Zuéu 2:1-32
2 Asimnhihârâzé hã maꞌãpé hãsi aba, Siã na ẽtẽ nhisi ãma. Maꞌãpé duré ropire wa ãma dapoꞌre puꞌuzéb da, hãsi aba, ꞌRe ihâimana uꞌâsi mono te ẽtẽꞌrãihâ ãma.Ã hã dazaꞌrui ꞌre, ꞌre iꞌaiꞌubumroi waꞌaba mono norĩ, aipahi zaꞌra waꞌaba wa, airẽrẽꞌẽ zaꞌra waꞌaba, Uburé Danhibꞌapito nhibâdâ te te ipisudu hã za oto romhutu na wisi dâꞌâsina.
2 Taha bâtâ na hã te za oto tirobra. Duré te za hâiwaꞌa norĩ hã tiꞌrãdâꞌâ zaꞌra.Taha ré, te za ꞌridi hã sina rotété zaꞌra, dasiꞌwapéi ꞌmanharĩꞌwa norĩ iꞌahâ isiptete ne hã, duré hâiwaꞌa iꞌrãdâ hã ẽtẽ ꞌrãirã te te siwi iꞌupsibi ne hã.Niwamhã ãne hã iwatobro õ. Duré niwamhã romhutuꞌõmhã ãne hã za iwatobro õ.
3 Ta norĩ te za uburé marĩ hã te te uprosi, uzâ hã te te ꞌre iromhõmo mono ne.We ãne hã romhâimana wana ré hã tiꞌa hã wẽ uptabi di, Édẽ na robꞌre nhisi ãmam ne. Tane nherẽ, we oto ãne romhâimana parimhã, aiwa oto rop si ꞌre irosaꞌwari mono ne hã.ꞌRiti norĩ wi, marĩ iꞌmaibaꞌa da hã mare di.
4 Ta norĩ hã awaru ne te ꞌre hâimana zaꞌra. Duré ꞌre dasiꞌwapé zaꞌra mono wa, awaru ꞌre isisaꞌrei mono ne, te ꞌre sisaꞌre.
5 Ẽtẽ ꞌrãirã nhisiwi ꞌre sarõtõ zaꞌra mono wamhã, te te sina ꞌre robruruꞌu zani zaꞌra, wedewara zapore na ꞌre dasiꞌwapé zaꞌra mono wa, da te dasina ꞌre irobruruꞌu zaꞌra mono ne, duré amnho teihi, ꞌre roꞌo zaꞌra mono wa, uzâ te te ꞌre iteihi sinhama mono ne.Duré dasiꞌwapéi ꞌmanharĩꞌwa norĩ ahâ uptabi na dasiꞌwapé da, sada ꞌre isisõré pese zaꞌra mono ne, te ꞌre hâimana zaꞌra.
6 Te te sina ꞌre rotété zaꞌra mono wamhã, te uburé pese tãma ꞌre darẽrẽꞌẽ zaꞌra. Uburé te duré tãma ꞌre daꞌubuꞌa zaꞌra, dapahi te.
7 Te duré te te ꞌre daꞌwapé zaꞌra, dasiꞌwapéi ꞌmanharĩꞌwa norĩ isibꞌru ne hã.Te duré ꞌri ꞌwawi waꞌra ꞌrãihâ na te te ꞌre saꞌuri zaꞌra, sima iwẽ na.Ropãrĩ sina te duré waꞌõmo pese na ꞌre nomro, nima niwĩ siwi sipéi ãna.
8 Sisãmra mono ãna, te sisõwamhã te te ropãrĩ zaꞌra mono sina, sisõré pese na aiꞌabaꞌréi uꞌâsi, hâiba mono bâ tite na bâdâdi na si.Danhimnhiꞌã hã ꞌmaihâimana õ di, te te isõwada zaꞌra da hã.
9 Ta norĩ hã te duré ꞌriꞌahâ simizaꞌrese õ ré te te ꞌre susi zaꞌra.Te duré ꞌri ꞌwawi waꞌra ꞌrãihâ na te te ꞌre saiꞌuri zaꞌra. Taha pari, te duré ꞌri naꞌrata na te te ꞌre saiꞌuri zaꞌra, zanela ꞌri zadazâri na ꞌre sisisi mono da, isimisaihuri norĩ ne.
10 Ta norĩ hã sisõré pese na we sisarina ꞌre nomro mono ré, te duré tiꞌa hã ꞌre popoꞌo, duré hâiwa hã.Bâtâ norĩ hã te duré ꞌre tõmo ꞌrãdâꞌâ zahuré, aꞌamoi me. Wasi norĩ hã te duré ꞌre roꞌosipari zaꞌra.
11 Uburé Danhibꞌapito hã te tite dasiꞌwapéi ꞌmanharĩꞌwa norĩ nhoꞌremhã tãma robꞌru zaꞌra, mreme ꞌrãihâ na. Ite dasiꞌwapéi ꞌmanharĩꞌwa norĩ hã ahâ uptabi di. Duré sibꞌru uptabi zaꞌra mono di.Uburé Danhibꞌapito nhibâdâ hã pipa uptabi di za. E ꞌwa hã tiwi siptete da bâ za bété niwamhã.
ꞌRe ihâimana uꞌâsi mono, tinhibꞌaꞌuwẽ te te ꞌre isawi pese zaꞌra mono zé wasuꞌu
12 Uburé Danhibꞌapito te tinha ãne:
“Tane nherẽ, maꞌãpé oto apâ ĩtẽme aipizari zaꞌra waꞌaba, aipẽꞌẽ na, asai ãna aihâimana zaꞌra waꞌaba sina, duré aiwawa zaꞌra waꞌaba sina, duré aiꞌruꞌru waꞌaba sina.
13 Aiwasété na iꞌasiwẽꞌõ zaꞌra waꞌaba zéb zarina, aiꞌuza ihâiwazu zaꞌra waꞌaba da hã mare di. Aihâiba uptabi si te za aipẽꞌẽ ꞌre ꞌrâwi iꞌmadâꞌâ zaꞌra waꞌwa.”Apâ aipizari zaꞌra waꞌaba, Uburé Danhibꞌapito wate ꞌRe ihâimana uꞌâsi mono tẽme, ta hã simipawapto pese wa, duré daꞌãma ꞌre siwamri pese mono wa. Ta hã daꞌãma waꞌa suꞌu õ di. Tinhimizawizé hã te saꞌẽtẽ na te te dama ꞌre ahâiꞌré. Tãma wẽ di, tinhimirosaꞌrata na te te ãma ꞌre isaprĩ mono da hã, te te dama ꞌre arobꞌmanharĩ mono tõ da.
14 Tahawa, ãté te za tinhimirosaꞌrata na ãma saprĩ, iwẽ hã tinhibꞌaꞌuwẽ norĩ ma, te te tãma pisutu zaꞌra da, amnho tehârizé iwẽ hã te te tãma isõmri zaꞌra zém na hã.Ãne wamhã, te za a norĩ waꞌwa hã amnho na duré robꞌrãi waꞌu na ꞌRe ihâimana uꞌâsi mono ma, ꞌre asõprub zaꞌra waꞌaba mo.
15 Maꞌãpé danhimnhihârâzé hã asiwi ꞌmaihârâ aba, Siã na ẽtẽꞌrãihâ nhisi ãma. Maꞌãpé bâdâ iwazéb zahi na asai ãna iꞌaihâimana zaꞌra waꞌaba zéb da hã asiwi pisutu aba. Duré maꞌãpé dazô aihãsi aba, ꞌRe ihâimana uꞌâsi mono nhorõwa ꞌri ꞌrãihâ u aiꞌrãꞌõtõ aba da, ꞌRe ihâimana uꞌâsi mono ma.
16 Uburé daꞌrãꞌõtõ aba. Tawamhã uburé te za dama iꞌru zaꞌra waꞌwa, dasihâiba pese zaꞌra da. We dasiꞌabaꞌré da uburé, ihi norĩ hã, aiꞌuté norĩ hã, dapabre norĩ zama.Duré siꞌãma imro téb zaꞌra norĩ hã te za we wairé ꞌri hawimhã, ta norĩ zama we siꞌabaꞌré da, ꞌRe ihâimana uꞌâsi mono nhorõwa u hã.
17 Sasedoti norĩ, a norĩ waꞌwa hã ꞌRe ihâimana uꞌâsi mono nhorõwa ꞌri zahâpâ, tãma ꞌre iromhuri zaꞌra waꞌaba mono hã te za aiꞌruꞌru waꞌwa. Te za duré tãma aimreme zusi ꞌwa ãne: “ꞌRe ihâimana uꞌâsi mono, robꞌmanharĩ tõ, asibꞌaꞌuwẽ norĩ ma hã.Wasiré aꞌuwẽꞌõ norĩ nhoꞌremhã wanhiséb zaꞌra tõ da, wazaꞌré zaꞌra tõ, waꞌãma waꞌẽ zaꞌra sina, te te duré wazada nharĩ zaꞌra tõ da ãne: ‘E mahã, ate zaꞌra waꞌwa ꞌRe ihâimana uꞌâsi mono.’ ”
ꞌRe ihâimana uꞌâsi mono, tiꞌa apâ wẽ na ꞌre saꞌwari mono da, te te ipisutuzé
18 Tawamhã Uburé Danhibꞌapito hã ma tô tinhimizawi zaꞌẽtẽ zém na hã sihâiꞌré, tinhiptiꞌa na. Ma tô duré tinhibꞌaꞌuwẽ norĩ ãma tipẽꞌẽzé.
19 Ãne ma tô tinhibꞌaꞌuwẽ norĩ hã ãma sadaꞌâbâ zaꞌra oto:
“Ãhã na hã wa za aima sõmri zaꞌra waꞌwa amnho hã, duré uwa ꞌrãi waꞌu isé hã, azeitona waꞌu tob zama. Ãhã wamhã, te za a norĩ waꞌwa hã asa na ꞌre asidupu zaꞌra waꞌaba mo.Niwamhã te duré dama ꞌre iwaprosi mono da hã mare di za, asiré aꞌuwẽꞌõ norĩ aiꞌãma ꞌre waꞌẽ zaꞌra waꞌaba mono da hã.
20 ꞌRiti norĩ ipipa hã hâiwa nhimiꞌe hawi we iwatobro hã wa za sãmra romhâ na, asiti zaꞌra waꞌaba, suparaꞌré na si ꞌre iropsaꞌwari mono aꞌubuni u.ꞌRidi hã danhowa we iwatobro hã wa za sãmra, Â Warĩrĩ na puꞌu nhisi u hã. Duré isaꞌu we iwatobro hã te za rere, Mediterãniu na â poré nhisi u.Tawamhã ꞌriti norĩ hã te za aiꞌutõ, saꞌra ꞌrãihâ na. Sizub zaꞌra wamhã, te za tiꞌroi pese zaꞌra.Ãne wa za marĩ isaꞌreseꞌõ hã te ꞌre abꞌmanharĩ.
21 “Tiꞌa, asima rowẽ zaꞌra waꞌaba, duré aipahi zaꞌra waꞌaba tõ, wa hã Uburé Danhibꞌapito, marĩ isaꞌreseꞌõ hã te ꞌre abꞌmanharĩ mono wa.
22 Abaze norĩ, aipahi zaꞌra waꞌaba tõ, du hã ãma ꞌre iꞌasaihuri aba mono zéb da hã, za apâ uzé zaꞌra mono wa. Wede norĩ hã te za duré oto apâ tiꞌrã zaꞌra. Duré figuera hã ꞌrãi pese di za, uwaꞌru ꞌrã zama.
23 “Siã ãma aꞌuwẽ norĩ, ꞌre ato zaꞌra waꞌaba mono, wa hã Asibꞌapito zaꞌra waꞌwa ꞌRe ihâimana uꞌâsi mono, marĩ isaꞌreseꞌõ hã te ꞌre abꞌmanharĩ mono wa.Wa hã wa tô tãi ma hã te ꞌre robꞌru, ꞌre itaꞌa mono zéb uwaibaba ꞌre taꞌa mono da, ꞌre aꞌẽ taꞌa mono da hã, duréi we te ꞌre iꞌabꞌmanharĩ mono zém ne hã.
24 Amnho trigu, da te ꞌre ipréꞌé zaꞌra mono zé mono bâ te za iꞌrã na hã da te ꞌre ꞌmasisi zaꞌra. Ahâ uptabi di za, uwa ꞌrãi waꞌu isé hã, duré azeitona waꞌu to hã.
25 Uburé wa za isimini zaꞌra waꞌaba nhowaꞌreꞌremhã apâ aima sõmri zaꞌra waꞌwa, hâiwaꞌa zaꞌẽtẽ ne ꞌriti norĩ ma, te tãma robꞌrui wa, dasiꞌwapéi ꞌmanharĩꞌwa norĩ ne, amnho tehâri hã te te iꞌuprosi zaꞌra waꞌrãmimhã.
26 A norĩ waꞌwa hã te za ꞌre asaihuri uꞌâsi aba mo, ꞌre iꞌmahâpãrĩ zaꞌra waꞌaba mono zéb u. Tahawa, te za ĩꞌãma si ꞌre aiwata uꞌâsi zaꞌra waꞌaba mo, wa hã Asibꞌapito zaꞌra waꞌwa ꞌRe ihâimana uꞌâsi mono, aiꞌuꞌâbâ zaꞌra waꞌaba, marĩ isaꞌreseꞌõ iwẽ hã te ꞌre iꞌabꞌmanharĩ mono zém na.Tawamhã ĩnhibꞌaꞌuwẽ norĩ hã niwamhã isiséb zahu zaꞌra da hã mare di za.
27 Tawamhã te za ĩwaihuꞌu zaꞌra waꞌwa, wa hã aiwaꞌwa waꞌaba ꞌre ĩhâimana mono na, Izaraéu nhihudu norĩ waꞌwamhã. Te za duré ĩwaihuꞌu zaꞌra waꞌwa, wa hã Asibꞌapito waꞌwa, misire ate zaꞌra waꞌwa ꞌRe ihâimana uꞌâsi mono na, duré aimawi ĩsine iꞌmaihâimana õ na hã.Duré ĩnhibꞌaꞌuwẽ norĩ, niwamhã isiséb zahu zaꞌra da hã mare di za.”
ꞌRe ihâimana uꞌâsi mono nhibâdâ
28 Uburé Danhibꞌapito te tinha ãne, tinhibꞌaꞌuwẽ norĩ ma:
“Ãhã parimhã, wa hã wa za ãma ropé Ĩpẽꞌẽzani na, uburé pese dama.Aiꞌra siꞌaibâ norĩ hã duré aiꞌra sipiꞌõ norĩ hã te za te te dama ꞌre ĩzadawa wasuꞌu zaꞌra.Duré ihi norĩ hã te za te te ꞌre rosawẽrẽ zaꞌra. Ipréduptém norĩ hã te za duré marĩ hã sõꞌawi te te ꞌre ꞌmadâꞌâ zaꞌra, sõtõ ꞌrowim ne.
29 Pawaꞌâbâ ãna dama romhuriꞌwa norĩ siꞌaibâ ma, wa za ãma ropé, Ĩpẽꞌẽzani na hã, pawaꞌâbâ ãna dama romhuriꞌwa norĩ sipiꞌõi ma zama, tô taha bâtâ mono na hã.
30 Wa za duré niha na hã robꞌmanha, marĩ isaꞌreseꞌõ ipipa na, za hâiwa na iwairébé da hã, duré tiꞌa na, za marĩ iwairébé mono da hã. Dawapru pu hã te za duré tihâiba. Unhama norĩ hã, isizédé me, te za duré tipusi zahuré.
31 Bâdâ hã te za titõmo ꞌrãdâꞌâ. Duré aꞌamo hã te za titõmo wapru, Uburé Danhibꞌapito nhibâdâ tô sena ipipa uptabi wisi wana ré hã.”
32 Tawamhã niꞌwam norĩ hã Uburé Danhibꞌapito nhimipawaptobzé te te tiwi iwaptẽrẽ zaꞌra hã te za uburé sõꞌreptu zaꞌra. E marĩ wa. Wanhibꞌapito hã ma tô ropisutu, niꞌwam norĩ hã isiꞌutõrĩꞌõ hã za Siã na ẽtẽꞌrãihâ nhisi ãma, Zeruzalẽ ãma ꞌre siꞌubumroi mono da. Ã norĩ hã Uburé Danhibꞌapito te te ipisutu zaꞌra norĩ si te za tinhoꞌreptuzé hã sina uwaimrami zaꞌra, hâiba ré.
