Filipu 1:1-30
1 Wa hã Paulu duré Timotiu, wa norĩ hã Cristu Zezusihi ma romhuriꞌwa, wa ãma aima robꞌuiꞌéré zaꞌra waꞌaba ni, Filipu na ꞌri nhoꞌõmo nhisi ãma ꞌre iꞌaiꞌubumroi waꞌaba mono norĩ ma, ꞌRe ihâimana uꞌâsi mono nhibꞌaꞌuwẽ na ꞌre iꞌaihâimana zaꞌra waꞌaba mono norĩ ma, duré Cristu Zezusi isaze zaꞌra waꞌaba norĩ ma, duré tame isazeiꞌwa norĩ ꞌmadâꞌâꞌwa norĩ ma, duré dapawaptoꞌwa norĩ ma zama.
2 Wa wa te aiꞌãma ꞌre rowaptẽrẽ uꞌâsi zaꞌra waꞌwa, ꞌRe ihâimana uꞌâsi mono tinhimizawi pese zé hã duré Uburé Wanhibꞌapito Zezu Cristuhu te zama, te te aima ꞌre isõmri uꞌâsi zaꞌra waꞌaba mono da si, duré ihawi rowẽ uꞌâsi zama.
Paulu hã te te ꞌre irowaptẽrẽ mono zé, Filipu ãma ꞌre isiꞌubumroi mono norĩ ãma
3 Aiꞌãma ꞌre ĩpoꞌre puꞌu zaꞌra waꞌaba mono sidâpâsi, wa ĩte ꞌRe ihâimana uꞌâsi mono ãma hã ꞌre ĩwata uꞌâsi.
4 Te duré aiꞌãma ꞌre rowaptẽrẽ zaꞌra waꞌaba mono sidâpâsi, wa ĩtoi uptabi na te ꞌre rowaptẽrẽ,
5 ĩꞌãma iꞌaime zaꞌra waꞌaba zéb uꞌâbâ, bâdâ imorĩꞌrata na ĩma ihâimanazéb ãma Rowasuꞌuwẽ itém na te irowasuꞌuzém hawim haré ãwa bâtâ u hã.
6 Tahawa, ĩsiwawãi ãna wa ĩhâiba. Romhuri iwẽ na te te aiꞌãma isãnaꞌrata zaꞌra waꞌwa hã*, ta hã te za duré ãma uzusi, bâdâ iꞌrãsutuzéb u Cristu Zezusi apâ we imorĩzéb u.
7 Tahawa, tô iꞌuwaibaba ãne na te aiꞌãma irosaꞌrata zaꞌra aba na hã, ĩpẽꞌẽ ꞌre, ꞌre aihâimana zaꞌra waꞌaba mono wa. Mare di, dazazéb ꞌre, ĩza wapsi hã. Tazahã, Rowasuꞌuwẽ ité ꞌwawi ꞌre ĩza mono wab zama, duré ꞌRe ihâimana uꞌâsi mono nhimiroti tô sena na ꞌre ihâimana mono na te ꞌre rowasuꞌu mono wab zama. Ãne wa, uburé ma tô ĩsiré ꞌre aihâimana zaꞌra waꞌaba mo, bâdâ ꞌRe ihâimana uꞌâsi mono te te ĩma isõmrizéb ãma hã, tinhimizawi pese zéb zarina.
8 Ãne na hã ꞌRe ihâimana uꞌâsi mono ma si ĩwaihuꞌu pese di, uburé aiꞌãma ĩpẽꞌẽzé zaꞌra waꞌaba na hã, duré tô sena te ꞌre iꞌasawi pese zaꞌra waꞌaba mono zém na zama, Cristu Zezusihi nhimizawizém na.
9 Ãne wa duré te aiꞌãma ꞌre rowaptẽrẽ uꞌâsi zaꞌra waꞌwa: Asimizawizé hã aima isaꞌẽtẽ uꞌâsi zaꞌra waꞌaba mono da si, duré dahâimanazém na rowaihu iwẽ hã aima ꞌre ihâimana zaꞌra waꞌaba mono da si, duré rowaihuꞌu wẽ wahu ré aima ꞌre ihâimana zaꞌra waꞌaba mono da si,
10 iwẽ si asima ꞌre pisutu uꞌâsi zaꞌra waꞌaba mono da. Ãne wapsi, Cristu hã apâ we imorĩzé bâtâ ãma hã te za aiwasédé aiꞌãma ꞌre ihâimana zaꞌra waꞌaba mono wi, isiti aihâimana zaꞌra waꞌwa, duré aiwasédé ꞌre iꞌmanharĩ zaꞌra waꞌaba mono na da te aiꞌãma isaꞌra waihuꞌu aba õ na.
11 Duré, Zezu Cristuhu ãma ꞌre aihâimana zaꞌra waꞌaba mono wamhã, romhuri iwẽ hã ahâ na te za ꞌre iꞌmanharĩ zaꞌra waꞌaba mo, ꞌRe ihâimana uꞌâsi mono ãma ꞌre dawata zaꞌra mono da hã.
Paulu hã dazazéb ꞌre sam nherẽ, te te sima irowẽzé, Rowasuꞌuwẽ ité da te iwasuꞌu zazâri zaꞌra õ uꞌâbâ
12 Ĩsisãnawã norĩ, wa ĩsima wẽ, waihuꞌu zaꞌra waꞌaba da, ãne: Marĩ ĩzada ꞌre hâimana zaꞌra mono nherẽ, ma tô ta norĩ waꞌrãmi tizaꞌẽtẽ, Rowasuꞌuwẽ ité hã.
13 Taha zarina ma tô uburé danhibꞌapito nhorõwa ꞌmadâꞌâꞌwa norĩ dasiꞌwapéi ꞌmanharĩꞌwa norĩ hã duré uburé aimawi norĩ hã waihuꞌu zaꞌra, Cristuhu zazeiꞌwai uꞌâbâ, dazazéb ꞌre ĩzam na hã.
14 Duré ĩsisãnawã norĩ ahâ na ihâimana zaꞌra hã ma tô Uburé Wanhibꞌapito ãma aptete zaꞌra, dazazéb ꞌre ĩzab uꞌâbâ. Tahawa siptete sina te tihâimana zaꞌra oto, ꞌRe ihâimana uꞌâsi mono nhimiroti te te ꞌre iwasuꞌu zaꞌra mono da hã, pahi ãna.
15 Tô sena te tô niꞌwam norĩ hã Cristuhu wasuꞌu na ãma ĩnhoꞌru zarina te te dama ꞌre robꞌmahârâ zaꞌra, duré ĩnhipai u daꞌahâ na isiré ꞌre dahâimana zaꞌra mono zô. Tane nherẽ, niꞌwam norĩ hã ĩꞌãma ꞌre sina mono da si, te tô te te dama ꞌre robꞌmahârâ zaꞌra.
16 Ta norĩ ma ĩzawi zarina, te ãne hã te te ꞌre ꞌmanharĩ zaꞌra, Rowasuꞌuwẽ ité ꞌwawi ꞌre ĩsimapa mono da, ꞌRe ihâimana uꞌâsi mono te te ĩpisutu na tãma waihuꞌu pese zaꞌra wa.
17 Tane nherẽ, isisaꞌẽtẽ da si, te niꞌwam norĩ hã Cristuhu nhimiroti na te te dama ꞌre rowahutu zaꞌra, mare di tô sena hã. E marĩ wa. Ta norĩ ma iwẽ hã, wa hã te tô irobzépata zaꞌẽtẽ da si, ãme dazazéb ꞌre ĩzab ré hã.
18 Tane nherẽ, ta hã marĩ dai õ di. Isipai u ipire hã Cristuhu wasuꞌu, da te ꞌre iwasuꞌu zaꞌra mono da si, niha na, niwamhã tô sena na danhimirosaꞌrata wẽ na duré niwamhã dasisaꞌẽtẽ da si, da te ꞌre rosaꞌrata zaꞌra mono nherẽ. Taha na wa tô te ĩsima ꞌre rowẽ uꞌâsi. Wa za duré tô te ãma ĩsima ꞌre rowẽ uꞌâsi,
19 ꞌRe ihâimana uꞌâsi mono za te te ĩnhoꞌreptu na ĩma waihuꞌu pese wa, ĩꞌãma irowaptẽrẽ zaꞌra waꞌaba uꞌâbâ, duré ꞌRe ihâimana uꞌâsi mono Pẽꞌẽzani nhimipawaptob zarina, Zezu Cristu hawi we ꞌre ine mono hã.
20 Te ĩsima ꞌre iwẽ uptabi mono hã duré ĩsiwawãi ãna ꞌre ĩnhimipari mono zé hã niwa marĩ na te upai wa, ꞌRe ihâimana uꞌâsi mono hã ĩma sisép tõ da. Ãne wamhã, õne uꞌâsi duré ãhã na hã te za ĩpahi ãna ꞌre ĩhâimana mono zé hã ĩma ꞌre hâimana. Tawapsi uburé marĩ na te ꞌre inharĩ mono zé hã duré marĩ te ꞌre iꞌabꞌmanharĩ mono zé hã ĩhâiba ré ꞌre ĩhâimana mono zém na niwamhã duré ĩdâꞌâzém na zama Cristu hã saꞌẽtẽ uptabi na ꞌre ihâimana mono zé hã te za ĩꞌãma ꞌre hâimana, ĩꞌuꞌâbâ.
21 E marĩ wa. Ĩma hã ĩhâiba ré ꞌre ĩhâimana mono zé hã Cristuhu ma si, wa za tô ꞌre ĩhâimana. Duré tô ĩdâꞌâ wamhã, ta hã oto ĩsipai u wẽ uptabi di, ĩma hã.
22 Tane nherẽ, duré ꞌre ĩhâimana hâ mono zô ꞌwaiꞌâ, romhuri iwẽ hã wa aré te ꞌre ꞌmanharĩ. Tahawa, nima hã te ĩsima pisutu waihuꞌu õ di.
23 Pire uptabi di ĩma hã maparane ihâimana zahuré, nima hã te ĩsima ipisutu da hã: Ihâiba amo hã wa ĩsima wẽ upta, ĩdâꞌâ da, Cristuhu siré oto ꞌre ĩnhamra mono da, ta hã wẽ uptabi wa.
24 Tane nherẽ, tô iꞌru zahi ĩhâiba ré ꞌre ĩhâimana mono da hã aꞌâ, aiꞌudâna zaꞌra waꞌaba.
25 Taha na tô sena na te ĩsina iwaihuꞌu zarina, wa za tô aꞌâ ꞌre ĩhâimana. Duré wa za uburé asiré zaꞌra waꞌaba tô ꞌre ĩhâimana, te ꞌre aipawaptob zaꞌra waꞌaba mono da, aiprédub zaꞌra waꞌaba da, duré ꞌRe ihâimana uꞌâsi mono asina ꞌre iꞌumnhasi zaꞌra waꞌaba zém na, rowẽ sina ꞌre aihâimana uꞌâsi zaꞌra waꞌaba mono da.
26 Ãne wamhã, duré za apâ asiré ĩhâimana zaꞌra waꞌaba wamhã, te za ĩꞌãma asima irowẽ zaꞌra waꞌaba zé hã aima tihâimana zaꞌra waꞌwa, Cristu Zezusihi ãma ꞌre iꞌaihâimana zaꞌra waꞌaba mono zém na hã.
27 Tahawa, ãhã na hã niha hã tô romhâimana mono nherẽ, maꞌãpé asima sô asõpré waꞌaba, tô sena Cristuhu wasuꞌuwẽ itém na si ãma ꞌre aihâimana zaꞌra waꞌaba mono da. Ãne wamhã, te asabu zaꞌra waꞌaba da, ãma ĩmorĩ da wamhã, duré ãma ĩmorĩ dai õ wamhã, wa za waihuꞌu za, asiptete sina ãma iꞌaihâimana zaꞌra waꞌaba na hã, duré asimirosaꞌrata misi ré ꞌre iꞌaihâimana zaꞌra waꞌaba mono na zama. Wa za duré waihuꞌu za, asiptete sina ꞌRe ihâimana uꞌâsi mono asina ꞌre iꞌumnhasi zaꞌra waꞌaba mono zém na ãma iꞌaihâimana zaꞌra waꞌaba na hã, duré simisutu misi haré Rowasuꞌuwẽ itéb uꞌâbâ ꞌre iꞌaiꞌwapé zaꞌra waꞌaba mono zém na zama.
28 Asitobꞌru norĩ ma, ꞌre aipahi zaꞌra waꞌaba mono tõ. Maꞌãpé asibꞌru na ꞌre aihâimana uꞌâsi zaꞌra waꞌaba mono. E marĩ wa. Ta hã asitobꞌru norĩ ma ꞌre hâimana zaꞌra mono wa, za ãma ꞌre iꞌaiꞌuté zaꞌra waꞌaba mono na iwaihuꞌuzéb da hã, duré a norĩ waꞌwa hã marĩ na aiꞌutéꞌwa na ꞌre iꞌaihâimana zaꞌra waꞌaba mono na hã. E marĩ wa. ꞌRe ihâimana uꞌâsi mono si te za marĩ na ꞌre aiꞌuté zaꞌra waꞌaba mono da hã te te aima ꞌre sõmri zaꞌra waꞌwa.
29 E marĩ wa. Ta hã ma tô iwẽ uptabi hã aima pisutu zaꞌra waꞌwa, Cristuhu ma ꞌre romhuri zaꞌra waꞌaba mono da. Mare di, ꞌre isaze zaꞌra waꞌaba mono da si hã. Tazahã, iꞌuꞌâbâ ꞌre robzépata zaꞌra waꞌaba mono da zama.
30 E marĩ wa. Ãhã na hã te ĩme aihâimana zaꞌra waꞌwa, robzépata na tô ĩꞌãma iꞌmadâꞌâ zaꞌra waꞌaba na. Ta hã te duré ãhã na iwapari zaꞌra waꞌwa, zahadu te ꞌre isépata mono na.
Ĩwaꞌõtõ piꞌreba watsuꞌu mono
^ 1:6 Romhuri iwẽ na te te ãma isãnaꞌrada hã, ꞌRe ihâimana uꞌâsi mono te wasuꞌu. Ta hã romhuri wẽ na isãnaꞌrataꞌwa.
