Esté 1:1-22
1 1:1-2 Persia na darom nhisi ãma, Zersi na isisi apito na ꞌre hâimana mono ré, ma tô ãne hã tiromhâiba. Ta hã ma tô 127 na dazaꞌrui waꞌõno hã te te ꞌre aꞌmadâꞌâ, India na dazaꞌrui wamri hawi, Etiopia na dazaꞌrui wamri u.
2 ꞌMadâꞌâ 1:1
3 Apito hã te te ꞌre idaꞌabꞌmadâꞌâ mono zém na siꞌubdatõ ãma iwahubzém na, ma tô dasa isaꞌẽne hã ꞌmanha, uburé tãma daꞌmadâꞌâꞌwa norĩ ma, duré tãma iromhuriꞌwa norĩ ma zama. Duré Persia ãma daꞌwapéiꞌwa norĩ nhibꞌihâꞌa norĩ hã, Média ãma daꞌwapéiꞌwa norĩ nhibꞌihâꞌa norĩ hã, duré dama iꞌrãnhoꞌõmo norĩ hã, duré dazaꞌrui waꞌõtõ na isimarĩ pese norĩ hã, te tame simisutu siré dame tihâimana zaꞌra.
4 Tawamhã apito Zersi imropâ aꞌamoi ꞌremhã, ma tô dama ipire norĩ ma tinhimarĩ iwaꞌâbâ zaꞌẽtẽ norĩ hã, duré ihâiba na marĩ iꞌmadâꞌâ ze ꞌre ihâimana zaꞌra mono hã uburé pese tãma sina hâiꞌré zaꞌra.
5 Tawamhã imropâ aꞌamo siꞌutõrĩ pari, ma tô apito hã tinhimiromhurizé ꞌri ꞌrãihâ ꞌri mana ãma robꞌre norĩ ihâimana ãma dasa isaꞌẽne hã dama ꞌmanha, Susã na ꞌri nhoꞌõmo nhisi ãma uburé ꞌre idahâimana zaꞌra mono norĩ ma, isibro pese norĩ ma, duré isibrobꞌõ norĩ ma. Tame dasa na dato isaꞌẽtẽ na hã ma tô misi romhuri hã ãma aiꞌutõ.
6 Duré ꞌri mana ãma ma tô zazahâ hâpa na dasiwi wamnarĩ ni, abazi iꞌa na ihâ ꞌmanharĩ na duré iꞌuzé na zama. Ma tô wedenhorõ isõrõ surure pré na ãma dasiwi wasisi ni, isiꞌuwazi zapodo ẽtẽ waipo prã prata na iꞌmanharĩ u hã te te tété da, duré ꞌri uparizém na ẽtẽ ꞌmanharĩ baihâire na isaꞌo u. Waptâzé hã tiꞌa zebre na iꞌmanharĩ iꞌuzé na, ẽtẽ baihâire iꞌa na, waptâzé ihâ suꞌu na isiꞌutõrĩꞌõ na zama, duré ẽne iwẽ uptabi na zama waptâzé hã. Duré ꞌri mana ãma robꞌre ãma dasimasisizé ẽtẽ waipo pré oru na iꞌmanharĩ iꞌuwa na hã, ẽtẽ waipo prã prata na zama iꞌmanharĩ hã.
7 Sô idahãsi norĩ, hâsizé ẽtẽ waipo pré oru na iꞌmanharĩ wamhã, te nasi âhu. Dasinei õ na ma tô uburé tihâimana zaꞌra. Tahawa apito tite uwa ꞌrãi waꞌu isé sima iwẽ na te te nasi dama saꞌwari zaꞌra mono da hã, ma tô tãma ꞌru zaꞌra, tite romhuriꞌwa norĩ ma hã.
8 Uburé norĩ, ma tô sima iwẽ na nasi âhu. E marĩ wa. Apito hã ma tô aré ꞌri ꞌrãihâ ãma tite romhuriꞌwa norĩ ma waihuꞌu zaꞌra, sô ihãsi norĩ ma, te te nasi tãma ꞌwasari da, te te sima iwẽ zaꞌra zéb zarina.
9 Apito sipiꞌõ Vasti na isisi hã ma tô duré imro uburé sô ihãsi norĩ mro ma, dasa isaꞌẽne hã ꞌmanha, apito nhimiromhurizé ꞌri ꞌrãihâ ãma.
10 Tawamhã 7 bâtâ ãma datoi wa dasa isaꞌẽtẽ wamhã, ma tô apito uwa ꞌrãi waꞌu isé waꞌu hã saꞌẽtẽ na nasi hâsi. Tahawa tãma hã rowẽ uptabi di. Tawamhã 7 na eunucu te te tãma ꞌre iromhuri zaꞌra mono zô dahãsi da hã ma tô dama ꞌru zaꞌra, ãne isisi norĩ zô: Meuma, Bizta, Harbona, Bidita, Abagata, Zeta, duré Carcasi.
11 Apito ma tô duré dama waihuꞌu, apito sipiꞌõ Vasti zô siꞌabaꞌré da, itẽme morĩ da, apito sipiꞌõ te, danhopre waipo ré. Apito hã ma tô sima wẽ, piꞌõ hã ꞌmadâꞌâ zei uptabi wa, dama ipire norĩ hã, duré aimawi sô idahãsi norĩ hã ãma tobꞌuzu zaꞌra da, iwẽ na.
12 Tane nherẽ, apito sipiꞌõ hã ma tô wẽꞌõ zahi, apito te te iwaihuꞌuzé hã. Tahawa apito hã ma tô sada abꞌrui pese, isimiroti zarina imro hã hâimana õ wa.
13 Apito hã marĩ mono na te te sima ꞌre rowairébé mono wana ré, ma tô aꞌâ dama iꞌrãnhoꞌõmo te, roti waihuꞌu pese ꞌwa norĩ hã, duré dahâimanazé waihuꞌu pese ꞌwa norĩ hã te te ãma ꞌre sadanharĩ zaꞌra. Taha wa, tô ta norĩ zô ma tô tihârâ zaꞌra, dama rotiꞌwa norĩ zô hã,
14 tãma iꞌumnhasi zaꞌẽtẽ zaꞌra, ãne isisi norĩ zô hã: Carsena, Seta, Adimata, Tarsi, Meresi, Marsena, duré Memucã. Ã norĩ hã 7 na ihâiba zaꞌra hã ma tô Persia ãma duré Média ãma dama ipire na dama ꞌre hâimana zaꞌra, uburé danhimiromhurizém nhipaiꞌu pire na hã. Apito ꞌrata, apito ma dama rotiꞌwa na hã ma tô duré ꞌre hâimana zaꞌra.
15 Apito ma tô sadanha ãne:
— Wa hã apito Zersi, wa tô aré ĩma romhuriꞌwa norĩ hã satõrĩ zaꞌra, apito sipiꞌõ Vasti tẽme siꞌabaꞌré da hã, te tãma iꞌruzéb ré. Tane nherẽ, te te ĩzazei õ di. Tahawa dama iꞌrãnhoꞌõmo nhimiroti ꞌre ihâimana mono zéb zarina, e niha te za ãne wamhã, tãma tiromhâiba za.
16 Tawamhã Memucã te apito ma, duré ite dama ipire norĩ ma nharĩ zaꞌra ãne:
— Apito sipiꞌõ, aima si, duré ate ipire norĩ ma si te te marĩ hã ꞌmanharĩ wasédé õ di. Uburé aibâ norĩ ꞌri waꞌõtõ mono bâ dama iꞌrãnhoꞌõmo na ꞌre ihâimana zaꞌra mono norĩ ma zama ma tô marĩ hã ꞌmanharĩ wasété.
17 Tahawa, ãne hã uburé apito nhimiꞌmadâꞌâzéb ꞌremhã piꞌõ norĩ hã te te waihuꞌu zaꞌra wamhã, te za isarina timro hã te te sima ꞌre hâiba wazéb õ zaꞌra. Te za te te sima ꞌre nharĩ zaꞌra ãne: “Apito Zersi hã ma tô aré sô daꞌmazatõ, sô daꞌmaimorĩ da, apito sipiꞌõ Vastihi zô hã. Tane nherẽ, itẽme morĩ õ di.”
18 Tô ã bâtâ na te za piꞌõ norĩ hã Persia ãma duré Média ãma dama ipire mro norĩ hã waihuꞌu zaꞌra, apito sipiꞌõ Vasti te te iꞌmanharĩ wasété zé hã. Ta hã te za duré timro ma hã wasuꞌu zaꞌra. Tawamhã daro mono bâ piꞌõ norĩ hã timro te te oto ꞌre wazéb zaꞌra mono õ wamhã, te za duré imro siꞌaibâ norĩ hã sada ꞌre sahi zaꞌra.
19 Tahawa, apito, asima wẽ wamhã, te za asisi hã ãma isã, marĩ na rotizéb u hã, apito sipiꞌõ Vasti hã niwamhã asõꞌre u sihâiꞌré tõ da hã oto. Tahawa te za duré dama iꞌru Persia ãma, duré Média ãma itepãi wasisi ꞌre, ãhã roti na da te ãma robꞌuiꞌéré da hã, niwamhã da te pari waihuꞌu tõ da. Taha parimhã Vasti hã te za iwaze za, taha nhipai u piꞌõ iwẽ uptabi hã asima sẽrẽ da, isõwaꞌreꞌremhã.
20 Tawamhã apito, asimiroti zahi waihuꞌu na uburé pese daro mono bâ da te oto ãma robꞌmahârâ zaꞌra wamhã, te za uburé piꞌõ norĩ timro hã te te ꞌre wazéb zaꞌra, isibro pese norĩ hã, duré isibrobꞌõ norĩ zama.
21 Tawamhã apito, ite dama ipire norĩ me ma tô Memucã tinhimirosaꞌrada te te imezé hã siwi wẽsã.
22 Taha zarina, ma tô apito tinhimirobꞌuiꞌéré hã, dazaꞌrui waꞌõtõ mono na ꞌre idahâimana zaꞌra mono norĩ ma hã me zaꞌra, romnhihâtâ na damreme mono bâ ãma irobꞌuiꞌéré na hã. Taha na, ma tô uburé damro siꞌaibâ norĩ ma ꞌru zaꞌra, tinhorõwa zaꞌra mono bâ, te te ꞌre robꞌru zaꞌra mono da hã.
