Zona 2:1-10
2 Uburé Danhibꞌapito tite ꞌRe ihâimana uꞌâsi mono ma, te Zona hã mre, tepe waihõ ꞌre, ãne:
2 “Uburé Danhibꞌapito, ꞌRe ihâimana uꞌâsi mono, iwasétézém na te robzépata wa, wa tô ãma aiwi rowaptẽ, ĩpawaptob da.Taha wa, ma tô we ãma ĩzadaꞌâ.Adâ ꞌre ihâimana zaꞌra mono zém hawi, wa tô ãma aiwi rowaptẽ, ĩmreme ꞌrãihâ na, ĩpawaptob da.Taha zarina, ma tô iwapa, ĩmreme hã.
3 A hã ma tô ĩme, â ꞌrehâ uptabi u.Tame ma tô â hã ĩꞌubu uburé. Duré uburé ate âsisasi si nhiptete zama ma tô ĩhâiba upsi.
4 Wa tô aré rosaꞌrata, asisiti ĩzatõrĩzém na hã atõmo nhiti. Duré wa tô aré rosaꞌrata, asibꞌri iwazéb zahi iwẽ uptabi za te iꞌmadâꞌâ zahu õ na hã apâ.
5 “Â sisasi hã ma tô ĩhâiba upsibi pese, te te ĩꞌmazébré da.Duré wesu ne hã â ꞌre, ꞌre isimasa mono norĩ hã ma tô ĩꞌrã zama siwi ubu.
6 Wa tô duré piꞌreba wara, ẽtẽꞌrãihâ nhanaꞌrata u hã.Duré tiꞌai ãma ꞌridawa zaꞌẽne sitob uꞌâsi ꞌre isa mono u zama wa tô duré wara, piꞌrebamhã*.Tane nherẽ, A hã Ĩnhibꞌapito ꞌRe ihâimana uꞌâsi mono, ma tô ĩnhoꞌreptu, ĩdâꞌâzé wi.
7 Ĩdâꞌâzéb u aré oto ĩhâimana wamhã, wa tô aiꞌãma poꞌrepuru, Uburé Danhibꞌapito ãma hã.Tawamhã ãma aima ĩmremezé hã ma tô ãma atẽme wi, ꞌre iꞌaihâimana mono zéb u, ꞌri hã iwazéb zahi iwẽ uptabi u hã.
8 “Romhâibarĩ hã marĩ dai õ nherẽ, ãma ꞌre iwata zaꞌra mono norĩ hã ma tô airẽme zaꞌra, aiꞌãma tinhimizaze zaꞌra zém na hã.
9 Tane nherẽ, wa hã wa za aiꞌãma ꞌre ĩwata uꞌâsi, ĩnhoꞌre na hã. Wa za ĩnhimizama zata na zama aima ꞌre ĩnhopru.Wa za duré aima ãma uwaimra, te aima iropisutuzé hã.E marĩ wa. ꞌRe idaꞌanhoꞌreptui mono zé hã aihawip si dâꞌâsina, Uburé Danhibꞌapito.”
10 Tawamhã Uburé Danhibꞌapito hã te tinha, tepe zaꞌẽtẽ ma, Zonahã na soꞌoꞌo da, suparaꞌré ãma.
Ĩwaꞌõtõ piꞌreba watsuꞌu mono
^ 2:6 Ã hã adâꞌâ norĩ ꞌre ihâimana zaꞌra mono zé, te wasuꞌu.
