Hebreu 12:1-29
12 Duréihã niꞌwam norĩ hã ꞌRe ihâimana uꞌâsi mono te te sina ꞌre iꞌumnhasi zaꞌra mono zéb zarina, danhoꞌa ꞌre inomro wẽ mono norĩ hã ahâ uptabi na ꞌrâwi wamana wawi ꞌre isimasab uꞌâsi mono ne, wa za ta norĩ ãma ꞌre wasipoꞌre puꞌu uꞌâsi zaꞌra. Tahawa, wa za uburé marĩ iwasédé hã wa te wasiwi ꞌre wẽꞌõ pese zaꞌra, ꞌre iwanomro wẽ mono zé wi, te te ꞌre wanhowada zaꞌra mono tõ da, te te ꞌre iwawasutu uꞌâsi zaꞌra mono hã, wawasédé hã. Dawara na ꞌre dasipibu zaꞌra mono wa, dahâiba wapu na ꞌre dasisaꞌrei mono da, marĩ ipire hã dahâiba na dama ꞌre ihâimana zaꞌra mono hã da te dasisa ꞌre isani zaꞌra mono ne, wa za wawasédé hã wa te wasiwi ꞌre wẽꞌõ pese zaꞌra. Tawamhã wanhiptete na wa za tô ãma ꞌre wahâimana zaꞌra Cristuhu ãma si, tiwi ꞌre wasipizari zaꞌra mono ãna. Dawara na ꞌre dasipibu zaꞌra mono wamhã, dawara tete haré dasiwi ꞌre idasisaꞌrei mono ne, wa za tô wanhiptete na ãma ꞌre wahâimana uꞌâsi zaꞌra, Cristuhu ãma si.
2 Dawara na ꞌre dasipibu zaꞌra mono wa, dawara, da te ꞌre iꞌrãsutu zaꞌra mono zéb u si, da te ꞌre iꞌmadâꞌâ zaꞌra mono ne, wa za Zezusihi ãma si wa te wasina ꞌre rosaꞌrata uꞌâsi zaꞌra. Ta hã Zezusi hã ma tô isãnaꞌrata hawimhã te te ꞌre waꞌapawapto, ꞌRe ihâimana uꞌâsi mono si wa te wasina ꞌre umnhasi uꞌâsi zaꞌra mono da. Tane te za duré te te ꞌre waꞌapawaptob uꞌâsi, ꞌre iwadâꞌâ zaꞌra mono zéb u, õhõ si wa te wasina ꞌre umnhasi uꞌâsi zaꞌra mono da, tiwi ꞌre wasipizari zaꞌra mono ãna. Ta hã Cristu hã sihâiba zawi õ di, wedepoꞌo nhonhiꞌrãmi na dazada dâꞌâ tõ da hã, wedepoꞌo nhonhiꞌrãmi hã dazada ꞌre ihâimana wasété zaꞌra mono norĩ pãrĩzép si nherẽ. Taha waꞌrãmi, hâiwa ãma to sina ꞌre ihâimana uꞌâsi mono zé hã za tãma ꞌre ihâimana mono na, te te sina waihuꞌu siromo wa, tahawa, sihâiba zawi õ di tô, wedepoꞌo nhonhiꞌrãmi na dazada dâꞌâ tõ da hã. Ãhã na hã ꞌRe ihâimana uꞌâsi mono nhimire niwĩ, te oto pire uptabi na ꞌre sãmra, isiré ꞌrâwi te te ꞌre daꞌabꞌmadâꞌâ uꞌâsi mono da oto.
3 Maꞌãpé ãma rosaꞌrata pese zaꞌra waꞌaba, Zezusi hã tiꞌab ré te te ꞌre irobzépata mono na hã. Tiwasété si te te ꞌre iꞌmanharĩ zaꞌra mono norĩ hã te te ꞌre ꞌruiwapari zaꞌra mono wa, te te tãma ꞌre irobꞌmanharĩ wasété zaꞌra mono zém na, ma tô te te ꞌre robzépata zaꞌẽtẽ, Zezusi hã. Tane nherẽ, siptete uꞌâsi ma tô ꞌre hâimana. Tane duré a norĩ waꞌwa hã te za marĩ iwasété wi ꞌre asiꞌmadâꞌâ pese zaꞌra waꞌaba mo, asiptete sina ꞌre aihâimana zaꞌra waꞌaba mono da, aiwi ꞌre robzeiꞌõ zaꞌra waꞌaba mono tõ da. Taha zarina, ꞌRe ihâimana uꞌâsi mono hã asina ꞌre iꞌumnhasi zaꞌra waꞌaba mono zé hã aiwi ꞌre siꞌutõrĩ zaꞌra waꞌaba mono tõ da, te za tô asiptete sina ꞌre aihâimana zaꞌra waꞌaba mo.
4 Dawasété nhiptete da, asiptete sina ꞌre aihâimana zaꞌra waꞌaba mono nherẽ, zahadu aiꞌmatâꞌâ aba õ di, da te aima iꞌmairobꞌmanharĩ zaꞌẽtẽ aba na hã, Zezusi, ãma idâꞌâ ne hã.
5 E ma tô bété ãma aipoꞌre siꞌâri zaꞌra waꞌwa, ꞌRe ihâimana uꞌâsi mono te te aima iroti zaꞌra waꞌaba zém na hã, duré tiꞌra na te te aima inharĩ zaꞌra waꞌaba zém na hã. Ãne ma tô ãhã wasuꞌu na niꞌwa hã ãma robꞌuiꞌéré, duréihã:
“A norĩ waꞌwa hã ĩꞌra na ĩma ꞌre aihâimana zaꞌra waꞌaba mono nherẽ, aiwasédé hã ꞌre iꞌmanharĩ zaꞌra waꞌaba mono zém na ꞌre asisãmri zaꞌra waꞌaba mono da, wa hã Danhibꞌapito uptabi hã te ꞌre aihâ zaꞌra waꞌaba mono wamhã, ĩꞌãma ꞌre rosaꞌrata upa zaꞌra waꞌaba mono õ di za, taré newa.Duré apâ ꞌre anomro wẽ waꞌaba mono da, niha te aima ꞌre robꞌmanharĩ zaꞌra waꞌaba mono wamhã, aiwi ꞌre robzeiꞌõ zaꞌra waꞌaba mono õ di za. Te za ĩꞌãma asima ꞌre irosaꞌrata wẽ uꞌâsi zaꞌra waꞌaba mo.
6 E marĩ wa, aiwi ꞌre robzeiꞌõ zaꞌra waꞌaba mono õ di za. Wa hã Danhibꞌapito uptabi hã uburé te ꞌre iꞌazawi pese mono norĩ hã te ꞌre ahâ zaꞌra mono wa. Duré tiwasété na ꞌrâwi ꞌre sisãmri zaꞌra mono da, uburé ĩꞌra na te ꞌre isisi zaꞌra mono norĩ hã apâ ꞌre nomro wẽ mono da, wa wa hã te tãma ꞌre arobꞌmanharĩ, ta norĩ ma.”
Ãne wa, aiwi ꞌre robzeiꞌõ zaꞌra waꞌaba mono õ di za, ꞌRe ihâimana uꞌâsi mono te te ꞌre aihâ zaꞌra waꞌaba mono wamhã.
7 Damama norĩ hã bété. E tiꞌra norĩ hã te te ꞌre hâ zaꞌra mono õ di za, poꞌre ãna ꞌre hâimana zaꞌra mono wamhã. Te za tô te te ꞌre hâ zaꞌra. Tane te duré Aimama ꞌwa ꞌRe ihâimana uꞌâsi mono hã te te ꞌre aihâ zaꞌra waꞌwa. E marĩ wa. Iꞌra si tãma ꞌre aihâimana zaꞌra waꞌaba mono wa oto. Tahawa, marĩ na ꞌre robzépata zaꞌra waꞌaba mono nherẽ, te za sada ꞌre asiptete zaꞌra waꞌaba mo, aiwi ꞌre robzeiꞌõ zaꞌra waꞌaba mono ãna. ꞌRe ihâimana uꞌâsi mono ꞌra si, oto tãma ꞌre aihâimana zaꞌra waꞌaba mono wa, te te ꞌre iꞌaihâ zaꞌra waꞌaba mono zém na asina ꞌre waihuꞌu pese zaꞌra waꞌaba mono wa, te za tô sada ꞌre asiptete zaꞌra waꞌaba mo za.
8 Uburé te tô tiꞌra norĩ hã te te ꞌre ahâ zaꞌra ꞌRe ihâimana uꞌâsi mono hã, tiwasédé te te ꞌre iꞌmanharĩ zaꞌra mono zém na ãma ꞌre siwaihuꞌu zaꞌra mono da oto, ta norĩ hã. Tahawa, te te ꞌre aiꞌmaiꞌahâri aba mono õ wamhã, iꞌraꞌõ na te za ꞌrâwi ꞌre aiꞌmasiwaihuꞌu aba mo. Ãne wamhã, niꞌwa hã mama õ wa, da te ꞌre iꞌahâri mono õ ne, ꞌre aiꞌmaihâimana aba mono na te za ꞌrâwi ꞌre aiꞌmasiwaihuꞌu aba mo, sena na iꞌra na tãma ꞌre aiꞌmaihâimana aba mono õ na hã.
9 Tiꞌai ãma wamama uptabi norĩ hã wawasété na ꞌrâwi ꞌre wasiwaihuꞌu zaꞌra mono da, wanhimizaꞌrese wi te te ꞌre wahâ zaꞌra mono wamhã, wa tô ta norĩ hã wa te ꞌre hâimana wazéb zaꞌra, wama pire na ꞌre hâimana zaꞌra mono wa. Taha nhipai u, wa za duré hâiwa ãma Wamama uptabi hã wa te ꞌre wapari pese zaꞌra, te te ꞌre waꞌahâ zaꞌra mono nherẽ, rowẽ na õhõ ãma si ꞌre wanomro uꞌâsi mono da oto.
10 Tiꞌai ãma wamama uptabi norĩ hã ma tô wanhimizaꞌrese wi te te ꞌre waꞌahâ zaꞌra tô, ꞌre waprédub zaꞌra mono õ ré hã. Wawasété na ꞌrâwi ꞌre wasiwaihuꞌu zaꞌra mono da, ma tô te te ꞌre waꞌahâ zaꞌra, niwamhã iꞌuwaibaba uptabi õ nherẽ, damama norĩ nhimiꞌahârizé hã. Tazahã, ꞌRe ihâimana uꞌâsi mono si, te iꞌuwaibaba si te te ꞌre waꞌahâ zaꞌra. Te te ꞌre iwaꞌapawapto mono da si, te za tô tiꞌai ãma ꞌre wanomro mono ré, te te ꞌre waꞌahâ zaꞌra, wawasété ãna isine ꞌre wahâimana zaꞌra mono da oto, wa norĩ hã.
11 Wawasédé hã wa te ꞌre iꞌmanharĩ zaꞌra mono zém na ꞌrâwi ꞌre wasiwaihuꞌu zaꞌra mono da, ꞌRe ihâimana uꞌâsi mono te te ꞌre wahâ zaꞌra mono wamhã, awaꞌawi ꞌre watoi waihuꞌu zaꞌra mono õ di, taha na hã. Robzeiꞌõ na si wa za aꞌâ ꞌre wahâimana zaꞌra. Tane nherẽ, ꞌRe ihâimana uꞌâsi mono te te ꞌre iwahâ zaꞌra mono zém na oto ꞌrâwi ꞌre wasiwaihuꞌu zaꞌra mono wamhã, duré waꞌãma ꞌre ronomro pese zaꞌra mono wapsi, te za wapẽ hã iꞌre wama ꞌre simiꞌwara wẽ oto, õhõ ãma si ꞌre iwanomro wẽ mono zéb zarina wa.
ꞌRe ihâimana uꞌâsi mono mreme, da te ꞌre iwapari pese zaꞌra mono zé wasuꞌu
12 Tahawa, marĩ na ꞌre robzépata zaꞌra waꞌaba mono wamhã, aipẽꞌẽ wẽ zarina te za asiptete sina ãma ꞌre aihâimana zaꞌra waꞌaba mo, ꞌRe ihâimana uꞌâsi mono ãma si, aiwi ꞌre robzeiꞌõ pese zaꞌra waꞌaba mono wa, tiwi asina ꞌre aipahâ zaꞌra waꞌaba mono tõ da.
13 Bâdâdi na awaꞌawi uꞌâsi ꞌre idanomro mono ne, te za Cristuhu nhirã zarina si awaꞌawi ꞌre anomro uꞌâsi aba mo, iwẽ na si. Ãne wamhã, iꞌrãtẽire hã morĩ wasété na ꞌre imorĩ ne, niꞌwam norĩ hã Cristuhu ãma sibꞌuware na ꞌre ihâimana zaꞌra mono norĩ hã asine waꞌaba, awaꞌawi uꞌâsi ꞌre nomro wẽ mono wamhã, ta norĩ hã tiwasété na ꞌre siꞌmarõpãrĩ zahu zaꞌra mono õ di za oto. Apâ te za aiꞌãma ꞌre siptete zaꞌra waꞌwa, isazei uptabi ꞌwa na ꞌre iꞌaihâimana zaꞌra waꞌaba mono zém na.
14 Rowẽ zô te za ꞌre asõpré waꞌaba mo, dasiré ꞌre aihâimana zaꞌra waꞌaba mono da. Duré ꞌRe ihâimana uꞌâsi mono ma si ꞌre asisõmri uꞌâsi zaꞌra waꞌaba mono da, te za ꞌre asiꞌmadâꞌâ pese zaꞌra waꞌaba mo. Ãne hã niꞌwam norĩ hã ꞌre hâimana wẽ zaꞌra mono õ nherẽ, niwamhã Wanhibꞌapito hã titõmo na te te dame ꞌmadâꞌâ zaꞌra õ di za, ta norĩ hã.
15 ꞌRe aihâimana zaꞌra waꞌaba mono zém na, ꞌRe ihâimana uꞌâsi mono ma, asina tãma ãma ꞌre uwaimrami zaꞌra waꞌaba mono õ wa, tinhoprubzéb zarina, iwẽ uptabi hã te te aima ꞌre ipisutu zaꞌra waꞌaba mono hã ꞌre simini zaꞌra waꞌaba mono tõ da, te za ꞌre asiꞌmadâꞌâ pese zaꞌra waꞌaba mo. Wede pa hã, tiꞌai ꞌrowi ꞌre simiꞌwara mono ré hã, taha waꞌu isé hã dama simimnhasi õ di. Tane nherẽ, ipa hã da te oto ꞌre saꞌoꞌo zaꞌra mono wa, da te oto ꞌre huri mono wamhã, te za te te ꞌre daꞌrãiwamnarĩ zaꞌra, taha pa waꞌu hã sé wa. Tane duré, a norĩ waꞌwa hã te za niꞌwam norĩ wi ꞌre asiꞌmadâꞌâ pese zaꞌra waꞌaba mo, ta norĩ hã te te aiwi ꞌre rowasété zaꞌra waꞌaba mono tõ da, duré taha zarina a norĩ waꞌwa hã ꞌrâwi aiwasété na ꞌre asiꞌuptob zaꞌra waꞌaba mono tõ da, ta norĩ zu.
16 Duréihã Ezau hã tãma mrab uptabi wa, ma tô tino nhipi hã tiwi waptẽ, Zacoho wi. Tawamhã imama ma ipotoꞌrata zarina, uburé marĩ hã imama te te tãma ipisudu hã, duré ꞌRe ihâimana uꞌâsi mono, iwazéb zahi te te tãma ipisudu hã iꞌupana inoi ma ꞌre hâimana mono da, ma tô tinoi ma tiꞌru, isipi waꞌrãmi Ezau hã, taha na sai õ ré. Ãne hã Ezau hã ꞌre ihâimana wasété mono ne, te duré niꞌwam norĩ hã asiré ꞌre hâimana wasété zaꞌra waꞌwa. Ta norĩ wi, te za ꞌre asiꞌmadâꞌâ pese zaꞌra waꞌaba mo, sina ꞌre isipsaihuri zaꞌra mono norĩ wi, ꞌRe ihâimana uꞌâsi mono hâimanazé te te ꞌre iwazéb zaꞌra mono õ norĩ wi hã.
17 Tawamhã taha na ãma ronomro parip si, ma tô Ezau hã timama ma tinha, ꞌRe ihâimana uꞌâsi mono ma, ãma mreme da, iwẽ hã te te tãma ꞌre anhomri mono da, inoi upana. Tane nherẽ, ma tô imama hã siwi wẽꞌõ, ãma mreme tõ da. Tahawa, tiwasédé te te ꞌmanharĩ pari nherẽ, apâ te te sima pari waihuꞌu õ di, timama ma te te nharĩ sina, wawa ꞌrãihâ na wawa nherẽ. Ãhã wasuꞌu hã aima waihuꞌu pese zaꞌra waꞌaba di, ãne na hã.
18 Duréihã Izaraéu nhihudu norĩ hã ma tô Sinaꞌi na ẽtẽ ꞌrãihâ nhisi u sina rotété zaꞌra, tame aꞌâ iꞌrata siꞌubumro da, ꞌRe ihâimana uꞌâsi mono ꞌrata. Ta hã ẽtẽ ꞌrãihâ hã danhibꞌrata na da te upi waihuꞌu pese di. Tane nherẽ, a norĩ waꞌwa hã tane ꞌre aihâimana zaꞌra waꞌaba mono õ di oto, ãhã na hã. ꞌRe ihâimana uꞌâsi mono u, aipẽꞌẽ na ꞌrâwi itẽme ꞌre aihutu aba mono wamhã, marĩ hã asibꞌrata na ꞌre upi waihuꞌu zaꞌra waꞌaba mono õ di za. Izaraéu nhihudu norĩ si ma tô ꞌrâwi unhama roꞌo zaꞌẽne hã ꞌmadâꞌâ zaꞌra, ẽtẽ ꞌrãihâ nhisiwimhã. Tamemhã ma duré hâiwa nhirõtõ ꞌrãdâ hã watobro, iꞌrãdâꞌâra uptabi hã. Rowaꞌuꞌu zaꞌẽtẽ zama ma tô duré watobro, ẽtẽ ꞌrãihâ nhisi ãma hã. Ãne ma tô ta norĩ hã ꞌmadâꞌâ zaꞌra titõmo na, Izaraéu nhihudu norĩ hã.
19 Danhimnhihârâzé hã ihârâ ꞌrãihâ hã ma tô duré wapari zaꞌra. ꞌRe ihâimana uꞌâsi mono mreme zama ãhã wamhã, ma tô duré wapari zaꞌra, Izaraéu nhihudu norĩ hã. Ta hã te te wapari zaꞌra wamhã, ꞌRe ihâimana uꞌâsi mono hã niha te tãma robꞌmanharĩ zaꞌra õꞌumnhasite, ma tô sima wẽ zaꞌra, Mozésihi ma si te te rowaihuꞌu mono da, ꞌRe ihâimana uꞌâsi mono hã, hâiba pisutu.
20 E marĩ wa, ma tô ta norĩ hã ꞌRe ihâimana uꞌâsi mono ma tipahi zaꞌra, Izaraéu nhihudu norĩ hã. ꞌRe ihâimana uꞌâsi mono hã ma tô ẽtẽ ꞌrãihâ hâiba na tãma roti zaꞌra, ãne: “Niꞌwa hã ã ẽtẽ ꞌrãihâ te te upi wamhã, te za asiwi iwĩrĩ ꞌwa, ẽtẽ na. Duré asimizama zaꞌra waꞌaba zama, te te sina ꞌmaiꞌupi wamhã, te za iwĩrĩ ꞌwa, ẽtẽ na.” Ãne ma tô ẽtẽ ꞌrãihâ hâiba na ta norĩ ma mreme pire na tãma roti zaꞌra aré, ꞌRe ihâimana uꞌâsi mono hã. Taha pipa te, ma tô Izaraéu nhihudu norĩ hã sima wẽ zaꞌra, Mozésihi ma si, hâiba pisutu te te rowaihuꞌu mono da, ꞌRe ihâimana uꞌâsi mono hã.
21 Ã hã te te iꞌmadâꞌâ zaꞌra hã pipa uptabi wa, te Mozési hã ꞌrâwi sima tinha, ãne: “Ĩpahi wa, wa tãma rẽrẽ.” Ãne te sima tinha, Mozési hã. Ãne ma tô ropipa uptabi hã ẽtẽ ꞌrãihâ ãma isõꞌa iwatobro zaꞌra hã ꞌmadâꞌâ zaꞌra duréihã, Izaraéu nhihudu norĩ hã, ꞌRe ihâimana uꞌâsi mono u te te sina rotété zaꞌra wamhã.
22 Tazahã, a norĩ waꞌwa hã tane ꞌre aihâimana zaꞌra waꞌaba mono õ di oto, ãhã na hã. ꞌRe ihâimana uꞌâsi mono u aipẽꞌẽ na ꞌrâwi asina ꞌre robꞌumhutu zaꞌra waꞌaba mono wamhã, hâiwa ãma Siã na ẽtẽ ꞌrãihâ nhisi u ne, ma tô ꞌre irobꞌumhutu zaꞌra waꞌaba mo. Duré hâiwa ãma Zeruzalẽ hã ꞌri nhoꞌõmo u ne, ma tô ꞌre irobꞌumhutu zaꞌra waꞌaba mo, ꞌRe ihâimana uꞌâsi mono ꞌre isãmra uꞌâsi mono zéb u hã, hâiwa ãma tãma iromhuriꞌwa norĩ hã ahâ uptabi na, iꞌrata ꞌre isiꞌubumroi mono zéb u zama.
23 Tame te oto ꞌRe ihâimana uꞌâsi mono nhibꞌaꞌuwẽ norĩ hã to sina ꞌre siꞌrãꞌõtõ, aibâ hã dama ꞌre poto ꞌrata zaꞌra mono wa, dama isawi pese ne, ꞌRe ihâimana uꞌâsi mono te te ꞌre iꞌazawi pese mono norĩ hã, hâiwa ãma sisi uiꞌéré ré ꞌre ihâimana zaꞌra mono norĩ hã. Tamomo ma tô itẽme ꞌre irobꞌumhutu zaꞌra waꞌaba mo, dahâimanazém na iꞌuwaibaba si te te ꞌre idaꞌawaihuꞌu mono zéb zarina, daꞌãma rowairébéꞌwai u hã. Duré tiꞌai ãma ré iwẽ si te te ꞌre iꞌmanharĩ zaꞌra mono norĩ hã ꞌre ihâimana zaꞌra mono zéb u, ma tô duré ꞌre irobꞌumhutu zaꞌra waꞌaba mo, ꞌRe ihâimana uꞌâsi mono te te tãma ꞌre iwẽ zaꞌra mono zéb zarina si, rowẽ uptabi na oto ꞌre ihâimana zaꞌra mono norĩ u hã.
24 Zezusihi u ma tô duré asina ꞌre irobꞌumhutu zaꞌra waꞌaba mo. Ta hã te oto ꞌRe ihâimana uꞌâsi mono te te dama iropisutuzép té hã te te waꞌãma ꞌre abꞌmadâꞌâ uꞌâsi. Duréihã Caĩ hã tino te te wĩrĩ wa, iwapru hã tiwi puꞌu wamhã, ꞌRe ihâimana uꞌâsi mono te te iꞌruiwaꞌâbâzé, te wasuꞌu, Abéu wapru hã. Tanei õ di, Zezusihi wapru hã. Dazada dâꞌâ wa, iwapru hã tiwi puꞌu wamhã, ꞌRe ihâimana uꞌâsi mono hã dawasédé te te dama ꞌre iꞌapari mono zé, te wasuꞌu.
25 Tahawa, te za ꞌre asiꞌmadâꞌâ pese zaꞌra waꞌaba mo, ꞌRe ihâimana uꞌâsi mono hã te te aima ꞌre rowasuꞌu zaꞌra waꞌaba mono wamhã, tiwi ꞌre asipoꞌre nhitob zaꞌra waꞌaba mono tõ da. Duréihã Sinaꞌi na ẽtẽ ꞌrãihâ nhisi ãma, ꞌRe ihâimana uꞌâsi mono tiꞌai u te te we dama rowasuꞌu wamhã, isimiroti wapariꞌõꞌwa norĩ hã wairébé õ di, te te idahâ zaꞌra zé wi hã. Wa norĩ hã bété. E ꞌRe ihâimana uꞌâsi mono hã hâiwa hawi te te wei wama ꞌre aroti wẽ mono nherẽ, tiwi ꞌre wasipizari zaꞌra mono wamhã, e isimihâzé wi wasiꞌuihâ na ꞌre wawairébé mono da bâ, wa za bété wanhimipari ãna hã ꞌre wanomro uꞌâsi.
26 Duréihã ꞌRe ihâimana uꞌâsi mono hã Sinaꞌi na ẽtẽ ꞌrãihâ nhisi ãma te te dama roti wamhã, ma tô tiꞌa hã sãsãꞌã. Tane nherẽ, taha zaꞌu hã ma tô oto dama ropisutu, ãne: “Tiꞌa hã niwapsi wa za duré sãsãꞌã, irẽme ma. Tahawa, tiꞌa si hã niwamhã te sãsãꞌã õ di za oto. Hâiwa nhirõtõ zama hã, wa za oto isu sãsãꞌã za, nimahã na hã.” Ãne ꞌRe ihâimana uꞌâsi mono te te dama iropisutuzép tém na robꞌuiꞌéré hã.
27 E marĩ te tawamhã wama wasuꞌu zaꞌra imreme hã, “irẽme ma” na hã. Uburé za marĩ hã tiꞌai ãma, ꞌRe ihâimana uꞌâsi mono nhimipodo nimahã na te te sãsãꞌã zaꞌra wa, za isiꞌutõrĩ mono zé, te wama wasuꞌu zaꞌra. Tawamhã taha nhowaꞌreꞌre, te za iwẽ uptabi hã da te oto isãsãꞌã waihuꞌuꞌõ hã ꞌre hâimana uꞌâsi zaꞌra hâiwa ãma, isiꞌutõrĩ waihuꞌuꞌõ hã.
28 ꞌRe ihâimana uꞌâsi mono hã ꞌrâwi te te ꞌre waꞌabꞌmadâꞌâ mono da, iꞌrata ꞌre iwahâimana uꞌâsi zaꞌra mono zéb da hã, ma tô te te wama ꞌre apisutu, da te wawi ãma iꞌaiꞌuté waihuꞌu zaꞌra õ hã. Tahawa, wa za ꞌRe ihâimana uꞌâsi mono ãma ꞌre wawata uꞌâsi zaꞌra, sõpru wa. Te te sima ꞌre iwaꞌawẽ mono zéb zarina, wa za ãma ꞌre wawata uꞌâsi zaꞌra, wa te wasiwi ꞌre wazéb zaꞌra mono sina, wama ꞌre toi uꞌâsi mono da.
29 Wate ꞌRe ihâimana uꞌâsi mono hã ipoꞌreꞌõ norĩ te te uprosi waihuꞌu pese di, unhama roꞌo zaꞌẽtẽ na marĩ hã ꞌre isiꞌunhama pese mono ne hã. Tahawa, wa za tô wa norĩ hã imreme hã wa te ꞌre wapari uꞌâsi zaꞌra, Wanhibꞌapito nhimiroti hã.
