Esté 9:1-32
9 Tawamhã 13 bâtâ ãma 12 aꞌamoi ãma ada na aꞌamo nhisi ãma, ma tô oto wi apito nhimiroti zahi bâdâ te te aré sina iꞌuwaimrami da hã. Taha bâdâ hã Zudeu nhitobꞌru norĩ aré isimipari zaꞌra zé, te te ãma aiꞌuté zaꞌra da hã. Tane nherẽ, ma te iwaꞌrãmi isiti tãma tiromhâimana zaꞌra. Ma tô Zudeu norĩ hã, tinhitobꞌru norĩ ãma aiꞌuté zaꞌra.
2 Apito nhimiꞌmadâꞌâzéb ꞌre, uburé ꞌri nhoꞌõmo na Zudeu norĩ ꞌre ihâimana zaꞌra mono zé mono bâ ma tô siꞌrãꞌõtõ, te te susi zaꞌra da, te te sima iwẽ norĩ hã te te simro da. Ãhã wa, niꞌwam norĩ hã sada sisapẽtẽ waihuꞌu zaꞌra õ di, uburé tãma pahi uptabi zaꞌra wa.
3 Uburé ꞌri waꞌõtõ na dama rotiꞌwa norĩ ihâimana zaꞌra hã tô uburé siwaꞌru Zudeu norĩ te, danhibꞌihâꞌa norĩ hã, duré apito te, dama iꞌrãnhoꞌõmo na ꞌri waꞌõtõ na ꞌre ihâimana zaꞌra mono norĩ hã ma tô Zudeu norĩ hã pawaptob zaꞌra. E marĩ wa. Mordecaihi ma, pahi uptabi zaꞌra wa.
4 Tawamhã iwasuꞌu ma tô apito nhimiꞌmadâꞌâzéb ꞌre, ropâ te te ropé. Tahawa, ma tô uburé norĩ hã waihuꞌu zaꞌra, ta hã apito nhimiꞌmadâꞌâzéb ꞌre, simiroti nhiptete na dama ꞌre ihâimana mono na hã. Ãne wa, ma tô oto Mordecaihi nhiptetezé mono hã te te sina hâimo uꞌâsi.
5 Tawamhã Zudeu norĩ hã te te sima iwẽ zaꞌra zéb zarina, ma tô tinhitobꞌru norĩ ma robꞌmanharĩ zaꞌra. Ma tô uburé sibꞌézé ꞌwapa na hã uprosi, niꞌwa tiwi sisõꞌreptu zaꞌra ãna.
6 Susã dahu nhoꞌõmo ãma hã ma tô siwi uprosi, 500 na aibâ norĩ ihâiba na.
7 9:7-10 Hamahã ꞌra norĩ 10 na ihâiba zaꞌra hã ma tô duré siwi simro. Hama hã Hamedataha ꞌra, Zudeu nhitobꞌrui ꞌra. Iꞌra norĩ nhisi hã ãne: Parsãdata, Dalfã, Asipata, Porata, Adaria, Aridata, Parmasta, Arisaꞌi, Aridaꞌi duré Waizata. Tane nherẽ, Zudeu norĩ hã isimarĩ zaꞌra te te sima waibu zaꞌra õ di, tãma ihâimana zaꞌra da hã.
8 ꞌMadâꞌâ 9:7
9 ꞌMadâꞌâ 9:7
10 ꞌMadâꞌâ 9:7
11 Tawamhã tô taha bâtâ na hã ma tô apito ma, Susã ãma niha da te isimro zaꞌra hâiba zaꞌratazé hã tãma wasuꞌu ni.
12 Ãne ma tô Estéhé ma wasuꞌu:
— Ãme Susã ãma, Zudeu norĩ hã 500 na aibâ norĩ ihâiba na ma tô siwi uprosi. Hamahã ꞌra norĩ 10 na ihâiba zaꞌra zama ma tô duré siwi uprosi. Duré e niha ma tô bété dazaꞌrui waꞌõtõ ãma hã siwi danhimro. E marĩ te ãhã na awaꞌawi na hã asima iwẽ. Niha hã marĩ asima wẽ zahu wamhã, wa za tô aima tisõ za.
13 Tawamhã Esté, ma te ãne asa ãma sadaꞌâ:
— Apito aima wẽ wamhã, maꞌãpé Susã ãma Zudeu norĩ ma rowairébé zaꞌra na, awẽ bâtâ na te te siwi ꞌmanharĩ da, tô ãhã bâtâ na te te siwi ꞌmanharĩ da, tãma irowairébé zaꞌra ne. Duré wa za aiwi waptẽ, Hamahã ꞌra norĩ 10 na ihâiba zaꞌra hã ihâiba hã da te dasiwi sasõmri zaꞌra da, dabutuwazizém na simnhatã da.
14 Tawamhã apito ãne hã, da te dasiwi ꞌmanharĩ da hã ma tô dama waihuꞌu. Tahawa, Susã ãma ma tô Hamahã ꞌra 10 na ihâiba norĩ ãma sõꞌawi robꞌuiꞌéré hã dasiwi sõré ni. Taha pari ma tô oto 10 na ihâiba hã dasiwi sasõmri zaꞌra ni, dabutuwazizém na.
15 Tawamhã 14 bâtâ ãma hã ada na aꞌamo nhisi ãma ma tô Zudeu norĩ hã siꞌrãꞌõtõ. ꞌRi nhoꞌõmo ãma ma tô 300 na aibâ norĩ hã siwi uprosi. Tane nherẽ, te te sima waibu zaꞌra õ di isimarĩ zaꞌra hã, tãma ihâimana zaꞌra da hã.
16 9:16-17 Tawamhã 13 bâtâ ãma ada na aꞌamo nhisi ãma hã, Zudeu norĩ hã dazaꞌrui waꞌõtõ mono bâ ma tô siꞌrãꞌõtõ. Ma tô siꞌwawi aimapa zaꞌra. Ãne wa, ma tô tinhitobꞌru zaꞌra norĩ hã siwi uprosi 75 miu na. Ãne, sada isitiꞌru zaꞌra na hã ma tô sima ropese zaꞌra. Tane nherẽ, te te siwi isimro norĩ nhimarĩ hã te te sima waibu zaꞌra õ di, tãma simiꞌwara da hã. Tawamhã 14 bâtâ ãma oto waꞌutu zaꞌra wamhã, ma tô sima romhuꞌu zaꞌra dato isaꞌẽne te te sima iꞌmanharĩ zaꞌra na hã.
17 ꞌMadâꞌâ 9:16
18 Tane nherẽ, Susã ãma Zudeu norĩ hã 15 bâtâ ãmap si ma tô sima romhuꞌu zaꞌra. E marĩ wa. 13 bâtâ ãma duré 14 bâtâ ãma hã, tinhitobꞌru te te uprosi wa. Tawamhã 15 bâtâ ãmap si ma tô oto tiwaꞌutu zaꞌra.
19 Tahawa, te Zudeu norĩ rom na duré ꞌri waꞌõtõ ãma ꞌre ihâimana zaꞌra mono norĩ hã 14 bâtâ ãma hã te te sima ꞌre romhuꞌu uꞌâsi zaꞌra, dasa isaꞌẽtẽ na duré dato na. Taha na te duré dasa na sima ꞌre sõprub zaꞌra.
Purĩ na dato nhisi ihâimanazé wasuꞌu
20 Tawamhã Mordecai uburé iromhâimanazém na ma tô ãma robꞌuiꞌéré. Taha pari ma tô uburé Zudeu norĩ ma tinhimiromnhihâtâ na tãma ãma ropé zaꞌra, apito nhimiꞌmadâꞌâzéb ꞌre dazaꞌrui waꞌõtõ mono na ꞌrâwim norĩ ma hã, duré romhâ na ꞌre ihâimana zaꞌra mono norĩ ma.
21 Robꞌuiꞌéré na ma tô dama waihuꞌu zahi, wahup sidâpâsi 14 bâtâ ãma hã, duré 15 bâtâ ãma ada na aꞌamo nhisi ãma te te sima ꞌre romhuꞌu zaꞌra mono da.
22 E marĩ wa. Tô taha bâtâ norĩ na Zudeu norĩ tinhitobꞌru norĩ na te te sima ropese zaꞌra wa, duré tô taha aꞌamo na tiwi irobzeiꞌõ zaꞌra zé hã, duré tipẽꞌẽzé te te isépata zaꞌra zé hã toi uptabi na za oto ihâimana zaꞌra u, tãma sisaprĩ zaꞌra wa, duré dato isaꞌẽtẽ ꞌmanharĩzéb u. Tahawa, ma tô tinhimiromnhihâtâ na tãma waihuꞌu zahi zaꞌra, tô taha bâtâ norĩ na hã dato isaꞌẽne ihâimanazém na, duré da te dasima ꞌre iromhuꞌu zaꞌra mono zém na hã, duré dasa na sima ꞌre isõprub zaꞌra mono zém na, duré isimarĩꞌõ norĩ ma, ꞌre isõprub zaꞌra mono na hã.
23 Ãne Zudeu norĩ hã, Mordecai nhimiromnhihâtâ zarina, taha bâtâ na te te sima ꞌre iromhuꞌu zaꞌra mono zém na za oto ãma ꞌre ihâimana zaꞌra mono na hã ma tô ãma sãnaꞌrata zaꞌra.
24 Hama, Hamedataha ꞌra, Agaguihi nhihudu Zudeu norĩ ꞌruꞌwa hã ma tô aré sima rowaꞌõtõ, te te uprosi da hã. Ma tô duré aré datozébre (“purĩ” na isisi hã) dama tiꞌru, da te dasiwi me da, bâtâ pisutu pese zé ãma ihâimana da hã da te dasiwi iꞌuprosizéb da hã ãma.
25 Tane nherẽ, Esté hã, apito u morĩ wa, ma tô robꞌuiꞌéré na hã dama waihuꞌu zahi, Hama hã tô Zudeu norĩ zada, te te sima irowaꞌõtõ wasété zé hã, õhõ nhisiwip si iwaptãꞌã da hã. Tahawa, ma tô Hama hã, iꞌra norĩ me butu wazi na sõꞌreti zaꞌra ni.
26 Ãne wa, ã bâtâ norĩ nhisi hã, “purĩ” na, “pur” na damreme zarina.
Tawamhã Mordecai te te iromnhihâtâzéb zarina, duré uburé Zudeu norĩ te te iꞌmadâꞌâ zaꞌra zéb zarina, duré marĩ uburé iwatobrozéb zarina,
27 ma tô ta norĩ hã oto ꞌrâwi sima rowairébé zaꞌra, duré tinhihudu norĩ ma, duré isizudeu zaꞌra norĩ ma, wahup sidâpâsi maparane bâtâ na te te sima ꞌre romhuꞌu zaꞌra mono da hã, Mordecai te te ãma iromnhihâtâ zarina.
28 Tawamhã ma tô sima rowairébé zaꞌra, ta hawim haré uburé Zudeu hawi aꞌuwẽ waꞌõtõ mono bâ, uburé dazaꞌrui waꞌõtõ mono na apito nhimiꞌmadâꞌâzéb ꞌre, Purĩ na dato isaꞌẽtẽ na te te sima ꞌre romhuꞌu zaꞌra mono da, Zudeu norĩ, marĩ ihâimanazém na õne uꞌâ ãma ꞌre sipoꞌre puꞌu uꞌâsi zaꞌra mono da, duré niwamhã siwaꞌru wahum na bâdâ dato isaꞌẽtẽ ꞌmanharĩzé hã te te siwi ꞌre simini tõ mono da.
29 Tawamhã Abiaiuhu ꞌra apito sipiꞌõ Estéhé zama ma tô Zudeu Mordecaihi hâiba zu robꞌuiꞌéré hã ꞌmanha, Mordecaihi nhimirobꞌuiꞌéré te te aré iꞌmanharĩ hã, te te ãma siptete da, purĩ na dato isaꞌẽtẽ na te te ãma irobꞌuiꞌérézé hã.
30 Tawamhã romnhihâtâ awã mono hã ma tô apito nhimiꞌmadâꞌâzéb ꞌre, uburé Zudeu norĩ 127 na dazaꞌrui waꞌõtõ mono na te te dama ãma ropé. Taha na ma tô uburé Zudeu norĩ ma rowẽ na si ꞌre hâimana zaꞌra mono da hã, sawi zaꞌra, duré sima iwẽ na hâtâꞌâ ãna ꞌre hâimana zaꞌra mono da.
31 Taha na ma tô duré purĩ na dato isaꞌẽne za ꞌre ihâimana mono zéb da bâtâ norĩ hã oto siwi pisutu pese zaꞌra. Ãne, dato isaꞌẽtẽ na te te sima ꞌre iromhuꞌu zaꞌra mono zéb da hã, duré sai ãna aꞌâ ꞌre ihâimana zaꞌra mono zéb da hã, te te sima ipisutu zaꞌra zéb zarina, duré tinhihudu norĩ ma, te te ipisutu zaꞌra zéb zarina, te za ta norĩ hã ãma ꞌre hâimana zaꞌra, ã hã Zudeu Mordecai norĩ nhimirowaihuꞌuzéb zahi zarina, Estéhé me hã.
32 Tawamhã Esté te te iwaihuꞌu zahi zé hã, ma tô purĩ na dato isaꞌẽtẽ na da te dasima ꞌre iromhuꞌu zaꞌra mono zéb da hã itepãi wasisi na ibaihâ na ãma robꞌuiꞌéré ni.
