Esté 7:1-10
7 Apito norĩ Hamahã me, ma tô duré tineb zahuré, Esté dasa isaꞌẽne te te iꞌmanharĩ u.
2 Tawamhã dasa isaꞌẽne isãnaꞌre ihâimana ãma, uva ꞌrãi waꞌu isé nasi apâ te te hâsi zahuré ré, ma tô apito hã Esté sadanha ane:
— E marĩ te za iwaptẽ. Maꞌãpé asima iwẽzéb zarina tô waptẽrẽ, wa hã za te aima isõmri da hã, niwamhã tô ĩte iꞌrãnhoꞌõmo na ꞌre ĩhâimana mono zé hã aiwa ãma isipoꞌo da, ĩwi waptẽrẽ nherẽ.
3 Esté ma sadaꞌâ ãne:
— Apito, ĩwẽsãmri wamhã, duré ãne hã aima wẽ wamhã, maꞌãpé te ĩsima iwẽzéb zarina ĩnhoꞌreptu na za, duré ĩte aꞌuwẽ norĩ hã sõꞌreptu zaꞌra na za.
4 E tihai wa. Wa hã ĩte aꞌuwẽ norĩ me, ma tô dasiwi wawede zaꞌra ni, da te wanhimro da, uburé pese wasiꞌutõrĩ pese da. Taré uburé wapawaꞌâbâ ãna, wa te ꞌre romhuri zaꞌra mono da si, da te dasiwi wawede zaꞌra da ꞌwaꞌâhã, wa hã aré te aima inharĩ da hã maze di. E tihai wa. Iꞌuwaibaba õ wa aré ĩma hã, te aiwi iroꞌwaꞌrézé hã, ã hã robzépatazé aré duré pire õ wa.
5 Tawamhã apito Zersi te apito sipiꞌõ Esté hã sadanha ãne:
— E ꞌwa hã aibâ, te te bété ãne na irosaꞌrada te te aima ꞌmanharĩ da hã. E mame te tihâiba.
6 — Wanhitobꞌru, wazada ꞌre ihâimana mono hã, Hama, ta hã aibâ iwasédé! — Ãne Esté hã ma te asa ãma sadaꞌâ.
Tawamhã pahi uptabi na, Hama te apito hã ꞌmadâ, duré apito sipiꞌõ Esté hã.
7 Tawamhã apito sahi sina ma tô ꞌriꞌre waꞌõno isaꞌẽtẽ hawi watobro. Ma tô mo, ꞌri mana ãma robꞌre ihâimana u. Tawamhã Hama hã za te te tãma irobꞌmanharĩzém na, ma tô sina waihuꞌu. Tahawa te ꞌriꞌre waꞌõtõ zaꞌẽtẽ ãma nhamra uꞌâ, apito sipiꞌõ Estéhé wi, tinhoꞌreptuzé te te tiwi waptẽrẽ da.
8 Tawamhã dazaꞌwarizé ihâteteꞌõ wa, ma tô Esté inomrozéb u sime, ãma isiwamrizé te te tiwi waptẽrẽ da. Taha ré, ma tô apito hã sina siri, robꞌre hawimhã. Hama te te ꞌmadâꞌâ wamhã, ma tô ãne tinha:
— E apito sipiꞌõ, ĩnhoꞌre te te wazébꞌõ da, ma tô wei wi, ĩnhimiromhurizé ꞌri u hã.
Ãne hã apito te te nharĩ wi, ma tô tãma iromhuriꞌwa norĩ hã Hama oto siwi ꞌrãꞌubu.
9 Tawamhã ite romhuriꞌwa norĩ ꞌre, Harbona na isisi hã te ãne tinha:
— Hamahã nhorõwa ꞌratamhã danhoꞌretizéb da 20 metru na iꞌrãihâ pibu na da te ꞌmanharĩ da, te te iꞌru hã te tihâiba, aré Mordecai, da te ãma isõꞌreti da hã, aibâ te te iꞌasõꞌreptu hã.
— Maꞌãpé Hama hã taha na asiwi sõꞌreti waꞌaba! — Ãne apito te tãma ꞌru zahi zaꞌra.
10 Tawamhã Hama, Mordecaihi da, danhoꞌretizé da te ꞌmanharĩ da, te te iꞌru na, ma tô oto sõꞌreti ni.
Taha zarina ma tô apito nhitiꞌruzé hã mazazâ oto.
