Esté 6:1-14
6 Tô taha mara na hã apito hã, aptâ te te azâri waihuꞌu õ di. Tahawa ma tô dama tiꞌru, itepãiwasi hã apito nhimiꞌmadâꞌâzéb ꞌre, uburé ꞌre iromhâimana mono zém na da te ãma ꞌre irobꞌuiꞌéré zaꞌra mono zé hã, da te tãma âri da. Tawamhã tãma iromhuriꞌwa norĩ ma, ma tô ꞌru zaꞌra, te te tãma ꞌmanhoré da.
2 Tawamhã robꞌuiꞌéré te te siwi sõré wamhã, ma tô Mordecai, apito za da te iwĩrĩzém na rosaꞌrada te te iꞌupsibimezé hã siwi wasuꞌu, Bigtã norĩ, Teresihi me, maparane eunucu norĩ apito nhimiromhurizé te te ꞌre iꞌmadâꞌâ zahuré mono te te sima irowaꞌõtõ zahuré zé hã.
3 Tawamhã apito te ãma sadanharĩ zaꞌra ãne:
— E marĩ, te te ãne iꞌmanharĩ zarina, wa tô Mordecaihi ãma iwawata zaꞌra zé hã wasiwi ꞌmanharĩ ni. Duré e marĩ, wa te tãma sõmri zaꞌra õ di, ipawaꞌâbâzé hã.
— Marĩ hã wa te tô tãma ꞌmanharĩ zaꞌra õ di, isimiꞌmanharĩzé waꞌrãmimhã! — Ãne ma tô tãma iromhuriꞌwa norĩ hã ãma tãma waꞌrãmi zaꞌra.
4 Taha ré, Hama ma tô apito nhimiwaptâ ihâimana zaꞌra zababa ꞌri zahâpâ u ãzé, Mordecai, da te dasiwi isõꞌretizé te te tiwi waptẽrẽ da, duré isõꞌretizéb da, da te sada ꞌmanharĩ da, te te aré iꞌruzéb zarina. Tawamhã apito te anha ãne:
— E ꞌwa hã te ꞌri zahâpâ ãma tihâiba.
5 Apito ma romhuriꞌwa norĩ, ma ãne ãma sadaꞌâbâ zaꞌra:
— Hama te ꞌri zahâpâ ãma tihâiba.
— Maꞌãpé tãma nharĩ zaꞌra waꞌaba, we sébré da. — Ãne te apito tãma nharĩ zaꞌra.
6 Hama hã oto sébré wamhã, ma tô apito ãne tãma tinha:
— Wa ĩsima wẽ, aibâ te ipisutu ãma ĩwatazé, te iꞌmanharĩ da hã. Maꞌãpé, ãma ĩma nharĩ, za marĩ te tãma iꞌmanharĩzéb da na.
Tawamhã Hama, ãne ma tô rosaꞌrata: “E ꞌwa aibâ, apito, ãma iwata da, te te sima iwẽ zahi hã. Tô wa hã!”
7 Hama te apito ma ãne tinha:
8 — Maꞌãpé apito uza tô aiꞌuza norĩ hã we da te dasiwi âri da hã, dama ꞌru na, duré awaru, ãma ꞌre iꞌane mono hã. Apito nhoprezém na awaru da te ãma sõpre da, maꞌãpé duré dama ꞌru na.
9 Taha pari aiꞌuza norĩ hã, awaru me, nimahã aima romhuriꞌwa dama ipire uptabi ma sõmri zaꞌra na. Tawamhã te za tãma iwaihu, ta hã aibâ ma, aiꞌuza hã te te sẽrẽ da, ãma aiwata da, asima iwẽ ma. Taha parimhã te za awaru hã oto iré saprõ, ꞌri nhoꞌõmo te, ꞌre idasisõpẽtẽ pese zaꞌra mono zéb u. Tawamhã te za duré ãne aimreme ꞌrãihâ na dama iꞌmahârâ mo za: “Ãhãta ãne ma tô apito hã ꞌmanha, aibâ ãma iwata da, te te sima iwẽ ma hã.”
10 Apito te Hamahã ma tinha ãne:
— Maꞌãpé saꞌẽtẽ aimorĩ. Duré ĩꞌuza norĩ hã awaru me mrami, Zudeu Mordecaihi ma, uburé ãma inharĩ mono zéb zarina tãma ꞌmanharĩ da. Ta hã te apito nhimiromhurizé ꞌri ꞌrãihâ u ꞌre idanhisisi mono zé ꞌridawa ãma nhamra. Duré ãne na inharĩ mono zé hã ꞌmairẽme tõ, tãma iꞌmanharĩ da hã.
11 Tawamhã Hama, apito uza norĩ, awaru me te te oto mrami wamhã, ma tô Mordecai hã ãma uza. Taha pari ma tô Mordecaihi ré oto saprõ awaru hã, ꞌre idasisõpẽtẽ pese zaꞌra mono zé waꞌwaibaba. Taha sina, te mreme ꞌrãihâ na tinha ãne: “Ãhãta ãne ma tô apito hã ꞌmanha, aibâ ãma iwata da, te te sima iwẽ ma hã!”
12 Ãne pari, ma tô Mordecai hã apâ mo, apito nhimiromhurizé ꞌridawa zaꞌẽtẽ na ꞌre idanhisisi mono zéb u. Taha ré, ma tô Hama hã siꞌubu upsibi sina tinhorõwa u hã wara, rowazép te, duré tiwi robzeiꞌõ pese wa.
13 Tawamhã timro ma, duré tisiwaihuꞌu norĩ ma, ma tô uburé marĩ tãma ihâimanazé hã wasuꞌu zaꞌra. Tahawa te imro, duré isiwaihu iꞌrãiwaihuꞌu wẽ norĩ hã tãma nharĩ zaꞌra ãne:
— A hã ma tô asisimini naꞌra, Mordecaihi me iꞌasiꞌwapéi aba zém na hã. Õ hã Zudeu. A hã tiwi iꞌaiwatobro da hã mare di. Te za tô a hã isarina hã asisimini.
14 Tawamhã zahadu te te nasi tãma nharĩ zaꞌra ré, ma tô eunucu apito ma, te te ꞌre iromhuri zaꞌra mono hã aihutu. Tawamhã ma tô Hama hã awaꞌawi siwi saprõ, Esté hã dasa isaꞌẽne te te iꞌmanharĩ u.
