Hebreu 4:1-16
4 Duréihã wahiꞌrata norĩ ma, te te ropisutu wamhã, e ta norĩ ma si ma tô rowẽ hã tãma pisutu zaꞌra, ꞌRe ihâimana uꞌâsi mono hã. Mare di. Wa norĩ ma zama ma tô wama pisutu zaꞌra oto, ꞌre idawaꞌutu uꞌâsi zaꞌra mono ne, ꞌre wahâimana zaꞌra mono da hã oto, rowẽ uptabi na. Tahawa, ꞌrâwi te za ꞌre asiꞌmadâꞌâ pese zaꞌra waꞌaba mo, ꞌRe ihâimana uꞌâsi mono te te wama iropisutu zaꞌra zé hã asiwi ꞌre simini zaꞌra waꞌaba mono tõ da, duréihã wahiꞌrata norĩ te te siwi isimini zaꞌra ne.
2 Ta norĩ hã ꞌRe ihâimana uꞌâsi mono nhimiropisutu wẽ hã te te wapari zaꞌra nherẽ, te te sina uwaimrami zaꞌra õ di, te te ãma saze zaꞌra õ wa. Tane duré, wa norĩ zama wa tô ꞌRe ihâimana uꞌâsi mono wasuꞌuwẽ hã wa te ꞌre wapari zaꞌra. Tane aiwa isimiropisutu wẽ na wa te ꞌre saze zaꞌra mono õ wamhã, wa norĩ zama tô wa te wasina ꞌre uwaimrami zaꞌra mono õ di za, te te wama iropisutu zaꞌra zé hã, ꞌre idawaꞌutu uꞌâsi zaꞌra mono ne, ꞌre wahâimana zaꞌra mono da hã oto, rowẽ uptabi na.
3 ꞌRe ihâimana uꞌâsi mono, wa te wasina ꞌre iꞌumnhasi zaꞌra mono norĩ si, wa za tô wasina wa te ꞌre uwaimrami zaꞌra, ꞌre idawaꞌutu uꞌâsi zaꞌra mono ne, rowẽ uptabi na oto ãma ꞌre iwahâimana uꞌâsi zaꞌra mono zéb da hã, te te wama iropisutu zaꞌra zém na. ꞌRe ihâimana uꞌâsi mono te te sina ꞌre iꞌumnhasi zaꞌra mono õ norĩ si te te sina ꞌre uwaimrami zaꞌra mono õ di za, rowẽ hã. Duréihã niꞌwa hã ma tô ãne na ãma robꞌuiꞌéré, ꞌRe ihâimana uꞌâsi mono mreme na, wahiꞌrata norĩ ãma hã:
“Te ĩsiwi iwẽꞌõ zaꞌra zéb zarina, wa tô ĩmreme pire na ta norĩ ãma tinha, ãne: ‘Tô sena, niwamhã dame sisisi õ di za, tiꞌai wẽ u hã, ꞌre idawaꞌutu zaꞌra mono ne, iwa ꞌre hâimana zaꞌra mono da, te aré tãma ipisutu zaꞌra zéb u hã.’ ”
E tawamhã, ꞌRe ihâimana uꞌâsi mono hã zahadu te te tãma pisutu zaꞌra õ wa, te te sina uwaimrami zaꞌra õ di, wahiꞌrata norĩ hã. Mare di. Taha wab õ di. Ropoto naꞌrata hawimhã ma tô uburé marĩ hã te te sima apisutu siromo, marĩ hã te te dama ãma ꞌre iꞌabꞌmanharĩ mono zéb da hã.
4 Duréihã ꞌRe ihâimana uꞌâsi mono zadawa wasuꞌu na ma tô niꞌwa hã ãne na ãma robꞌuiꞌéré, te te roꞌapoto mono pari, ãma iꞌawẽzém na hã, ãne:
“ꞌRe ihâimana uꞌâsi mono hã zahadu 6 na bâdâ hã ãma morĩ ré, ma tô te te roꞌapoto. Taha pari, oto awẽ wam na hã te oto waꞌudu, romhuri ãna.”
5 Ta hã ãne iwasuꞌu hã, duréihã wahiꞌrata norĩ ãma niꞌwa te te ãma irobꞌuiꞌérézé hã, ꞌRe ihâimana uꞌâsi mono mreme na:
“Tô sena niwamhã dame sisisi õ di za, tiꞌai wẽ u hã, aré ꞌre waꞌutu zaꞌra mono da, iwa ꞌre hâimana zaꞌra mono da, te aré tãma ipisutu zaꞌra zéb u hã.”
6 Duréihã tiꞌai wẽ wa, ꞌre idanomro wẽ mono zé wasuꞌu wapari ꞌrata ꞌwa norĩ hã, ta norĩ ꞌre idawaꞌutu uꞌâsi zaꞌra mono ne, iwa ꞌre hâimana zaꞌra mono da, ꞌRe ihâimana uꞌâsi mono te te tãma ipisutu zaꞌra zé hã te te sina uwaimrami zaꞌra õ di, isimiroti hã te te ꞌre ꞌmadâꞌâ zaꞌra mono õ wa, ta norĩ hã. E tawamhã õhõ haré ma tô dawi sizâ ꞌRe ihâimana uꞌâsi mono hã, ꞌre idawaꞌutu uꞌâsi zaꞌra mono ne, rowẽ uptabi na ꞌre idanomro uꞌâsi mono zé hã. Mare di. Siꞌutõrĩ waihuꞌu õ di, ta hã. Niꞌwam norĩ hã te za tô rowẽ uptabi na ꞌre idahâimana zaꞌra mono zéb u ꞌre sisisi, ꞌRe ihâimana uꞌâsi mono te te tãma ipisutu zaꞌra zéb zarina.
7 E niha wa za tawamhã ãne na sena na wa te ãma ꞌre waihuꞌu zaꞌra. ꞌRe ihâimana uꞌâsi mono hã ma tô bâdâ hã tô sena na pisutu, ꞌre idawaꞌutu uꞌâsi zaꞌra mono ne, rowẽ uptabi na ꞌre idanomro mono zéb u ꞌre idanhisisi mono zéb da hã. Tawamhã ãne te te pisutu wamhã, “ã bâtâ na” ma tô sisi, ꞌRe ihâimana uꞌâsi mono hã. Ãne na ma tô apito Dawi hã dama sadawa wasuꞌu, duréihã wahiꞌrata norĩ hã aꞌubuni wi ꞌre inomro mono zém hawi, ãma wahub ahâ zaꞌra parip si. Ãne apito Dawi te te ãma irobꞌuiꞌérézém na te ãma aima irobꞌuiꞌéré zaꞌra waꞌaba zé hã:
“Ã bâtâ na, ꞌRe ihâimana uꞌâsi mono mreme hã wapari zaꞌra waꞌaba wamhã, aipẽꞌẽ tete na aihâimana zaꞌra waꞌaba tõ.”
8 Duréihã Zozué tiꞌai wẽ u te te idanhimroi mono zé hã, e taha si, ꞌRe ihâimana uꞌâsi mono, ꞌre idawaꞌutu zaꞌra mono zéb da, te te dama ipisutuzé hã, te wasuꞌu. Mare di. Taha si õ di. Taha si ꞌwaꞌâhã, ꞌRe ihâimana uꞌâsi mono hã niwamhã te te aré wasuꞌu zahu õ di ãne hã, ꞌre idawaꞌutu uꞌâsi zaꞌra mono ne, rowẽ uptabi na ꞌre idanomro mono zé wasuꞌu hã.
9 ꞌRe idawaꞌutu uꞌâsi zaꞌra mono ne, rowẽ uptabi na ꞌre idanomro mono zé hã, te tô ꞌRe ihâimana uꞌâsi mono nhibꞌaꞌuwẽ norĩ ma ꞌre hâimana uꞌâsi zaꞌra, õne uꞌâsi, duréihã ropoto naꞌrata hawi bâdâ hã 6 na ãma siꞌutõrĩ pari, bâdâ misi na romhuri ãna iwaꞌutu ne, ꞌRe ihâimana uꞌâsi mono hã.
10 Niꞌwam norĩ hã ꞌre idawaꞌutu uꞌâsi zaꞌra mono ne, rowẽ uptabi na ꞌre idanomro mono zéb da hã, ꞌRe ihâimana uꞌâsi mono te te dama ipisutuzém na te te sina ꞌre iꞌuwaimrami zaꞌra mono norĩ hã, ꞌre siwasutu zaꞌra mono õ di za oto, taha na ꞌRe ihâimana uꞌâsi mono hã te te ꞌre awẽsãmri mono da. ꞌRe ihâimana uꞌâsi mono hã duréihã te te roꞌapoto mono pari, romhuri te te isazâri ne, ꞌre siwasutu zahu zaꞌra mono õ di za oto, ta norĩ hã apâ.
11 Tahawa, rowẽ uptabi na ꞌre iwanomro mono zéb zô si, wa za wasima ꞌre wanhopré uꞌâsi, ãma ꞌre wahâimana uꞌâsi zaꞌra mono da. Duréihã Izaraéu nhihudu norĩ hã aꞌubuni wi ꞌre nomro mono ré, ꞌRe ihâimana uꞌâsi mono nhimiroti te te siwi wẽꞌõ pese zaꞌra wa, ta norĩ hã te te sina uwaimrami zaꞌra õ di, ꞌre idawaꞌutu uꞌâsi zaꞌra mono zé hã. Ta norĩ ne, wa te wasiwi ꞌre simini tõ zaꞌra mono da, wa za tô taha zô si wasima ꞌre wanhopré uꞌâsi, iwẽ uptabi zô si.
12 ꞌRe ihâimana uꞌâsi mono zadawa wasuꞌu hã ihâiba ré ne, te tô wama ꞌre hâimana uꞌâsi zaꞌra. Siptete uptabi di duré imreme hã, uburé marĩ hã iꞌuwaibaba si te te dama ãma ꞌre iꞌabꞌmanharĩ mono zéb da hã, ꞌRe ihâimana uꞌâsi mono hã. Sibꞌézé ꞌwa pa siꞌuiwa iꞌwa pese ne, te wama ꞌre hâimana zaꞌra, isadawa wasuꞌu hã. Sibꞌézé iꞌwa pese na te za romnhi hã da te ꞌre nhizazari zaꞌra, ihi si da te ꞌre urĩrĩ zaꞌra mono da hã. Tane duré, ꞌRe ihâimana uꞌâsi mono zadawa wasuꞌu hã wa te ꞌre wapari zaꞌra mono wamhã, ꞌrâwi wapẽꞌẽ na wanhimirosaꞌrada iwẽ hã duré iwasédé hã wa za wa te ãma ꞌre waihuꞌu zaꞌra.
13 Marĩ hã ꞌRe ihâimana uꞌâsi mono wi isimaꞌuri pese na hã ꞌmaihâimana õ di, te te ꞌre iꞌabꞌmadâꞌâ mono õ na hã. Aiꞌuréiwi te uburé marĩ hã tãma ꞌre hâimana, sõꞌawi. Taha ma si, wa za nimahã na hã wahâimanazém na tãma wasiwasuꞌu zaꞌra ni, wahâiba mono bâ. Tahawa, wahiꞌrata norĩ ne, ꞌre wahâimana zaꞌra mono õ di za, wa norĩ hã.
Zezusi hã sasedoti ipire uptabi na te te daꞌãma ꞌre iromhuri mono zé wasuꞌu
14 Sasedoti ipire uptabi na te tô niꞌwa hã te te waꞌãma ꞌre romhuri uꞌâsi. Ta hã Zezusi, ꞌRe ihâimana uꞌâsi mono ꞌra. Timama u ma tô mo hâiwa u, ꞌrâwi te te tiwi ꞌre rowaptẽrẽ uꞌâsi mono da, wama zaꞌra. Tahawa, Zezusi, wa te ꞌre isaze zaꞌra mono zém na tô sena dama ꞌre iwasiwasuꞌu zaꞌra mono zéb zarina, wa za tô ta hawim haré wanhiptete sina ãma ꞌre wahâimana uꞌâsi zaꞌra.
15 Tawamhã tô õ hã sasedoti ipire uptabi na, te te waꞌãma ꞌre iromhuri mono hã, e wahâimana nhibꞌuware na ꞌre wahâimana zaꞌra mono nherẽ, waꞌãma ꞌre siwamri mono õ di za bété, ta hã. Te za tô waꞌãma ꞌre siwamri uꞌâsi. E marĩ wa. Ta hã ma tô Waꞌuburé hã te te ꞌre pibu aré, tiwasédé hã te te ꞌmanharĩ da, wawasédé hã wa te ꞌre ꞌmanharĩ zaꞌra mono da, te te ꞌre iwaꞌapibui uꞌâsi mono ne. Tane nherẽ, tiwasédé hã te te ꞌmanharĩ õ uptabi di, Zezusi hã.
16 Tahawa, wasina ꞌre wahâtâꞌâ zaꞌra mono ãna, wa za tô ꞌrâwi wapẽꞌẽ ꞌre, ꞌRe ihâimana uꞌâsi mono u ꞌre wasihutu, daꞌãma ꞌre siwãrĩ mono da, te te ꞌre idaꞌabꞌmadâꞌâ uꞌâsi mono u hã. Waꞌuburé te te ꞌre waꞌwapé zaꞌra mono ré, waꞌãma ꞌre siwamri mono da, duré waꞌãma ꞌre siwãrĩ mono da, wa za ãhã ré wapẽꞌẽ ꞌre, itẽme ꞌre wasihutu uꞌâsi, ꞌRe ihâimana uꞌâsi mono u hã.
