Esté 2:1-23
2 Oto ãma ronomro wamhã, apito nhitiꞌruzé hã ma tô tiwi aiꞌutõ. Tane nherẽ, te õne uꞌâ zahadu nasi ãma rosaꞌrata, Vasti te te tãma iꞌmanharĩ wasétézém na, duré tinhimiroti pire na ãma isisihâtâ na piꞌõ zada ihâimanazém na hã.
2 Tawamhã nima norĩ tãma romhuriꞌwa hã ma tô ãne tãma nharĩ zaꞌra:
— Apito, maꞌãpé sô daꞌmazatõrĩ zaꞌra na, piꞌõi ubuni wẽ uptabi na asimiꞌmadâꞌâ na ꞌre ihâimana zaꞌra mono norĩ zô, sô rĩtĩ zaꞌra da.
3 Maꞌãpé duré uburé dazaꞌrui waꞌõtõ mono na niꞌwam norĩ hã romhuriꞌwa da, pisutu zaꞌra na, duré tãma waihuꞌu zaꞌra na, tô õ norĩ piꞌõ iprédupté iwẽ uptabi hã we te te simroi mono da ãwa, Susã ꞌri nhoꞌu dama isaꞌẽtẽ u. Tawamhã Hegai eunucu hã uburé apito mro norĩ ꞌmadâꞌâꞌwa hã te za isõwaꞌreꞌreb zara robꞌmadâꞌâ zaꞌra, piꞌõ norĩ te te iwaibui wẽ zaꞌra da hã, ꞌmadâꞌâ wẽ da, te te nasi ihâiba ꞌmaꞌwamarĩ wẽ zaꞌra da hã.
4 Apito, piꞌõ iprédupté danhipai u te te aima irowẽ hã te za siꞌapito za, Vastihi nhowaꞌreꞌremhã.
Tawamhã apito ma tô wẽsã, tinhimirosaꞌrada te te tãma ipibu zaꞌra zé hã.
5 Susã ãma hã te Zudeu ꞌre hâimana, Mordecai na isisi hã. Ta hã Jaꞌihi ꞌra, Simehe nhihudu, duré Quisihi nhihudu, Bẽzamihĩ hawi aꞌuwẽ.
6 Babilonia te, apito Nabucodonozo, Zeruzalẽ hawi Zudaha nhihudu norĩ te apito Zoaquĩ, te te saprõni wamhã, ma tô Mordecai hã Zoaquĩ norĩ, da te isimroi mono ꞌremhã dame tihâiba.
7 Mordecai, te tihidiba Hadasa na isisi hã siré saprõ, Esté na isisi amo hã. Ta hã piꞌõ iꞌubu ꞌmadâꞌâ ze, duré ihâiba ꞌmadâꞌâ zei uptabi. Imama norĩ ina me tiwi idâꞌâ zahuré. Tahawa, baꞌõtõre ré, Mordecai te te âri wa, ma tô tiꞌra ne prédu.
8 Tawamhã apito, tãma iromhuriꞌwa norĩ ma, te te oto tãma ꞌru zaꞌra wa, isimiroti pire na te te dama ãma robꞌmahârâ zaꞌra da hã, ma tô azarutu norĩ ahâ na da te simro, Susã na dahu nhoꞌõmo nhisi u, Hegai na isisi ma, te te hâiba nhomri zaꞌra da, te te ꞌmadâꞌâ zaꞌra da hã. Tamemhã, dawazari misi azarudu iwẽ uptabi, Esté na isisi hã te tihâiba.
9 Tawamhã Hegai ma tô wẽsã, Esté hã. Tahawa õhõ si ma tô ꞌmadâꞌâ wẽ, uburé piꞌõ norĩ nhipai u. Ma tô awaꞌawi ãma sãnaꞌrata, te te ihâiba ꞌmaꞌwamarĩ wẽ na hã, duré dasa iwẽ aimawi te te nasi tãma isõmri na hã. Romhuriꞌwa norĩ iwẽ hã ma tô duré 7 na te te siwi iꞌmadâꞌâ da hã sani zaꞌra, apito nhimiromhurizé ꞌri ꞌrãihâ hawimhã. Tawamhã Esté duré romhuriꞌwa norĩ hã ma tô Hegai hã oto sõré, ꞌriꞌre waꞌwa iwẽ uptabi ꞌre, apito te, piꞌõ norĩ nhimiwaptâ u.
10 Tawamhã Esté, Mordecai te te tãma iꞌruzéb zarina, ma tô ꞌmanha. Tahawa, niꞌwai ma hã siwasuꞌu õ di, tite aꞌuwẽ wamri na hã, duré nimahã siwapru na hã.
11 Bâtâ mono na hã Mordecai, apito te, piꞌõ norĩ nhimiwaptâ zahâpâ nhoꞌre waꞌwaibaba te nasi ne, niha Esté hã hâimana zô, duré niha za marĩ tãma ihâimanazéb da hã te te waihuꞌu da.
12 Azarutu norĩ, iwẽ na da te hâiba ꞌmaꞌwamarĩ zaꞌra mono ré hã ma tô ãma tiwahub zaꞌra, misi. Imropâ aꞌamoi ꞌremhã ma tô nasi dasiwi hâiba uꞌré zaꞌra ni, mirra na wedewaꞌu tom nhisi isadaze pire na. Duré wahu aiwa ãma isipoꞌo hawimhã imropâ aꞌamoi ꞌremhã te iwaꞌu to zadaze ihâiba amo norĩ na nasi hâiba uꞌré zaꞌra ni. Tawamhã nasi da te ãma ihâiba uꞌré zaꞌra zé hã oto siꞌutõrĩ wamhã, azarudu hã misi si te nasi da te oto simro, apito Zersihi u.
13 Tawamhã azarutu norĩ hã apito mro norĩ ꞌre ihâimana zaꞌra mono zém hawi, apito nhorõwa ꞌri ꞌrãihâ u sidâpâsi sisãnaꞌre nasi siꞌabaꞌréi wamhã, ma tô tite marĩ te te sima iwẽ zaꞌra mono si nasi siré ꞌwasa.
14 Tawamhã te piꞌõ norĩ hã sidâpâsi misi si nasi asisi, apito nhimiromhurizé ꞌri ꞌrãihâ u hã. Duré awẽm na te nasi aiꞌabaꞌré, apito mro norĩ ꞌre ihâimana zaꞌra mono zé hâiba amoi u. Tame ma tô Saagasihi ma hâiba nhomri zaꞌra, te te ꞌre ꞌmadâꞌâ zaꞌra mono da hã. Ta hã eunucu hã, apito mro norĩ ꞌmadâꞌâꞌwa. Tawamhã, piꞌõ norĩ hã apâ te te sina siri zaꞌra õ di, apito te te isõpẽtẽ zaꞌra da hã, te te wẽsãmri zaꞌra wapsi, sô iꞌmaihârâ da si, isisi na.
15 Tawamhã Abiaiuhu ꞌra Mordecaihi hidiba Estéhé zô dahârâzé ma tô oto iwa waptãrã. Ta hã azarudu, Mordecai te te iprédu, uburé te te siwi iwaihuꞌu zaꞌra norĩ, te te siwi iwẽsãmri zaꞌra. Tawamhã apito te te sõpẽtẽ da, oto wisi wamhã, ma tô Hegai eunucu, apito mro norĩ ꞌmadâꞌâꞌwa te te tãma ipisutu si siré tidu.
16 Tawamhã Esté, apito Zersi tẽme isõꞌre da te tãma hâiba hâiꞌré da, ma tô dasiwi saprõni ni isimiromhurizé ꞌri u, tebeti na aꞌamo 10 na isiꞌutõrĩ nhisi ãma, 7 na apito isiꞌiꞌrãnhoꞌõmozém na ãma iwahubzéb ãma.
17 Tawamhã ta hã, apito ma wẽ uptabi di, isiré azarutu norĩ nhipai u. Te te iwẽsãmrizém na ma tô Esté hã ãma aiꞌuté. Ãma itobꞌuzuzém na hã ma tô duré ãma aiꞌuté, isiré azarutu norĩ te te iꞌmanharĩ waihuꞌu zaꞌra õ na. Tahawa ma tô apito hã danhoprezém na oto sõpre, siꞌiꞌrãnhoꞌõmo da, Vasti nhoꞌwaꞌreꞌre.
18 Taha pari ma tô dasa isaꞌẽne hã ꞌmanha, Esté te te iwazéb zarina. Ma tô uburé dama ipire norĩ hã, duré uburé romhuriꞌwa norĩ hã waptẽrẽ zaꞌra. Ma tô duré roti hã ꞌmanha, tô taha bâtâ na bâdâ iꞌuiꞌéré pré hâimana da, uburé dazaꞌrui waꞌõtõ mono na dama iꞌrãnhoꞌõmo norĩ ma hã. Tawamhã ma tô tinhibzari hã te te dama sõmri, apito si ãma ꞌre isõpru mono zé hã.
Mordecai, apito te te isõꞌreptuzé wasuꞌu
19 Azarutu norĩ hã, apito mro norĩ ꞌre ihâimana zaꞌra mono zé hâiba amoi u da te simroi mono ré, ma tô Mordecai apito hã pisutu, dama iꞌrãnhoꞌõmo na te te tãma ꞌre romhuri mono da.
20 Esté hã Mordecai te te iꞌuwatizéb zarina, niꞌwai ma hã siwasuꞌu õ di, Zudeu norĩ nho hidiba na, õ hã. Tahawa ma tô Mordecai timreme te te tãma iꞌmanharĩzéb zarina tihâimana na hã ãma uzusi, baꞌõtõ ré imreme wapari pese ꞌwa na ꞌre ihâimana mono ne, te te prédu wamhã, õ hã.
21 Mordecai tô taha bâtâ mono na apito nhimiromhurizé ꞌri ꞌrãihâ ãma tinhimiromhuri te te ꞌmanharĩ siwaprã, maparane eunucu norĩ Bigtã na isisi, Teresi na isisi me, apito nhimiromhurizé ꞌri ꞌrãihâ te te ꞌre iꞌmadâꞌâ zahuré mono, apito zada isahi zahuré zé hã, duré te te sima irowaꞌõtõ zahuré zé hã te te iwĩrĩ zahuré da hã, ma tô waihuꞌu.
22 Tawamhã Mordecai, Esté apito sipiꞌõi ma, ãne hã te te iwasuꞌu, ma tô apito ma hã wasuꞌu, Mordecai marĩ te te iꞌupsibi me hã.
23 Tawamhã sena zô da te aba mono wamhã, ma tô dasiwi upsibi me ni sena hã. Tahawa ma tô eunucu norĩ hã dasiwi butu wazi zahuré ni. Tawamhã apito ma tô dama waihuꞌu, uburé ãne na rowasuꞌu na da te ãma robꞌuiꞌéré da, apito nhoꞌa, ibaihâ ꞌremhã tiꞌai waꞌõtõ nhoꞌõmo ꞌre uburé marĩ ꞌre ipusi mono zém na.
