Esdra 9:1-15
9 Tawamhã ãne hã uburé da te ꞌmanharĩ zaꞌra pari, niꞌwam norĩ Izaraéu nhihudu norĩ ma iꞌrãnhoꞌu hã ma tô we ĩtẽme aiꞌabaꞌré, te te ĩma rowasuꞌu zaꞌra da, ãne: “Aꞌuwẽ Izaraéu nhihudu norĩ, sasedoti norĩ, duré levita norĩ, tisiré aꞌuwẽꞌõ norĩ ꞌre ihâimana siwamnarĩ zaꞌra mono zé wi ꞌre sisawi zaꞌra mono õ di, cananeu norĩ wi, hitita norĩ wi, perizeu norĩ wi, zebuzeu norĩ wi, amonita norĩ wi, moabita norĩ wi, ezipsiu norĩ wi, duré amoreu norĩ wimhã.
2 Izaraéu nhihudu siꞌaibâ norĩ, ma tô tisiré aꞌuwẽꞌõ norĩ nhipiꞌõ na ãma ꞌre mro zaꞌra. Ãhã zarina ma tô ꞌRe ihâimana uꞌâsi mono, tinhibꞌaꞌuwẽ da, te te ipisutu zaꞌra norĩ hã ibâi õ na ãma ꞌre sihâimana wamnarĩ zaꞌra. Tawamhã danhibꞌihâꞌa norĩ, duré dama iꞌrãnhoꞌõmo norĩ, ma tô dawasété na danhowamhã dama ãma tihâimana naꞌrata zaꞌra.”
3 Tawamhã ãne na wa hã te wapari wamhã, wa tô robzeiꞌõzé te, ĩꞌuza hã hâiwazu. Tahawa, wa tô duré ĩzéré sano. Wa tô duré ĩsiwatasu zano. Ãhã wa, wa tô duré ĩhâimana zeiꞌõ pese na hã ĩhâiba, tãma ĩsiꞌrãmi zép te, ãne ma.
4 Tawamhã tame wa tô ĩhâimana zeiꞌõ na hã aꞌâ nhamra, hâiwahâ tẽme danhoprub zata zéb u. Tawamhã niꞌwam norĩ ma tô oto siꞌrãꞌõtõ da hã siwi ĩꞌuirĩ, Izaraéu nhihudu norĩ te ꞌRe ihâimana uꞌâsi mono, Babilonia hawi isiꞌabaꞌré norĩ tiwasédé te te ꞌre iꞌmanharĩ zaꞌra mono zém na te te inharĩzé ma, ipahi zaꞌra norĩ hã.
5 Tawamhã oto hâiwa hâ te, danhoprub zatazéb da, bâdâ iwa waptãꞌã wamhã, wa tô oto udu, ĩwi irobzeiꞌõzé ĩma sipari wa. Tawamhã ĩhiꞌrãtitõ wa tô duré ꞌRe ihâimana uꞌâsi mono ma, ĩmreme da hã nhamra, ĩꞌuza te ihâi wazui ré. Ãhã wa, Uburé Danhibꞌapito, ĩte ꞌRe ihâimana uꞌâsi mono ma, ĩnhibꞌrada te tãma wẽ sina,
6 wa tô tinha ãne:
— ꞌRe ihâimana uꞌâsi mono, ĩma rowazéb uptabi di. Tahawa, tô asõꞌre ĩꞌrãiwahutu da hã, ĩma rowazéb uptabi di. ꞌRe iwawasété zaꞌra mono zém na hã wa tô ãma ꞌre wasiꞌrã ubu pese zaꞌra. Duré ꞌre wawasété zaꞌra mono wa, wawasédé waꞌãma ꞌre iꞌazaꞌra zaꞌra mono zé hã te hâiwa u te te sina ꞌre hâimo uꞌâsi.
7 Wahiꞌrata norĩ hawim haré, wa wa norĩ asibꞌaꞌuwẽ hã ãhã na zama ꞌre wawasété ahâ zaꞌra. Taha zarina, wa tô wa norĩ hã wate apito norĩ me hã, duré sasedoti norĩ me hã wasiré aꞌuwẽꞌõ norĩ nhibꞌapito nhibꞌratamhã warereꞌe ni. Tahawa, danhiꞌwa na ma tô duré da te dasiwi ꞌre wanhimro. Ma tô duré wawi da te ꞌre romnhimiꞌuri zaꞌra. Nimomo ma tô duré da te dasiwi ꞌre wanhimro. Tahawa, te ãhã na zama zahadu dama hã tarére wa, da te wama ꞌre robꞌmanharĩ wasété uꞌâsi zaꞌra.
8 Tane nherẽ, Uburé Danhibꞌapito, wate ꞌRe ihâimana uꞌâsi mono, ãhã na awaꞌawi na ma tô nimosi prã na iwẽ na wama ꞌre iꞌabꞌmanharĩ mono na hã isãnaꞌra. Taha zarina ma tô niꞌwam norĩ ma, wasimani zaꞌra da hã wama irowairébé zaꞌra, ãme ro iwazéb zahi ãma wasima iwẽ na ꞌre iwahâimana zaꞌra mono da hã. Duré wapawaꞌâbâ ãna danhimiwadaꞌuri zarina ꞌre iwahâimana zaꞌra mono zém hawi wasimani zaꞌra da hã ma tô wama irowairébé zaꞌra. Ma tô duré wahâimanazép té hã wama isõmri zaꞌra.
9 Wa norĩ hã wa tô aré danhibꞌaꞌuwẽ wa, wapawaꞌâbâ ãna wa te ꞌre romhuri zaꞌra. Tane nherẽ, taha ꞌremhã warẽme zaꞌra õ di. A hã ma tô Persia nhibꞌapito norĩ hã iꞌrãipizari zaꞌra, iwẽ si te te wama ꞌre ꞌmanharĩ zaꞌra mono da. Taha zarina ma tô asõrõwa ꞌri hã apâ wa te wasiwi wahutu da hã wama saꞌré zaꞌra, da te aré dasiwi iꞌri pru pe hã. Ma tô duré wama saꞌré zaꞌra, ãme Zuda ãma, duré Zeruzalẽ ãma wasima iwẽ na ꞌre wahâimana zaꞌra mono da, ꞌri ꞌwawi waꞌra ꞌrãihâ ꞌrem ne.
10 — ꞌRe ihâimana uꞌâsi mono, e niha uburé marĩ hâimana parim nherẽ, wa za bété nharĩ zaꞌra ni, niha na, ãhã awaꞌawi na hã. Wa norĩ hã wa tô uburé asimiroti hã rẽme zaꞌra ni,
11 asadawa ꞌmahârâꞌwa norĩ nhoꞌõmoi baba wama isõmri zaꞌra hã. Ta norĩ hã ma tô te te ꞌre wapoꞌre puꞌu siromo zaꞌra, ãma wanhiptiꞌa zaꞌra da, tiꞌai u za iwanhisisi hã iwẽꞌõ ꞌre isaꞌwari mono na hã. E marĩ wa. Taha ꞌre, aꞌuwẽ norĩ tiꞌa zadaꞌré siꞌuiwa na tinhimiꞌmanharĩ wasété uptabi na ro hã te te siwi ꞌre sito mono wa.
12 Ta norĩ hã ma tô duré te te wama ꞌre nharĩ zaꞌra, niwamhã õ norĩ aꞌuwẽ na hã ãma ꞌre wamro zaꞌra mono tõ da. Ma tô duré wama te te ꞌre nharĩ zaꞌra, õ norĩ hã niwamhã tãma ꞌre irowẽ zaꞌra mono zéb da, duré sibro pese na ꞌre hâimana zaꞌra mono da hã, wa te ꞌre pawapto zaꞌra mono tõ da. Tawapsi wa za, u, ãhã tiꞌai ꞌre robꞌrã norĩ hã wa te ꞌre huri, wasima iwẽ na. Tawapsi wa za duré, u, wanhihudu norĩ ma, wasiꞌuirĩ na ãhã tiꞌa hã wa te tãma ꞌre sõmri zaꞌra, ãma ꞌre siptiꞌa zaꞌra mono da hã.
13 Wawasété uꞌâbâ, duré wa te ãma ꞌre iꞌupa zaꞌẽtẽ zaꞌra mono uꞌâbâ, niha na marĩ na ꞌre waꞌahâ zaꞌra mono wa, ma tô ãne na uburé marĩ hã wama ꞌre hâimana zaꞌra, robzépata zaꞌẽtẽ zé hã. Tane nherẽ, ã hã wa tô wasina waihuꞌu zaꞌra ni, a hã, ꞌRe ihâimana uꞌâsi mono, ãne ꞌre wahâimana zaꞌra mono nherẽ, suru na wama ꞌre irobꞌmanharĩ zaꞌra mono zém na hã. Duré ma tô wama irowairébé zaꞌra, aꞌâ wahâiba ré ꞌre wahâimana zaꞌra mono da.
14 E niha ãhã nherẽ, wa za duré apâ asimiroti wa te ꞌre iwapari zaꞌra mono õ zém na hã ꞌre wahâimana zaꞌra, aꞌuwẽ iwasété uptabi te te ꞌre iꞌmanharĩ zaꞌra mono norĩ na ꞌre iwamro zaꞌra mono hã. Ãne hã wa te tô ꞌre ꞌmanharĩ zaꞌra mono wamhã, a hã te za duré apâ wazada ꞌre asahi mo za, õne haré waꞌuprosi da hã, aiwi hã waꞌmasimani ãna.
15 Uburé Danhibꞌapito, Izaraéu nhihudu norĩ te ꞌRe ihâimana uꞌâsi mono, a hã tô sena iꞌuwaibaba na si te dama ꞌre iꞌarowairébé uꞌâsi mo. Tahawa, duréi hawim haré ã bâtâ u zahadu wahâiba ré na ꞌre wahâimana zaꞌra mono da hã ma tô duré a hã wama irowairébé zaꞌra. Wa norĩ hã wa te ãma ꞌre iꞌupa zaꞌra mono zém na hã, wa ãhã na aima hã ꞌre wasiwẽꞌõ zaꞌra. Tane nherẽ, atõmo nhoꞌa ꞌre iwasimasa mono da hã, ibâi õ di.
