Zuéu 3:1-21
3 Uburé Danhibꞌapito hã te tinha ãne:
— Taha wahu mono ꞌremhã, wa za pisutu, Zeruzalẽ ãma ꞌre idahâimana zaꞌra mono norĩ hã duré Zuda na romnhisi ãma ꞌre idahâimana zaꞌra mono norĩ hã apâ rowẽ na duré simarĩ ahâ na ꞌre hâimana zaꞌra mono da.
2 Tahawa, wa za ubumro, uburé tiꞌai waꞌõtõ nhoꞌõmo mono bâ aꞌuwẽ norĩ hã, Zozafa na ẽtẽ siwaꞌaba wa romharé nhisi u, te simroi mono da, tame niha na te tãma rowairébé zaꞌra da. Ĩnhibꞌaꞌuwẽ Izaraéu nhihudu norĩ da, iwasédé hã te te ꞌre ꞌmanharĩ zaꞌra mono wa, wa za ãne hã ꞌmanha. Ta norĩ hã ma tô Izaraéu nhihudu norĩ na te te ropé, tiꞌai waꞌõtõ nhoꞌõmo mono bâ. Ma tô duré sima sipoꞌo, ĩnhiptiꞌa nhoꞌõmo ãma hã.
3 Datozébre ma tô nasi siwi sãmra, ĩnhibꞌaꞌuwẽ da te iwaibu zaꞌra norĩ hã da te dasima sõmri zaꞌra da. Ma tô duré nasi wede zaꞌra ni, ꞌwatébrémi norĩ hã duré baꞌõtõ norĩ hã pawaꞌâbâ ãna te te dama ꞌre romhuri zaꞌra mono da, taré robꞌuiprazé hã te te ꞌre uprosi zaꞌra mono da, piꞌõ siwaꞌâbâ zô ꞌre isisõmri zaꞌra mono norĩ ãma, duré uva ꞌrãi waꞌu isé ãma. Taha na ma tô taré pese robꞌuiprazé dapawaꞌâ hã nasi ãma uprosi zaꞌra ni.
4 — Tiru ãma aꞌuwẽ norĩ, Sidõ ãma aꞌuwẽ norĩ, duré uburé Filistéa ãma aꞌuwẽ norĩ zama, e marĩ zarina te ĩzada ꞌre aihâimana zaꞌra waꞌaba mo bété. E ma tô asima iwẽ zaꞌra waꞌwa, asiꞌruiwaꞌâbâ zaꞌra waꞌaba da hã. Tane ze te bâ, ĩzama wa oto mare siro, iꞌmanharĩ zaꞌra waꞌaba uꞌâbâmhã, taha na si oto ĩsiꞌruiwaꞌâbâ da.
5 E marĩ wa. A norĩ waꞌwa hã ma tô isimiꞌuri zaꞌra waꞌwa, ĩte ẽtẽ waipo prã prata hã, duré oru ẽtẽ waipo pré hã, ate zaꞌra waꞌwa ihâibaꞌõ norĩ ãma ꞌre iꞌaiwata zaꞌra waꞌaba mono zé ꞌri norĩ ꞌre, saꞌra zaꞌra waꞌaba da.
6 A norĩ waꞌwa, Zuda ãma ꞌre idahâimana zaꞌra mono norĩ, duré Zeruzalẽ ãma, ma tô romhâ na isiptiꞌa nhiti isimroi waꞌaba mo, gregu norĩ ma, ꞌre wede zaꞌra waꞌaba mono da, pawaꞌâbâ ãna ta norĩ ma, te te ꞌre romhuri zaꞌra mono da hã.
7 Tane nherẽ, wa hã wa za apâ sani zaꞌra ĩnhibꞌaꞌuwẽ norĩ, tô dama iwede zaꞌra waꞌaba mono zém hawimhã. Wa za duré aima robꞌmanharĩ zaꞌra waꞌwa, tãma iꞌmanharĩ zaꞌra waꞌaba zém ne, asisiwib zaꞌra waꞌaba waptãꞌã da hã.
8 Wa za aiꞌra siꞌaibâ norĩ ma, duré aiꞌra sipiꞌõ norĩ ma, da te wede zaꞌra da hã tãma ꞌmanharĩ zaꞌra, pawaꞌâbâ ãna Zuda ãma aꞌuwẽ norĩ ma, te te ꞌre romhuri zaꞌra mono da, ta norĩ hã te te duré sabeusi* norĩ ma, oto ꞌre wede zaꞌra mono da, aꞌuwẽ tiꞌai waꞌõtõ nhoꞌu romhâ uptabi na ꞌre ihâimana zaꞌra mono norĩ ma. Wa hã Uburé Danhibꞌapito wa ãne tinha.
9 — Ãne te za idapoꞌre puꞌu zaꞌra waꞌwa:“Maꞌãpé, asima robꞌubumro zaꞌra waꞌaba, dasiꞌwapé u da hã. Sô aihârâ zaꞌra waꞌaba, dasiꞌwapéi ꞌmanharĩꞌwa norĩ zô, uburé ta norĩ ubumroi waꞌaba da, simire sina dasiꞌwapé da hã oto hâimana zaꞌra da.
10 Maꞌãpé ate zaꞌra waꞌwa tiꞌai hâipoꞌozém na sibꞌézé ꞌwapa hã ꞌmanharĩ zaꞌra waꞌaba. Duré popanone na isiꞌuwazi ꞌrãꞌwa hã, maꞌãpé ꞌmanharĩ zaꞌra waꞌaba.Niꞌwam norĩ, sibꞌuware na ꞌre hâimana zaꞌra mono zahã, te za nharĩ zaꞌra ãne: “Wa hã ĩnhibꞌrui uptabi.”
11 Maꞌãpé saꞌẽtẽ we aiꞌabaꞌréi waꞌaba, uburé wawaptoma dapoto mono bâ ꞌre iꞌaihâimana zaꞌra waꞌaba mono norĩ, ẽtẽ nhiꞌriti romharé wa aiꞌrãꞌõtõ aba da. Uburé Danhibꞌapito, maꞌãpé ate dasiꞌwapéi ꞌmanharĩꞌwa norĩ ma, ꞌmanharĩ zaꞌra na, we te te siꞌra zaꞌra da.
12 “Maꞌãpé asima robꞌubumro zaꞌra waꞌaba, uburé aꞌuwẽ daro mono bâ ꞌre iꞌaihâimana zaꞌra waꞌaba mono norĩ. We aiꞌabaꞌréi waꞌaba, Zozafa na saꞌa waꞌwa romharé nhisi u. E marĩ wa. Tame wa za wa hã Uburé Danhibꞌapito, uburé aꞌuwẽ aiwaptoma ꞌre ihâimana zaꞌra mono norĩ ma, niha na tãma rowairébé zaꞌra.
13 Aꞌuwẽ norĩ wasédé hã saꞌẽtẽ uptabi di. Tahawa te za ta norĩ hã asiwi iꞌuprosi ꞌwa, trigu ꞌre ꞌrãi ꞌré zaꞌra mono wa, da te dasiwi ꞌre itehâri zaꞌra mono ne, duré uva ꞌrã iwaꞌu zô, da te ꞌre iwatiꞌi zaꞌra mono ne, iꞌrãi waꞌu hã ꞌre ipuꞌu zaꞌra mono zéb u isémezém hawimhã.”
14 Tahawa, te za daꞌahâ uptabi na tahâimana zaꞌra ni, Dasima Rowairébézém na romharé nhisi ãma. Romhuture di oto Uburé Danhibꞌapito nhibâdâ hã taha romharé ãma za marĩ te te iꞌmanharĩzéb da hã.
15 Tawamhã bâtâ norĩ hã aꞌamoi me te za titõmo ꞌrãdâꞌâ zahuré. Duré wasi norĩ hã te za roꞌohaimani zaꞌra.
ꞌRe ihâimana uꞌâsi mono, iwẽ na tinhibꞌaꞌuwẽ norĩ te te ipawaptob zaꞌra zé wasuꞌu
16 Uburé Danhibꞌapito te za Siã na saꞌa nhisi ãma mreme ꞌrãihâ na tinha, tãirãrãꞌã ne. Zeruzalẽ hawi te za mreme ꞌrãihâ na mreme watobro.Tawamhã, hâiwa norĩ tiꞌai me te za tipopoꞌo zahuré.Tane nherẽ, te za tinhibꞌaꞌuwẽ Izaraéu nhihudu norĩ ꞌwawimhã aimapa, ꞌRe ihâimana uꞌâsi mono hã.
17 ꞌRe ihâimana uꞌâsi mono hã te tinha ãne, tinhibꞌaꞌuwẽ norĩ ma:“Ãne te za a norĩ waꞌwa hã iwaihuꞌu zaꞌra waꞌwa, wa hã Asibꞌapito zaꞌra waꞌaba na, duré ate zaꞌra waꞌwa ꞌRe ihâimana uꞌâsi mono na.Siã nhisi ãma wa ꞌre ĩnhamra, ĩte saꞌa iwazéb zahi ãma.Zeruzalẽ hã te za ꞌriꞌahâ iwazéb zahi na ꞌre hâimana. Tawamhã aꞌuwẽ dasiréꞌõ norĩ hã niwamhã te te ãma iꞌaiꞌuté zaꞌra da hã mare di za.
18 “Tô taha wahu mono na uva ꞌru hã te za ẽtẽꞌrãirã hã te te ubu. Duré tawamhã powawẽ norĩ hã te za tisa hã ropâ te te nasi huri, saꞌa mono na. Duré â hã te za Zuda tiꞌa na ꞌre praba, pa nhipti mono na.Duré ĩnhorõwa ꞌri ꞌrãihâ hawi te za â naꞌrada hã watobro, Acasia na romharé nhisi te te ꞌre idiꞌi mono da hã.
19 Ezitu hã te za dasipara dasiwi rẽme ni. Duré Edõ hã rop si ꞌre irosaꞌwari mono ne, te za ꞌre hâimana. E marĩ wa. Taha ꞌre, ꞌre idahâimana zaꞌra mono norĩ, Zuda tiꞌai u piꞌuriwi isisi, iwẽ norĩ hã te te siwi uprosi wa.
20 3:20-21 Aꞌuwẽ norĩ isiꞌutõrĩ hã, wa hã wa za ꞌruiwaꞌâbâ zaꞌra. Duré dawapru puꞌu na iꞌupaiꞌwa norĩ hã, wa za hâ zaꞌra.Tane nherẽ, Zuda tiꞌai ãma, duré Zeruzalẽ ãma te za õne uꞌâ iꞌremhã ꞌre dasiꞌubumro. Wa hã Uburé Danhibꞌapito, Siã nhisi ãma, wa za ꞌre ĩnhamra uꞌâsi.”
21 ꞌmadâꞌâ 3:20
Ĩwaꞌõtõ piꞌreba watsuꞌu mono
^ 3:8 Sabeusi hã aꞌuwẽ wamri.
