Zuéu 1:1-20
1 Ã hã Wanhibꞌapito, ma tô timreme hã Zoéu, Petuéhé ꞌra ma tisõ.
ꞌRiti norĩ na robꞌmanharĩ pipa zé wasuꞌu, robꞌré taꞌa wasuꞌu me
2 Ihi norĩ, maꞌãpé asiwi ĩwapari pese aba.Ãhã dazaꞌrui ꞌre, uburé ꞌre iꞌaihâimana zaꞌra waꞌaba mono norĩ, maꞌãpé asiwi ĩwapari pese aba.E niwamhã ma tô marĩ ãne hã watobro, iwasété uptabi hã wate bâtâ mono ꞌremhã, duré wahiꞌrata norĩ ꞌre hâimana zaꞌra mono ré hã.
3 Maꞌãpé aiꞌra norĩ waꞌaba ma, tãma ꞌre wasuꞌu zaꞌra waꞌaba mono, ã hã marĩ iwatobrozé hã, ta norĩ zama tiꞌra norĩ ma, tinhihudu norĩ ma, duré tinhihudu sidâpâsi te te tãma ꞌre wasuꞌu zaꞌra mono da.
4 ꞌRiti norĩ hã ahâ uptabi na ma we sõꞌuma watobro.Ta hã ma tô robꞌre hã uburé te te uprosi.ꞌRidi imorĩꞌrata na we iwairébé, robꞌre te te iꞌuprosi mono õ hã, ma tô isaꞌu we iwairébé norĩ si te te uprosi pese.
5 Maꞌãpé âzé hâsi zaꞌẽtẽ ꞌwa norĩ, atopoꞌo zaꞌra waꞌaba!Duré robꞌrãi waꞌu isé zeiꞌwa norĩ, maꞌãpé aiꞌutu zaꞌra waꞌaba, aiꞌruꞌru waꞌaba da.E marĩ wa. Uva ꞌrã hã ma tô oto aiꞌutõrĩ pese. Tahawa ꞌre iꞌâhuri aba mono da hã tô oto ꞌmaihâimana õ di.
6 ꞌRiti norĩ hã dasiꞌwapéi ꞌmanharĩꞌwa norĩ, ahâ uptabi na duré siptete uptabi na ꞌre inomro mono ne, ma tô we sõꞌuma watobro.Ta hã saꞌrese ãna ma sisisi ãwa, ĩte tiꞌai waꞌõtõ nhoꞌõmo u hã.Iꞌwa mono hã huꞌu zérépa ꞌwa ne iꞌwa ꞌwa pe.
7 Ta hã wate zaꞌra uva ꞌru hã ma tô siwi uprosi, duré robꞌrã figu wede zama.Ma tô duré te te wedehâ zani zaꞌra. Tahawa te nemo panhipti ãꞌa.
8 Maꞌãpé aiꞌruꞌru waꞌaba, piꞌõ ihâiba ubuni pẽꞌẽzé te, tiꞌuza ihâiro na ãma isiꞌuza ré ꞌre isiwaꞌõi mono ne, aibâ na za aré ãma imro da hã, tiwi dâꞌâ wa.
9 Sasedoti, ꞌRe ihâimana uꞌâsi mono ma daꞌãma romhuriꞌwa norĩ hã te ꞌre ꞌruꞌru uꞌâsi, Wanhibꞌapito nhorõwa ꞌri ꞌrãihâ ma, danhoprubzé hã ꞌre hâimana zahu mono õ wa oto, amnho na hã, duré uva ꞌrãi waꞌu isé na hã.
10 Rom na da te ꞌre irobzuri mono hã te uꞌõi pese na hâ suꞌu na nomro. Tiꞌa te duré ꞌré pese na hã nomro.E marĩ wa. Amnho hã ma tô aiꞌutõrĩ pese. Duré uva ꞌrãi waꞌu isé waꞌu ité hã ma tô aiꞌutõ. Azeitona ꞌrãi waꞌu zô zama ma tô tirobaba.
11 Buru na romhuriꞌwa norĩ, asihâzé zaꞌra waꞌaba.Duré uva ꞌru ꞌmadâꞌâꞌwa norĩ, aiꞌruꞌru waꞌaba.E marĩ wa. Hâimana õ wa oto, amnho trigu hã, duré cevada hã.Uburé ma siꞌutõrĩ pese, da te ꞌre itehâri zaꞌra mono hã.
12 Uburé ma tô ꞌré mono uva ꞌru hã, robꞌrã figu wede hã, romazeira wede hã, duré norõwede hã, duré maçã na robꞌrã nhisi wede zama. Duré uburé rowede hâiba amo norĩ zama ma ꞌré.Ãne wa, ma tô oto dawi tirobzeiꞌõ pese zaꞌra.
13 Sasedoti norĩ, wedezane ꞌmanharĩ nhisiwi, danhoprubzé ꞌre isaꞌra zaꞌra waꞌaba mono norĩ, maꞌãpé zazahâ hâiro na asiꞌuza zaꞌra waꞌaba, iré aiꞌruꞌru waꞌaba da.ꞌRe ihâimana uꞌâsi mono ma daꞌãma romhuriꞌwa norĩ, we aiꞌabaꞌréi waꞌaba, ꞌri zahâpâ u, aiꞌruꞌru waꞌaba da marabâre, ꞌRe ihâimana uꞌâsi mono nhorõwa ꞌri ꞌrãihâ ãma.E marĩ wa. Wate ꞌRe ihâimana uꞌâsi mono nhorõwa ãma hã amnho na duré uva ꞌrãi waꞌu isé na danhoprubzé hã hâimana õ wa oto.
14 Maꞌãpé asisô aihârâ zaꞌra waꞌaba, ubumroi waꞌaba da, ꞌRe ihâimana uꞌâsi mono nhorõwa ꞌri ãma, misi bâtâ na asaihuri aba ãna aihâimana zaꞌra waꞌaba zé hã asima pisutu zaꞌra waꞌaba da.Duré ubumroi waꞌaba, uburé dama ipire norĩ, duré uburé dazaꞌrui ꞌre, ꞌre iꞌaiꞌubumroi waꞌaba mono norĩ, Uburé Danhibꞌapito wate ꞌRe ihâimana uꞌâsi mono nhorõwa ꞌri ꞌrãihâ ãma, aimreme ꞌrãihâ na tãma aimreme zusi aba da, tiwi iwaptẽrẽ zaꞌra waꞌaba zém na, te te aipawaptob zaꞌra waꞌaba da.
15 Wanhibꞌapito isiptete uptabi nhibâdâ iwa iwaptãꞌãzéb u hã romhuture di oto, tinhiptete na za te te idaꞌaꞌuprosizéb da hã. Ta hã bâdâ hã pipa uptabi di za.
16 Marĩ, wa te ꞌmanharĩ waihuꞌu zaꞌra ãna, wa tô taré ꞌmadâꞌâ zaꞌra ni, wanhimirobꞌre norĩ isiꞌutõrĩzém na hã.Tahawa, wate ꞌRe ihâimana uꞌâsi mono nhorõwa ꞌri ꞌrãihâ ꞌremhã, hâimana õ di oto dasima rowẽzé hã, duré datozé hã.
17 Rom na daburu mono na robꞌré wa, romnhamare hã poto mono õ di. Duré trigu tehâri hã hâimana õ di. Amnho nhimiꞌwarazéb zama te oto siprum haré simiꞌwara, tiꞌa.
18 Powawẽ norĩ hã te nasi hãsi, mrap te. Iꞌrãsiwamnarĩ ne te duré siwaꞌru ꞌre nomro, dui õ wa, isa zaꞌra zéb da hã.Duré poneꞌẽrebâ zéré mapure norĩ zama te nasi tidâꞌâ zaꞌra, mrap te.
19 Wanhibꞌapito, taha wa, wa ĩmreme ꞌrãihâ na saꞌẽtẽ aiwi rowaptẽ, wede norĩ hã duré du hã ꞌré zaꞌra wa, uzâ hã uburé te te ꞌre ihõmo mono ne.
20 Abaze norĩ zama pawaptob zaꞌra da, te hârâ ꞌrãihâ na aima ꞌre hãsi, panhoꞌu hã paꞌre ꞌré mono wa, duré uzâ hã du te te hõmo mono wa.
