Esté 5:1-14
5 Siꞌubdatõ bâtâ na marĩ te te huri ãna ihâimana ãma, ma tô Esté hã tite apito sipiꞌõ uza na siꞌuza. Taha pari ma tô mo, apito nhimiromhurizé ꞌri ꞌrãihâ zahâpâ u. Tame te oto simipari sina nhamra, apito te, ꞌri ꞌre waꞌwa iwẽ uptabi nhoꞌre. Tame te apito ꞌri para nhamra, tisimasisizém na ꞌri zahâpâ ꞌridawa nhoꞌre.
2 Tawamhã apito, piꞌõ dama iꞌrãnhoꞌu Esté ꞌri zahâpâ simipari sina ihâimana na te te ꞌmadâꞌâ wamhã, te te wẽsãmri wa, ma tô ẽtẽ waipo pré oru na tisiwazusizé hã tãma wẽ. Tahawa ma tô Esté hã oto ãzé. Duré ꞌrâwi itẽme wisi wa, ma tô isiwazusizé ꞌrãsudu hã upi.
3 Apito, ma tô sadanha ãne:
— E marĩ ma tô tihâiba, dama iꞌrãnhoꞌu Esté. E marĩ te za duré iwaptẽ. Maꞌãpé marĩ asima iwẽzé hã waptẽrẽ. Wa hã wa za aima tisõ za, ĩte iꞌrãnhoꞌõmo na ꞌre ĩhâimana mono zé aiwa ãma isipoꞌo da, ĩwi waptẽrẽ nherẽ.
4 Tawamhã Esté ma te ãma sadaꞌâ ãne:
— Tô aima wẽ wamhã, ĩma wẽ di za, te iꞌaiwaptẽrẽ aba da hã, Hamahã me, dasa isaꞌẽne ã bâtâ na te aima iꞌmanharĩ u ãma aimasisi aba da.
5 Apito, ma te tãma waihuꞌu ãne asa:
— Maꞌãpé Hamahã ma nharĩ zaꞌra waꞌaba, saꞌẽtẽ waptu na we ĩtẽme morĩ da, Esté te te iwawaptẽrẽzé hã wa te wasima wẽ da.
Ãne ma tô apito norĩ hã Hamahã me, Esté dasa isaꞌẽne te te iꞌmanharĩ u hã oto tineb zahuré.
6 Tawamhã uwa ꞌrãi waꞌu isé te te oto nasi âhuri ré, ma tô apito hã Esté sadanha ãne:
— E marĩ te za iwaptẽ. Maꞌãpé asima iwẽzéb zarina, tô marĩ hã waptẽrẽ. Wa za aima tisõ za, tô ĩte iꞌrãnhoꞌõmo na ĩhâimanazé aiwa ãma isipoꞌo da, ĩwi waptẽrẽ nherẽ.
7 Esté ma te asa ãma sadaꞌâ ãne:
— Ãne wa za tô aiwi waptẽ:
8 Apito aima ĩwẽ wamhã, duré ĩnhimirowaptẽrẽzé âri wẽ wamhã, ĩma wẽ uptabi di za Hamahã me te iꞌaiwaptẽrẽ aba da hã, awẽ dasa isaꞌẽne ihâiba amo aima waꞌaba si, te oto iꞌmanharĩ da hã. Tawap si, wa za aima nharĩ ꞌwa za, te ĩsima iwẽzém na hã.
Hama hã te te sima irowaꞌõtõzé, Mordecaihi zada za ihâimanazém na
9 Tawamhã Hamahã ma, rowẽ sina duré to sina, ma tô dasa isaꞌẽtẽ hawi watobro. Tane nherẽ, apito nhimiromhurizé ꞌri ꞌrãihâ u ꞌre idanhisisi mono zéb u ꞌrâwi oto wisi wamhã, ma tô tame Mordecai hã sõpẽtẽ. Tawamhã ma tô sada tizahi pese, isõꞌremhã tãma siwẽꞌẽi õ wa, duré aimawi na wazéb sina te te tãma ꞌmanharĩ õ wa.
10 Tane nherẽ, ꞌrâwi ma tô siwi ꞌmaꞌrã. Tahawa ma tô apâ tinhorõwa u mo. Taha pari ma tô tisiwaihuꞌu norĩ zô hâ. Ma tô duré timro Zere zama hã waptẽ, taha zama itẽme morĩ da hã.
11 Hama hã tinhibro pese na, duré iꞌra norĩ ahâ na tãma ihâimana zaꞌra na, duré apito uburé tãma iromhuriꞌwa norĩ nhipai u pire na ꞌre hâimana mono da, te te ipisutu na hã ma tô timreme na oto sãnaꞌrata.
12 Timreme na ma tô ãma uzusi ãne:
— Tane nherẽ, ãhã si õ di. Ĩsiwaprosi apito sipiꞌõ Esté hã ma tô ĩwaptẽ, apito siré dasa isaꞌẽne te te tãma iꞌmanharĩ u isiré ĩmorĩ da. Tawamhã dasa isaꞌẽne te te iꞌmanharĩ hâiba amoi u awẽmhã ĩmorĩ da, ma tô duré ĩwaptẽ.
13 Tane nherẽ, uburé ã norĩ hã tarére ĩma hã, zahadu zudeu Mordecai apito nhimiromhurizé ꞌri ꞌrãihâ u ꞌre idanhisisi mono ꞌridawa ꞌrata ꞌre isimasisi mono, te ꞌre iꞌmadâꞌâ mono ré hã.
14 Tawamhã imro, duré uburé isiwaihuꞌu norĩ, ma tô tinhimirosaꞌrada hã ãne tãma me pibu zaꞌra:
— Maꞌãpé isõꞌretizéb da hã 20 metru hâimo ipibuzém na, da te dasiwi ꞌmanharĩ da, dama ꞌru na. Tawamhã awẽm na mararé te za apito wi iwaptẽ, Mordecai, da te dasiwi isõꞌretizéb da hã. Tawamhã a hã ato sina te za apito siré dasa isaꞌẽne ihâimana u hã aimo.
Tawamhã isimirowaꞌõtõ zaꞌra Hama hã ma tô wẽsã. Tahawa, ma tô da te dasiwi isõꞌretizéb da hã dama tiꞌru, da te dasiwi ꞌmanharĩ da.
