Hebreu 11:1-40
11 E niha, ꞌRe ihâimana uꞌâsi mono, wa te wasina ꞌre iꞌumnhasi zaꞌra mono zé hã. Ta hã te te wama ꞌre iꞌapisutu mono zéb zarina, iwẽ uptabi zô si ꞌre iwanhimipari uꞌâsi zaꞌra mono na, tô sena za te te wama ãma iꞌuwaimrami zaꞌra na, wa za wa te wasina ꞌre waihuꞌu zaꞌra. Duré uburé marĩ hã watõmo na wa te ꞌre iꞌmadâꞌâ waihuꞌu zaꞌra mono õ zama, wa za duré wa te ꞌre waihuꞌu zaꞌra, sena na ꞌre ihâimana zaꞌra mono na hã. Ãne ꞌRe ihâimana uꞌâsi mono, wa te wasina ꞌre iꞌumnhasi zaꞌra mono zé hã, te za wama ꞌre hâimana zaꞌra.
2 Duréihã wahiꞌrata norĩ hã, ꞌRe ihâimana uꞌâsi mono te te sina ꞌre iꞌumnhasi zaꞌra mono zéb zarina si, ma tô te te ꞌre awẽsãmri, ta norĩ hã.
3 ꞌRe ihâimana uꞌâsi mono, wa te wasina ꞌre iꞌumnhasi zaꞌra mono zéb zarina, wa tô, sena na wa te ꞌre waihuꞌu zaꞌra, ꞌRe ihâimana uꞌâsi mono te te inharĩzéb zarina, marĩ õ uptabi ré, te te iꞌaropoto mono na hã. Datõmo na da te ꞌre iꞌmadâꞌâ waihuꞌu zaꞌra mono õ na si, ma tô te te roꞌapoto, watõmo na wa te oto ꞌre iꞌmadâꞌâ zaꞌra mono da hã. Ãne na wa tô duré sena na wa te ꞌre waihuꞌu zaꞌra, ꞌRe ihâimana uꞌâsi mono si, wa te wasina ꞌre iꞌumnhasi zaꞌra mono zéb zarina hã.
4 Abéu hã, ꞌRe ihâimana uꞌâsi mono si te te sina ꞌre iꞌumnhasi mono zéb zarina, ma tô iwẽ uptabi na tãma tinhopru, ꞌRe ihâimana uꞌâsi mono ma. Caĩhĩ nhibzari si, te te wẽsãmri õ di, ꞌRe ihâimana uꞌâsi mono hã. Tahawa, Abéu hã ꞌRe ihâimana uꞌâsi mono si te te sina ꞌre iꞌumnhasi mono zéb zarina, ma tô ꞌRe ihâimana uꞌâsi mono hã wẽsã, ꞌre imorĩ wẽ na zama. Tahawa, ma tô Abéu nhoprubzép si wẽsã. Ãne na Abéu hã ꞌRe ihâimana uꞌâsi mono te te sina ꞌre umnhasi mono wa, duréihã dâꞌâ nherẽ, zahadu hâiba ré wama ꞌre ihâimana zaꞌra mono ne, te wama ꞌre hâimana zaꞌra, taha ãma duré ꞌre wasipoꞌre puꞌu uꞌâsi zaꞌra mono wa.
5 Duré Enoqui hã ꞌRe ihâimana uꞌâsi mono te te sina ꞌre iꞌumnhasi mono zéb zarina, ma tô hâiba ré mo, hâiwa u. ꞌRe ihâimana uꞌâsi mono hã ma tô hâiba ré sitẽme tiꞌâ. Tahawa, niꞌwa te te waihuꞌu õ di ta hã, idâꞌâzém na hã. Duréihã ꞌRe ihâimana uꞌâsi mono zadawa ꞌmahârâꞌwa hã ma tô ãne na rowasuꞌu ibaihâ na, Enoquihi wasuꞌu na hã: “ꞌRe ihâimana uꞌâsi mono hã hâiwa u sitẽme te te âri õ ré, ma tô Enoquihi ma ꞌre to, ꞌre imorĩ wẽ zéb zarina.”
6 Niꞌwam norĩ hã ꞌRe ihâimana uꞌâsi mono te te sina ꞌre umnhasi zaꞌra mono õ nherẽ, ta norĩ ma hã, ꞌre toi mono õ di za, ꞌRe ihâimana uꞌâsi mono hã. Duré niꞌwam norĩ hã ꞌRe ihâimana uꞌâsi mono ãma ꞌre wata zaꞌra mono da, tipẽꞌẽ na ꞌrâwi itẽme ꞌre sihutu mono da, te te sima ꞌre wẽ zaꞌra mono wamhã, tô sena ꞌre ihâimana mono na, te za te te ꞌre saze zaꞌra aꞌâ. Duré ꞌRe ihâimana uꞌâsi mono zô si ꞌre isõpré mono norĩ ma, iwẽ na za te te ta norĩ ma iwaꞌâbâ zaꞌra na, te za ta norĩ hã te te sina ꞌre umnhasi uꞌâsi zaꞌra.
7 Nowé hã, ꞌRe ihâimana uꞌâsi mono si te te sina ꞌre iꞌumnhasi mono zéb zarina, ma tô duré ãma saze, ropipa hã za dazô iwatobrozém na ꞌRe ihâimana uꞌâsi mono hã romhâ ré te te ãma ipoꞌre puꞌuzém na, zahadu marĩ hã titõmo na te te ꞌmadâꞌâ õ nherẽ, Nowé hã. Tahawa, isimiroti zarina ma tô ubaꞌre zaꞌẽne hã ꞌmanha, tiꞌra norĩ hã te te ãma sõꞌreptu zaꞌra da, duré timro zama hã, duré tisaniꞌaba norĩ zama hã te te ãma sõꞌreptu zaꞌra da. Taha zarina, ma tô ꞌRe ihâimana uꞌâsi mono hã siwi daꞌawẽꞌõ pese, dawasété na si ꞌre dahâimana zaꞌra mono wa, Nowéhé si isimiroti hã te te ꞌre ꞌmadâꞌâ pese mono wa. Tawamhã Nowé hã, ꞌRe ihâimana uꞌâsi mono si te te sina ꞌre umnhasi mono wa, ma tô ꞌRe ihâimana uꞌâsi mono hã ãma tiwata, ãne: “Ãhã si te ꞌre timorĩ wẽ.” Ãne ꞌRe ihâimana uꞌâsi mono hã, Nowéhé ãma iwatazé wasuꞌu hã.
8 Abraꞌã hã, ꞌRe ihâimana uꞌâsi mono si te te sina ꞌre iꞌumnhasi mono zéb zarina, ma tô duré isimiroti na saze, tirom nhiti watobro da, tiꞌa te te tãma ipisutuzéb u morĩ da, ãma isaꞌru da hã. Tawamhã tirom hawi ma tô watobro tô, tiꞌai amoi u morĩ da, tamomomhã bâdâdi hã te te waihuꞌu õ nherẽ, za ãma imorĩzéb da hã itẽme.
9 ꞌRe ihâimana uꞌâsi mono si te te sina ꞌre iꞌumnhasi mono zéb zarina, ma tô darob amoi ãma ꞌre sãmra Abraꞌã hã, dasiré õ nherẽ, ꞌRe ihâimana uꞌâsi mono, za ãma isaꞌru da hã te te tãma ipisutuzéb ãma. Ãhã wamhã, romhâ ꞌmanharĩ na ꞌri wa, te oto ꞌre sãmra, ꞌri uptabi õ wa. Izaqui norĩ hã ma tô duré romhâ ꞌmanharĩ na ꞌri wa, ꞌre simasisi zahuré, Zacoho me. Ta norĩ ma, ma tô duré ropisutu zahuré, Abraꞌãhã ma te te iropisutu ne, ꞌRe ihâimana uꞌâsi mono hã.
10 Abraꞌã hã ꞌri nhoꞌu isiꞌutõrĩꞌõ zô si ma tô ꞌre simipari uꞌâsi, ꞌRe ihâimana uꞌâsi mono hã te te sima iwẽzéb zarina, te te dazô iꞌri zô si hâiwa ãma. Tahawa, te te siwi wẽꞌõ õ di Abraꞌã hã, romhâ ꞌmanharĩ na ꞌri hã wasété wa, aꞌâ iꞌre ꞌre sãmra tõ mono da hã.
11 Abraꞌã hã ꞌRe ihâimana uꞌâsi mono si te te sina ꞌre iꞌumnhasi mono zéb zarina, ma tô duré iꞌra hã tãma podo, siꞌihi pese nherẽ, duré imro hã Sara hã préduptéb ré, ꞌra waihuꞌu õ nherẽ. ꞌRe ihâimana uꞌâsi mono te te tãma iropisutuzém na te te ãma sazei pese wa, ma tô iꞌra hã tãma podo tô.
12 Abraꞌã hã siꞌihi uptabi wa, idâꞌâzéb u romhutu nherẽ, ma tô ihâiba hawi daꞌahâ uptabi na hã dasina dahâꞌâ uꞌâsi, isihudu sidâpâsi. Wasi norĩ hã hâiwa na ahâ uptabi na ꞌre isimasa mono ne, ma tô daꞌahâ uptabi na hã atébré ni. Â zaihâ na supara, ahâ uptabi na ꞌre isimiꞌwara mono ne, ma tô atébré ni.
13 Ã norĩ hã ꞌRe ihâimana uꞌâsi mono te te sina ꞌre umnhasi zaꞌra mono ré, ꞌre dâꞌâ zaꞌra mono nherẽ, ꞌRe ihâimana uꞌâsi mono te te tãma iropisutu zaꞌra zé hã te te sima ꞌre waibui mono õ di ta norĩ hã, tiꞌai ãma hâiba ré ꞌre hâimana zaꞌra mono ré hã. Tane nherẽ, ꞌRe ihâimana uꞌâsi mono te te tãma iropisutu zaꞌra zé hã romhâ na uptabi na za te te tãma ãma iꞌuwaimrami zaꞌra na, sena na te te ꞌre waihuꞌu zaꞌra mono wa, ma tô ãma ꞌre to zaꞌra ta norĩ hã, tiꞌai ãma ꞌre nomro mono ré. Ma tô duré sõꞌawi dama ꞌre siwasuꞌu zaꞌra, tiꞌai ãma dasiré ꞌre ihâimana uptabi zaꞌra mono õ na hã.
14 Ãne na ta norĩ hã dama ꞌre siwasuꞌu zaꞌra mono wamhã, daro hã aimawi itéb zô ꞌre isõpré uꞌâsi mono zé, te wama wasuꞌu zaꞌra, taha na si za oto ꞌre irob uptabi zaꞌra mono na hã.
15 Tirob ꞌrata hawi ꞌre iwairébé mono na te te ꞌre rosaꞌrata zaꞌra mono õ di, ta norĩ hã. Mare di. Ãne ꞌwaꞌâhã, ãté te aré ta norĩ hã apâ tirob ꞌrata u ꞌre nomro.
16 Tane nherẽ, daro iwẽ uptabi zô si ma tô ta norĩ hã sima ꞌre sõpré, hâiwa ãma sô ꞌre ihâimana zaꞌra mono zô si, iwa ꞌre isiꞌubumroi uꞌâsi mono zéb da hã. Tahawa, ꞌRe ihâimana uꞌâsi mono te te siwi wẽꞌõ zaꞌra õ di, tinhibꞌapito na te te ꞌre sisi zaꞌra mono tõ da hã. Taha zarina, ma tô oto tô ꞌri nhoꞌu hã iwẽ uptabi hã tãma ꞌmanharĩ zaꞌra, iwa ꞌre isiꞌubumroi uꞌâsi mono zéb da hã, tirop téb ãma.
17 11:17-18 Abraꞌã hã ꞌRe ihâimana uꞌâsi mono si te te sina ꞌre iꞌumnhasi mono zéb zarina, ma tô aré tiꞌra hã tãma tiwĩ Izaqui hã, tãma ãma isõprubzéb da, ꞌRe ihâimana uꞌâsi mono hã te te pibui wamhã. Taha õ ré, ma tô ꞌRe ihâimana uꞌâsi mono hã tãma ropisutu siro, Abraꞌãhã ma hã, ãne:
“Aiꞌra Izaquihi hawip si, te za asihudu norĩ hã ahâ uptabi na ꞌre hâimana zaꞌra, asihudu sidâpâsi te aima iropisutuzéb zarina.”
Ãne na ꞌRe ihâimana uꞌâsi mono te te tãma ropisutu nherẽ, ma tô aré Abraꞌã hã tiꞌra hã tiwĩ Izaqui hã, iꞌra siꞌaibâ hã misi tãma poto nherẽ. Duré ta hawip si za isihudu norĩ hã sitébré da nherẽ, ma tô aré tãma tiwĩ, ꞌRe ihâimana uꞌâsi mono ma hã.
18 ꞌMadâꞌâ 11:17
19 Abraꞌã hã ãne ma tô sima rosaꞌrata: “ꞌRe ihâimana uꞌâsi mono ma si, waihuꞌu pese di, ꞌre dadâꞌâ zaꞌra mono nherẽ, apâ te te ꞌre idaꞌahâiwaꞌutu mono da hã. Tahawa, ĩꞌra hã te aré tãma iwĩrĩ hã, te te duré waihuꞌu pese di, apâ te te ĩma ihâiwaꞌutu da hã, te te ĩma iropisutuzém na te te ĩma ãma uwaimrami da hã.” Ãne ma tô sima rosaꞌrata, Abraꞌã hã. Tawamhã iꞌra Izaqui hã dâꞌâ uptabi õ nherẽ, aré dâꞌâ wa, apâ te te tãma ihâiwaꞌutu ne, ma tô dâꞌâ ãna tãma tisõ apâ, ꞌRe ihâimana uꞌâsi mono hã.
20 Duré Izaqui hã ꞌRe ihâimana uꞌâsi mono si te te sina ꞌre iꞌumnhasi mono zéb zarina, ma tô tiꞌra norĩ ãma rowaptẽ tiwi, iwẽ na si te te ꞌre pawaptob uꞌâsi zahuré mono da, duré iwẽ si te te tãma ꞌre pisutu zahuré mono da, Zaco norĩ ma hã Ezauhu me.
21 Duré Zaco hã ꞌRe ihâimana uꞌâsi mono si te te sina ꞌre iꞌumnhasi mono zéb zarina, ma tô Zuzéhé ꞌra norĩ ma rowaptẽ ꞌRe ihâimana uꞌâsi mono wi, iwẽ na si te te ꞌre pawaptob uꞌâsi zahuré mono da, duré iwẽ si te te tãma ꞌre pisutu zahuré mono da. Taha zarina, ma tô duré tisiwazusizém na siꞌupari sina ãma tiwata, ꞌRe ihâimana uꞌâsi mono ãma, Zaco hã.
22 Duré Zuzé hã ꞌRe ihâimana uꞌâsi mono si te te sina ꞌre iꞌumnhasi mono zéb zarina, ma tô tidâꞌâzéb u tidubꞌrata norĩ ma rowaihuꞌu siromo zaꞌra, Izaraéu nhihudu norĩ, za Ezitu hawi iwairébézém na hã. Ãne na, ꞌRe ihâimana uꞌâsi mono si te te sina ꞌre umnhasi mono wa, te duré tãma sina roti zaꞌra, iꞌuirĩ na si, ihi hã te te siwi âri da apâ, tizaꞌru ꞌrata u, tamep si te te siwi sẽrẽ da.
23 Duré Mozésihi mama norĩ hã, ꞌRe ihâimana uꞌâsi mono si te te sina ꞌre iꞌumnhasi zahuré mono zéb zarina, ma tô dawi simiꞌuri zahuré Mozési hã, ꞌwatébrémi na tãma poto zahuré wa. Duré tãma ꞌmadâꞌâ ze zahuré wa, tãma sawi uptabi zahuré di. Tahawa, ma tô dawi simiꞌuri zahuré. Aꞌamo hã siꞌubdatõ ma tô ãma aiꞌutõ, te te dawi isimiꞌuri zahuré zém na hã. Apito ma, ta norĩ hã pahi zahuré õ di, ꞌwatébrémi na ꞌre ipoto zaꞌra mono norĩ hã, te te dama ꞌre aꞌrui mono nherẽ. Ãne ma tô ꞌmanharĩ zahuré Mozésihi mama norĩ hã, ꞌRe ihâimana uꞌâsi mono si te te sina ꞌre iꞌumnhasi zahuré mono zéb zarina.
24 Mozési hã prédu wamhã, ꞌRe ihâimana uꞌâsi mono si te te sina ꞌre iꞌumnhasi mono zéb zarina, ma tô dawi sisawi, Ezitu ãma apito Faraꞌoho ꞌra sipiꞌõi ꞌra na da te dasima ꞌre wasuꞌu zaꞌra mono tõ da, piꞌõ te te iprédum na hã.
25 Apito Faraꞌoho nhorõwa ãma, uburé marĩ iwasédé hã te te aꞌâ dame ꞌre iꞌabꞌmanharĩ mono da hã, te te sima wẽ õ di Mozési hã, taha na si wẽ uptabi newa ãma ꞌre itoi mono da hã. ꞌRe ihâimana uꞌâsi mono nhibꞌaꞌuwẽ norĩ siré, te te ꞌre irobzépata mono da si, ma tô sima wẽ.
26 Apito Faraꞌoho nhorõwa ãma ꞌre sãmra uꞌâsi mono ꞌwaꞌâhã, te aré marĩ iwaꞌâbâ zaꞌẽtẽ na tinhibro pese, Ezitu ãma uburé marĩ hã iwaꞌâbâ zaꞌẽne hã ꞌre isimiꞌwara mono na. Ta hã marĩ waꞌâbâ zaꞌẽtẽ mono hã wẽ nherẽ, taha upana marĩ iwẽ uptabi si ma tô sima wẽ, Mozési hã. Danhoꞌreptuiꞌwa da, ꞌRe ihâimana uꞌâsi mono te te ipisutu ma si, te te ꞌre robzépata mono da si, ma tô sima wẽ pese. Iwẽ hã ꞌRe ihâimana uꞌâsi mono, niwa za te te tãma isõmri na si, ma tô te te ãma ꞌre rosaꞌrata uꞌâsi, Mozési hã.
27 ꞌRe ihâimana uꞌâsi mono si te te sina ꞌre iꞌumnhasi mono zéb zarina, ma tô duré Mozési hã watobro Ezitu hawi, apito Faraꞌo hã te te sima simimnhasi ãna. ꞌRe ihâimana uꞌâsi mono hã datõmo na da te ꞌre ꞌmadâꞌâ waihuꞌu zaꞌra mono õ nherẽ, Mozési hã titõmo na te te ꞌre iꞌmadâꞌâ mono na ne, te te sina ꞌre umnhasi mono wa, apâ sipiꞌrai õ di, Ezitu u hã. Õne haré ma tô ta hawi watobro, siptete sina.
28 Mozési hã ꞌRe ihâimana uꞌâsi mono si te te sina ꞌre iꞌumnhasi mono zéb zarina, ma tô duré Pascowa na dato hã te te ꞌre iꞌmanharĩ zaꞌra mono zéb da na tãma roti zaꞌra Izaraéu nhihudu norĩ ma hã, ta norĩ hã tisai ꞌmanharĩ na te te ãma sãnaꞌrata zaꞌra da, ꞌRe ihâimana uꞌâsi mono hã Mozésihi ma te te ipisutuzéb zarina. ꞌRe ihâimana uꞌâsi mono si te te sina ꞌre iꞌumnhasi mono zéb zarina, ma tô duré Mozési hã tãma roti zaꞌra Izaraéu nhihudu norĩ ma hã, tinhimizama wapru na ꞌridawa zadaꞌré hã te te ãma sapré zaꞌra mono da, hâiwa ãma romhuriꞌwa hã Dapãrĩꞌwa na iwaptẽrẽ hã, aibâ tãma ꞌre ipotoꞌrata zaꞌra mono hã te te tiwi simroi mono tõ da, Izaraéu nhihudu norĩ wi hã.
29 Duré Izaraéu nhihudu norĩ hã, ꞌRe ihâimana uꞌâsi mono si te te sina ꞌre iꞌumnhasi zaꞌra mono zéb zarina, ma tô â poré na hã saprĩ zaꞌra, zara u, Â ipré na â poré nhisi na. Â ꞌré na da te ꞌre isaprĩ zaꞌra mono ne, ma tô robꞌré na saprĩ zaꞌra, â zadaꞌré amoi u hã, iꞌuiwada u. Tane nherẽ, ezipsiu norĩ hã robꞌré na dazarina te te aré saprĩ zaꞌra da, siꞌabaꞌréi wamhã, ma tô â hã apâ iré atob zaꞌra. Tahawa, ezipsiu norĩ hã â poré na ma tô uburé aiꞌutõ.
30 Duré Izaraéu nhihudu norĩ hã, Zerico na ꞌri nhoꞌõmo nhisi ãma ꞌri ꞌwawi waꞌra ꞌrãihâ hã ma tô nasi te te uirĩ zaꞌra, sime da, ꞌRe ihâimana uꞌâsi mono te te tãma ipisutu zaꞌra zéb zarina. Bâdâ hã 7 na ma tô ãma aiꞌutõrĩ zaꞌra, te te nasi siwi uirĩ zaꞌra mono ré hã. Tawamhã ꞌri ꞌwawi waꞌra ꞌrãihâ hã ma tô aime. Ta norĩ hã ꞌRe ihâimana uꞌâsi mono si te te sina ꞌre iꞌumnhasi zaꞌra mono zéb zarina, ma tô aime.
31 Duré Raꞌabi hã piꞌõ aré iwaꞌâbâ zô ꞌre isisõmri mono hã, ꞌRe ihâimana uꞌâsi mono si te te sina ꞌre iꞌumnhasi mono zéb zarina, ma tô wapsãiꞌaꞌwa norĩ hã tinhorõwa u ꞌmazasi wẽ zahuré, tiꞌai wẽ zô piꞌuriwi dama robzabuiꞌwa norĩ hã. Tahawa, ꞌRe ihâimana uꞌâsi mono hã te te dazu wĩrĩ õ di Raꞌabi hã, ꞌri nhoꞌõmo ãma uburé ꞌRe ihâimana uꞌâsi mono nhimiroti ꞌmadâꞌâꞌõꞌwa norĩ zu hã.
32 Ãne na ꞌRe ihâimana uꞌâsi mono si, da te dasina ꞌre iꞌumnhasi zaꞌra mono zém na, ahâ uptabi na te ãma aima robꞌrãzarõtõ zaꞌra waꞌaba neza. Ãhã wamhã, ĩnhimirobꞌrãzarõno hã te aré sina tipahâ. E marĩ wa. Ahâ uptabi wa. Ahâ uptabi di tô, ꞌRe ihâimana uꞌâsi mono te te sina ꞌre iꞌumnhasi zaꞌra mono norĩ hã, zahadu te ãma aima irowasuꞌu zaꞌra waꞌaba õ hã: Gidiã hã, duré Baraqui, duré Sãsã, duré Zepté, duré Dawi, duré Samuéu, duré aimawi norĩ hã uburé ꞌRe ihâimana uꞌâsi mono zadawa ꞌmahârâ ꞌrata ꞌwa ꞌre ihâimana zaꞌra mono norĩ hã.
33 Ta norĩ hã ꞌRe ihâimana uꞌâsi mono si te te sina ꞌre iꞌumnhasi zaꞌra mono zéb zarina, ma tô te te daꞌãma ꞌre aiꞌuté zaꞌra, ꞌRe ihâimana uꞌâsi mono zadawa para, daro hã te te dawi ꞌre waibui mono da. Ta norĩ hã iwẽ si te te ꞌre ꞌmanharĩ uꞌâsi zaꞌra mono wa, ma tô iwẽ uptabi hã te te sima ꞌre waibu, ꞌRe ihâimana uꞌâsi mono te te tãma iropisutu zaꞌra zéb zarina. Duré huꞌu zérépa hã ma tô te te ꞌre sadaiꞌré nhitob zaꞌra tinhibꞌrata na, te te ꞌre simro tõ mono da.
34 Ta norĩ hã ma tô duré unhama roꞌo zaꞌẽne hã te te ꞌre simro, siwi. Ma tô duré dawi ꞌre sisõꞌreptu zaꞌra, sibꞌézé ꞌwapa na da te ꞌre simroi mono da nherẽ. Sibꞌuware na ꞌre hâimana zaꞌra mono nherẽ, ꞌRe ihâimana uꞌâsi mono nhimipawaptobzém na ma tô siptete na dazada ꞌre hâimana zaꞌra. Siptete uptabi na te te ꞌre daꞌwapé zaꞌra mono wa, ma tô ta norĩ hã tizahuiꞌwa norĩ hã te te ꞌre wanoꞌõ apâ, darob amoi hawi te te ꞌre idazahu zaꞌra mono norĩ hã.
35 Duré piꞌõ norĩ wi, aré tiwi ꞌre idâꞌâ zaꞌra mono norĩ hã, ma tô apâ tãma ꞌre hâiwaꞌutu zaꞌra, piꞌõ norĩ ma. Duré ta norĩ hã ꞌRe ihâimana uꞌâsi mono si te te sina ꞌre iꞌumnhasi zaꞌra mono norĩ hã dazazéb ꞌre, ꞌre hâimana zaꞌra mono ré, ꞌRe ihâimana uꞌâsi mono te te dawi ꞌre udâ zaꞌra mono ꞌwaꞌâhã, taha zarina te aré dazazém hawi da te tãma ꞌre robꞌru zaꞌra, ta hawi ꞌre wairébé mono da. Tane nherẽ, ta norĩ hã ꞌRe ihâimana uꞌâsi mono te te dawi ꞌre udâ waihuꞌu zaꞌra mono õ di. Tahawa, ma tô danhimirobꞌmanharĩ wasété na ꞌre siꞌutõrĩ. Rowẽ uptabi na ꞌre idanomro uꞌâsi mono zéb u hã, ꞌRe ihâimana uꞌâsi mono si te te ꞌre hâiwaꞌutu zaꞌra mono da, ma tô ãne zô si ꞌre siꞌmadâꞌâ zaꞌra, ta norĩ hã.
36 Niꞌwam norĩ ãma, ma tô duré ꞌre dawaꞌẽ zaꞌra. Powawẽ hâiwaré ꞌmanharĩ na ma tô da te dasiwi ꞌre hâ zaꞌra. Duré niꞌwam norĩ hã ma tô da te ꞌre pawasisi zaꞌra, isiꞌuwazi nhorõ rutu na, dazazéb ꞌre, da te ꞌre séme mono da hã.
37 Niꞌwam norĩ hã ma tô duré ẽtẽ tõmo wawẽ na da te ꞌre simro. Niꞌwam norĩ hã ma tô duré iwãiwa ãma ꞌre dasiwã zaꞌra, wedeꞌézém na ne. Sibꞌézé ꞌwapa na ma tô duré da te ꞌre simro. Poneꞌẽrebâi hâ na si ma tô duré niꞌwam norĩ hã ꞌre siꞌuza zaꞌra. Sibrob ãna ma tô duré ta norĩ hã ꞌre hâimana zaꞌra. Danhimirobꞌmanharĩ wasété na ma tô duré niꞌwam norĩ hã te te ꞌre robzépata zaꞌra, da te ꞌre ꞌruiwapari zaꞌra mono wa. Ãne ꞌRe ihâimana uꞌâsi mono si te te sina ꞌre iꞌumnhasi zaꞌra mono norĩ wasuꞌu ꞌrãzarõno hã.
38 Ta norĩ hã hâiwi si ma tô ꞌre nomro aꞌubuni wi, ẽtẽ ꞌrãihâ u zama. Duré ẽtẽ ꞌrãihâ zahâpâ ẽtẽꞌre wa, ma tô duré dawi ꞌre siꞌubumro, abꞌre wab zama. Ta norĩ si ma tô ꞌRe ihâimana uꞌâsi mono ma ꞌre hâimana wẽ zaꞌra.
39 Ta norĩ ãma si ma tô ꞌRe ihâimana uꞌâsi mono hã ꞌre wata zaꞌra uburé, õhõ si te te sina ꞌre umnhasi zaꞌra mono wa. ꞌRe ihâimana uꞌâsi mono te te tãma iropisutu zaꞌra zéb zarina, iwẽ uptabi hã tiꞌab ré te te sima ꞌre waibui mono õ nherẽ, ma tô te te sina ꞌre umnhasi uꞌâsi zaꞌra, ꞌre isiꞌutõrĩ zaꞌra mono zéb u.
40 ꞌRe ihâimana uꞌâsi mono hã iwẽ uptabi hã niwamhã za te te wama isõmri zaꞌra na, te te sima waꞌãma roti siromo zaꞌra wa, tiꞌab ré ta norĩ hã te te sima ꞌre waibui mono õ di tô, ꞌRe ihâimana uꞌâsi mono te te tãma iropisutu zaꞌra zé hã. Uburé wasiré si te za rowẽ uptabi na iꞌrata ꞌre ihâimana uꞌâsi zaꞌra mono zé hã sima waibu zaꞌra, ta norĩ hã.
