Zona 4:1-11
4 Ãne hã ꞌRe ihâimana uꞌâsi mono te te iꞌmanharĩzé, ma tô Zona hã wẽꞌõ pese. Tahawa, ma tô tizahi.
2 Ãne te mre:
— Ĩnhibꞌapito ꞌRe ihâimana uꞌâsi mono, e ãne hã te nharĩ õre bâ, ĩnhiptiꞌai hawi we ĩwatobro wana ré hã, tô ãne na iꞌmanharĩzém na hã. Taha zarina, wa tô ĩsima rowairébé, Espãnha u si ĩmorĩ da, aiwi ĩsimani da. Ĩma waihuꞌu pese di, a hã ꞌRe ihâimana uꞌâsi mono asimizawi pese na hã, duré daꞌãma iꞌaipẽꞌẽzé pese na hã. Duré ĩma waihuꞌu pese di, daꞌãma iꞌaiwaꞌa suꞌu õ na hã, duré iwẽ na si dama ꞌre iꞌabꞌmanharĩ uꞌâsi mono na hã. Te duré ꞌre asiꞌmadâꞌâ uꞌâsi mo, asimirosaꞌrata na ãma ꞌre isaprĩ mono na, taha zarina, ꞌre dahâ zaꞌra mono tõ da.
3 Ĩnhibꞌapito, ãhã na awaꞌawi ĩhâimanazé hã ĩwi uprosi. E marĩ wa. Ĩma wẽ di, ĩdâꞌâ da si, ĩhâiba ré ꞌre ĩhâimana mono zém nhipai u.
4 Tawamhã Uburé Danhibꞌapito hã te asa tãma tinha ãne:
— Zona, e iꞌuwaibaba bâ asahi uptabi na iꞌaihâimana da hã.
5 Tawamhã Zona hã ma tô watobro, Ninive hawimhã. Bâtâ pusizéb u ma tô mo. Tame ma tô nhamra. Ma tô sima awã, sãmra da, awã zahâpâ, simipari sina, ta hawi te te robꞌmadâꞌâ da, ꞌri nhoꞌõmo zô, marĩ iwatobrozéb zô.
6 Tawamhã Uburé Danhibꞌapito ꞌRe ihâimana uꞌâsi mono hã ma tô robꞌre ma ꞌmanha, prédub suꞌu da, Zonahã nhisiwi, te te tãma awã da, taha zarina sima iwẽ na sãmra da. Tahawa Zona hã toi uptabi di, robꞌre ma hã.
7 Tane nherẽ, awẽ bâtâ na hã bâdâ ꞌrãi watobro wi, ꞌRe ihâimana uꞌâsi mono nhimiroti zarina ma tô wedewaiꞌu hã wede zapuꞌu, robꞌre hã. Tahawa, ma tô tiꞌré.
8 Bâdâ ꞌrãiwatobro parimhã, ꞌRe ihâimana uꞌâsi mono hã ma tô duré rowaꞌuꞌu waꞌro ma robꞌru, watobro da, bâtâ pusizém hawi. Tahawa, ma tô aré tiwi tirobra Zonahã wi, waꞌro uptabi wa, bâdâ hã te te ꞌrãi waꞌro pese wa. Tawamhã dâꞌâ da si, te oto sima wẽ. Tahawa, te ãne tinha:
— Ĩma hã wẽ di ĩdâꞌâ da hã, ꞌre ĩhâimana mono zém nhipai u.
9 Tane nherẽ, te ꞌRe ihâimana uꞌâsi mono hã sadanha:
— Zona, e tô iꞌuwaibaba ma asibꞌru, robꞌre zabâdâmhã.
Zonahã asa te tãma tinha ãne:
— E marĩ bété. Tô iꞌuwaibaba ma ĩwa aime, ĩnhitiꞌrui pese zé hã. Taha zarina iꞌuwaibaba ĩdâꞌâ da si, wa ĩsima wẽ.
10 Uburé Danhibꞌapito hã te duré tãma tinha ãne:
— Ã hã robꞌre hã ma tô tiprédu misi mara na. Mara amo na ma tô duré aiꞌutõ. A hã marĩ hã ãma ꞌmanharĩ õ di, duré prédub da hã tãma nharĩ õ di. Tane nherẽ, ma tô ãma aipẽꞌẽzé.
11 E iꞌuwaibaba õ di bété, Ninive ꞌri nhoꞌõmo zaꞌẽtẽ ãma ꞌre idahâimana zaꞌra mono norĩ ãma ĩpẽꞌẽzé da hã, robꞌre nhipai u. Tô iꞌuwaibaba daꞌãma ĩpẽꞌẽzézé hã. E marĩ wa. 120 miu na iwa ꞌre dahâimana zaꞌra mono wa, ꞌre idanomro wẽ mono na, duré ꞌre idanomro wasété mono na da te dasina ꞌre iwaihuꞌu zaꞌra mono õ norĩ hã. Duré danhimizama ahâ uptabi na iwa ꞌre simasa mono wa.
