Lucas 10:1-42
10 Taha pari, Wanhibꞌapito hã ma tô pisutu zaꞌra, 72 na isazeiꞌwa aibâ norĩ hã. Ta norĩ hã ma tô datẽme satõrĩ zaꞌra maparane si isõwa siꞌabaꞌré da, ꞌri nhoꞌõmo mono u, za datẽme ꞌre imorĩzéb u hã.
2 Tawamhã te te satõrĩ zaꞌra wana ré, ma tô tãma rowasuꞌu zaꞌra, ãne:
— Amnho itehâri da hã saꞌẽtẽ uptabi di. Tane nherẽ, romhuriꞌwa norĩ hã umrore di. Tahawa, maꞌãpé roptehâriꞌwa tedeꞌwai wi waptẽrẽ zaꞌra waꞌaba, romhuriꞌwa norĩ hã ahâ na te te we satõrĩ zaꞌra da, tite roptehâri u hã.
3 Mo oto aiꞌabaꞌréi waꞌaba. Wa oto asatõrĩ zaꞌra waꞌwa datẽme, poneꞌẽrebâ iꞌrare norĩ hã abaze zahi waꞌwa u ꞌre isisisi mono ne.
4 Aiꞌabaꞌréi waꞌaba wamhã, romramizé hã ꞌwasari aba tõ, duré roꞌwapézé hã, duré aipara uza zama. Duré bâdâdi na asimizahâri zaꞌra waꞌaba mono tõ, dazawi zaꞌra waꞌaba mono da hã.
5 Danhorõwa u asisisi aba mono wamhã, imorĩꞌrata na dazawi zaꞌra waꞌaba mono, ãne: “Rowẽ hã ãme ꞌri ꞌre, ihâimana da si, iwẽ hã.”
6 Tame aibâ rowẽ tãma isawi hã ꞌre sãmra mono wamhã, rowẽ tãma ipisutu zaꞌra waꞌaba zé hã te za tô tãma ꞌre hâimana. Tazahã, rowẽ tãma iwẽꞌõ wamhã, apâ ate zaꞌra waꞌwa rowẽ tãma ipisutu zaꞌra waꞌaba zé hã te za atẽme sina siri ꞌwa.
7 Tawamhã tô taha ꞌri ꞌrep si aiꞌubumroi waꞌaba mono. Nasi asaihuri aba, duré nasi â huri aba, nasi da te aima iꞌru zaꞌra waꞌwa hã. E marĩ wa. Romhuriꞌwa norĩ hã tô sada, tipawaꞌâ te te ꞌre iwaibui mono da hã. Duré asãmrazé ꞌri na ãma ꞌre saprĩ haré zaꞌra waꞌaba mono tõ.
8 — Nima hã ꞌri waꞌõtõ u asisisi aba mono wamhã, duré tame da te aiwaibui wẽ waꞌaba mono wamhã, tô asaihuri aba mono, da te aima isõmri zaꞌra waꞌaba mono na.
9 Tame ꞌri waꞌõtõ ꞌremhã, maꞌãpé ihâzé ré norĩ hã pese zaꞌra waꞌaba mono. Duré dama rowasuꞌu zaꞌra waꞌaba mono, ãne: “ꞌRe ihâimana uꞌâsi mono daꞌãma ꞌre isibꞌaꞌuwẽ mono zé hã ma we atẽme tiwisi zaꞌra waꞌwa.”
10 Tazahã, nima hã ꞌri waꞌõtõ u asisisi aba mono wa, da te aiwaibui wasété aba mono wamhã, maꞌãpé ꞌri nhiꞌriti na dama rowasuꞌu zaꞌra waꞌaba mono, ãne:
11 “Ãme ꞌri waꞌõtõ ꞌre, robzapru wapara na isimnhatã hã, wa asada tataꞌa zaꞌra waꞌaba ni! Maꞌãpé waihuꞌu zaꞌra waꞌaba, ã hã: ꞌRe ihâimana uꞌâsi mono daꞌãma ꞌre isibꞌaꞌuwẽ mono zé hã romhutu di oto, iwisizé hã.”
12 Tawamhã Zezusi hã ma duré tãma waihuꞌu zaꞌra, ãne:
— Tô sena, wa za aima waihuꞌu zaꞌra waꞌwa, ãne: Bâdâ ꞌRe ihâimana uꞌâsi mono, uburé te te daꞌãma iꞌarowairébézéb ãma hã Sodoma ãma ꞌre idahâimana wasété uptabi zaꞌra mono norĩ ãma, te te irobꞌmanharĩ pipa zém nhipai u, te za ã hã ꞌri waꞌõtõ ꞌre, asô idatobꞌuzu zaꞌra waꞌaba õ norĩ ma, robꞌmanharĩ wasété zaꞌẽtẽ.
Zezusihi wẽꞌõꞌwa norĩ poꞌre puꞌuzé
13 Tawamhã Zezusi hã ma duré ãma uzusi, ãne:
— ꞌRi nhoꞌu Corazĩ ãma ꞌre iꞌaiꞌubumroi waꞌaba mono norĩ, aima ꞌre ropipa uptabi zaꞌra waꞌaba mono di za! Duré ꞌri nhoꞌu Betisaida ãma ꞌre iꞌaiꞌubumroi waꞌaba mono norĩ, aima ꞌre ropipa uptabi zaꞌra waꞌaba mono di za. E marĩ wa. Marĩ dama iꞌmanharĩ waihuꞌuꞌõ, aiꞌreb zaꞌra waꞌaba te ꞌre iꞌabꞌmanharĩ mono hã, ꞌri waꞌõtõ norĩ Tiru duré Sidõ ãma ꞌwaꞌâhã, tame ꞌre isiꞌubumroi mono norĩ hã ma tô aré tiwasété wi aipizari zaꞌra, duréi pese. Tawamhã tiwasété na isiꞌruiwapari zaꞌra zém na sihâiꞌré zaꞌra da hã, tiꞌai wa, te aré asimro. Zazahâ ihâiro na daꞌuza na te aré siꞌuza zaꞌra. Te aré duré ꞌruꞌa hã sima ahiri zaꞌra, tiꞌrã nhisiwi.
14 Tahawa, ꞌRe ihâimana uꞌâsi mono, za Daꞌãma Rowairébézé ihâimana ãma hã Tiru duré Sidõ ãma ꞌre isiꞌubumroi mono norĩ ãma te za tipẽꞌẽzé za, asipai u zaꞌra waꞌaba, Corazĩ duré Betisaida ãma ꞌre iꞌaiꞌubumroi waꞌaba mono norĩ nhipai u.
15 Tawamhã duré a hã, ꞌri waꞌõno Cafarnau. E te asina irosaꞌra, hâiwa u za iꞌaiwisi na hã. Aiwisi õ di za. ꞌRe ihâimana uꞌâsi mono hã te za aime, adâ ꞌre ihâimana zaꞌra mono zé, Hades na rowamri u.
16 Tawamhã isiré ꞌre inomro mono norĩ ma, te tinha, ãne:
— Niꞌwa hã ĩnhimiroti na te te ꞌre aiwapari zaꞌra waꞌaba mono wamhã, ta hã te tô te te ꞌre ĩwapari. Tazahã, niꞌwa hã ĩnhimiroti te te wẽꞌõ wamhã, ta hã te za ĩwẽꞌõ. Duré niꞌwa hã te te ĩwẽꞌõ wamhã, we ĩzatõrĩꞌwa zama te tô wẽꞌõ duré, ta hã.
Isazeiꞌwa norĩ 72 na ihâiba zaꞌra hã, apâ isihutuzé
17 Tawamhã 72 na ihâiba zaꞌra norĩ hã apâ ma tô sina siri zaꞌra, to sina. Ãne ma tô Zezusihi ma siwasuꞌu zaꞌra:
— Apito, waꞌuburé norĩ zama ma tô te te wawapari zaꞌra, asisi waihuꞌu pese na, wa te tãma robꞌru zaꞌra mono wamhã, dahawi wairébé mono da hã.
18 Tawamhã Zezusi hã ma tô tãma waihuꞌu zaꞌra, ãne:
— Tane tô. Satanasi hã tãiwapsaꞌa ne waptu na hâiwa hawi waptãꞌã wamhã*, wa tô ꞌmadâ.
19 Maꞌãpé ĩwapari pese zaꞌra waꞌaba. Asimiroti pire hã wa aima sõmri zaꞌra waꞌwa, wahi norĩ hã aipara na ꞌre watiꞌi zaꞌra waꞌaba mono da, duré apaꞌapa ꞌwa nhiꞌoto zama. Wa tô duré asimiroti pire hã aima sõmri zaꞌra waꞌwa, waꞌuburé norĩ nhiptetezém nhipai u ꞌre ihâimana mono hã. Tahawa niha hã te te ꞌre aiꞌmanharĩ wasété zaꞌra waꞌaba mono õ di za.
20 Tane nherẽ, asima ꞌre rowẽ zaꞌra waꞌaba mono tõ, waꞌuburé norĩ hã te te ꞌre aiwapari zaꞌra waꞌaba mono wamhã. Tazahã, asima ꞌre rowẽ zaꞌra waꞌaba mono, hâiwa ãma danhisi na robꞌuiꞌérézém na, asisi zaꞌra waꞌwa hã ꞌre hâimana zaꞌra mono wa.
21 Tawamhã tô taha bâtâ na hã, ꞌRe ihâimana uꞌâsi mono Pẽꞌẽzani nhiptetezém na, ma tô Zezusi hã ꞌre to. Tahawa ma tô ãne tinha Timama ma:
— Ĩmama, Uburé Danhibꞌapito, hâiwa ãma duré tiꞌai ãma zama, wa aiꞌãma ĩwata, aiꞌuté ne dama wapu na ꞌre ihâimana zaꞌra mono norĩ ma, ꞌre ahâiꞌré mono wa, rowaihuꞌu pese ꞌwa norĩ ma, marĩ ꞌre iꞌahâiꞌré mono õ hã. Tane tô, Ĩmama. Ãma aima ꞌre rowẽ uptabi mono di, ãne hã ꞌre iꞌabꞌmanharĩ mono zém na hã.
22 — Ĩmama uburé marĩ hã ma tô ĩma sõmri zaꞌra. Niꞌwa hã te te waihuꞌu õ di, Iꞌra hã. Imama si te te waihuꞌu pese di. Duré niꞌwa hã, Imama hã te te waihuꞌu õ di. Iꞌra si te te waihuꞌu pese di. Duré Iꞌra hã niꞌwam norĩ te te sima ꞌre iꞌawẽ mono zéb uwaibaba, te te tãma ꞌre iꞌahâiꞌré mono norĩ ma si, waihuꞌu pese di, Imama hã.
23 Tawamhã ãne na te te tãma waihuꞌu zaꞌra pari, Zezusi hã ma tô aipiꞌra, isiré ꞌre inomro mono norĩ u. Hâiba pisutu ma tô ãne tãma nharĩ zaꞌra:
— Niꞌwam norĩ ma ꞌre rowẽ uptabi zaꞌra mono di, ãhã na atõmo na iꞌmadâꞌâ zaꞌra waꞌwa hã te te iꞌmadâꞌâ zaꞌra norĩ ma hã.
24 Tô sena wa za aima waihuꞌu zaꞌra waꞌwa, ãne: Ahâ uptabi na ꞌRe ihâimana uꞌâsi mono zadawa ꞌmahârâꞌwa norĩ hã duré apito norĩ zama ma tô aré te te sima ꞌre wẽ zaꞌra, ã hã atõmo na iꞌmadâꞌâ zaꞌra waꞌwa hã te te ꞌmadâꞌâ zaꞌra da. Tane nherẽ, te te ꞌmadâꞌâ zaꞌra õ di. Ma tô aré duré te te sima ꞌre wẽ zaꞌra, ã hã iwapari zaꞌra waꞌwa hã tipoꞌre na te te ꞌre wapari zaꞌra mono da. Tane nherẽ, te te wapari zaꞌra õ di.
Samaritanu, ꞌre imorĩ wẽ wasuꞌu
25 Tawamhã nimahã bâtâ na, ꞌRe ihâimana uꞌâsi mono nhimiroti zahi na dama rowahutuꞌwa hã, Zezusi te te ãma upa zô, te te pibu da, te te sima wẽ wa, ma tô sadanha, ãne:
— Rowahutuꞌwa, e marĩ, wa za ꞌmanha, dahâimanazé isiꞌutõrĩꞌõ te ĩsina uwaimrami da wamhã.
26 Tawamhã Zezusi hã ma ãma sadaꞌâ, ãne:
— E niha ꞌRe ihâimana uꞌâsi mono mreme na Ibaihâ iwazé pese na robꞌuiꞌéré hã te nomro. E niha ma tô isadaihu, ãma irobꞌuiꞌéré hã.
27 Tawamhã aibâ hã ma ãma sadaꞌâ, ãne:
— Uburé Danhibꞌapito ate ꞌRe ihâimana uꞌâsi mono hã ꞌre sawi pese mono, duré uburé aipẽꞌẽ na, duré uburé aihâimanazé iꞌrowi uptabi na, duré uburé asiptede aima ꞌre ihâimana mono na duré uburé asimirosaꞌrata na zama. Duré aiꞌrata ꞌre ihâimana zaꞌra mono hã ꞌre azawi pese mono, ꞌre iꞌasisawi pese mono ne.
28 Tawamhã Zezusi hã ma tô ãne tãma tinha:
— Tane tô. Iꞌuwaibaba ma ãma ĩzadaꞌâ. Maꞌãpé ta hã ꞌre ꞌmanharĩ mono. Tawamhã te za dahâimanazé isiꞌutõrĩꞌõ hã asina iꞌuwaimra.
29 Tane nherẽ, aibâ hã siꞌuꞌra zé, ma tô Zezusi hã sadanha, ãne:
— E ꞌwa hã ꞌrâwi ĩꞌrata ꞌre ihâimana mono.
30 Tawamhã Zezusi hã ma tô ãma sadaꞌâ, romnhimiréꞌé na, ãne:
— Aibâ hã te siꞌra Zeruzalẽ hawi, Zerico u. Tane nherẽ, bâdâdi na morĩ ré, ma tô isimisaihuri norĩ hã sô wairé. Ta norĩ hã ma tô iꞌuza tiwi sani zaꞌra. Ma duré siwi azâ. Taha pari ma tô oto aiꞌabaꞌré. Dâꞌâ prã na ma tô siwi tirẽ.
31 Tawamhã sasedoti hã taha bâdâdi na te duré siwaꞌru na siꞌra. Tawamhã aibâ inomro te te ꞌmadâꞌâ wamhã, ma tô saprĩ, bâdâdi zadaꞌré hâiba amo niwĩ.
32 Tawamhã levita hã ma duré roꞌrazâ, taha bâdâdi na hã. Ta hã duré, aibâ nomro ré te te ꞌmadâꞌâ wamhã, ma tô duré saprĩ, bâdâdi zadaꞌré amo niwĩ. Ma tô timorĩ waré.
33 Tane nherẽ, samaritanu na iwamri, darob amoi u romhâ na imorĩ hã ma tô duré oto roꞌrazâ, taha bâdâdi na. Aibâ inomrozéb u ma tô wi. Te te ꞌmadâꞌâ wamhã, ma tô ãma tipẽꞌẽzé.
34 Tahawa ma tô itẽme sina rotété. Tawamhã iꞌwaꞌre hã ma tô tãma uꞌré zaꞌra, robꞌrãi waꞌu na, duré azeite ꞌrãi waꞌui wam na. Taha pari ma tô tãma ubu zaꞌra. Tinhimizama ba nhisi ma tô tihi. Ma tô ãwisi, dazaꞌwarizéb u. Tame ma tô aꞌâ ꞌmadâ.
35 Tawamhã awẽm na hã, dazaꞌwarizé tedeꞌwai ma, ma tô tisõ, maparane robꞌuiprazé isapotore ẽtẽ waipo prã prata ꞌmanharĩ hã. Ãne te tãma tinha: “Maꞌãpé ꞌmadâꞌâ pese. Apâ we ĩwisi wapsi, wa za aima waꞌâbâ ꞌrãsutu, ãma irobꞌuprosizé hã.”
36 Tawamhã Zezusi hã ma tô oto ãma sadanha, aibâ hã, ãne:
— Aima hã siꞌubdatõ te te iroꞌrahâri zaꞌra hã, e ma hã ma tô aibâ zawi na tihâiba ꞌrâwi iꞌratamhã, isimisaihuri te te siwi iꞌazâri ꞌratamhã.
37 Tawamhã aibâ hã ma tô ãma sadaꞌâ, ãne:
— Aibâ ãma isime!
Tawamhã Zezusi hã ma tô ãne tãma tinha:
— Tane tô. Mo oto aimorĩ. Isine ꞌre ꞌmanharĩ mono!
Zezusi hã, Marta norĩ Mariaha me, te te isabu zahuré zé
38 Tawamhã Zezusi hã duré isiré ꞌre inomro mono norĩ me, timorĩ na te te uzusi zaꞌra wamhã, ma tô aihutu, ꞌri waꞌõtõ u. Tame piꞌõ Marta na isisi hã ma tô Zezusi ꞌmazé, tinhorõwa u.
39 Tawamhã isisãnawã Maria hã ma tô nhamra, Wanhibꞌapito Zezusihi para ãma. Isimirowasuꞌu hã te wapa.
40 Tanei õ di, Marta hã. Ta hã ꞌri ꞌre romhuri na si ma tô tiꞌrãzaꞌõtõ. Tahawa, ma tô Zezusihi u sina rotété. Ãne te sadanha:
— Apito, e ãma rosaꞌrata õ di, ĩno hã ĩsiwaprosi te romhuri da, te te irẽme na hã, uburé romhuri, te abꞌmanharĩ da hã. Maꞌãpé, tãma nharĩ, te te ĩpawaptob da.
41 Tahawa Wanhibꞌapito hã ma tô sadaꞌâ ãne:
— Marta, Marta, airési ãna asãmra õ di. Duré marĩ iꞌahâ na si te aihâtâ.
42 Tane nherẽ, misire iꞌru zahi hã! Ta hã Maria hã ma tô sima pisutu, uburé marĩ nhipai u iwẽ uptabi hã. Ta hã niꞌwa hã te te tiwi wazere waihuꞌu õ di za.
Ĩwaꞌõtõ piꞌreba watsuꞌu mono
^ 10:18 Satanasi hã hâiwa hawi waptãꞌã wamhã, isiptetezé hã ma tô tiwi abꞌuwa.
