Hebreu 10:1-39
10 ꞌRe ihâimana uꞌâsi mono nhimiroti zahi na Mozési te te ãma irobꞌuiꞌéré zarina, iwẽ hã oto wama ꞌre ihâimana zaꞌra mono zém na wa te ãma ꞌre waihuꞌu uptabi zaꞌra mono õ di. Wahub sidâpâsi ma tô danhimizama hã dasiꞌudâna da te tãma ꞌre simroi uꞌâsi zaꞌra, ꞌRe ihâimana uꞌâsi mono ma hã, da te ꞌre sahâri zaꞌra mono ãna. Tane nherẽ, danhimizama da te tãma ꞌre isimroi mono zé hã sibꞌuware di, dawasédé hã tô sena te te dama ꞌre iꞌapari mono da hã, ãma ꞌre dawata zaꞌra mono da, ꞌrâwi dapẽꞌẽ na ꞌRe ihâimana uꞌâsi mono ãma ꞌre idanomro mono norĩ ma hã. Dapẽꞌẽ ꞌre, rowẽ na ꞌre idahâimana zaꞌra mono zéb da hã, sibꞌuware di tô, ꞌRe ihâimana uꞌâsi mono ma, danhimizama da te ꞌre isimroi mono zé hã.
2 ꞌRe ihâimana uꞌâsi mono ãma ꞌre idawata zaꞌra mono norĩ hã danhimizama hã dasiꞌudâna da te tãma ꞌre isimroi mono zém na, õhõ haré dawasédé hã te te dama ꞌre apari uptabi mono ꞌwaꞌâhã, taha zarina ꞌrâwi ꞌre dasiwẽꞌõ uꞌâsi zaꞌra mono õ di aré, dawasété na hã. Taha zarina te aré oto danhimizama pãrĩ hã da te ꞌre sahâri zaꞌra.
3 10:3-4 Tane nherẽ, powawẽ ibaꞌõmo wapru hã duré poneꞌẽrebâi wapru hã dawasédé hã te te dama ꞌre pari uptabi zaꞌra mono õ di. Taré te za danhimizama hã wahub sidâpâsi dasiꞌudâna ꞌRe ihâimana uꞌâsi mono ma, da te ꞌre isimroi mono zéb zarina, ãma ꞌre dasipoꞌre puꞌu uꞌâsi zaꞌra, dawasété na ꞌre dahâimana zaꞌra mono wa.
4 ꞌMadâꞌâ 10:3
5 Tahawa, Cristu hã tiꞌai u wei imorĩzéb u, ma tô Timama ma tinha, ãne:“Danhimizama na duré dasazém na aima ꞌre danhoprub zaꞌra mono da, a hã asina sô ꞌre asimipari mono õ di.Tane nherẽ, ĩhâiba hã ma tô ĩma isõ, daꞌupana ĩsina aima ĩnhoprubzéb da hã.
6 Danhimizama hã dawasété parizéb da, wahuré danhoprubzé zatazém na da te ꞌre izata zaꞌra mono zém na ꞌre atoi mono õ di. Duré dawasété parizéb da, danhoprubzé, da te aima ꞌre isõmri zaꞌra mono na zama hã, asima ꞌre rowẽ mono õ di.”
7 Ãne te duré tãma tinha, Timama ma hã:“ꞌRe ihâimana uꞌâsi mono, wa hã wa wei ãwa mo tiꞌai u, ĩma ipisutuzéb zarina, te oto ĩsina uwaimrami da aima, ibaihâ na ĩwasuꞌu na duréihã da te ĩꞌãma irobꞌuiꞌéré zaꞌra zéb zarina.”
8 Ãne ma tô Cristu hã imorĩꞌrata na Timama ma rowasuꞌu, tô: “Danhimizama dawasété parizéb da, da te aima ꞌre izata zaꞌra mono zô, duré dasazém na aima ꞌre idanhoprub zaꞌra mono zô, asina ꞌre asimipari mono õ di a hã. Duré taha na a hã asima ãma ꞌre rowẽ mono õ di.” Ãne na ma tô Cristu hã Timama ma rowasuꞌu, Mozési hã isimiroti zahi na te te ãma irobꞌuiꞌéré zarina, ãne hã da te ꞌre ꞌmanharĩ zaꞌra mono nherẽ.
9 Taha pari, ma tô duré Timama ma siwasuꞌu, ãne: “Ãhãta wa hã wa tô wei mo tiꞌai u, ĩma ipisutuzéb zarina, te oto ĩsina aima ãma uwaimrami da.” Ãne ma tô Cristu hã Timama ma siwasuꞌu, duréihã dawasété parizéb da, danhimizama na duré dasazém na ꞌRe ihâimana uꞌâsi mono ma, ꞌre idanhoprub zaꞌra mono zé hã te te oto dawi sina sizâri da, taha nhowaꞌreꞌre tihâiba na tãma sõprub da oto, taha na si dawasédé hã te te dama ãma ꞌre apari mono da.
10 Zezu Cristu hã ꞌRe ihâimana uꞌâsi mono te te tãma ipisutuzéb zarina, tihâiba na tãma isõprum na te te ãma tãma uwaimrami wa, ma tô te te ꞌre waꞌaꞌupsõ wawasété wa, tãma ꞌre wanomro wẽ mono da oto. Misi haré ma tô tãma sisõ, dazada dâꞌâ da, tô õhõ na si dawasédé hã te te oto dama ãma ꞌre apari mono da.
11 Sasedoti norĩ hã awẽ sidâpâsi te te daꞌãma ꞌre romhuri zaꞌra, ꞌRe ihâimana uꞌâsi mono nhorõwa ãma. Danhimizama na ꞌre idanhoprub zaꞌra mono zé hã te ahâ uptabi na te te tãma ꞌre sõmri zaꞌra, ꞌRe ihâimana uꞌâsi mono ma, tô õhõ si. Tane nherẽ, ã norĩ hã danhimizama na ꞌre idanhoprub zaꞌra mono zém na hã, dawasédé hã te te dama ãma ꞌre pari waihuꞌu zaꞌra mono õ di.
12 Cristuhu si, ma tô misi haré tihâiba hã tãma tisõ, dazada dâꞌâ da, õhõ na si dawasédé hã te te dama ãma ꞌre apari mono da. Taha pari, te ꞌRe ihâimana uꞌâsi mono nhimire niwĩ ꞌre sãmra, pire uptabi na isiré te te ꞌre daꞌaꞌmadâꞌâ mono da oto, õne uꞌâsi.
13 Tame te oto Cristu hã sô ꞌre simipari uꞌâsi, ꞌRe ihâimana uꞌâsi mono hã tinhitobꞌru norĩ tipara nhimizusizéb zahâpâ, te te isõrézéb u.
14 Misi haré ꞌRe ihâimana uꞌâsi mono ma, dazada sisõmri wa, ma tô dawasété hawi te te ꞌre daꞌawaibu, ꞌRe ihâimana uꞌâsi mono nhibꞌaꞌuwẽ si oto ãma ꞌre danomro mono da.
15 ꞌRe ihâimana uꞌâsi mono Pẽꞌẽzani hã ma tô ãne na wama waihuꞌu zaꞌra, sena na wa te wasina ꞌre waihuꞌu zaꞌra mono da. Ãne te te wama ãma iwaihuꞌu naꞌrata zaꞌra zé hã:
16 “Nimahã bâtâ na wa za, te dama iropisutuzép té iwẽ hã dama pisutu, duréihã te dama iropisutuzém nhowaꞌreꞌre. Ãne, wa wa hã Uburé Danhibꞌapito hã aima wasuꞌu zaꞌra waꞌwa, ĩnhimiroti tém na te oto dama iropisutuzém na hã.Tawapsi wa za ĩnhimiroti hã dapẽꞌẽ ꞌre te dama ꞌre anhomri, iré ꞌre danomro uꞌâsi mono wa, da te ꞌre ꞌmadâꞌâ pese zaꞌra mono da, ĩmreme hã.”
17 Ãne ma tô duré iwasuꞌu nhanaꞌremhã wama waihuꞌu zaꞌra:“Dawasété na ꞌre ĩsipoꞌre puꞌu mono õ di za oto, marĩ, da te ꞌre iꞌmanharĩ wasété zaꞌra mono zém na hã.”
18 Ãhã wamhã, dawasédé hã ꞌRe ihâimana uꞌâsi mono te te oto daꞌãma ꞌre iꞌaꞌmadâꞌâ mono õ zéb da hã, marĩ dai õ di oto, danhimizama na tãma ꞌre idanhoprub zaꞌra mono zé hã. Ta hã tâibâ oto, marĩ dai õ wa.
ꞌRe ihâimana uꞌâsi mono u, ꞌrâwi dapẽꞌẽ na ꞌre idasihutu mono zé wasuꞌu
19 Ĩsisãnawã norĩ, Zezusihi wapru hã tiwi ipuꞌuzém na wazada idâꞌâzéb zarina, wa za oto wasina wapahi ãna ꞌRe ihâimana uꞌâsi mono u hã ꞌre wasihutu ꞌrâwi wapẽꞌẽ na, robzei uꞌâsi tãma ꞌre wamreme zusi mono da. Duréihã sasedoti norĩ hã, ꞌRe ihâimana uꞌâsi mono ꞌre isãmra mono zéb u, ꞌri ꞌre waꞌwa u ꞌre isisisi mono ne, wa za oto wa norĩ hã ꞌrâwi itẽme ꞌre wasihutu, wasina ꞌre wapahi zaꞌra mono ãna, tãma hã.
20 Duréihã ꞌRe ihâimana uꞌâsi mono ꞌre isãmra mono zéb ꞌre, ꞌri ꞌre waꞌwa nhitobzé hã zazahâ ihâpa hã te dawi ꞌre hâsipra uꞌâsi, itẽme ꞌre danhisisi tõ mono da. Tane nherẽ, Cristu hã ma tô oto wama ꞌridawa zaꞌra tidâꞌâzém na, zazahâ ihâpa na ꞌri ꞌre waꞌwa nhitobzé waꞌwaibaba, itẽme ꞌre idanhisisi mono ne, wapẽꞌẽ na itẽme ꞌre wasihutu mono da, ꞌRe ihâimana uꞌâsi mono u, robzei uptabi na ime ꞌre wanomro uꞌâsi mono da oto.
21 Sasedoti danhipai u Ipire uptabi hã te oto duré wama ꞌre hâimana zaꞌra. Taha si te oto tãma hã duré umnhasi na uburé ꞌRe ihâimana uꞌâsi mono nhibꞌaꞌuwẽ norĩ hã te te ꞌre aꞌmadâꞌâ, pire uptabi na.
22 Wawasété na ꞌre wanomro mono wa, wapẽꞌẽ na ꞌrâwi ꞌre iwasisãmri zaꞌra mono na, ꞌre iwasiwẽꞌõ zaꞌra mono zé hã ma tô Cristu tiwapru na hã te te wama ꞌre apari, duréihã sasedoti norĩ hã te te ãma ꞌre dahâiba wẽ zaꞌra mono da, danhimizama wapru na suru na te te ãma ꞌre idahâiba diꞌi zaꞌra mono ne. Sasedoti norĩ hã ꞌre sihâiba wasété zaꞌra mono ãna, ꞌRe ihâimana uꞌâsi mono u ꞌre sisisi mono da, ꞌre isihâiba upsõi pese zaꞌra mono ne, wa oto wa norĩ hã wahâiba upsõi pese ne tãma ꞌre wahâimana zaꞌra, ꞌRe ihâimana uꞌâsi mono ma si. Tahawa, wa za oto wapẽꞌẽ na ꞌrâwi itẽme ꞌre wasihutu, wahâimanazé sena ré si, ꞌRe ihâimana uꞌâsi mono u hã, õhõ si wa te oto wasina ꞌre iꞌumnhasi zaꞌra mono zéb zarina.
23 ꞌRe ihâimana uꞌâsi mono hã wama umnhasi zaꞌra di, te te wama ꞌre iꞌaropisutu mono zéb uwaibaba, te te wama ãma ꞌre iꞌaꞌuwaimrami mono da hã. Tahawa, wanhiptete sina wa za iwẽ uptabi zô ꞌre wanhimipari uꞌâsi zaꞌra, ꞌRe ihâimana uꞌâsi mono hã te te wama iropisutu zaꞌra zém na wa te ꞌre wawã zaꞌra mono ãna, sena na za wama ꞌre ihâimana zaꞌra mono na wa te dama ꞌre iwasuꞌu zaꞌra mono zéb zarina.
24 Wa za duré wasiꞌãma hã ꞌre wapoꞌre puꞌu uꞌâsi zaꞌra, marĩ na ꞌre iwasipawaptob zaꞌra mono zéb da na, duré taha zarina ꞌre iwasisawi pese zaꞌra mono zém na wa te wasima ãma ꞌre iꞌuwaimrami zaꞌra mono zéb da na, duré marĩ wẽ na wa te wasima ãma ꞌre iwaꞌrãmi wẽ zaꞌra mono zém na da zama.
25 Niꞌwam norĩ hã Cristuhu zazeiꞌwa dasiré ꞌre hâimana zaꞌra mono wa, rowahutu u dasiré ꞌre siꞌrãꞌõtõ mono nherẽ, ma tô ta norĩ hã oto rosahâri pese zaꞌra. Tane nherẽ, wa norĩ hã wasiré ꞌre iwasiꞌrãꞌõtõ mono zé hã wa te wasiwi sazâri õ di za. Wa za tô wasiré ꞌre wasiꞌrãꞌõtõ uꞌâsi, ãma ꞌre wasipawapto pese zaꞌra mono da, ꞌRe ihâimana uꞌâsi mono hã wa te wasina ꞌre iꞌumnhasi zaꞌra mono zém na si ꞌre wanhiptete zaꞌra mono da. E marĩ wa. Wanhibꞌapito apâ we imorĩzéb u hã bâdâ hã romhutu na aima waihuꞌu pese zaꞌra waꞌaba wa.
26 Niꞌwam norĩ hã Cristuhu wasuꞌuwẽ, sena na ꞌrâwi te te sina ꞌre waihuꞌu pese zaꞌra mono nherẽ, duré te te sima ꞌre iwẽ zaꞌra mono zéb zarina, ꞌre ihâimana wasété ꞌrata zaꞌra mono zém na si ꞌre hâimana uꞌâsi zaꞌra mono wamhã, marĩ hã ꞌre ꞌmaihâimana mono õ di, ta norĩ da hã, iwasédé te te tãma ꞌre ipari zaꞌra mono zéb da hã, ta norĩ ma.
27 Ta norĩ hã ꞌRe ihâimana uꞌâsi mono zada, ꞌre hâimana zaꞌra mono wa, te za ꞌRe ihâimana uꞌâsi mono hã uprosi unhama roꞌo zaꞌẽtẽ na, te te siwi ꞌre iwẽꞌõ pese zaꞌra mono norĩ hã. Tahawa, te za ta norĩ hã sina pahi na sina ꞌre simipari zaꞌra oto.
28 ꞌRe ihâimana uꞌâsi mono nhimiroti zahi na, Mozési te te ãma irobꞌuiꞌéré hã niꞌwam norĩ hã te te siwi ꞌre wẽꞌõ pese zaꞌra mono wamhã, ta norĩ hã ma tô da te dasiwi ꞌre simro, ãma ꞌre dapẽꞌẽzé waihuꞌu zaꞌra mono ãna. Marĩ iwasédé hã ta norĩ hã te te ꞌre ꞌmanharĩ zaꞌra mono ré, siwaptom na titõmo na iꞌmadâꞌâ zaꞌra ꞌwa norĩ hã, iwasété na te te dama ꞌre iwasuꞌu zaꞌra mono zéb zarina, ma tô da te dasiwi ꞌre simro, ta norĩ hã.
29 Ãne, duréihã ꞌRe ihâimana uꞌâsi mono nhimiroti ꞌrata wẽꞌõꞌwa norĩ ma hã, ꞌre ropipa zaꞌra mono di. E niha tawamhã za, ꞌRe ihâimana uꞌâsi mono ꞌra, te te siwi ꞌre iꞌruiwapari zaꞌra mono norĩ ma, ꞌre iromhâimana zaꞌra mono zé hã za. Tãma ꞌre ropipa uptabi zaꞌra mono di za tô. ꞌRe ihâimana uꞌâsi mono hã te za tô ta norĩ hã hâ zaꞌra zaꞌẽtẽ, robꞌrãsutuzéb ãma hã. Duré ꞌRe ihâimana uꞌâsi mono te te dama iropisutuzép té iwẽ na, Cristu hã dazada idâꞌâzé hã taré newa, te ta norĩ hã te te ãma ꞌre rosaꞌrata upa zaꞌra. Ta norĩ hã te duré ꞌRe ihâimana uꞌâsi mono Pẽꞌẽzani ãma te te ꞌre wasété uꞌâsi zaꞌra, isimizawi uptabi ãma hã.
30 Tahawa, te za tô ta norĩ hã nimahã na hã hâ zaꞌra, ꞌRe ihâimana uꞌâsi mono hã. Duréihã ma tô ãne na niꞌwa hã ãma robꞌuiꞌéré siro, ꞌRe ihâimana uꞌâsi mono mreme na hã. Ãne na hã ꞌRe ihâimana uꞌâsi mono mreme hã wama waihuꞌu pese zaꞌra di oto:“Wa hã ĩsiwaprosi wa za te ꞌre daꞌaꞌruiwaꞌâbâ. Ĩwétési wa za te dama ãma ꞌre awaꞌrãmi, marĩ, da te ꞌre iꞌmanharĩ wasété zaꞌra mono norĩ ma hã.”
Ãne duré ꞌRe ihâimana uꞌâsi mono mreme na robꞌuiꞌéré amo hã:“Wa hã Uburé Danhibꞌapito hã wa za iꞌuwaibaba uptabi na si te ꞌre daꞌahâ zaꞌra, dawasété na ĩsiwaprosi te ꞌre idaꞌawaihuꞌu mono zéb zarina.”
31 Niꞌwam norĩ hã ꞌRe ihâimana uꞌâsi mono nhibꞌrata, ꞌre irereꞌe mono ne, te te ꞌre hâ zaꞌra mono wamhã, tãma ꞌre ropipa uptabi zaꞌra mono di za, ta norĩ ma hã.
32 Maꞌãpé, ãma asipoꞌre puꞌu zaꞌra waꞌaba, duréihã Cristu hã Danhoꞌreptuiꞌwa na asina ꞌre iwaihuꞌu naꞌrata zaꞌra waꞌaba mono zém na hã, ꞌRe ihâimana uꞌâsi mono nhimipawaptobzéb zarina. Ta hawim haré, Cristuhu zazeiꞌwa oto ꞌre anomro aba mono wa, marĩ na ꞌre robzépata zaꞌẽtẽ zaꞌra waꞌaba mono nherẽ, ma tô asiptete sina ãma ꞌre aihâimana uꞌâsi zaꞌra waꞌaba mo, tiwi ꞌre aipizari zaꞌra waꞌaba mono ãna.
33 Nimahã na hã ma tô niꞌwam norĩ hã danhoꞌa te te aiꞌãma ꞌre wasété zaꞌra waꞌwa. Ma tô duré da te aima ꞌre robꞌmanharĩ wasété zaꞌra waꞌwa, danhoꞌa. Duré nimahã na asiré norĩ ma, da te ꞌre robꞌmanharĩ wasété zaꞌra mono wamhã, ma tô ꞌre ipawaptob zaꞌra waꞌaba mo, ta norĩ zu, da te aima ꞌre robꞌmanharĩ wasété zaꞌra waꞌaba mono da nherẽ.
34 Dazazéb ꞌre, ꞌre ihâimana zaꞌra mono norĩ ãma ꞌre aipẽꞌẽzé zaꞌra waꞌaba mono zéb zarina, ma tô ta norĩ me aipẽꞌẽ na ꞌre irobzépata zaꞌra waꞌaba mo, ihâiba zu. Duré asibro hã da te aiwi ꞌre waibui waꞌaba mono nherẽ, ma tô ato sina ꞌre aihâimana zaꞌra waꞌaba mo. Aiwi ꞌre robzeiꞌõ zaꞌra waꞌaba mono õ di, taha na hã. E marĩ wa. Tiꞌai ãma asibrom nhipai u, hâiwa ãma iwẽ uptabi hã isiꞌutõrĩꞌõ hã za aima ꞌre ihâimana zaꞌra waꞌaba mono na hã aima waihuꞌu pese zaꞌra waꞌaba wa.
35 Tahawa, Cristu hã aipahi ãna asina ꞌre iꞌumnhasi zaꞌra waꞌaba mono zé hã asiwi ꞌre iwẽꞌõ zaꞌra waꞌaba mono zéb zarina, ꞌre rẽme zaꞌra waꞌaba mono õ di za. Asiptete sina te za tô ãma ꞌre anomro uꞌâsi aba mo. Ãne ꞌre aihâimana zaꞌra waꞌaba mono wamhã, taha zarina te za ꞌRe ihâimana uꞌâsi mono hã iwẽ uptabi na aima waꞌâbâ zaꞌra waꞌwa, nimahã na hã.
36 Marĩ na ꞌre robzépata zaꞌra waꞌaba mono nherẽ, duré Cristuhu zazeiꞌwa ꞌre anomro aba mono wa, da te aima ꞌre robꞌmanharĩ wasété zaꞌra waꞌaba mono nherẽ, te za tô asiptete sina, asina ꞌre iꞌumnhasi uꞌâsi zaꞌra waꞌaba mo, tiwi ꞌre aipizari zaꞌra waꞌaba mono tõ da. Ãne zarina, asina tãma ãma ꞌre uwaimrami zaꞌra waꞌaba mono wamhã, ꞌRe ihâimana uꞌâsi mono te te aima ꞌre iwẽ zaꞌra waꞌaba mono zéb zarina, te za tô tãma ꞌre anomro wẽ waꞌaba mo. Tawapsi, te za ꞌRe ihâimana uꞌâsi mono hã te te aima iropisutu zaꞌra waꞌaba zém na iwẽ uptabi hã oto asina iꞌuwaimrami zaꞌra waꞌwa.
37 E marĩ wa. ꞌRe ihâimana uꞌâsi mono mreme na Ibaihâ iwazé pese na robꞌuiꞌéré hã, ãne:“Ta hã za we imorĩ hã niwamhã oto wei morĩ wamhã, sô rowaptâꞌâ õ di za. Romhutu na te za tô wei mo.
38 Niꞌwam norĩ hã te tãma ꞌre iwẽ zaꞌra mono zéb zarina si ꞌre inomro wẽ mono norĩ hã, ta norĩ hã Danhoꞌreptuiꞌwa na te te sina ꞌre ĩzaze zaꞌra mono zéb zarina si, wa za te ꞌre awẽsãmri, iwasédé hã te ãma ꞌre aꞌmadâꞌâ mono õ wa za oto, ta norĩ ãma hã. Ãne wa, te za rowẽ uptabi na ĩꞌrata ꞌre hâimana uꞌâsi zaꞌra, ta norĩ hã.Tane nherẽ, niꞌwam norĩ hã ĩwi ꞌre sipizari zaꞌra mono wamhã, ãma ꞌre ĩtoi waihuꞌu zaꞌra mono õ di za oto, ta norĩ ãma hã.”
39 Tane nherẽ, ta norĩ ne, wa norĩ hã ꞌre wahâimana zaꞌra mono õ di oto. Nimahã na ꞌRe ihâimana uꞌâsi mono wi ꞌre wasipizari zaꞌra mono õ di, ta norĩ ne. Tahawa, ꞌRe ihâimana uꞌâsi mono hã niwamhã ta norĩ zu te te waꞌuprosi õ di za. Taha si wa tô wa te wasina ꞌre umnhasi uꞌâsi zaꞌra, te te ꞌre iwaꞌanhoꞌreptui mono da hã. Taha zarina te za tô wa norĩ hã waꞌanhoꞌreptu, iꞌrata oto ꞌre iwahâimana uꞌâsi zaꞌra mono da hã, ꞌrâwi.
