Hebreu 7:1-28
7 Ta hã Mequizédéqui hã Salẽ na ꞌri nhoꞌõmo nhisi ãma danhibꞌapito, ma tô dama ꞌre hâimana. Sasedoti na te duré dama ꞌre hâimana, ꞌRe ihâimana uꞌâsi mono ma, daꞌãma romhuriꞌwa na. Danhipai u dama pire uptabi na ꞌre ihâimana mono ma, romhuriꞌwa na te ꞌre hâimana. Duréihã Abraꞌã norĩ hã, danhibꞌapito norĩ, maparane siꞌuiwa na te te ãma aiꞌuté zaꞌra pari, apâ siꞌabaꞌréi ré, ma tô sõpẽtẽ Mequizédéqui hã, Abraꞌã hã. Tahawa, ma tô mreme pire na Mequizédéqui hã ãma mre, ꞌRe ihâimana uꞌâsi mono ma, marĩ hã iwẽ si te te tãma ꞌre apisutu mono da, Abraꞌãhã ma hã.
2 Tawamhã Abraꞌã norĩ hã te te daꞌãma aiꞌuté zaꞌra pari, danhibro te te iꞌwasari hã ma tô Abraꞌã hã tinhiptõmo hi zaꞌratazém hawimhã misi waze, te te ipo hã. Taha parimhã, ma tô misi tãma tisõ, Mequizédéquihi ma. Mequizédéquihi nhisi hã: “Danhibꞌapito, sena na si daꞌmadâꞌâꞌwa” te wasuꞌu. Duré iwaptẽrẽzéb amo hã “Salẽ ãma danhibꞌapito”, iwaptẽrẽzéb amo hã. Salẽ hã “rowẽ” te wasuꞌu. Taha zarina, Salẽ ãma danhibꞌapito na iwaptẽrẽzé hã, “Danhibꞌapito, dama rowẽ nhomriꞌwa” te wasuꞌu.
3 Taha mama nhisi uiꞌéré hã hâimana õ di, ibaihâ na hã, ina nhisi me. Ihiꞌrata norĩ nhisi uiꞌéré zama, hâimana õ di duré. Iwaptãꞌãzém na ãma irobꞌuiꞌéré hã hâimana õ di duré, idâꞌâzém na irobꞌuiꞌéré na zama. ꞌRe ihâimana uꞌâsi mono ꞌra ne, te pire na dama ꞌre hâimana uꞌâsi ta hã, Wanhibꞌapito ne, sasedoti na daꞌãma romhuriꞌwa ꞌre hâimana uꞌâsi mono wa.
4 Mequizédéqui hã dama pire uptabi di. Maꞌãpé ãne na ãma rosaꞌrata pese zaꞌra waꞌaba. Abraꞌã wahiꞌrata uptabi hã ma tô danhibro hã Mequizédéquihi ma poꞌo, pire na dama ꞌre hâimana mono wa, ta hã. Te te daꞌãma aiꞌuté zaꞌra pari, danhibro te te apâ siré iꞌwasari hã tinhiptõmo hi zaꞌratazém hawi ma te misi poꞌo. Taha pari, ma tô, tô misi tãma tisõ, Mequizédéquihi ma hã.
5 Levita norĩ hã sasedoti na dama ꞌre ihâimana zaꞌra mono hã, ꞌRe ihâimana uꞌâsi mono nhimiroti na Mozési te te ãma irobꞌuiꞌéré zarina, te za danhibro hã te te dawi ꞌre waibu, tisiré aꞌuwẽ norĩ wi, tô Izaraéu nhihudu norĩ wi. Danhibro hã danhiptõmo hi mono bâ da te ꞌre poꞌo zaꞌra mono parip si, misi te za da te tãma ꞌre sõmri zaꞌra, levita norĩ ma hã. Abraꞌãhã nhihudu si, siré ꞌre hâimana zaꞌra mono nherẽ, te za te te tãma ꞌre sõmri zaꞌra, levita norĩ ma hã.
6 Tawamhã Mequizédéqui hã Levihi nhihudu, ꞌre hâimana mono õ nherẽ, ma tô Abraꞌã hã danhibro hã tãma tisõ. Tinhiptõmo hi mono bâ te te poꞌo mono pari, ma tô misi tãma tisõ. Tawamhã Mequizédéqui hã mreme pire na ma tô ãma mre, ꞌRe ihâimana uꞌâsi mono ma, iwẽ uptabi hã te te tãma ꞌre apisutu mono da, Abraꞌãhã ma hã. Taha ma, ma tô ꞌRe ihâimana uꞌâsi mono hã tãma ropisutu, duréihã.
7 ꞌRe ihâimana uꞌâsi mono hã iwẽ hã te te dama ꞌre apisutu mono da, niꞌwa hã daꞌãma mreme wamhã, ta hã pire na dama ꞌre ihâimana mono. Ãne hã wama waihuꞌu pese zaꞌra di. Tahawa, wa za ãne na ãma waihuꞌu zaꞌra ni, Mequizédéqui hã Abraꞌãhã ma, pire na ꞌre ihâimana mono zém na hã.
8 Levita norĩ hã, sasedoti na daꞌãma romhuriꞌwa norĩ hã te za tô te te dawi ꞌre waibu danhibro hã, danhoprubzé da te tãma ꞌre ipoꞌo zaꞌra mono hã. Tane nherẽ, te za uburé ta norĩ hã ꞌre dâꞌâ zaꞌra, levita norĩ hã. Mequizédéquihi si, dâꞌâ ãna wama ꞌre ihâimana mono ne, te wama ꞌre hâimana sasedoti na hã, idâꞌâzém na ãma irobꞌuiꞌéré hã ãma hâimana õ wa, ibaihâ na hã.
9 7:9-10 Levi hã uburé sasedoti norĩ hiꞌrada te ꞌre hâimana, uburé daꞌãma romhuriꞌwa norĩ hiꞌrada, duré danhoprubzé te te dawi ꞌre iwaibui mono norĩ hiꞌrada. Mequizédéqui hã Abraꞌã te te sõpẽtẽ wamhã, Levi hã zahadu poto õ di. Tane nherẽ, te taha wamhã Abraꞌãhã hâiba ꞌre tihâiba, tihiꞌrata hâiba ꞌremhã. Tahawa, Abraꞌã hã danhibro, Mequizédéquihi ma te te poꞌo wamhã, taha nhipai u ma duré Levi hã tãma poꞌo, Abraꞌãhã hâiba ꞌre, hâimana wa. Tawamhã Mequizédéqui hã Levihi ma zama pire na ꞌre ihâimana mono zé, te wasuꞌu, ã hã.
10 ꞌMadâꞌâ 7:9
11 Duréihã ꞌRe ihâimana uꞌâsi mono hã ãma ꞌre dahâimana wẽ zaꞌra mono da, tinhimiroti te te dama ꞌre anhomri mono wamhã, ma tô duré sasedoti norĩ te te daꞌãma ꞌre iromhuri zaꞌra mono zéb da hã, te te dama ꞌre awaihuꞌu. Sasedoti norĩ hã levita norĩ tinhimiromhuri na ꞌRe ihâimana uꞌâsi mono ma, te te ãma ꞌre uwaimrami uptabi zaꞌra mono ꞌwaꞌâhã, taha zarina te aré ꞌRe ihâimana uꞌâsi mono hã te te ꞌre daꞌawẽsãmri, dawasédé hã taha zarina te te daꞌãma ꞌre abꞌmadâꞌâ mono õ wa aré. Tane nherẽ, ta norĩ hã tinhimiromhuri na te te ãma ꞌre uwaimrami uptabi zaꞌra mono õ di, ꞌRe ihâimana uꞌâsi mono ma hã. Tahawa, sasedoti ihâiba amo hã levita norĩ nhibrobꞌre isébré hã te oto dama ꞌre hâimana, Levihi nhihudu na ꞌre hâimana mono õ nherẽ, duré Arãhã nhihudu na hã ꞌre hâimana mono õ nherẽ. Mequizédéqui hã sasedoti na pire na dama ꞌre ihâimana mono ne, te ta hã dama pire uptabi na ꞌre hâimana oto.
12 Duréihã sasedoti norĩ hã ꞌRe ihâimana uꞌâsi mono ma daꞌãma romhuriꞌwa norĩ hã tinhimiromhuri na te te tãma ãma ꞌre uwaimrami uptabi zaꞌra mono õ wa, ta norĩ nhibrobꞌre sasedoti ihâiba amo hã ma tô duré ãzé. Sébré wamhã, ma tô duré ꞌRe ihâimana uꞌâsi mono hã tinhimiroti té hã isu dama tisõ, sasedoti norĩ hâimanazém na isimiroti ꞌrata na Mozési te te ãma irobꞌuiꞌéré nhowaꞌreꞌre.
13 Ta hã sasedoti ihâiba amo hã danhowaꞌreꞌre isébré té hã, Wanhibꞌapito, te wasuꞌu. Ta hã Levihi nhihudu na hã ꞌre hâimana mono õ di. Izaraéu ꞌra hâiba amo nhihudu te ꞌre hâimana. Niwamhã niꞌwa hã isiré Izaraéu ꞌra hâiba amo nhihudu hã sasedoti na dama ꞌre hâimana mono õ di, isine da hã. Mare uptabi di.
14 Wanhibꞌapito hã Zudaha nhihudu, te ꞌre hâimana. Ãne hã dama waihuꞌu pese uptabi di, iwasuꞌu na hã. Mozési hã, Zudaha nhihudu norĩ ãma te te dama ãma rowasuꞌu õ di, sasedoti na te te daꞌãma ꞌre iꞌmairomhuri mono da hã.
Sasedoti ihâiba amo Mequizédéquihi ne, dama ꞌre ihâimana mono zé wasuꞌu
15 Ãhã wasuꞌu hã wama waihuꞌu pese zaꞌra di oto. E marĩ wa. Sasedoti ihâiba amo hã oto danhowaꞌreꞌre wama sébré zaꞌra wa, Mequizédéqui hã sasedoti na dama ꞌre ihâimana mono ne, ꞌRe ihâimana uꞌâsi mono ma daꞌãma romhuri uptabi ꞌwa da hã oto.
16 ꞌRe ihâimana uꞌâsi mono nhimiroti ꞌrata na Mozési te te ãma irobꞌuiꞌéré zarina, ma tô levita norĩ si, sasedoti na dama ꞌre hâimana zaꞌra. E tawamhã Wanhibꞌapito hã Levihi nhihudu ꞌre hâimana mono wa, ma tô ãzé, sasedoti na dama ꞌre hâimana mono da. Mare di. Ta hã Levihi nhihudu ꞌre hâimana mono õ di. E marĩ zarina, ma te bété tawamhã ãzé. Ta hã siꞌutõrĩ waihuꞌu õ wa, ma tô ãzé, sasedoti na dama ꞌre hâimana uꞌâsi mono da. Nimahã na hã siꞌutõrĩ waihuꞌu õ di za tô, siptete uptabi wa, duré waihuꞌu pese uptabi wa.
17 Duréihã, ma tô niꞌwa hã ibaihâ na ãma robꞌuiꞌéré iwasuꞌu na hã, ꞌRe ihâimana uꞌâsi mono, tiꞌra ma te te irotizém na hã, ãne:
“A hã, sasedoti norĩ, dama ꞌre ihâimana zaꞌra mono ne, te za sasedoti na dama ꞌre aihâimana uꞌâsi mo, duréihã Mequizédéqui hã sasedoti na pire na dama ꞌre ihâimana mono ne.”
18 7:18-19 Ãne wa, ꞌRe ihâimana uꞌâsi mono nhimiroti ꞌrata na Mozési te te ãma irobꞌuiꞌéré hã pire na dama ꞌre hâimana mono õ di oto. E marĩ wa. Marĩ dai õ wa oto, te te ãma ꞌre idaꞌanhoꞌreptui mono zéb da hã. ꞌRe ihâimana uꞌâsi mono nhimiroti ꞌrata zarina, da te dasina tãma ꞌre uwaimrami waihuꞌu zaꞌra mono õ wa, taha na te te sima daꞌãma ꞌre aroti mono õ di, dawasédé hã te te oto daꞌãma ꞌre iꞌabꞌmadâꞌâ mono õ zéb da hã, duré taha zarina te te ꞌre idaꞌawẽsãmri mono da hã. Tahawa, aimawi hã iwẽ uptabi hã ma tô ꞌRe ihâimana uꞌâsi mono hã wama pisutu zaꞌra oto, sô ꞌre iwanhimipari zaꞌra mono zéb da hã: Cristuhu si te oto sasedoti na pire uptabi na dama ꞌre hâimana. Taha zô si wasina ꞌre wanhimipari zaꞌra mono wamhã, wa za itẽme ꞌre wasihutu wapẽꞌẽ ꞌremhã ꞌrâwi, ꞌRe ihâimana uꞌâsi mono u hã.
19 ꞌMadâꞌâ 7:18
20 7:20-21 Duréihã sasedoti norĩ hã daꞌãma romhuriꞌwa da, ꞌre sisisi mono wamhã, tinhisi na mreme pire na te te tãma ꞌre ropisutu zaꞌra mono õ di, ꞌRe ihâimana uꞌâsi mono hã. Tazahã, Zezusi hã dama sisasedoti da, ꞌRe ihâimana uꞌâsi mono te te oto pisutu wamhã, mreme pire na ma tô tãma ropisutu, ãne:
“Wa hã Danhibꞌapito uptabi, ĩmreme ipire na wa za oto aima ropisutu, ãne: ‘A hã sasedoti na te za dama ꞌre aihâimana uꞌâsi mo. Niwamhã te dawi aiwazere õ di za, ta hawimhã.’ Ãne wa aima ropisutu. Ĩnhimiropisutu na te aima ãma isaprĩ da hã, mare uptabi di za.”
21 ꞌMadâꞌâ 7:20
22 Ãne na Zezusihi ma, timreme ipire na te te tãma ropisutu wa, ꞌRe ihâimana uꞌâsi mono te te dama iropisutuzép té iwẽ uptabi hã te wasuꞌu. Duréihã ꞌRe ihâimana uꞌâsi mono te te dama iropisutuzém nhipai u iwẽ uptabi hã, te wasuꞌu.
23 Duréihã sasedoti norĩ hã ahâ uptabi na ma tô sisõwaꞌreꞌre te te daꞌãma ꞌre romhuri zaꞌra, ꞌre siꞌutõrĩ mono sidâpâsi.
24 Tazahã, Zezusi hã nimahã na tidâꞌâ na te te sahu õ di za. Õne uꞌâ te za ꞌre hâimana uꞌâsi. Tahawa, sasedoti na te za tô dama ꞌre hâimana uꞌâsi oto, watobro waihuꞌu ãna niꞌwai ma.
25 Tahawa, te te ꞌre daꞌanhoꞌreptui waihuꞌu pese mono di ta hã, da te dasina ꞌre iꞌumnhasi zaꞌra mono zéb zarina, ꞌrâwi dapẽꞌẽ ꞌre itẽme ꞌre idasihutu mono norĩ hã, ꞌRe ihâimana uꞌâsi mono u. ꞌRe ihâimana uꞌâsi mono ma, daꞌãma ꞌre mreme mono da, dama ꞌre hâimana uꞌâsi mono wa, te te ꞌre daꞌanhoꞌreptui waihuꞌu pese mono di, ta hã oto.
26 Tahawa, te oto õhõ si sasedoti ipire uptabi na hã wama ꞌre hâimana zaꞌra, Timama ma, te te waꞌãma ꞌre romhuri mono da. Taha si te ꞌre timorĩ wẽ uptabi. Õhõ si ma tô ꞌRe ihâimana uꞌâsi mono hã te te ꞌre wẽsãmri, marĩ te te ꞌre abꞌmanharĩ wasété mono õ wa. Tahawa, iwasédé hã sena na da te ãma ꞌre saꞌra waihuꞌu zaꞌra mono õ di. ꞌRe ihâimana uꞌâsi mono hã ma tô tãma pisutu, tiꞌai ãma dawasété na ꞌre idanomro mono norĩ nhiti ꞌre sãmra mono da oto, hâiwa ãma danhipai u dama pire uptabi na ꞌre hâimana uꞌâsi mono da.
27 Duréihã sasedoti norĩ ꞌre ihâimana zaꞌra mono ne, ꞌre hâimana mono õ di, Zezusi hã. Ta norĩ hã awẽ sidâpâsi te za tinhoprubzé hã siꞌudâna te te tãma ꞌre sõmri ꞌrata zaꞌra ꞌRe ihâimana uꞌâsi mono ma, tiwasété parizéb da hã. Taha pari, te za duré daꞌudâna zama danhoprubzé hã te te tãma ꞌre sõmri zaꞌra, dawasédé te te dama ãma ꞌre apari mono da. Tanei õ di, Zezusi hã sasedoti na te te waꞌãma ꞌre iromhuri zaꞌra mono zé hã. Niwa marĩ te te ꞌmanharĩ wasété waihuꞌu õ wa, awẽ sidâpâsi siꞌudâna tinhoprubzé hã te te tãma ꞌre anhomri mono õ di, Timama ma hã. Misi haré ma tô tinhoprubzém na hã tãma sisõ, ꞌRe ihâimana uꞌâsi mono ma, dazada dâꞌâ da, sihâiba zawi ãna tãma sisõmri wamhã, õhõ haré dawasédé hã te te oto dama ãma ꞌre iꞌapari mono zéb da hã.
28 Duréihã ꞌRe ihâimana uꞌâsi mono nhimiroti ꞌrata na Mozési te te ãma irobꞌuiꞌéré zarina, ma tô sasedoti da, te te ꞌre daꞌapisutu, ꞌRe ihâimana uꞌâsi mono hã. ꞌRe danomro wasété mono wa, danhibꞌuware na ꞌre dahâimana zaꞌra mono nherẽ, ma tô ãne da hã te te ꞌre daꞌapisutu. Tane nherẽ, ma tô ꞌRe ihâimana uꞌâsi mono hã timreme pire na tiꞌra ma ropisutu, taha si sasedoti na misi wama ꞌre hâimana zaꞌra mono da oto. Ta hã te uburé marĩ hã Imama te te tãma ꞌre iꞌapisutu mono zéb zarina, te te tãma ãma ꞌre aꞌuwaimrami uꞌâsi, Timama ma hã.
