Zona 1:1-17
1 Nimahã bâtâ na te Uburé Danhibꞌapito hã tinha, Amitaꞌihi ꞌra Zona na isisi ma, ãne:
2 — Maꞌãpé asima robꞌubumro na, aimorĩ da, ꞌri nhoꞌu isaꞌẽne Niniwé na isisi u. Tame te za aimreme ꞌrãihâ na irowasuꞌu, ꞌri nhoꞌõmo wa, ꞌre idahâimana zaꞌra mono norĩ ma. E marĩ wa. Ta norĩ ꞌre iwasété zaꞌra mono zé hã ma tô we ĩtẽme wi. Ta hã wa tô wapa.
3 Tawamhã Zona hã ma tô oto sima robꞌubumro, morĩ da aré. Tane nherẽ, Uburé Danhibꞌapito te te tãma irobꞌruzéb upana, ma tô aimawi Zope na ꞌri waꞌõtõ nhisi u si mo. Tame ma tô ubaꞌre isaꞌẽne hã sõpẽtẽ, Espãnha na romnhisi u iwara da hã. Ma tô sima waꞌâ, ãma imorĩzéb da. Taha pari ma tô oto ãzé ubaꞌre wa dame, isariꞌwa norĩ me, Espãnha u morĩ da, Uburé Danhibꞌapito nhiti hâimana da, romhâ na.
4 Tane nherẽ, ꞌRe ihâimana uꞌâsi mono hã ma tô robꞌru, rowaꞌu isiptete uptabi ma, saꞌẽtẽ â hã te te sasisi da. Tahawa, te â hã saꞌẽtẽ sisasisi. Sisasisi mono wa, saꞌẽtẽ â hã, simimnhasi di aiwa ãma isipoꞌo da si, ubaꞌre ãma hã.
5 Ubaꞌre sariꞌwa norĩ hã ma tô tipahi pese zaꞌra. Ma tô duré sadari zaꞌra hâiba mono bâ, ãma ꞌre iwata zaꞌra mono norĩ ma, ihâibaꞌõ norĩ ma, te te pawaptob zaꞌra da. Ubaꞌre hã wapu na wara da hã, ma tô ro te te sãmra zaꞌra âi ba, siré te te iꞌwasari hã. Taha wana ré, ma tô Zona hã siꞌra ubaꞌre ꞌri ꞌre waꞌwa hâiba amoi u hã piꞌreba. Tame ma tô nomro. Aptâꞌâ uptabi wa, ma tô aré nhotõ pe.
6 Tawamhã ubaꞌre ꞌre, daꞌmadâꞌâꞌwa hã ma tô tame sõpẽtẽ, sõtõ ré. Tahawa, te ãne tãma tinha:
— E niha te a hã aiprédu ma asõ. Aiꞌutu, rowaptẽrẽ da, ate ihâibaꞌõ ãma ꞌre iꞌaiwata mono wi, te te aipawaptob da. Ãté ta hã te za waꞌãma tipẽꞌẽzé zaꞌra, wasiꞌutõrĩ tõ da.
7 Ubaꞌre sariꞌwa norĩ hã te duré sima nharĩ zaꞌra ãne:
— Oto wa te wasiwi mei waꞌaba ẽtẽ zapotore iꞌuiꞌéré ré hã, niꞌwa hã marĩ na te te iꞌupa, wa te wasiwi upsibi me da, taha nhimiꞌmanharĩzéb upa zarina romnhimimnha wama ihâimana zaꞌra zé hã.
Tahawa, ma tô siwi time, ẽtẽ zapotore hã. Tawamhã Zonahã nhisi hã ma tô watobro.
8 Te siwi sadanha oto ãne:
— Maꞌãpé wama asiwasuꞌu zaꞌra na. E ꞌwa hã marĩ na iꞌupaiꞌwa merẽ. E marĩ asimiromhuri. E ma hawi te we aimo. Duré e ma hã ate tiꞌai waꞌõtõ nhoꞌu. E ma hã duré asibꞌaꞌuwẽ.
9 Ãne te tãma siwasuꞌu zaꞌra, Zona hã:
— Wa hã hebreu na ĩwamri. Duré Uburé Danhibꞌapito ꞌRe ihâimana uꞌâsi mono ãma si wa ãma ꞌre ĩwata, hâiwa ãma ꞌre isãmra mono ãma, âporé ꞌmanharĩꞌwai ãma, duré tiꞌai ꞌmanharĩꞌwai ãma.
10 Taha pari, te Zona hã duré tãma siwasuꞌu zaꞌra:
— Uburé Danhibꞌapito wi, wa tô aimani.
Tahawa ubaꞌre sariꞌwa norĩ hã ma tô tipahi pese zaꞌra oto. Ãne te tãma nharĩ zaꞌra:
— E marĩ ma tô bété iꞌmanha!
11 Ãne wa, te rowaꞌuꞌu zaꞌẽne hã saꞌẽtẽ uptabi te te robꞌrãi waihi hârâ oto. Te duré siwi sadanha, ubaꞌre sariꞌwa norĩ hã, Zona ãne:
— E marĩ, wa za aima ꞌmanharĩ zaꞌra ni, âsisasi hã simizazâri da hã.
12 Zona hã ma tô asa ãma tãma waꞌrãmi zaꞌra ãne:
— Asiwi ĩꞌâri aba, asiwi ĩmei waꞌaba da âi ba, simizazâri da, âsisasi hã. E marĩ wa. Wa hã ĩma waihuꞌu pese di, te iꞌupazéb zarina rowaꞌu isaꞌẽne hã asô iwatobro zaꞌra waꞌaba na hã.
13 Ubaꞌre sariꞌwa norĩ hã ãne hã te te siwi ꞌmanharĩ da nherẽ, te te aꞌâ siwi wasi uꞌâsi, siptete na te te siwi sari pibu da, suparaꞌai u. Tane nherẽ, te te siwi sari waihuꞌu õ di, rowaꞌu hã waꞌuꞌu nhiptete uptabi wa.
14 Tahawa, te oto mreme zu, mreme ꞌrãihâ na ãne:
— Uburé Danhibꞌapito, wahâ zaꞌra tõ, wasiꞌutõrĩ da hã, ãhã aibâ hâimanazé, wa te wasiwi iꞌuprosizém na hã. A hã Uburé Danhibꞌapito te ãne hã iꞌmanha. Duré marĩ iwatobro hã asima iwẽzéb zarina hã.
15 Taha pari ma tô ubaꞌre sariꞌwa norĩ hã siwi tiꞌâ oto Zona hã. Ma tô siwi time, âi ba. Tahawa, ma tô awaꞌawi âsisasi hã ꞌmazazâ.
16 Ãne hã te te ꞌmadâꞌâ zaꞌra wamhã, ma tipahi pese zaꞌra, ꞌRe ihâimana uꞌâsi mono ma. Tahawa, ma tô tinhimizama hã misi tãma zata zaꞌra, tinhoprub zaꞌra zé hã. Te duré ropisudu hã sina tãma ꞌmanharĩ zaꞌra.
17 Tawamhã Uburé Danhibꞌapito hã ma tô tebe hã isaꞌẽtẽ ma tiꞌru, Zona te te sõmri da hã, hâiba wahuré. Tame, te siꞌubdatõ bâtâ ꞌre duré siꞌubdatõ mara na, tepe zaꞌẽtẽ waihõ ꞌremhã tihâiba.
