Esté 4:1-17
4 Mordecai ãne hã te te waihuꞌu wamhã, ma tô tiꞌuza hã hâiwazu, robzei õ zé te. Ma tô duré siꞌuza daꞌuza ihâiro na. Tiꞌrã nhisiwi ma duré ꞌruꞌa hã sima ahi. Taha pari ma tô duré ꞌre mo, ꞌri nhoꞌõmo te, ꞌri nhiꞌriti na, siwaꞌõ mono sina, duré sadari sina.
2 Tawamhã apito nhimiromhurizé ꞌri ꞌrãihâ u ꞌridawa zaꞌẽtẽ na ꞌre idanhisisi mono zéb u wisi wamhã, sébré õ di. E marĩ wa. Õne na niꞌwa hã siꞌuza wamhã, sébré waihuꞌu õ wa.
3 Tawamhã apito te te iwaihuꞌuzé uburé dazaꞌrui waꞌõno ihâimana zaꞌra na hã, duré uburé daro mono bâ da te isõré zaꞌra ãma ma tô Zudeu norĩ hã wawa ꞌrãihâ na tiꞌruꞌru. Tisiwaꞌõ na ma tô robzépata zaꞌra. Saihuri ãna te duré tihâimana zaꞌra. Ma tô duré daꞌuza hâiro na siꞌuza zaꞌra. ꞌRuꞌa nhisiwi ma tô duré hâiba mono bâ simiꞌwara.
4 Esté hã saꞌẽtẽ na te robzépata, ite romhuriꞌwa norĩ duré ite eunucu norĩ hã te te ãne tãma rowasuꞌu zaꞌra wa, iromhâimanazém na hã. Tahawa Mordecaihi ma, ma tô daꞌuza hã ꞌmaime, ãma siꞌuza da. Tane nherẽ, te te sima wẽ õ di, te te sima isẽrẽ da hã.
5 Tahawa Esté hã, Hataqui eunucu apito nhimiromhurizé ꞌri ꞌrãihâ ãma ꞌre ihâimana mono, te te ꞌre ꞌmadâꞌâ mono da, da te ipisutu zô, ma tô hâ. Tawamhã ma tô tãma tiꞌru, Mordecaihi tẽme morĩ da, te te sadanharĩ da, iromhâimanazém na duré marĩ te te tiwi iroꞌwaꞌrutuzé hã te te waihuꞌu da.
6 Tawamhã Hataqui hã ma tô mo, Mordecaihi zô rĩtĩ mono da, apito nhimiromhurizé ꞌri ꞌrãihâ nhoꞌre ꞌre idasisõpẽtẽ pese zaꞌra mono zéb u.
7 Tame ma tô Mordecai hã tãma rowasuꞌu pese, marĩ tãma ihâimanazém na. Hama hã uburé Zudeu norĩ uprosizé waꞌâ hã apito te cofri ꞌre, za te te tãma isẽrẽ na te te tãma iropisutuzém na ma tô duré tãma rowasuꞌu.
8 Tawamhã Mordecai, Hataquihi ma, ma tô tisõ, uburé ꞌrinhoꞌu Susã ãma apito nhimiroti na robꞌuiꞌéré, da te isõrézé warõ hã, Zudeu norĩ za da te isimrozém na robꞌuiꞌéré hã. Tawamhã Mordecai hã Hataquihi wi, ma tô waptẽ, Estéhé ma iwarõ hã te te âri da, uburé te te ãma tãma irowasuꞌu da hã, duré apito u imorĩzé te te duré tiwi waptẽrẽ da, te te tãma nharĩ da, ite aꞌuwẽ ãma isiwamrizéb zarina te te tãma ꞌru zaꞌra da.
9 Tawamhã Hataqui hã, Mordecai te te tiwi iwaptẽrẽzé hã ma tô ꞌmanha.
10 Ma tô duré Esté hã Hataquihi ma tiꞌru, ãne te te ãma isadaꞌâbâzém na te te tãma rowasuꞌu da, Mordecaihi ma:
11 “Uburé dama hã waihuꞌu pese di, apito nhimiromhurizé ꞌri ꞌrãihâ ꞌre romhuriꞌwa norĩ ma hã, duré uburé aꞌuwẽ ꞌri waꞌõtõ mono bâ ꞌre ihâimana zaꞌra mono norĩ ma hã, niwamhã aibâ, duré niha wamhã piꞌõ, ꞌripara u apito tẽme isébré waihuꞌu õ na hã, marĩ na te te tãma irobzanhamri da hã, ãne da, sô dahârâ õ nherẽ. Ãhã na apito nhimiroti hã ãne: Niꞌwa hã apito te te tãma rowairébé õ nherẽ, sébré wamhã, te za dârâ za. Apito hã ẽtẽ waipo oru ꞌmanharĩ na tisiwazusizé, hâimo te te tãma wẽ wapsi, te za pibui pese na itẽme taꞌmazébré ni. Wa hã misi aꞌamo apito ĩzô ihârâ ãna hã ma tô oto ĩꞌãma aiꞌutõ.”
12 Tawamhã Estéhé hawi romreme iwi te te waihuꞌu wamhã,
13 ma tô ãne Mordecai romreme na hã ãma tãma siri asa Estéhé ma: “Asiꞌãma rosaꞌrata tõ, apito nhimiromhurizé ꞌri ꞌrãihâ ꞌre, ꞌre aihâimana mono wẽ te, aiwétési atâꞌâ ãna aiwatobro da newa, uburé Zudeu norĩ ꞌre, ꞌre aihâimana mono nherẽ.
14 Ãhã na awaꞌawi na ariꞌiwi aihâimana wamhã, te za Zudeu norĩ pawaptobzé duré isõꞌreptu zaꞌra zé nima hawi tãma tihâimana zaꞌra. Õ norĩ ma si, te za tô isõꞌreptu zaꞌra zé hã tãma tihâimana zaꞌra. Tane nherẽ, a hã aimama hawi aꞌuwẽ norĩ me, te za aiꞌutõrĩ ꞌwa za. Tane nherẽ, ãté niha te za aimawi tiromhâiba. Ãté a hã ma tô apito sipiꞌõ na ꞌre iꞌaihâimana mono da, aipisutu ni, ãne na iromhâimanazém na dapawaptob da hã.”
15 Tawamhã Esté ma tô Mordecaihi ma, ãne te te ãma tãma iwaꞌrãmizé hã tisõ:
16 “Maꞌãpé aimorĩ, uburé Zudeu norĩ hã ꞌrãꞌõtõ da, Susã ãma ihâimana zaꞌra norĩ hã. Tawamhã te za aꞌâ asaihuri aba ãna ĩꞌãma irowaptẽrẽ zaꞌra waꞌwa za. Siꞌubdatõ bâtâ na duré mara siꞌubdatõ na te za asaihuri aba ãna duré âhuri aba ãna aihâimana zaꞌra waꞌwa. Tawamhã wa hã ĩma romhuriꞌwa norĩ me, wa za duré wasai ãna wahâimana zaꞌra ni za. Taha parip si, wa za mo za apito ma, te inharĩ da hã, tô apito nhimirotizé waꞌrãmim nherẽ. Duré ãne zarina tô ĩdâꞌâ da wamhã, wa za tô dârâ za. Tihai õre di.”
17 Tawamhã Mordecai hã morĩ wamhã, ma tô Esté te te tãma iꞌruzé hã uburé ꞌmanha.
