Zona 3:1-10
3 Uburé Danhibꞌapito hã maparane ãma te Zonahã ma duré tinha, ãne:
2 — Maꞌãpé asima robꞌubumro na, Niniwé u aimorĩ da, ꞌri nhoꞌu hã dama iwaihuꞌu zaꞌẽtẽ u, tame dama rowahutu da, ĩmreme za te aima isõmrizém na.
3 Tawamhã Zona hã ma tô oto sima robꞌubumro. Taha pari te oto mo, Niniwé u hã, Uburé Danhibꞌapito te te tãma ipisutuzéb zarina. Niniwé hã ꞌri nhoꞌu isaꞌẽtẽ uptabi. Niꞌwa te te ãma roꞌrazâri da wamhã, siꞌubdatõ bâdâ te za ãma ne, para na morĩ wamhã.
4 Zona hã wisi wamhã, ma tô ãzé ꞌri nhoꞌõmo u hã. Tame bâtâ wahuré na ma tô ꞌre mo, ꞌri baba. Tawamhã ma tô oto ãma sãnaꞌrata, te te dama irowahutu na hã, ãne:
— Bâdâ 40 na isiꞌutõrĩzéb ãma hã, Niniwé hã te za aiꞌutõrĩ pese.
5 Tahawa Niniwé ꞌre, ꞌre idahâimana zaꞌra mono norĩ hã ma tô saze zaꞌra, ꞌRe ihâimana uꞌâsi mono hã. Ma tô duré sima pisutu zaꞌra, hâiba mono bâ mreme zusi da, sai ãna aꞌâ. Tawamhã dahâiba mono bâ dama ipire norĩ hã duré dama iwapu norĩ zama ma tô uburé pese siꞌuza zaꞌra saꞌu ihâiro na, tiwasété na isiwẽꞌõ zaꞌra zém na sihâiꞌré zaꞌra da hã.
6 Niniwé ãma apito, ãne hã te te waihuꞌu wamhã, ma tô oto wahudu, tisimasisizém hawi. Ma duré waze tinhoꞌutu ubuzé ipanoiꞌõ hã, saꞌu ihâiro na siꞌuza da. Taha pari ma tô nhamra, ꞌruꞌa nhisiwi.
7 Ma tô duré dama tiꞌru, da te ãma dapoꞌre puꞌu zaꞌra da, ꞌri nhoꞌõmo ꞌre, ꞌre idahâimana zaꞌra mono norĩ hã ãne: “Ã hã apito nhimiroti, duré isapari tãma iromhuriꞌwa norĩ nhimiroti zama. Niꞌwa isa da hã mare di za. Aihĩni norĩ hã, duré abaze norĩ hã, powawẽ norĩ hã duré poneꞌẽrebâ zéré mapure norĩ zama isaihuri da hã, mare di za. Duré â te te iꞌâhuri da hã mare di za, uburé marĩ waꞌu norĩ zama.
8 Uburé aꞌuwẽ norĩ hã duré abaze norĩ zama te za ãma siꞌuza zaꞌra, saꞌu ihâiro na. Dahâiba mono bâ te za saꞌẽtẽ tamreme zusi ni za, ꞌRe ihâimana uꞌâsi mono ma hã. Te za duré danhibâdâdi iwasédé hã rẽme zaꞌra ni, danhimirobꞌmanharĩ wasété zéb zama.
9 Ãté ãne wamhã, ꞌRe ihâimana uꞌâsi mono hã te za tinhimirosaꞌrata na saprĩ. Ãté isahi hã te za taré tiwi aiꞌutõ. Ãne wamhã, wasiꞌutõrĩ õ di za.”
10 Tawamhã ꞌRe ihâimana uꞌâsi mono hã ma tô ꞌmadâ, marĩ te te iꞌmanharĩ zaꞌra zé hã, duré tinhibâdâdi iwasédé hã te te irẽme zaꞌra zéb zama. Tahawa, ma tô tinhimirosaꞌrata na ãma saprĩ, te te tãma robꞌmanharĩ zaꞌra tõ da oto, ꞌri nhoꞌõmo ꞌre, ꞌre ihâimana zaꞌra mono norĩ ma hã, te te aré nharĩ nherẽ, te te daꞌuprosi da hã.
