Filipu 3:1-21
3 Ĩsisãnawã norĩ, maꞌãpé oto asima ꞌre rowẽ uptabi zaꞌra waꞌaba mono, Uburé Wanhibꞌapito ãma hã! Te ãma aima robꞌuiꞌéré zaꞌra waꞌaba pari nherẽ, te ãma aima irobꞌuiꞌéré zahu zaꞌra waꞌwa hã, te te ĩzadâꞌâ dai õ di. E marĩ wa. Ta hã aiꞌwawi za ꞌre simapa zaꞌra waꞌaba mono wa.
2 Maꞌãpé ꞌre asipibui pese zaꞌra waꞌaba mono, wapsã norĩ wi, tô marĩ te te ꞌre iꞌmanharĩ wasété zaꞌra mono norĩ wi hã. Ta norĩ hã te sadawa zaꞌréi ãna te te dama ꞌre ꞌru zaꞌra, ꞌre dasisihâiwata nhihâri zaꞌra mono da hã*.
3 E marĩ wa. Wa norĩ si wa tô sena na danhihâiwata nhihâri ne ré ꞌre wahâimana zaꞌra, wa te ꞌre isaze zaꞌra mono zéb uꞌâbâ. Duré wa norĩ si, wa ꞌRe ihâimana uꞌâsi mono ãma ꞌre wawata zaꞌra, Ipẽꞌẽzani wawa ꞌre ihâimana zaꞌra mono ré wa. ꞌRâwi ꞌre wasiꞌumnhasi zaꞌra mono õ di, marĩ, wahâimanazéb zarina wa te ꞌre iꞌmanharĩ zaꞌra mono zém na. Cristu Zezusihi ãma ꞌre iwahâimana zaꞌra mono zém na si wa wasiꞌãma ꞌre watobꞌuzu zaꞌra.
4 Isarina tô aré, ĩzama marĩ tiꞌai ãma ꞌre ihâimana zaꞌra mono hã te ꞌre iꞌaꞌumnhasi mono da hã, ta hã pire na ꞌre ꞌmaihâimana mono ꞌwaꞌâhã. Niꞌwa hã ã hã marĩ te te ꞌre aꞌumnhasi mono da, te te ꞌre rosaꞌrata mono wamhã, wa hã wa aré isipai u ãne hã te ꞌre rosaꞌrata.
5 Ĩpotozém na 8 na bâdâ ĩꞌãma ne parimhã, ma tô ĩnhihâiwata nhizâri ni. Wa hã Izaraéu nhihudu na ĩpodo, Bẽzami na dawamri nhihudu. Wa hã duré Ebreu uptabi. Duré Mozési, ꞌRe ihâimana uꞌâsi mono nhimiroti zahi na te te irobꞌuiꞌérézé, te ꞌre iꞌabꞌmadâꞌâ pese mono zarina, wa tô farizeu na ꞌre ĩhâimana.
6 Wa tô te ĩsima ꞌre wẽ upta, ꞌRe ihâimana uꞌâsi mono ma si, ꞌre ĩhâimana mono da. Tahawa isazeiꞌwa norĩ ma, wa tô te ꞌre arobꞌmanharĩ wasété aré. Tawamhã niꞌwa hã te te ĩzada ꞌmasãmri waihuꞌu õ di, Mozési ꞌRe ihâimana uꞌâsi mono nhimiroti zahi na te te ãma irobꞌuiꞌéré upa na ꞌre ĩhâimana mono na hã.
7 Duréihã, uburé ã hã marĩ mono hã, ĩma hã ipire uptabi aré, iꞌuwaibaba newa. Tane nherẽ, ãhã na hã oto, Cristuhu uꞌâbâ, oto marĩ dai õ di, ĩma hã.
8 Ã norĩ si õ di. Uburé marĩ mono hã marĩ dai õ uptabi na wa oto te ꞌre abꞌmadâꞌâ. Ta norĩ nhipai u te wẽ uptabi na marĩ hã ꞌre hâimana. Ta hã Cristu Zezusi Ĩnhibꞌapito te iwaihuꞌuzé. Uburé marĩ mono hã wa tô sãmra, rob u, ropru da te ꞌre isãmra mono ne, Cristuhu ma si oto ꞌre ĩhâimana mono da,
9 duré taha siré si oto ꞌre ĩhâimana mono da. Te ĩsima sô ꞌre robꞌmadâꞌâ mono õ di oto, ꞌRe ihâimana uꞌâsi mono nhimiroti zahi te ꞌre iꞌabꞌmadâꞌâ pese mono zéb zarina, te te ĩwẽsãmri da hã. E marĩ wa. Cristu te ꞌre iꞌumnhasi mono zéb zarina si, te te ĩwẽsãmri wa. Ã hã isimiwẽsãmrizé hã tô ꞌRe ihâimana uꞌâsi mono hawip si, da te ꞌre iꞌumnhasi zaꞌra mono zéb zarina.
10 Te ĩsima iwẽ uptabi hã ãhã na hã, Cristu te iwaihuꞌu wẽ pese da si, duré apâ hâiwaꞌutu wa, iwaihuꞌu pe tãma ihâimana hã te pibu da. Wa duré ĩsima wẽ, te te irobzépata ne isiré te ꞌre robzépata mono da, duré idâꞌâzém ne te pibu da nherẽ, ĩdâꞌâzéb u,
11 taha zarina sô ĩnhimipari da, te sõpẽtẽ da, idâꞌâ norĩ siré ĩhâiwaꞌutuzé hã.
Isazeiꞌwa norĩ, dawara na ꞌre idasirẽme zaꞌra mono ne, ꞌre ihâimana zaꞌra mono zé
12 Te nharĩ õ di, uburé ãne hã te oto ĩsina iꞌuwaimrami zaꞌra na hã, niwamhã duré ĩwẽ uptabi na oto ꞌre ĩhâimana mono na hã. Tazahã, ãhã na hã wa wara uꞌâ, te sasãmri da, taha da, Cristu Zezusi hã ĩꞌãma sibꞌaꞌuwẽ wa.
13 Ĩsisãnawã norĩ, te ĩsina ꞌre rosaꞌrata mono õ di, ãne hã te isasãmri na hã. Tazahã, misi marĩ hã wa te ꞌre ꞌmanharĩ tô: Ãma ꞌre ĩpoꞌre puꞌu mono õ di oto, ĩhâimanazéb ꞌrata na hã. Duré ĩmorĩ na wa oto te uzusi uꞌâsi, marĩ ĩnhowa ihâimana zaꞌra zô.
14 Ĩwara na wa ãma te uzusi uꞌâsi, ĩwisi wa, marĩ iwẽ uptabi hã te âri da. Ta hã marĩ iwẽ uptabi hã dahâimanazé ité. Taha da, ꞌRe ihâimana uꞌâsi mono hã ma tô ĩzô hâ, iꞌrata ꞌre ĩnhamra uꞌâsi mono da, Cristu Zezusihi nhimiꞌmanharĩzéb uꞌâbâ.
15 Tahawa, uburé wa norĩ hã isazeiꞌwa na wapẽꞌẽ ꞌre, ꞌre iwaprédub zaꞌra mono hã wa za tô ãne hã wa te ꞌre rosaꞌrata zaꞌra. Tazahã oto, nima norĩ a norĩ waꞌwa hã niha na aimawi ꞌre ꞌmairosaꞌrata aba mono wamhã, ꞌRe ihâimana uꞌâsi mono si te za uburé te te aima ꞌre ahâiꞌré waꞌwa sõꞌawi.
16 Tahawa, wa te ãma uzusi uꞌâsi zaꞌra waꞌaba, ãwa bâtâ u wa te isasãmri zaꞌra zém na.
17 Ĩsisãnawã norĩ, asima sô ꞌre asõpré waꞌaba mono, ãma ĩsisanhozéb zarina ꞌre ĩnhizusi zaꞌra waꞌaba mono da. Duré asima ꞌre ꞌmadâꞌâ pese zaꞌra waꞌaba mono, ãma aima iwasisanho zaꞌra waꞌaba zéb zarina ꞌre ihâimana zaꞌra mono norĩ hã ꞌre sizusi zaꞌra waꞌaba mono da.
18 Daꞌahâ na te ꞌre dahâimana zaꞌra, Cristu wedepoꞌo nhonhiꞌrãmi na isaꞌozé nhitobꞌru na hã. Ãne na hã wa tô ãma aipoꞌre puꞌu ahâ zaꞌra waꞌwa. Tane nherẽ, ãhã na hã wa za duré ãma aipoꞌre puꞌu zahu zaꞌra waꞌwa, ĩsiwaꞌõ sina, ãma zaꞌra hã.
19 Ta norĩ hâimana ꞌrãsutu zéb ãma hã, te za ꞌRe ihâimana uꞌâsi mono hã te te ꞌre aꞌuprosi. Duré ꞌrâwi marĩ sihâiba ma si te te sima ꞌre iwẽ zaꞌra mono zép si te tô te te ꞌre ꞌruiwapari zaꞌra. Ta norĩ hã te ꞌrâwi sina ꞌre wata zaꞌra, marĩ iwasédé te te ꞌre iꞌmanharĩ zaꞌra mono na, siséb ãna. Marĩ tiꞌai ãma ꞌre ihâimana zaꞌra mono na si, te duré te te ꞌre rosaꞌrata zaꞌra.
20 Tanei õ di, wa norĩ hã. Hâiwa ãma wazaꞌrui uptabi zaꞌra hã, wa ꞌre wahâimana zaꞌra. Tahawa, watoi uptabi na wa ꞌre wanhimipari zaꞌra, Waꞌanhoꞌreptuiꞌwa zô Uburé Wanhibꞌapito Zezu Cristu, ta hawi za we imorĩ zô.
21 Wahâiba isibꞌuware duré idâꞌâ pe hã te za ãma wawi saprĩ zaꞌra, ihâiba wẽ uptabi na ꞌre ihâimana mono ne, oto ꞌre wahâimana zaꞌra mono da. Ta hã waihuꞌu pese uptabi na uburé marĩ te te ꞌre iꞌabꞌmadâꞌâ mono zém na te za ãne hã ꞌmanha.
Ĩwaꞌõtõ piꞌreba watsuꞌu mono
^ 3:2 Ta norĩ hã te zudeuꞌõ norĩ ma nherẽ, te te ꞌre ꞌru zaꞌra, ꞌre sisihâiwata nhihâri zaꞌra mono da, te te ꞌre saze zaꞌra mono wamhã, iꞌuwaibaba õ nherẽ.
