĩ wasiꞌabaꞌréi ré te te waꞌmadâꞌâ zaꞌra mono da, te tiwi iwaptẽrẽ da hã.
23 Tahawa, wa tô wasai ãna wamreme zusi ni, ꞌRe ihâimana uꞌâsi mono ma, te te waꞌmadâꞌâ zaꞌra mono da, wasiꞌabaꞌréi ré. Tawamhã ma tô wa te tiwi irowaptẽrẽ zaꞌra zém na hã wawapari zaꞌra.
Danhoprubzé da te isõmri zaꞌra zé wasuꞌu
24 Tawamhã wa hã, sasedoti ipire norĩ ꞌremhã wa tô pisutu zaꞌra, ã norĩ hã: Serebia, Hasabiasi, duré 10 na isiré norĩ hã.
25 Tawamhã wa tô ẽtẽ waipo prã prata hã, oru hã, apito norĩ, duré apito timreme na te te ꞌre iꞌrãiwaptob zaꞌra mono norĩ hã, duré tãma romhuriꞌwa norĩ hã, duré Izaraéu nhihudu norĩ marĩ te te isõmri zaꞌra hã, ꞌRe ihâimana uꞌâsi mono nhorõwa ꞌri ꞌre marĩ ꞌmanharĩzéb da. Ta hã wa tô uburé sasedoti norĩ ma sõmri zaꞌra.
26 8:26-27 Tawamhã ãne marĩ mono hã wa tô sõmri zaꞌra: Ẽtẽ waipo prã prata hã 22 miu na ipire pibuzém na; duré 100 na prata na marĩ ꞌmanharĩ mono hã 70 na ipire pibuzém na; duré ẽtẽ waipo pré oru hã 3.500 na ipire pibuzém na; duré 20 na oru na pizaꞌa ꞌre nhoꞌa ꞌreptõ ꞌmanharĩ mono hã, 8 aiwa ãma isipoꞌo na ipire pibuzém na; duré maparane ẽtẽ topsada brõzi na marĩ ꞌmanharĩ hã, aiwa oru iwaꞌâbâ zaꞌẽtẽ na hã.
27 ꞌMadâꞌâ 8:26
28 Tawamhã wa tô tãma nharĩ zaꞌra ãne:
— A norĩ waꞌwa hã Uburé Danhibꞌapito, aihiꞌrata norĩ te ꞌRe ihâimana uꞌâsi mono ma si, tãma ꞌre romhuri zaꞌra waꞌaba mono da hã te oto aimawi ꞌre aihâimana zaꞌra waꞌaba mo. Ma te duré aimawi uburé marĩ mono hã tãma isaꞌra waꞌwa Uburé Danhibꞌapito ma, prata hã, duré oru hã, we asiwi iꞌãwisi ꞌwa hã, õhõ ma, dasima iwẽ na ãma tãma idanhoprub zaꞌra zéb da hã.
29 Tahawa, maꞌãpé asiwi saꞌra wẽ waꞌaba, ꞌRe ihâimana uꞌâsi mono nhorõwa ꞌri u, iꞌaihutu aba zéb u hã. Tawamhã tame ꞌri ꞌre waꞌwa ꞌre, te za ipire pibu zaꞌra waꞌwa za. Taha pari te za duré sasedoti ipire norĩ ma, duré levita norĩ ma, duré Izaraéu nhihudu norĩ nhibꞌihâꞌa Zeruzalẽ ãma ꞌre ihâimana zaꞌra mono norĩ ma, uburé tãma isõmri zaꞌra waꞌwa, marĩ mono hã.
30 Tawamhã sasedoti norĩ hã, duré levita norĩ hã ma tô prata hã, duré oru hã, duré marĩ mono hã waibu zaꞌra, Zeruzalẽ ãma ꞌRe ihâimana uꞌâsi mono nhorõwa ꞌri, ꞌre isa mono u te te oto ꞌwasari da hã.
Zeruzalẽ u apâ idasiꞌabaꞌrézé wasuꞌu
31 Tawamhã aꞌamo imorĩꞌrata ãma 12 bâtâ na wa tô Zeruzalẽ u apâ wasiꞌabaꞌré da hã, Aava na pa nhoꞌõmo nhisi hawimhã wawairébé ni. Tahawa, ma tô wasiꞌabaꞌréi ré, wate ꞌRe ihâimana uꞌâsi mono hã wasiré hâimana. Taha ré, ma tô duré wanhitobꞌru isipãrĩ ze dazô ꞌre iwairébé zaꞌra mono norĩ wi hã te te waꞌmadâꞌâ uꞌâsi zaꞌra.
32 Tawamhã oto Zeruzalẽ u wasihutu wamhã, wa tô siꞌubdatõ bâtâ na hã aꞌâ wawaꞌutu zaꞌra ni.
33 Taha pari maparane siꞌuiwa na bâtâ ãma wa tô duré oto ꞌRe ihâimana uꞌâsi mono nhorõwa ꞌri u hã aiꞌabaꞌré ni. Tahawa, prata norĩ hã, oru hã, duré marĩ ꞌmanharĩ mono hã wa tô pire pibu zaꞌra ni. Taha pari wa tô duré sasedoti Meremote, Uriaha ꞌra ma sõmri zaꞌra ni. Taha siré te ã norĩ hã oto tihâimana zaꞌra: Finezaha ꞌra Eriaza hã; duré maparane levita norĩ hã: Zesuaha ꞌra Zozabade hã, duré Binuꞌihi ꞌra, Noadiasi hã.
34 Tawamhã uburé marĩ mono hã ma tô dasiwi saꞌrata ni. Ma tô duré dasiwi pire pibu zaꞌra ni. Ãhã wa, ma tô uburé ipire pibu zaꞌra zé hã dasiwi sihâtâ ni.
35 Tawamhã Babilonia hawi apâ uburé dasiꞌabaꞌréi parip si, ma tô danhimizama norĩ hã Izaraéu nhihudu norĩ te ꞌRe ihâimana uꞌâsi mono ma, da te izata zaꞌra da hã sõmri zaꞌra ni. Tahawa, 12 na powawẽ ibaꞌõmo na, duré 96 na poneꞌẽrebâ zéré mapure siꞌaibâ na, duré 77 na poneꞌẽrebâ ꞌra na, ma tô ãma tanhoprub zaꞌra ni, Izaraéu nhihudu norĩ uꞌâbâmhã. Ma tô duré 12 na poneꞌẽrebâ zéré uzé siꞌaibâ hã siwi zata zaꞌra, dawasété parizéb da hã. Ã hã uburé abaze norĩ hã ma tô Uburé Danhibꞌapito ma, ãma tãma danhoprub zaꞌra zéb da hã dasiwi zata pese zaꞌra ni.
36 Tawamhã apito nhimirowaihuꞌuzém na romnhihâdâ ma tô duré dama iꞌrãnhoꞌõmo norĩ ma, tisõ, duré dazaꞌrui waꞌõno Eufrati bâtâ zasizém niwĩ daꞌmadâꞌâꞌwa norĩ ma zama. Tawamhã ma tô duré ta norĩ hã ꞌRe ihâimana uꞌâsi mono nhorõwa ꞌri ꞌre romhurizém na hã dapawaptob zaꞌra.