Esté 8:1-17
8 Tô taha bâtâ na apito Zersi hã ma tô Estéhé ma, zudeu norĩ nhitobꞌru Hamahã nhorõwa, duré isimarĩ hã sõmri zaꞌra. Tawamhã Mordecai hã ma tô apito ma, isõꞌre u tãma hâiꞌré ni oto. E marĩ wa. Esté hã, Mordecai tisiwapru na te te tãma wasuꞌu wa.
2 Tawamhã apito ma tô tinhiptõmohi tétézé waze, Hamahã wi apâ te te iꞌâri hã. Ta hã Mordecaihi ma, ma tô tisõ. Esté hã, ma tô Mordecai hã tawamhã pisutu, uburé Hamahã nhimarĩ ꞌmadâꞌâꞌwa na ꞌre hâimana mono da.
3 Taha pari ma tô Esté hã apito papara waptãrã. Wawa sina ma tô tiwi waptẽ, Hama hã Agaguihi nhihudu te te iwaihuꞌu zahizé hã te te pari da, Hamahã nhimirowaꞌõno iwasété uptabi zudeu norĩ zada ihâimanazé hã, hâimana ãna da.
4 Tawamhã apito, ẽtẽ waipo oru ꞌmanharĩ na tisiwazusizé hã, Estéhé ma, ma tô wẽ hâimo. Te te wẽ wamhã, ma tô wahudu. Tawamhã para na te oto isõꞌre za.
5 Ãne te tinha:
— Apito, aima wẽ wamhã, duré ĩnhimirowaptẽrẽzé âri wẽ wamhã, duré te aiwi iwaptẽrẽ hã iꞌuwaibaba na wẽsãmri wamhã, te za asisihâ, roti na robꞌuiꞌérézéb ãma, Hama hã te te iwaihuꞌu zahizé hã pari da, Hamedataha ꞌra, Agaguihi nhihudu uburé asimiꞌmadâꞌâzéb ꞌre, te te iwaihuꞌuzé hã zudeu norĩ isiꞌutõrĩ da hã.
6 E tihai wa. Wa hã ĩnhiptete waihuꞌu õ wa aré oto, ĩnhibꞌaꞌuwẽ norĩ duré ĩsisãnawã norĩ isiꞌutõrĩ na hã.
7 Tawamhã Apito Zersi te apito sipiꞌõ Estéhé ma, duré zudeu Mordecaihi ma tinha ãne:
— Wa hã, Hama da te sõꞌreti da hã wa tô dama tiꞌru, zudeu norĩ hã da te uprosi da, te te dama ꞌru zaꞌra ꞌru te. Estéhé ma, wa tô duré uburé isimarĩ hã tãma sõmri zaꞌra.
8 Tane nherẽ, apito nhisi ré roti zahi hã, duré isiptõmohi tétézém na romnhihâdâ te te itobꞌratato hã sipari waihuꞌu õ di. Tane nherẽ, asima iwẽ waꞌaba zarina, rowaihuꞌuzé ihâiba amo hã zudeu norĩ pawapto wẽ zém na robꞌuiꞌéré aba. Duré ĩnhisi na ãma asisihâtâ aba. Duré ĩte danhiptõmohi tétézém na ãma tobꞌratato aba.
9 Ãne hã ma tô tiromhâiba dia 23, siꞌubdatõ aꞌamo ihâimana ãma, siwã na aꞌamo nhisi ãma. Tawamhã Mordecai hã, apito zapariꞌwa norĩ zô dahârâ zaꞌra da, ma tô dama tiꞌru. Tame, ma tô roti ꞌmanharĩzéb ãma zudeu norĩ ma hã robꞌuiꞌéré zaꞌra, apito norĩ ma, dazaꞌrui waꞌõtõ mono na dama iꞌrãnhoꞌõmo norĩ ma, aꞌuwẽ norĩ ma danhibꞌapito ma, duré dazaꞌrui waꞌõtõ mono na uburé 127 na danhibꞌihâꞌa norĩ India na romnhisi hawi ihâimana zaꞌra ma hã, Etiopia u hã. Rotizém na ma tô dama iꞌrãnhoꞌõmo norĩ ma damreme mono bâ ãma saprĩ zaꞌra ni. Dazaꞌrui waꞌõtõ mono bâ ma tô ãma ꞌre idamreme zusi mono bâ ãma dama robꞌuiꞌéré zaꞌra ni. Duré roti ꞌmanharĩzéb ãma hã, ma tô zudeu norĩ mreme na duré ta norĩ nhimirobꞌuiꞌéré zaꞌra zém na ãma robꞌuiꞌéré zaꞌra ni.
10 Tawamhã Mordecai hã, apito Zersi nhisi na ma tô romnhihâdâ hã ꞌmanharĩ zaꞌra. Ma tô duré apito nhiptõmohi tétézém na tobꞌratatob zaꞌra. Taha pari, romreme ꞌwapéiꞌwa norĩ hã ma tô ꞌwasa, awaru, apito te, da te ꞌre itébré zaꞌra mono na.
11 Tawamhã robꞌuiꞌéré na hã, apito ma tô zudeu norĩ ma hã waprosi zaꞌra, uburé isimiꞌmadâꞌâzéb ꞌre, ꞌri nhoꞌõmo na ꞌre ihâimana zaꞌra mono norĩ ma, siꞌrãꞌõtõ mono da, siwaꞌru da te ꞌre isusi zaꞌra mono na siꞌwawi tô ꞌre simapa zaꞌra mono da. Siwaꞌru aꞌuwẽ aibâ norĩ isimnhiꞌãsi ré norĩ hã, niha wamhã, dazaꞌrui waꞌõtõ mono na apito nhimiꞌmadâꞌâzéb ꞌre, zudeu norĩ te te ꞌre susi zaꞌra mono wamhã, te za tô sima iwẽ zaꞌra na te te ꞌre ꞌwapé zaꞌra. Te za duré te te ꞌre simro. Te za tô sima iwẽ na tinhitobꞌru norĩ hã uburé te te ꞌre uprosi, piꞌõ norĩ zama, aiꞌuté norĩ zama, isimarĩ zaꞌra hã tãma ꞌre hâimana zaꞌra mono da.
12 Uburé dazaꞌrui waꞌõtõ mono na, ma tô apito Zersi nhimiroti zahi hã ãzé, 13 bâtâ ãma 12 aꞌamoi ãma ada na aꞌamo nhisi ãma.
13 Apito nhimiroti zahi hã te za robꞌuiꞌéré na ꞌmanharĩ ni. Uburé te za ꞌri waꞌõtõ mono na uburé norĩ nhoꞌa dasiwi sõré zaꞌra ni za, zudeu norĩ, bâtâ tizahi na te te sima ropese zaꞌra da, tinhitobꞌru norĩ na za oto isiꞌruiwaꞌâbâ zaꞌra zém na hã.
14 Tawamhã apito te te tãma waihuꞌu zaꞌra wa, ma tô dama romreme ꞌwapéiꞌwa norĩ hã apito te, awaru tébrézém hawim na awaru iwara tete na sisaꞌre. Waptu na ma tô saꞌẽtẽ wairé. Tawamhã roti zahi na robꞌuiꞌéré hã ma tô Susã ꞌri nhoꞌõmo ãmab zama hã iꞌahâ norĩ nhoꞌa sõré ni.
15 Mordecai hã, apito nhimiromhurizé ꞌri ꞌrãihâ hawimhã, ma tô danhibꞌihâꞌa siꞌuzazé ihâ uzéi ré hã, duré ihâirã ré hã watobro, oru na isõprezé isaꞌẽtẽ ré zama, duré uza hâpa ihâ suꞌu wẽ uptabi hâ pré ré. Tawamhã ꞌri nhoꞌu Susã ãma ꞌre ihâimana zaꞌra mono norĩ hã toi uptabi zaꞌra di. Tahawa te rowẽ te saꞌẽtẽ uptabi ꞌre hãsi.
16 Zudeu norĩ ꞌremhã ma tô rowẽ isaꞌẽne tãma tihâimana zaꞌra, duré dato zaꞌẽtẽ zé hã. Te duré ꞌrâwi siꞌãma tiwata zaꞌra, te te daꞌãma aiꞌuté zaꞌra wẽ te.
17 Tawamhã apito nhimiꞌmadâꞌâzéb ꞌre, ꞌri nhoꞌõmo mono na apito nhimiroti zahi na robꞌuiꞌéré hã, da te isõré zaꞌra mono zém na hã ma tô zudeu norĩ hã sima romhuꞌu zaꞌra, rowẽ te. Ma tô duré dasa isaꞌẽtẽ na sima romhuꞌu zaꞌra. Taha nhipaiꞌu hã ma tô duré siwaꞌru apito nhimiꞌmadâꞌâzéb ꞌre, aꞌuwẽ ꞌre ihâimana zaꞌra mono norĩ hã sizudeu zaꞌra. E marĩ wa. Tãma pahi pese zaꞌra wa oto.
