Filipu 2:1-30
2 Cristuhu ãma ꞌre aihâimana zaꞌra waꞌaba mono wa, asiptete zaꞌra waꞌaba di. Isimizawizé hã te duré rowẽ te te aima ꞌre sani zaꞌra waꞌwa. Te duré ꞌRe ihâimana uꞌâsi mono Pẽꞌẽzani siré ꞌre aihâimana zaꞌra waꞌaba mo. Taha zarina te duré asima aihâimana wẽ na ꞌre aihâimana zaꞌra waꞌaba mo, aihâimana zasi ãna. Te duré asiꞌãma ꞌre aiba zaꞌra waꞌaba mo.
2 Tahawa, maꞌãpé asina rowẽ hã wahuré ĩma ꞌre sani zaꞌra waꞌaba mono. Tahawa, wa za duré aiwi waptẽrẽ zaꞌra waꞌwa, ãne: Maꞌãpé aiwap si ꞌre rosaꞌrata zaꞌra waꞌaba mono, niꞌwa hã sipai ãna. Duré aiwap si ꞌre asisawi pese zaꞌra waꞌaba mono. Duré aiwap si sena na marĩ na aipẽꞌẽ na duré asimirosaꞌrata na ꞌre asisaze zaꞌra waꞌaba mono.
3 Marĩ hã ꞌrâwi asima ꞌre iwẽ zaꞌra waꞌaba mono zéb zarina, ꞌre ꞌmanharĩ zaꞌra waꞌaba mono tõ, asiꞌmadâꞌâ ze zarina, niwamhã duré aiꞌrã nhimizaꞌrese õ zarina da te ꞌre aiꞌuzei wẽ zaꞌra waꞌaba mono zô. Tazahã, asiꞌmadâꞌâ zei ãna dama ꞌre aihâimana zaꞌra waꞌaba mono. Duré asiꞌupana dapire na ꞌre daꞌmadâꞌâ zaꞌra waꞌaba mono.
4 Niꞌwa hã marĩ te te sima iwẽ zô, sima si ꞌre rĩtĩ mono tõ. Tazahã, dama zama ꞌre rĩtĩ mono.
5 Maꞌãpé rosaꞌrada hã aiwapsi aima ꞌre hâimana zaꞌra waꞌaba mono, Cristu Zezusi te te ꞌre irosaꞌrata mono ne.
6 Ta hã, ꞌRe ihâimana uꞌâsi mono hâimanazém ne, ꞌre hâimana uptabi mono nherẽ, tiꞌai u we morĩ wamhã, siꞌmadâꞌâ õ di, ꞌre hâimana mono da hã aiwa ꞌRe ihâimana uꞌâsi mono sine.
7 Tazahã uburé marĩ tite hã ma tô sisaꞌu aꞌâ rẽme zaꞌra. Dama romhuriꞌwa ne, ma tô aꞌâ ꞌre hâimana. Tiꞌai ãma aꞌuwẽ hâiba na ma duré siꞌaꞌuwẽ. Tawamhã aꞌuwẽ hâimanazém na ꞌre hâimana mono wamhã,
8 wapu na ma tô ꞌre siꞌmadâꞌâ. Duré ꞌRe ihâimana uꞌâsi mono nhimiroti ma tô te te ꞌre abꞌmadâꞌâ pese, tidâꞌâzéb u, tô duré wedepoꞌo nhonhiꞌrãmi na idâꞌâzé ipire uptabi nherẽ.
9 Tahawa, ꞌRe ihâimana uꞌâsi mono, ma tô Zezusi hã pisutu, pire uptabi na danhipai u dama ꞌre hâimana mono da. Ma duré isisi hã tãma pisutu, uburé danhisi nhipai u pire uptabi na ꞌre ihâimana mono hã,
10 Zezusihi nhisi ma, uburé pese ꞌre idahâimana zaꞌra mono hã dahiꞌrãtitõ tãma ꞌre dasina mono da, hâiwa ãma duré tiꞌai ãma, duré adâ ꞌre ihâimana zaꞌra mono zéb ãma zama,
11 duré uburé dazadawa na isisi na ãma ꞌre dawata zaꞌra mono da, Zezu Cristuhu si Uburé Wanhibꞌapito na hã, duré ꞌRe ihâimana uꞌâsi mono Imama ãma zama ꞌre dawata zaꞌra mono da, iꞌuꞌâbâ.
Cristuhu zazeiꞌwa norĩ, te za te te dama ꞌre rowaꞌa zaꞌra
12 Tahawa, ĩsisãnawã norĩ, ĩma iꞌasawi pese zaꞌra waꞌaba norĩ, a norĩ waꞌwa hã ĩnhoꞌa ꞌRe ihâimana uꞌâsi mono nhimiroti ꞌre iꞌmadâꞌâ pese zaꞌra waꞌaba mono ne, te za duré ĩnhoꞌai õ nherẽ, oto ꞌre iꞌmadâꞌâ pese zaꞌra waꞌaba mo, ĩnhoꞌa ré nhipai u. Maꞌãpé asimiromhuri na ãma ꞌre uzusi uꞌâsi zaꞌra waꞌaba mono, ꞌRe ihâimana uꞌâsi mono wazéb sina, duré pipa sina, te te iꞌasõꞌreptu zaꞌra waꞌaba zéb zarina, ꞌre iꞌanomro wẽ waꞌaba mono zém na tãma ãma asina ꞌre uwaimrami uꞌâsi zaꞌra waꞌaba mono da.
13 E marĩ wa. ꞌRe ihâimana uꞌâsi mono hã te aiꞌãma zaꞌra waꞌaba te te ꞌre romhuri uꞌâsi, uburé marĩ te te sima ꞌre iwẽ mono zép si ꞌre ꞌmadâꞌâ pese zaꞌra waꞌaba mono da, ãma tãma ꞌre uwaimrami zaꞌra waꞌaba mono da, asimirosaꞌrata na duré marĩ ꞌre iꞌmanharĩ zaꞌra waꞌaba mono zém na zama.
14 Uburé marĩ hã aiwapsari ãna ꞌre ꞌmanharĩ wẽ zaꞌra waꞌaba mono, duré ꞌre asiwasu zaꞌra waꞌaba mono ãna zama,
15 marĩ iwasédé ꞌre iꞌmanharĩ zaꞌra waꞌaba mono na, da te ꞌre aiwasuꞌu waihuꞌu zaꞌra waꞌaba mono tõ da, duré marĩ iwasédé hã aiꞌãma ꞌre hâimana zaꞌra waꞌaba mono tõ da, ꞌRe ihâimana uꞌâsi mono ꞌra, marĩ na te te ꞌre iꞌupa zaꞌra mono õ na si ꞌre anomro aba mono da, dawasété na si ꞌre idanomro mono norĩ wazarimhã, ꞌRe ihâimana uꞌâsi mono, da te ꞌre waihuꞌu zaꞌra mono da, da te dasima ꞌre iwẽ zaꞌra mono õ norĩ wazarimhã. Ta norĩ waꞌwa, te za ꞌre irowaꞌa zaꞌra waꞌaba mo, wasi norĩ hâiwa na te te ꞌre irowaꞌa zaꞌra mono ne.
16 Ãne wamhã, te za tãma ꞌre iwasuꞌu zaꞌra waꞌaba mo, rowasuꞌu dahâimana uꞌâsi zém nhomriꞌwa hã. Ãne ꞌre ꞌmanharĩ zaꞌra waꞌaba mono wapsi, wa za ĩtobꞌuzu, niwa Cristu apâ we imorĩzé bâtâ ãma hã. E marĩ wa. Ta hã za te te ĩma hâiꞌré wa, te ꞌre iromhuri pese mono zé hã taréi õ na.
17 ꞌRe ihâimana uꞌâsi mono asina ꞌre iꞌumnhasi zaꞌra waꞌaba mono zé aima ꞌre ihâimana zaꞌra waꞌaba mono zéb uꞌâbâ, te za ꞌre asisõmri zaꞌra waꞌaba mo, danhimizama zata na danhoprubzé, da te ꞌre isõmri zaꞌra mono ne, ꞌRe ihâimana uꞌâsi mono ma, ꞌre romhuri zaꞌra waꞌaba mono da. Duré wa hã asõpru waꞌaba zéb siré ĩsisõmri da nherẽ, ta hã te za rowẽ uptabi hã ĩma tisõ. Wa za duré aiꞌãma ĩsima rowẽ zaꞌra waꞌwa.
18 Tane, duré maꞌãpé a norĩ waꞌaba zama ĩsiré asima rowẽ zaꞌra waꞌaba.
Timotiu norĩ, Epafrodituhu me te te sima irowaꞌõtõ zahuré zé
19 Uburé Wanhibꞌapito Zezusi te te sima iwẽzéb zarina wamhã, wa ĩsima ꞌmadâ, Timotiu hã te ãma atẽme satõrĩ suꞌu zaꞌra waꞌaba da. Ĩma rowẽ hâ, aiwasuꞌu wẽ zaꞌra waꞌwa we ĩtẽme wisi wamhã.
20 Wa ĩsima wẽ, te ãma atẽme satõrĩ zaꞌra waꞌaba da, niꞌwai õ wa isine hã, tô sena tãma iwẽ taha ma hã, rowẽ na si ꞌre aihâimana zaꞌra waꞌaba mono da hã.
21 E marĩ wa. Aimawi norĩ hã te te sima ꞌre iwẽ zaꞌra mono zéb zô si, sima sô ꞌre sõpré mono wa, mare di, Zezu Cristu te te sima ꞌre iwẽ mono zéb zô hã.
22 Tazahã, a norĩ waꞌaba ma, aima waihuꞌu pese zaꞌra waꞌaba di, Timotiu hã tihâimanazé iwẽ na te te ihâiꞌrézém na hã. Taha me wa wa te wasiré ꞌre romhuri, Rowasuꞌuwẽ itém na wa te ropé da hã, daꞌra timama siré te te ꞌre iromhuri mono ne.
23 Tahawa, ta hã te ãma atẽme satõrĩ zaꞌra waꞌaba da, wa ĩsima ꞌmadâ, niha na za ãme ĩma iromhâimanazé te ĩsina waihuꞌu pari wamhã.
24 Tahawa, Uburé Wanhibꞌapito si, wa duré ĩsina umnhasi, nimahã na hã ĩzama ãma atẽme ĩmorĩ suꞌu zaꞌra waꞌaba da, romhutu na.
25 Wa duré ꞌmadâꞌâ zahi, wasisãnawã Epafroditu ĩsiré romhuriꞌwa hã apâ te ãma atẽme satõrĩ zaꞌra waꞌaba da. Ta hã dasiꞌwapéi ꞌmanharĩꞌwa norĩ sisababa te te ꞌre idaꞌwapé zaꞌra mono ne te ĩzababa ꞌre hâimana. Ta hã ĩnhimnhasi ré hã ma tô wẽ ĩtẽme isatõrĩ zaꞌra waꞌwa, ĩꞌãma sime da.
26 Ta hã aiꞌãma pẽꞌẽzé uptabi zaꞌra waꞌaba di. Duré aiꞌãma hâtâꞌâ zaꞌẽtẽ zaꞌra waꞌaba di, iwasuꞌu wapari zaꞌra waꞌaba wa, ihâzé na hã.
27 Tô sena, ma tô tihâzé tô. Ma aré aiꞌutõ. Tane nherẽ, ꞌRe ihâimana uꞌâsi mono hã ma tô ãma aiwamri. Õhõ ãma si õ di. Duré ĩꞌãma zama, ma tô aiwamri, ĩwi robzeiꞌõ pese tõ da, ãhã na robzeiꞌõ ĩma ihâimana nhipai u.
28 Tahawa, wa za apâ ãma atẽme satõrĩ suꞌu zaꞌra waꞌwa, asiwi ꞌmadâꞌâ zahu zaꞌra waꞌaba wa, ãma ꞌre ato zaꞌra waꞌaba mono da, duré ĩma zama suru na robzeiꞌõ hã ĩma hâimana da, asabâdâ zaꞌra waꞌaba hã.
29 2:29-30 Tahawa, maꞌãpé asiwi âri wẽ waꞌaba, ato zaꞌẽtẽ na, Uburé Wanhibꞌapito zazeiꞌwai wa. Maꞌãpé duré ꞌre wazé pese zaꞌra waꞌaba mono, isine ꞌre idahâimana zaꞌra mono hã. E marĩ wa. Ta hã aré dâꞌâ wa, Cristuhu ma romhuri uꞌâbâ. Ta hã sina hâtâꞌâ ãna ma tô wei mo, ĩꞌãma sime da, a norĩ waꞌwa hã ĩꞌãma iꞌaimei waihuꞌu zaꞌra waꞌaba õ nhibrobꞌre.
30 ꞌMadâꞌâ 2:29
