Esté 3:1-15
3 Ãne pari, apito Zersi ma tô aibâ Hama na isisi hã tisẽ, imorĩꞌrata na dama ipire nhimiromhurizém na ꞌre hâimana mono da. Hama hã, Hamedataha ꞌra, Agaguihi nhihudu.
2 Tawamhã apito, ma tô waihuꞌu, uburé isimiromhurizé ꞌri ꞌrãihâ ꞌre romhuriꞌwa norĩ hã, Hamahã ma, isõꞌremhã tãma ꞌre siwẽꞌẽ zaꞌra mono da, duré hiꞌrãtitõ tãma ꞌre siꞌubumroi mono da, te te siwi ꞌre iwazé pese mono zéb zarina. Tahawa uburé tãma romhuriꞌwa norĩ hã ma tô ãne na ãma sãnaꞌrata zaꞌra. Tane nherẽ, Mordecaihi si nasi tãma siwẽꞌẽi õ di. Duré hiꞌrãtitõ nasi dame tãma simasisi õ di.
3 Tahawa te apito ma romhuriꞌwa hâiba amo norĩ hã siwi sadanha Mordecai hã, marĩ wa, apito te te iwaihuꞌuzé hã te te nasi dame iꞌmanharĩ õ na.
4 Tahawa bâtâ bâre te nasi tãma ꞌru zahi uꞌâsi zaꞌra, apito te te iwaihuꞌuzé te te wapari da. Tane nherẽ, te te wapari zaꞌra õ di, nasi te te tãma iꞌru zaꞌra zé hã. Tawamhã te nasi tãma siwasuꞌu zaꞌra, zudeu wa, apito te te iwaihuꞌuzé hã te te iwapari õ na hã. Tahawa, ma tô aiꞌabaꞌré Hamahã ma, ãne hã te te tãma wasuꞌu zaꞌra da, Mordecai, apito nhimiroti zahi te te iwapari õ zém na te te ãma uzusi uꞌâsi mono zô, te te ꞌmadâꞌâ zaꞌra da.
5 Tawamhã Hama hã, Mordecai, iwazéb sina tãma isiwẽꞌẽi õ na, te te ꞌmadâꞌâ uꞌâsi wa, ma tô nasi sada tizahi.
6 Tawamhã Mordecai hã zudeu na te te tãma wasuꞌu zaꞌra wamhã, ma tô waihuꞌu, õhõ si siwaprosi te te wĩrĩ tõ da. Uburé zudeu norĩ te te uprosi da, ma tô rowaꞌõno hã sima ꞌmanha, Zersi dama iꞌrãnhoꞌõmo na hâimana ré.
7 Tawamhã Zersi dama iꞌrãnhoꞌõmo na ꞌre hâimana mono ré 12 na ãma iwahum ãma, nisã na aꞌamo isãnaꞌrata nhisi ãma, ma tô Hama hã ꞌru zahi, datoire da te isãmra da hã (isisi hã “purĩ na”), te te ãma rowairébé da, bâtâ na hã, duré aꞌamo na hã, zudeu norĩ za da te isimrozéb da hã. Tawamhã datoire da te sãmra wamhã, bâdâ hã dia 13 na ma tô wasuꞌu zahi, aꞌamo zaꞌratazé 12 na ihâimana ãma, ada na aꞌamo nhisi ãma.
8 Tawamhã Hama hã apito u morĩ wamhã, ma tô ãne tãma tinha:
— Uburé asimiꞌmadâꞌâzéb ꞌre, daro waꞌõtõ mono na te aꞌuwẽ aimawi hã ꞌre hâimana zaꞌra, aiwab õ na roti ꞌre ihâimana mono na. Apito, ã hã iwasété uptabi. Asimiroti hã te te ꞌre wapari zaꞌra mono õ di. Tahawa, a hã ãma iꞌaiwaꞌa suꞌu zaꞌra õ na hã aihâimana tõ, ãne na te te ãma ꞌre uzusi zaꞌra mono nherẽ.
9 Tahawa a hã asima wẽ wamhã, maꞌãpé ãma asisihâtâ asimiroti na ãma irowaihuꞌu mono zém na hã, da te simro da, ta norĩ hã. Tawamhã wa za aima ropisutu, dama iꞌrãnhoꞌõmo te cofri ꞌre za te isẽrẽzém na hã 342 miu na ẽtẽ waipo prã prata ipire pibuzém na dama iꞌrãnhoꞌõmo nhimirowaꞌâbâzéb da hã.
10 Tawamhã apito tite danhiptõmohi tétézé tinhimiroti zahi te te ãma ꞌre itobꞌratato mono zé hã ma tô waze. Taha pari ma tô Hama, Hamedataha ꞌra, Agaguihi nhihudu, zudeu ꞌruiꞌwai ma hã tisõ.
11 Tawamhã apito te duré ãne tãma tinha:
— Tô aima hâimana ate robꞌuiprazé hã. Ã norĩ aꞌuwẽ, wa za asibꞌrata aima sõmri zaꞌra, marĩ hã asima iwẽzéb zarina ãma ꞌmanharĩ zaꞌra da.
12 Tawamhã Hama dia 13 aꞌamo isãnaꞌrata te na apito nhimiromhurizé ꞌri ꞌrãihâ ꞌre romhuriꞌwa norĩ zô ma tô hâ. Ma tô tãma waihuꞌu zaꞌra, uburé apito nhimiꞌmadâꞌâzéb ꞌre, ꞌre imreme zusizé mono bâ ãma isaprĩ na te te ãma robꞌuiꞌéré zaꞌra da, dazaꞌrui waꞌõtõ mono na aꞌuwẽ ꞌre imreme zusi mono norĩ, taha zarina ãma ꞌre nomro mono da. Tawamhã uburé danhibꞌihâꞌa na dama ꞌre ihâimana zaꞌra mono norĩ ma, duré dama iꞌrãnhoꞌõmo na ꞌre ihâimana zaꞌra mono norĩ ma, duré uburé aꞌuwẽ mono bâ danhibꞌapito na dama ꞌre ihâimana zaꞌra mono norĩ ma, te za tãma sõmri zaꞌra ni za ãhã romnhihâdâ hã. Tawamhã apito tinhisi te te ãma isãrĩ hã, duré tinhiptõmohi tétézém na te te itobꞌrata to hã,
13 ma tô dama romreme ꞌwapéiꞌwa norĩ hã siwi tiꞌâ, uburé dazaꞌrui waꞌõtõ mono na dama iꞌrãnhoꞌõmo norĩ ma. Rowaihuꞌuzé uburé zudeu norĩ, da te isimro na misi bâtâ na hã, aꞌamo isãnaꞌrata te dia 13 ãma, ada na aꞌamo nhisi ãma. Uburé zudeu norĩ siꞌutõrĩ da, ãma dapẽꞌẽzé zaꞌra ãna, ipréduptém norĩ na, ihi norĩ na, piꞌõ norĩ na, duré aiꞌuté norĩ na. Tawamhã duré zudeu norĩ nhimarĩ hã, za dama iꞌrãnhoꞌõmo norĩ ma ihâimana zaꞌra na rowaihu hã ma tô tãma me zaꞌra ni.
14 Tawamhã rowaihuꞌuzé hã dazaꞌrui waꞌõtõ mono na te za dasiwaꞌwamhã dasiwi sõré ni za, bâtâ pisutu zahi iwisizém na danhimizaꞌrese dahâimana zaꞌra da hã.
15 Tawamhã apito ma tô tãma ꞌru zahi zaꞌra, dama romreme ꞌwapéiꞌwa norĩ saꞌẽtẽ siꞌabaꞌré da, uburé dazaꞌrui waꞌõtõ mono u. Tawamhã, Susã dahu nhoꞌõmo ãma hã ma tô dasiwaꞌwa roti hã dasiwi sõré ni. Tawamhã apito norĩ, Hamahã me ma tô aimasisi zahuré, marĩ te te hâsi da hã, taha ꞌri nhoꞌõmo ꞌre roꞌwaꞌrudu te te iropéi mono siwaprã.
