Hebreu 1:1-14
1 Duréihã ꞌRe ihâimana uꞌâsi mono hã ma tô tizadawa ꞌmahârâꞌwa norĩ ma te te ꞌre rowasuꞌu, ta norĩ hã wahiꞌrata norĩ ma, te te oto ãma ꞌre rowasuꞌu zaꞌra mono da, isadawa nhipai u. Ta norĩ ma, ma tô marĩ na misi si te te tãma ꞌre rowasuꞌu zaꞌra, ãma ipuꞌu na hã, ꞌRe ihâimana uꞌâsi mono te te tãma ꞌre iwaihuꞌu zaꞌra mono zép sidâpâsi.
2 Tane nherẽ, tiꞌra si ma tô oto pisutu, isadawa nhipai u te te oto wama ãma ꞌre irowasuꞌu zaꞌra mono zéb da hã, robꞌrãsutuzéb u romhutu na za ꞌre iwahâimana zaꞌra mono norĩ ma. Taha si ma tô Timama zadawa para uburé te te roꞌapoto. Taha si ma tô duré pisutu Imama hã, niwapsi uburé roptedeꞌwa na ꞌre hâimana mono da oto.
3 Õhõ si te oto Timama hã iwẽ uptabi na te te dama ꞌre wasuꞌu, rowaꞌa isaꞌẽtẽ ré na hã. Taha si te Timama ne ꞌre hâimana, aiwa wa. Tinhimiroti nhiptete na te uburé marĩ hã te te ꞌre aꞌupari wẽ, ꞌre siꞌutõrĩ tõ zaꞌra mono da. Õhõ si dawasédé hã te te dama ꞌre apari mono da, dazada dâꞌâ wa, taha pari hâiwaꞌutu wa, te oto ꞌRe ihâimana uꞌâsi mono nhimire niwĩ ꞌre sãmra hâiwa ãma, danhipai u iwaihuꞌu pese uptabi nhimire niwĩ, isiré te te ꞌre daꞌabꞌmadâꞌâ mono da oto, pire uptabi na.
Zezusi hã hâiwa ãma romhuriꞌwa norĩ ma, pire na ꞌre ihâimana mono zé wasuꞌu
4 Imama hã ma tô isisi hã tãma pisutu, sisi pire da, ꞌRe ihâimana uꞌâsi mono ꞌra na isisi da hã, uburé hâiwa ãma tãma iromhuriꞌwa norĩ nhisi ma, pire uptabi da. Tane ma duré Imama hã pisutu, hâiwa ãma romhuriꞌwa norĩ ma, pire uptabi na ꞌre hâimana mono da oto, iꞌra hã.
5 Duréihã ꞌRe ihâimana uꞌâsi mono mreme hã ãne:
“A hã ĩꞌra te ĩme ꞌre aihâimana mo. Tahawa, wa za oto ĩꞌra na te ꞌre asisi, dama aipire na ꞌre aihâimana mono da oto.”
Ãne duré imreme amo hã:
“Wa hã Imama na wa za tãma ꞌre ĩhâimana. Tahawa, ĩꞌra na te za duré ꞌre hâimana.”
Tawamhã e hâiwa ãma tãma iromhuriꞌwa norĩ ãma zama, ma tô ãne na hã tinha, ꞌRe ihâimana uꞌâsi mono hã. Mare di. Zezusihi ãma si, ma tô ãne na hã tinha.
6 Ãne te duré tinha, ꞌRe ihâimana uꞌâsi mono hã tiꞌra hã tiꞌai u za te te we isatõrĩzém na, daꞌra hã dama ꞌre ipoto ꞌrata zaꞌra mono ne, poto da:
“Uburé hâiwa ãma ꞌRe ihâimana uꞌâsi mono ma, romhuriꞌwa norĩ hã za tô ãma ꞌre iwata uꞌâsi zaꞌra mono da si, wa tiꞌru.”
7 Ãne na si ma tô duré hâiwa ãma romhuriꞌwa norĩ ãma hã tinha:
“ꞌRe ihâimana uꞌâsi mono hã ma tô hâiwa ãma tãma iromhuriꞌwa norĩ hã pisutu zaꞌra, rowaꞌuꞌu na ne ꞌre hâimana zaꞌra mono da, duré unhama roꞌo na ne ꞌre hâimana zaꞌra mono da.”
8 Tazahã, iꞌra si dama pire uptabi na ꞌre ihâimana mono zém na ma tô rowasuꞌu ꞌRe ihâimana uꞌâsi mono hã, ãne:
“A hã Ropotoꞌwa. Daꞌãma ꞌre asibꞌaꞌuwẽ mono zé hã aiwi ꞌre siꞌutõrĩ mono õ di za. Te za tô aima ꞌre hâimana uꞌâsi.Duré marĩ na ꞌre upai mono ãna, te za ꞌre idaꞌabꞌmadâꞌâ uꞌâsi mo.
9 Uburé marĩ iwẽ hã da te ꞌre iꞌmanharĩ zaꞌra mono si, aima wẽ uptabi di. Duré uburé marĩ iwasédé hã da te ꞌre iꞌmanharĩ zaꞌra mono si, ma tô daꞌãma ꞌre iꞌaꞌruiwapari mo.Tahawa, wa hã ꞌRe ihâimana uꞌâsi mono, Asibꞌapito hã wa tô aipisutu, uburé asiré ꞌre ihâimana zaꞌra mono norĩ nhipai u, aipire na tãma ꞌre aihâimana zaꞌra mono da, duré ãne zarina ãma ꞌre atoi uꞌâsi mono da.”
10 Ãne ma tô duré tiꞌra ma tinha, ꞌRe ihâimana uꞌâsi mono hã:
“A hã uburé Danhibꞌapito. Duréihã ropoto naꞌrata hawimhã ma tô tiꞌa hã iꞌmanha. Asiꞌuihâ na ma tô duré hâiwa hã iꞌmanha.
11 1:11-12 Tane nherẽ, te za niwamhã aiꞌutõrĩ zahuré za, sahuré ta norĩ hã, daꞌuza hã dawi ꞌre ihâsiwamnarĩ suꞌu zaꞌra mono ne. Duré daꞌuza pano pa hã dawi ꞌre hâsiwamnarĩ zaꞌra mono wa, rob u da te oto ꞌre sãmra mono da, da te ꞌre ihânhinha zaꞌra mono ne, te za ta norĩ hã iꞌuprosi zahuré, itép si ꞌmanharĩ zahuré da, isõwaꞌreꞌre. Daꞌuza ꞌrada hã da te oto dasiwi ꞌre wẽꞌõ zaꞌra mono wa, ihâtép si da te ãma ꞌre isaprĩ zaꞌra mono ne, te za tô itép si iꞌmanharĩ zahuré, tiꞌa norĩ hã, hâiwa me.Tane nherẽ, niwamhã aiꞌutõrĩ õ di za, a hã. Aiwétési te za ꞌre aihâimana uꞌâsi mo. Nimahã na hã ãma saprĩ waihuꞌu õ di za, aihâimanazém na hã. Tô õhõ na si, ꞌre iꞌaihâimana mono zé hã za.”
12 ꞌMadâꞌâ 1:11
13 Ãne ma tô duré ꞌRe ihâimana uꞌâsi mono hã tãma waihuꞌu siro:
“Ĩꞌrata te za ꞌre asãmra uꞌâsi mo ĩnhimire niwĩ, dama aipire na ĩsiré ꞌre aihâimana uꞌâsi mono da. Asitobꞌru norĩ nhiptetezé hã wa za tiwi uprosi zaꞌra, wapu na aima ꞌre hâimana zaꞌra mono da oto, duré aima sibꞌuware na ꞌre hâimana zaꞌra mono da oto.”
Tawamhã e hâiwa ãma tãma iromhuriꞌwa norĩ ma, ma tô ãne hã waihuꞌu zaꞌra, ꞌRe ihâimana uꞌâsi mono hã. Mare di. Tiꞌra ma si, ma tô ãne hã waihuꞌu siro, ta norĩ ma, pire uꞌâsi ꞌre hâimana mono wa za, Zezusi hã.
14 E niha tawamhã, hâiwa ãma romhuriꞌwa norĩ ꞌre ihâimana zaꞌra mono zé hã. Ta norĩ hã ihâibaꞌõ, ꞌRe ihâimana uꞌâsi mono ma, romhuriꞌwa norĩ. Ta norĩ si ma tô ꞌRe ihâimana uꞌâsi mono hã te te ꞌre satõrĩ zaꞌra tiꞌai u, za te te isõꞌreptu zaꞌra norĩ hã te te ꞌre pawaptob zaꞌra mono da, tiꞌab ré. Taha na si, ta norĩ nhimiromhurizé hã te tãma ꞌre hâimana zaꞌra.
