Hebreu 3:1-19
3 Ĩsisãnawã norĩ, a norĩ waꞌaba zama ma tô ꞌRe ihâimana uꞌâsi mono hã aipisutu zaꞌra waꞌwa, isibꞌaꞌuwẽ si oto ꞌre anomro aba mono da, hâiwa ãma iꞌrata ꞌre aihâimana uꞌâsi zaꞌra waꞌaba mono da. Tahawa, te za Zezusihi ãma si ꞌre irosaꞌrata uꞌâsi zaꞌra waꞌaba mo, ꞌRe ihâimana uꞌâsi mono hã tiꞌai u, we te te isatõrĩ na, duré dama isadawa wasuꞌuꞌwa na. Ta hã sasedoti ipire uptabi na te waꞌãma te te ꞌre romhuri uꞌâsi, iwasuꞌuwẽ na wa te ꞌre isaze zaꞌra mono zém na te te ꞌre waꞌapawapto mono da.
2 Ta hã ma tô ꞌRe ihâimana uꞌâsi mono ma, umnhasi sina te te tãma ꞌre romhuri wẽ uꞌâsi, te te tãma ꞌre iꞌapisutu mono zéb zarina si. Tane aiwa, duréihã Mozési hã ma tô ꞌRe ihâimana uꞌâsi mono nhibꞌaꞌuwẽ norĩ ma, umnhasi sina te te tãma ꞌre romhuri wẽ uꞌâsi zaꞌra.
3 Niꞌwa hã simiromhuri wẽ na te te sima ꞌri wamhã, te za ãma tatobꞌuzu zaꞌra ni, isimiromhuri wẽ na hã. E tawamhã ꞌri na si te za ãma tatobꞌuzu zaꞌra ni. Mare di. Taha nhipai u, te za ꞌri ꞌmanharĩꞌwai ãma zama tatobꞌuzu zaꞌra ni. Tane duré, Mozési hã dama pire na ꞌre hâimana mono nherẽ, taha hâimanazém nhipai u hã, Zezusihi si dama pire uptabi di.
4 Tiꞌai ãma uburé ꞌri hã danhibꞌrata na robꞌmanharĩ hã siꞌuihâ na ꞌre siꞌmanharĩ zaꞌra mono õ di. Tahawa, te ꞌriꞌwa norĩ hã ꞌri nhipai u, pire na ꞌre hâimana zaꞌra. Tane nherẽ, ꞌRe ihâimana uꞌâsi mono si ma tô uburé marĩ hã te te ꞌre abꞌmanharĩ. Tahawa, te uburé marĩ nhipai u, pire uptabi na ꞌre hâimana uꞌâsi ta hã siwaprosi.
5 Mozési hã ma tô ꞌRe ihâimana uꞌâsi mono ma, umnhasi sina te te tãma ꞌre romhuri wẽ uꞌâsi, isibꞌaꞌuwẽ te te tãma ꞌre ipawaptob zaꞌra mono zém na hã. Marĩ na ꞌRe ihâimana uꞌâsi mono hã za tiꞌab ré te te dama ꞌre iꞌarowaihuꞌu mono zém na, ma tô isibꞌaꞌuwẽ ma te te ꞌre rowaihuꞌu siromo zaꞌra, Mozési hã. ꞌRe ihâimana uꞌâsi mono ma, romhuriꞌwa na si, te ta hã ꞌre hâimana.
6 Tane nherẽ, te Cristuhu si tãma umnhasi na uburé isibꞌaꞌuwẽ norĩ hã te te tãma ꞌre ꞌmadâꞌâ pese zaꞌra, pire uptabi na, ꞌRe ihâimana uꞌâsi mono ꞌra hã. Wa norĩ hã Cristuhu ãma si ꞌre wanomro mono wa, da te wama ꞌre robꞌmanharĩ wasété zaꞌra mono nherẽ, wapahi ãna wanhiptete sina ãma ꞌre wanomro mono wamhã, wa za tô isibꞌaꞌuwẽ na tãma ꞌre wahâimana uꞌâsi zaꞌra. ꞌRe ihâimana uꞌâsi mono hã iwẽ si, za te te wama ipisutu zaꞌra zéb zô, wama umnhasi sina sô ꞌre iwanhimipari uꞌâsi zaꞌra mono zéb zarina, tiwi ꞌre wasipizari zaꞌra mono õ wamhã, tawapsi wa za tô isibꞌaꞌuwẽ na tãma ꞌre wahâimana uꞌâsi zaꞌra.
ꞌRe ihâimana uꞌâsi mono nhibꞌaꞌuwẽ norĩ ꞌre iwaꞌutu zaꞌra mono zé wasuꞌu
7 3:7-8 Duréihã niꞌwa hã ma tô ꞌRe ihâimana uꞌâsi mono pẽꞌẽzani zadawa para, ãne na ãma robꞌuiꞌéré:
“Ã bâtâ na, ꞌRe ihâimana uꞌâsi mono mreme hã wapari zaꞌra waꞌaba wamhã, aipoꞌre siꞌâri ꞌre aihâimana zaꞌra waꞌaba mono õ di za, aiꞌrã tete aba na. Duréihã aihiꞌrata norĩ waꞌwa hã ma tô ãne na hã poꞌre ãna sada tihâimana zaꞌra, ꞌRe ihâimana uꞌâsi mono da. Ta norĩ hã aꞌubuni wi ꞌre nomro mono ré, nimahã bâtâ na ma tô tiwasédé hã ꞌmanharĩ zaꞌra, ꞌRe ihâimana uꞌâsi mono hã niha zô te te sina pibu zaꞌra da, niha te te pé tãma robꞌmanharĩ zaꞌra õ zô, ãma iwaꞌa suꞌu zaꞌra õ na hã.”
8 ꞌMadâꞌâ 3:7
9 Ãne duré, ꞌRe ihâimana uꞌâsi mono mreme na robꞌuiꞌéré hã:
“Aihiꞌrata norĩ hã ma tô siwi ĩpibu, ãma ĩwaꞌa suꞌu zaꞌra õ zarina, niha te tãma robꞌmanharĩ zaꞌra õ zô pé, 40 na ãma wahub zaꞌra ré, marĩ iwẽ na si te ꞌre pawaptob uꞌâsi zaꞌra mono nherẽ.
10 Tahawa, wa tô ta norĩ hã oto ĩsiwi wẽꞌõ pese zaꞌra. Tahawa, wa tô ãne ĩsima tinha: ‘Ta norĩ hã ĩzô si ꞌre sõpré mono õ di oto. Ĩnhimiroti zarina si ꞌre ihâimana zaꞌra mono da hã, te te sima ꞌre wẽ zaꞌra mono õ di duré.’ Ãne ta norĩ ãma te ĩsima irotizé hã.
11 Tahawa, te oto ĩsiwi iwẽꞌõ zaꞌra zéb zarina, wa tô ĩmreme pire na ta norĩ ãma hã tinha, ãne: ‘Tô sena, ã norĩ hã nimahã na hã dame sisisi õ di za, tiꞌai wẽ u hã, iwa ꞌre iwaꞌutu zaꞌra mono zéb da, te aré tãma ipisutu zaꞌra zéb u hã.’ ”
12 Ĩsisãnawã norĩ, ꞌrâwi te za ꞌre asiꞌmadâꞌâ pese zaꞌra waꞌaba mo, ꞌRe ihâimana uꞌâsi mono nhimiroti hã asimirosaꞌrata wasété aba zarina, asiwi ꞌre wẽꞌõ zaꞌra waꞌaba mono wa, tiwi ꞌre aipizari zaꞌra waꞌaba mono tõ da, aré iꞌrata ꞌre dasiꞌubumroi uꞌâsi mono da, dapisutuꞌwai wi hã.
13 Awẽ sidâpâsi te za duré asimiroti na ꞌre asipawaptob uꞌâsi zaꞌra waꞌaba mo, aipẽꞌẽ toi uꞌâsi Cristuhu ãma si ꞌre anomro wẽ waꞌaba mono da, asiptete sina. Satanasihi nhimiroti wasédé hã wẽ newa, aiwasédé hã ꞌre ꞌmanharĩ zaꞌra waꞌaba mono tõ da, duré ꞌRe ihâimana uꞌâsi mono nhimiroti hã asiwi ꞌre wẽꞌõ zaꞌra waꞌaba mono wa, aiꞌrã tete na tiwi ꞌre aihâimana zaꞌra waꞌaba mono tõ da, te za tô ꞌre asipawaptob uꞌâsi zaꞌra waꞌaba mo, rowẽ na wasiré ꞌre wahâimana zaꞌra mono ré, tiꞌai ãma hã.
14 Wa norĩ hã Zezusi, wa te ꞌre isaze naꞌrata zaꞌra mono zém hawi, wa tô wa te ꞌre umnhasi zaꞌẽtẽ zaꞌra. Ta hawim haré, ꞌre iwadâꞌâ zaꞌra mono zéb u, wa te wasina ꞌre umnhasi uꞌâsi zaꞌra mono wamhã, tawapsi wa za Zezusihi siré ꞌre wahâimana uꞌâsi zaꞌra, isine dama wapire na wa te ꞌre daꞌmadâꞌâ uꞌâsi zaꞌra mono da.
15 Duréihã niꞌwa hã ꞌRe ihâimana uꞌâsi mono pẽꞌẽzani zadawa para, te te ãma irobꞌuiꞌéré na wa za ãma aima sahu zaꞌra waꞌwa, ãma aipoꞌre siꞌâri zaꞌra waꞌaba tõ da:
“Ã bâtâ na, ꞌRe ihâimana uꞌâsi mono mreme hã wapari zaꞌra waꞌaba wamhã, aipoꞌre siꞌâri ꞌre aihâimana zaꞌra waꞌaba mono õ di za, aiꞌrã tete aba na. Duréihã aihiꞌrata norĩ hã ma tô ãne na hã poꞌre ãna sada tihâimana zaꞌra, ꞌRe ihâimana uꞌâsi mono da hã.”
16 E ꞌwam norĩ hã ma tô bété ꞌRe ihâimana uꞌâsi mono mreme hã te te wapari zaꞌra nherẽ, siwi wẽꞌõ pese zaꞌra. E ꞌwam norĩ hã te bété wasuꞌu, ãne na ãma irobꞌuiꞌéré hã. Mozési hã ꞌRe ihâimana uꞌâsi mono waihuꞌu pese na, Ezitu hawi te te isimroi mono norĩ, te wasuꞌu zaꞌra. Maꞌãpé ãma asipoꞌre puꞌu zaꞌra waꞌaba aꞌâ, asiꞌuihâ na.
17 Duré, e ꞌwam norĩ hã ma tô bété ꞌRe ihâimana uꞌâsi mono hã siwi wẽꞌõ pese zaꞌra, Mozési hã Ezitu hawi te te dazani zaꞌra pari, 40 na daꞌãma wahub ré, aꞌubuni wi ꞌre danomro mono ré hã. Tô õ norĩ hã tiwasédé te te ꞌre iꞌmanharĩ zaꞌra mono norĩ hã ma tô siwi wẽꞌõ pese zaꞌra. Tiwasédé hã te te ꞌre iꞌmanharĩ zaꞌra mono zéb zarina, ma tô aꞌubuni wi aiꞌutõ, ta norĩ hã. Maꞌãpé ta norĩ wasuꞌu na ꞌre asipoꞌre puꞌu zaꞌra waꞌaba mono duré, waihuꞌu zaꞌra waꞌaba da.
18 ꞌRe ihâimana uꞌâsi mono hã ma tô ta norĩ ãma timreme pire na rowaihuꞌu siromo zaꞌra, ãne: “Ta norĩ hã nimahã na hã sisisi õ di za, tiꞌai wẽ u hã, iwa ꞌre iwaꞌutu zaꞌra mono zéb da, te aré tãma ipisutu zaꞌra zéb u hã.” Ãne ma tô ta norĩ ãma waihuꞌu siro, ꞌRe ihâimana uꞌâsi mono hã, duréihã aꞌubuni wi ꞌre nomro mono ré, ꞌRe ihâimana uꞌâsi mono nhimiroti te te siwi ꞌre iwẽꞌõ zaꞌra mono zéb zarina, poꞌreꞌõ uꞌâsi tiwi ꞌre ihâimana zaꞌra mono norĩ ãma hã.
19 Tawamhã e marĩ, wa za wa norĩ hã ãma waihuꞌu zaꞌra ni, ta norĩ wasuꞌu na hã. Ta norĩ hã ꞌRe ihâimana uꞌâsi mono si te te ꞌre saze zaꞌra mono õ wa, sisisi õ di, tiꞌai wẽ u hã, iwa ꞌre iwaꞌutu zaꞌra mono zéb da, te te aré tãma ipisutu zaꞌra zéb u hã. Tahawa, a norĩ waꞌwa hã ta norĩ ne aiwasédé hã ꞌre ꞌmanharĩ zaꞌra waꞌaba mono õ di za, ꞌRe ihâimana uꞌâsi mono nhimiroti si ꞌre iꞌmadâꞌâ zaꞌra waꞌaba mono õ zarina.
