Hebreu 9:1-28
9 ꞌRe ihâimana uꞌâsi mono hã imorĩꞌrada tinhimiropisutu ꞌrada iwẽ hã te te dama sõmri wamhã, ma tô dama pisutu zaꞌra, ãma ꞌre idawata zaꞌra mono zéb da hã. ꞌRe dazâmorĩ mono ré, danhimizahâri sidâpâsi, romhâ ꞌmanharĩ na ꞌri hã da te dasiwi isimizusi mono zéb da hã, ma tô duré dama pisutu, ãma ꞌre idawata zaꞌra mono zéb da hã, duré iwa ꞌre isãmra mono zéb da zama.
2 Duréihã romhâ ꞌmanharĩ na ꞌri hã danhimizahâri sidâpâsi, ꞌRe ihâimana uꞌâsi mono ma, da te dasiwi ꞌre isimizusi mono hã maparane te ꞌri ꞌre waꞌwa hã ꞌre hâimana zahuré. ꞌRi ꞌre waꞌwa imorĩꞌrata ãma, te robꞌuiwẽzé simaꞌwarazé hã ꞌre sa. Wedeza hã te duré iwa ꞌre sa, iꞌuꞌẽtẽ wapu ꞌRe ihâimana uꞌâsi mono ma, iwa da te ꞌre isaꞌra mono zéb da hã. ꞌRe ihâimana uꞌâsi mono te, ꞌri ꞌre waꞌwa hã ipese na iwẽ uptabi na isisi hã.
3 Duré zazahâ ihâpa na ꞌri ꞌre waꞌwa nhitobzé babarã niwĩ, ꞌre ihâimana mono hã maparane ãma ꞌri ꞌre waꞌwa hâiba amo nhisi hã, ꞌRe ihâimana uꞌâsi mono te, danhipai u iwẽ uptabi hã, iwa ꞌre isãmra mono zém na taha nhisi hã.
4 Tame te ẽtẽ waipo pré oru ꞌmanharĩ na wedewaꞌu zadaze zatazé hã ꞌre sa. Wedehâꞌre hã te duré ꞌri para ꞌre sa. Wedehâꞌre mana wawimhã, oru ꞌmanharĩ. Duréihã robꞌuiꞌéré na ꞌRe ihâimana uꞌâsi mono te te dama iropisutuzé iwẽ na, wedehâꞌre nhisi hã. Wedehâꞌre ꞌre, te oru ꞌmanharĩ hã simhi ne hã ꞌre sa, mana na dasa nhisi hã iꞌre ꞌre isaꞌwari mono hã. Arãhã nhiwedehu zama te duré wedehâꞌre wa ꞌre saꞌwari, duréihã ꞌRe ihâimana uꞌâsi mono nhimipawaptobzéb zarina, wedehu na isuire ꞌre iwairébé mono hã. Robꞌuiꞌéré hã te duré iwa ꞌre saꞌwari zahuré, ꞌRe ihâimana uꞌâsi mono hã te te tinhibꞌaꞌuwẽ norĩ ma iropisutuzé iwẽ na robꞌuiꞌéré hã, ẽtẽ tõmo baihâ na.
5 Wedehâꞌre nhisiwi te duré ropodo hã ꞌre simaꞌwara zahuré, robꞌmanharĩ hã ropoto hâiba hã isaripi ré hã. ꞌRe ihâimana uꞌâsi mono, tame ꞌre isãmra mono zé, te ta norĩ hã wasuꞌu zahuré. Wedehâꞌre nhisiwi, te ta norĩ hã duré ꞌre papo zahuré. Wedehâꞌre nhitobzé nhisi hã ꞌRe ihâimana uꞌâsi mono, dawasédé te te daꞌãma ꞌre iꞌaꞌmadâꞌâ mono õ zém na isisi hã. Ãne duréihã romhâ ꞌmanharĩ na ꞌri wasuꞌu hã. Tane nherẽ, ãhã na hã te ãma aima rowasuꞌu uptabi zaꞌra waꞌaba õ di za. Suru na wa tô ãma aima rowasuꞌu zaꞌra waꞌwa.
6 Ãne ma tô danhimizahâri mono sidâpâsi ꞌri paramhã marĩ hã sipuꞌu pese na iwa da te ꞌre saꞌra. Tawamhã sasedoti norĩ hã ꞌRe ihâimana uꞌâsi mono ma daꞌãma romhuriꞌwa norĩ hã awẽ sidâpâsi ma tô ꞌre sisisi, ꞌri ꞌre waꞌwa imorĩꞌrata u hã, tame iwa tinhimiromhuri mono bâ marĩ na te te ꞌre romhuri zaꞌra mono da.
7 Tane nherẽ, sasedoti norĩ nhibꞌapito, tisiré norĩ nhipai u ipire uptabi si ma tô maparane ãma ꞌri ꞌre waꞌwa u ꞌre zasi, ꞌRe ihâimana uꞌâsi mono te hã, danhipai u iwazé pese uptabi hã iwa ꞌre isãmra mono zéb u hã. Wahub sidâpâsi ma tô misi haré ꞌre zasi. Tamomo ꞌre zasi mono wamhã, danhimizama waprui ré, te ꞌre zasi, dawasédé za te te ãma dama ꞌre ipari mono zéb ré, ta hã ꞌRe ihâimana uꞌâsi mono ma, te te tãma ꞌre sõmri mono da, siꞌudâna, duré daꞌudâna zama, da te dasina ꞌre waihuꞌu zaꞌra mono õ nherẽ, dawasédé da te ꞌre iꞌmanharĩ zaꞌra mono zé, za te te dama ãma ꞌre ipari mono zéb da hã.
8 E marĩ te tawamhã wama wasuꞌu zaꞌra ãne hã, duréihã sasedoti norĩ hã ꞌRe ihâimana uꞌâsi mono ma, te te daꞌãma ꞌre iromhuri zaꞌra mono zé hã. ꞌRe ihâimana uꞌâsi mono Pẽꞌẽzani hã ma tô ãne hã wama waihuꞌu zaꞌra. Duréihã romhâ ꞌmanharĩ na ꞌri ãma hã, ꞌri ꞌre waꞌwa imorĩꞌrata u danhimizama hã dawasété parizéb da, ꞌRe ihâimana uꞌâsi mono ma, da te ꞌre isimroi mono zé hã, zahadu ꞌre hâimana mono ré, te ꞌri ꞌre waꞌwa hâiba amoi u da hã ꞌridawa sitom haré zahadu dawi ꞌre sa. Tahawa, ꞌRe ihâimana uꞌâsi mono, iwa ꞌre isãmra mono zéb u hã, zahadu itẽme ꞌre danhisisi waihuꞌu mono õ di. Ãhã wasuꞌu, te ã hã wama wasuꞌu zaꞌra.
9 E marĩ te duré wama wasuꞌu zaꞌra, ꞌri ꞌre waꞌwa imorĩꞌrata ãma danhimizama iwa da te ꞌre izata zaꞌra mono zé hã. Danhimizama hã dawasété parizéb da, da te tãma ꞌre isõmri zaꞌra mono zém na, dapẽꞌẽ ꞌre dadâꞌâ uꞌâsi ne ꞌre idanomro mono zéb zarina, dawasété si da te ꞌre ꞌmanharĩ zaꞌra mono wa, ꞌrâwi ꞌre idasiwẽꞌõ uꞌâsi zaꞌra mono zé hã da te dasima ãma ꞌre pari waihuꞌu zaꞌra mono õ di, dasiꞌuihâ na hã.
Duré, ꞌRe ihâimana uꞌâsi mono ma danhoprubzé hã, ãma ꞌre dawata zaꞌra mono da, da te tãma ꞌre isõmri zaꞌra mono zém na hã da te dasima ꞌre pari waihuꞌu zaꞌra mono õ di, dapẽꞌẽ ꞌre dadâꞌâ uꞌâsi ne ꞌre idanomro mono zéb zarina, dawasété si da te ꞌre ꞌmanharĩ zaꞌra mono wa, ꞌre idasiwẽꞌõ uꞌâsi zaꞌra mono zé hã. Ãne, wa te oto ãma ꞌre iwaihuꞌu zaꞌra mono zé hã, ã hã ipire wasuꞌu na hã.
10 ꞌRe ihâimana uꞌâsi mono ma, danhoprubzé, da te ꞌre isõmri zaꞌra mono zé hã dapẽꞌẽ ꞌre, da te dasima ꞌre irosaꞌrata zaꞌra mono zém na te te wama rowasuꞌu õ di. Taré dasa hã marĩ, da te ꞌre ihuri mono zém na roti te wasuꞌu. Duré marĩ waꞌu, da te ꞌre iꞌâhuri mono zém na rowasuꞌu zama hã te wasuꞌu. Duré ꞌre dasihâiba wasété zaꞌra mono tõ da, ꞌre idasiꞌupsõi pese zaꞌra mono zém na zama roti hã te wasuꞌu. Ã norĩ na roti hã taré sõꞌawi dahâiba na roti, ma tô dama ꞌre hâimana zaꞌra. Tane nherẽ, ꞌRe ihâimana uꞌâsi mono hã ꞌre idanomro mono zép té hã, te te dama ipisutuzép téb ãma, ma tô oto dawi aiꞌutõ, ã norĩ na roti ꞌrada hã.
11 Cristu hã ma tô oto sisasedoti tô, Sasedoti danhipai u Ipire uptabi na dama ꞌre hâimana mono da, ꞌre idanomro mono zép té hã iwẽ uptabi hã te te dama ꞌre aꞌmadâꞌâ mono da oto. Tawamhã hâiwa ãma ꞌri hã, ꞌRe ihâimana uꞌâsi mono hã iwa ꞌre isãmra mono zéb u, ma tô oto ãzé Cristu hã, danhibꞌrata na da te dasiwi iꞌri õ u, ropoto wazari tiꞌai ãma ꞌre isa mono õ u. Tiꞌai ãma romhâ ꞌmanharĩ na ꞌri nhipai u, wẽ uptabi di ꞌri, hâiwa ãma hã. Pire uptabi na te ta hã ꞌre sab uꞌâsi.
12 Tawamhã Cristu hã hâiwa ãma ꞌri ꞌre waꞌwa u sébré wamhã, misi haré ma tô wanhowab zaꞌra hã ãzé, ꞌri ꞌre waꞌwa iwẽ uptabi u, ꞌRe ihâimana uꞌâsi mono, iwa ꞌre isãmra mono zéb u hã. Tamomo itẽme sébré wamhã, e poneꞌẽrebâi waprui ré ma tô ãzé. Duré e powawẽ ꞌra waprui ré zama, ma tô ãzé, te te tãma isõmri da ré, duréihã sasedoti norĩ te te tãma ꞌre isõmri zaꞌra mono ne ré. Mare di. Tiwaprui ré si ma tô itẽme ãzé Timama u hã, te te tãma sõmri da, taha na si wawasété hawi te te ꞌre waꞌanhoꞌreptui mono da, misi haré.
13 Sasedoti norĩ hã ꞌRe ihâimana uꞌâsi mono nhimiroti ꞌrata na Mozési te te ãma irobꞌuiꞌéré zarina, te za poneꞌẽrebâ zéré uzé wapru hã suru na dahâiba nhisiwi te te ꞌre saꞌwari zaꞌra, niha wamhã, powawẽ ibaꞌõmo wapru hã, marĩ na dahâiba mana wawip si ꞌre dasihâiba wasété zaꞌra mono wa, apâ te te ãma ꞌre dahâiba wẽ zaꞌra mono da hã, taha zarina pibu pese na ꞌRe ihâimana uꞌâsi mono ãma ꞌre dawata zaꞌra mono da. Niha wamhã, powawẽ ꞌra sipiꞌõ hã da te ꞌre ꞌwaꞌa pese zaꞌra mono wa, taha pro hã ꞌre isiꞌruꞌa zaꞌra mono hã te za duré ta norĩ hã te te dahâiba nhisiwi ꞌre saꞌwari zaꞌra, te te ãma ꞌre dahâiba wẽ zaꞌra mono da, duré taha na hã.
14 Ãne hã duréihã danhimizama wapru na dahâiba mana wawi marĩ na ꞌre idasihâiba wasété zaꞌra mono parizéb da hã, wẽ nherẽ, taha nhipai u, Cristuhu wapru si siptete uptabi di, dawasété parizéb da hã oto. E marĩ wa. Taha si wasété ãna ꞌre hâimana uꞌâsi mono wa. Tahawa, ꞌRe ihâimana uꞌâsi mono Pẽꞌẽzani waihuꞌu pese zarina ma tô wazada sisõmri zaꞌra ꞌRe ihâimana uꞌâsi mono ma, wazada zaꞌra dâꞌâ da, tiwapru na te te ꞌre waꞌaꞌupsõi mono da, wapẽꞌẽ ꞌre wadâꞌâ uꞌâsi ne ꞌre iwanomro mono zéb zarina, wawasété si wa te ꞌre ꞌmanharĩ zaꞌra mono wa, ꞌrâwi ꞌre iwasiwẽꞌõ uꞌâsi zaꞌra mono zé hã te te oto wama ꞌre apari mono da. Taha zarina, wa za oto ꞌRe ihâimana uꞌâsi mono ma si, wa te ꞌre romhuri zaꞌra, wawẽ na wahâimanazém na wa te oto ꞌre upa zaꞌra mono ãna.
ꞌRe ihâimana uꞌâsi mono te te dama iropisutuzép té wasuꞌu
15 Tahawa, te oto Cristuhu si te te daꞌãma ꞌre aꞌmadâꞌâ, ꞌRe ihâimana uꞌâsi mono te te dama iropisutuzép té iwẽ hã. Tidâꞌâzém na ma tô daꞌawaꞌâ Cristu hã, dawasété na ꞌre idanomro mono zém hawi te te oto ꞌre daꞌanhoꞌreptui mono da, zahadu ꞌRe ihâimana uꞌâsi mono te te dama iropisutuzéb ꞌrada hã dama ꞌre hâimana mono ré. Taha zarina te za oto ꞌRe ihâimana uꞌâsi mono hã tinhibꞌaꞌuwẽ da, te te ꞌre iꞌapisutu mono norĩ hã te te sima ꞌre awaibu, iwẽ uptabi na te te tãma ꞌre iꞌaropisutu mono zéb ré si, ꞌre hâimana uꞌâsi zaꞌra mono da iré, ta norĩ hã.
16 9:16-17 Niꞌwa hã dâꞌâ õ ré, te za tinhibrom na sisaꞌu dama roti, iꞌuirĩ na si niha da te dasima ipoꞌo mono da na hã. Sisõꞌa ré, te za ãne na hã ãma robꞌuiꞌéré ibaihâ na hã, pibu pese na isibro hã iꞌuirĩ na da te dasima ipoꞌo mono zéb da hã. Tawamhã e zahadu dâꞌâ õ ré, te za te te sima poꞌo, isimiꞌuiꞌéré zarina, te te tãma iroti zaꞌra zéb zarina. Mare di. Iꞌuirĩ na si te za tô ta norĩ hã isibro hã te te sima poꞌo, idâꞌâzém na te te waihuꞌu zaꞌra wapsi. Tane duré, ꞌRe ihâimana uꞌâsi mono te te dama iropisutuzé iwẽ hã.
17 ꞌMadâꞌâ 9:16
18 Duréihã sasedoti norĩ hã danhimizama te te ꞌre isimroi mono wapru na te te daꞌãma ꞌre romhuri zaꞌra mono õ ꞌwaꞌâhã, ꞌRe ihâimana uꞌâsi mono te te dama iropisutuzéb ꞌrada hã pire na aré dama ꞌre hâimana mono õ di. Taré te aré dama ꞌre hâimana.
19 Duréihã Mozési hã imorĩꞌrata na ma tô uburé ꞌRe ihâimana uꞌâsi mono nhimiroti zahi na dama rowasuꞌu. Taha pari, ma tô powawẽ wapru hã â na waza. Poneꞌẽrebâi wapru zama hã ma tô duré waza. Tawamhã wesuirã suiro panhipti hã ma tô sada siꞌẽ zaꞌra. Taha pari, simisutu ma tô poneꞌẽrebâ zéré na te te awasisi, da te iséré pré na. Tawamhã danhimizama wapru na ma tô ãma diꞌi, â wazari powawẽ wapru na hã. Tawamhã ibaihâ nhisiwi ma tô wesuirã suiro panhipti wasi hã sãsãꞌã, hisopo na isisi hã danhimizama wapru na te te ãma diꞌi da, ꞌRe ihâimana uꞌâsi mono nhimiroti zahi na robꞌuiꞌéré ré nhisiwi. Dahâiba nhisiwi zama ma tô duré te te sãsãꞌã, te te ãma daꞌahâiba diꞌi mono da, danhimizama wapru na hã.
20 Tawamhã Mozési hã ãne na te duré dama roti:“Ã danhimizama wapru hã ꞌRe ihâimana uꞌâsi mono te te aima iropisutu zaꞌra waꞌaba zé iwẽ hã, pire na oto aima ꞌre ihâimana zaꞌra waꞌaba mono da hã, te aima wasuꞌu zaꞌra waꞌwa. Tahawa, te te aima ãma iroti zaꞌra waꞌaba zéb zarina, te za oto ꞌre iꞌmadâꞌâ pese zaꞌra waꞌaba mo, tãma ãma ꞌre uwaimrami zaꞌra waꞌaba mono da.”
21 Tawamhã romhâ ꞌmanharĩ na ꞌri nhisiwib zama, ma tô duré wesuirã suiro panhipti wasi hã sãsãꞌã, danhimizama wapru na te te ãma diꞌi da. Uburé marĩ hã ꞌRe ihâimana uꞌâsi mono ãma ꞌre idawata zaꞌra mono zéb da, ꞌri para ꞌre isimasa mono nhisiwib zama ma tô duré sãsãꞌã, te te ãma adiꞌi mono da.
22 Tane tô. ꞌRe ihâimana uꞌâsi mono nhimiroti zahi na Mozési te te ãma irobꞌuiꞌéré zarina, ma tô danhimizama wapru na marĩ hã da te ãma ꞌre diꞌi zaꞌra, ꞌri para ꞌre isimasa mono hã, wasété ãna ꞌre simasa mono da, ꞌRe ihâimana uꞌâsi mono ma hã. Dahâiba wib zama, ma tô duré ãma ꞌre dasihâiba diꞌi zaꞌra, ꞌRe ihâimana uꞌâsi mono ma, dahâiba wasété ãna oto ꞌre dahâimana zaꞌra mono da. Danhimizama hã da te ꞌre simroi mono wa, iwapru hã tiwi ꞌre isisaꞌwari zaꞌra mono na si, te za ãma ꞌre dasihâiba wẽ zaꞌra dahâiba mana wawip si, marĩ na ꞌre dasihâiba wasété zaꞌra mono wamhã.
Cristu hã Timama ma dazada isisõmrizé wasuꞌu
23 Ã norĩ hã tiꞌai ãma romhâ ꞌmanharĩ na ꞌri hã, duré uburé marĩ hã iwa ꞌre isimasa mono hã, hâiwa ãma ꞌre ihâimana zaꞌra mono ne, te ꞌre hâimana zaꞌra. Tane nherẽ, aiwab uptabi õ di, marĩ ipire da, ꞌre hâimana zaꞌra mono õ nherẽ, ꞌri hã tiꞌai ãma hã, duré uburé iwa ꞌre iropsimasa mono hã. Ta hã ma tô sasedoti norĩ hã danhimizama wapru na te te ꞌre diꞌi zaꞌra, taha zarina si ꞌRe ihâimana uꞌâsi mono ma, wasété ãna ꞌre hâimana zaꞌra mono da. Tane nherẽ, hâiwa ãma marĩ hã sena ꞌre ihâimana zaꞌra mono hã iwẽ na si, ꞌRe ihâimana uꞌâsi mono ma, ꞌre hâimana zaꞌra mono da, ma tô iwẽ uptabi hã sada dârâ.
24 Ãhã wa, Cristu hã dâꞌâ pari oto duré hâiwaꞌutu wamhã, tiꞌai ãma danhibꞌrata na da te ꞌre iꞌri zaꞌra mono ꞌremhã, sébré õ di, ꞌRe ihâimana uꞌâsi mono iwa ꞌre isãmra mono zéb u hã. E marĩ wa. Ta hã tiꞌai ãma ꞌri hã, hâiwa ãma ꞌri iꞌuptabi ne si ꞌre hâimana mono wa, duré iꞌuptabi õ wa. Hâiwa ãma ꞌRe ihâimana uꞌâsi mono hã iwa ꞌre isãmra mono zéb u si ma tô ãzé Cristu hã, tame te te oto waꞌãma ꞌre romhuri uꞌâsi mono da, Timama nhoꞌa.
25 Sasedoti tisiré norĩ nhipai u ipire uptabi hã ma tô duréihã siwaprosi itẽme ꞌre zasi, ꞌRe ihâimana uꞌâsi mono te, ꞌri ꞌre waꞌwa iwẽ uptabi u hã, sasedoti ipire uptabi hã. Duré wahub sidâpâsi ma tô misi haré itẽmemhã ꞌre zasi, danhimizama wapru hã te te tãma ꞌre sõmri mono da, daꞌudâna. Tane nherẽ, Cristu hã wahub sidâpâsi hâiwa ãma ꞌRe ihâimana uꞌâsi mono hã iwa ꞌre isãmra mono zéb u hã, itẽme ꞌre zasi uꞌâsi mono õ di. Misi haré ma tô itẽmemhã ãzé, Timama u hã, õhõ haré dazada sisõmri wa, Timama ma hã.
26 Cristu hã wahub sidâpâsi ꞌRe ihâimana uꞌâsi mono ma, dazada ꞌre sisõmri uꞌâsi mono ꞌwaꞌâhã, te aré ropoto naꞌrata hawim haré dazada ꞌre dâꞌâ uꞌâsi. Tawamhã robzépata zaꞌẽtẽ na te aré tô te te ꞌre robzépata uꞌâsi. Tane nherẽ, za robꞌrãsutu u irobꞌumhutuzéb u si ma tô misi haré tãma sisõ, ꞌRe ihâimana uꞌâsi mono ma hã, dazada dâꞌâ da, taha zarina dawasédé hã te te dama ꞌre apari mono da oto, ꞌRe ihâimana uꞌâsi mono hã.
27 Misi haré te za aihĩni ꞌre dadâꞌâ zaꞌra. Taha parip si te za ꞌRe ihâimana uꞌâsi mono hã niwapsi daꞌawaihuꞌu, dawẽ na duré dawasété na zama, taha zarina te te oto dama ꞌre arowairébé mono da hã.
28 Tane ma tô duré Cristu hã misi haré dazada dârâ, dawasédé hã daꞌahâ na te te oto dama ãma ꞌre iꞌapari mono zéb da hã. Tawamhã niwa tiꞌai u apâ wei morĩ zahu wamhã, ta hã oto dazada dâꞌâ da hã, wei morĩ õ di za, taha zarina dawasédé hã te te duré dama ꞌre apari mono da hã. Ãne hã mare di za. Sô ꞌre isimipari zaꞌra mono norĩ si, te te oto isõꞌreptui pese zaꞌra da si, te za wei mo apâ Cristu hã, ta norĩ zô si.
