Lucas 14:1-35
14 Tawamhã nimahã sabadu na, Zezusi hã ma tô ãzé, farizeu dama ipire nhorõwa u, isiré sa da. Tawamhã Zezusi hã te dasiwi ꞌmadâꞌâ pese ni.
2 Tame te aibâ hã isõꞌre na tihâiba, ihâiba duptoi mono hã.
3 Tawamhã Zezusi hã ma tô sadanharĩ zaꞌra farizeu norĩ duré ꞌRe ihâimana uꞌâsi mono nhimiroti zahi na robꞌuiꞌéré na dama rowahutuꞌwa norĩ zama, ãne:
— E iꞌru zahi, sabadu na da te ꞌre idapese zaꞌra mono da hã. E niwamhã mare di.
4 Tane nherẽ, te te ãma siwi sadaꞌâbâ õ di. Tahawa Zezusi hã aibâ ma tô paꞌâ. Ma tô pese. Taha pari ma tô oto tãma robꞌru.
5 Tawamhã ma tô sadanharĩ zaꞌra, ãne:
— Aiꞌra waꞌwa hã duré niwamhã ate waꞌwa powawẽ hã â zô abꞌre ꞌre ꞌmaiwaptãꞌã wamhã, e waptu na wazere aba õ di za, ãne hã sabadu na romhâimana nherẽ.
6 Tawamhã te te ãma siwi sadaꞌâbâ waihuꞌu õ di.
Dawapu na dama ꞌre idahâimana zaꞌra mono zé, duré danhorõwa u da te ꞌre idawaibui wẽ mono zé
7 Tawamhã Zezusi hã, sô idahãsi norĩ, dama ipire norĩ simasisizéb zô sima sô isõpré na te te aꞌmadâꞌâ wamhã, ma tô rowasuꞌu na tãma ãma romnhimiréꞌé zaꞌra, ãne:
8 — Niꞌwa hã dasina damro wa, dato ihâimanazéb u asô hârâ aba wamhã, dama ipire norĩ simasisizém na asãmra aba tõ. E marĩ wa. Niwamhã asô ihârâ ꞌwa hã niꞌwa te te poꞌre puꞌu õꞌumnhasite, asipai u waꞌaba dama ipire hã.
9 Tawamhã asô ihârâ ꞌwa hã, te te aima nharĩ aba õꞌumnhasite, ãne: “Ãhã ma, tãma aiꞌré na.” Tawamhã te za aiwi tirowazé waꞌwa. Taha pari dama iwapu nhamrazéb ãma asãmra aba õꞌumnhasite.
10 Tahawa, niꞌwa asô hârâ waꞌaba wamhã, daꞌrãsutuꞌu asãmra waꞌaba. Ãne wamhã, asô ihârâ ꞌwa hã te za aiꞌmahârâ ꞌwa, ãne: “Ĩsiwaihu, ãwa we asãmra, danhamrazé iwẽ ãma.” Ãne wamhã, dama aipire ne te za aihâiba, sô idahãsi norĩ nhoꞌa hã.
11 E marĩ wa. Niꞌwa hã ꞌrâwi te te sina ꞌre hâimo mono wamhã, ꞌRe ihâimana uꞌâsi mono hã te za te te ꞌre sisém nomri. Tanei õ di, niꞌwa hã ꞌrâwi te te sina ꞌre tiꞌawi mono wamhã, ꞌRe ihâimana uꞌâsi mono hã te za tãma pisutu, pire na ꞌre hâimana mono da.
12 Taha pari, Zezusi hã ma tô tinha, aibâ sô ihârâ ma, ãne:
— Abzuma waꞌwa dasa hã duré niwamhã barana ꞌre ꞌmanharĩ mono wamhã, asiwaihuꞌu norĩ zô si ꞌre aihârâ zaꞌra mono tõ, duré asisãnawã norĩ zô si, duré asiwadi norĩ zô hã, duré asababa isibro pese norĩ zô zama. E marĩ wa. Ta norĩ hã niwamhã duré asô hârâ waihuꞌu pese zaꞌra di. Tawamhã te za aima waꞌâbâ zaꞌra, aihâimana wẽ na tãma iꞌmanharĩ zaꞌra zé hã.
13 Tazahã, dasa dama ꞌre ꞌmanharĩ mono wamhã, isibrobꞌõ norĩ zô si ꞌre aihârâ mono, duré imorĩ wasété norĩ zô, duré imorĩꞌõ norĩ zô, itobꞌa norĩ zô zama.
14 Ãne wamhã, aima ꞌre rowẽ uptabi mono di za. E marĩ wa. Ta norĩ hã niha te te aima waꞌâbâ waihuꞌu zaꞌra õ wa, za. Tawamhã ꞌRe ihâimana uꞌâsi mono hã iꞌuwaibaba na ꞌre ihâimana zaꞌra mono norĩ te te iꞌahâiwaꞌutuzéb ãma si te za aima waꞌâ.
Dasa isaꞌẽne, za ihâimanazé
15 Tawamhã aibâ, sa da, meza na dame isãmra hã, ãne te te wapari wamhã, ma tô Zezusihi ma tinha, ãne:
— Tãma ꞌre rowẽ uptabi zaꞌra mono di za, saihuri da, isisimro norĩ ma hã, dasa isaꞌẽne za ihâimana ãma hã, ꞌRe ihâimana uꞌâsi mono daꞌãma ꞌre isibꞌaꞌuwẽ mono zéb ãma hã.
16 Tawamhã Zezusi hã ma tô romnhimiréꞌé na tãma rowasuꞌu, ãne:
— Aibâ hã ma tô robzaꞌra pese, dasa isaꞌẽne hã te te ꞌmanharĩ da. Daꞌahâ uptabi na ma tô dazô hâ.
17 Tawamhã bâdâ oto wisi wamhã, tite romhuriꞌwa hã ma tô satõ, sô ihârâ zaꞌra norĩ ma, te te tãma rowasuꞌu zaꞌra da, ãne: “We oto aiꞌabaꞌréi waꞌaba! Uburé robzaꞌra pese di oto!”
18 — Tane nherẽ, ma tô hâiba mono bâ tãma siwasuꞌu zaꞌra, siꞌuꞌrazéb da. Imorĩꞌrada hã ma tô tãma siwasuꞌu, ãne: “Tiꞌa wa ꞌmaiꞌuipra. Tamomo wa za mo. Te sabui hâ. Tahawa, maꞌãpé ĩꞌruiwapari tõ.”
19 — Ihâiba amo hã ma tô duré tãma siwasuꞌu, ãne: “Wa uipra zaꞌra imrotõ na powawẽ ibaꞌu hã. Tamomo wa za mo te sabu zaꞌra da, te te romhuri wẽ zaꞌra zô. Tahawa, wa aiwi waptẽ, ĩꞌruiwapari tõ.”
20 — Ihâiba amo hã te duré tãma siwasuꞌu, ãne: “Nimosi wa ĩmro. Tahawa ãma ĩmorĩ waihuꞌu õ di.”
21 — Tawamhã romhuriꞌwa hã ma tô apâ sina siri. Tinhibꞌapito ma, ma tô rowasuꞌu pese. Tahawa, isibꞌapito hã sibꞌrui wa, ma tô tãma robꞌru, ãne: “Mo oto waptu na dazô ꞌre aimorĩ, ꞌri nhiꞌriti na, duré ꞌri nhiꞌriti ꞌrare na, isibrobꞌõ norĩ hã we simroi mono da, duré imorĩ wasétére norĩ hã, duré itobꞌa norĩ hã duré ihiꞌré norĩ zama.”
22 — Taha pari, romhuriꞌwa hã ma tô tinha, tinhibꞌapito ma, ãne: “Apito, ĩma iꞌruzé hã wa tô ꞌmanha. Tane nherẽ, zahadu robꞌre zaꞌẽtẽ di.”
23 — Tahawa, isibꞌapito hã ma tô duré tãma tinha, ãne: “Tane wamhã, maꞌãpé duré bâdâdi mono bâ dazô ꞌre aimorĩ. Daꞌanhopẽtẽ mono wamhã, dama arobꞌrui mono, we dasiꞌabaꞌré da, ĩnhorõwa hã ꞌmasisi pese da.
24 Tô sena wa za aima waihuꞌu zaꞌra waꞌwa, ãne: Sô ĩhârâ ꞌrata zaꞌra norĩ hã ĩte dasa isaꞌẽne te te ipibu zaꞌra da hã, mare di za!”
Zezusihi zazeiꞌwa na, ꞌre idanomro mono zé
25 Tawamhã nimahã bâtâ na, daꞌahâ uptabi hã te Zezusihi zarina aiꞌabaꞌré ni. Tahawa ma tô datẽme aipiꞌra. Ãne te dama tinha:
26 — Niꞌwa hã ĩsiré ꞌre morĩ da, we ĩtẽme morĩ nherẽ, ĩzawi nhipai u timama, duré tina, duré timro, duré tiꞌra norĩ, duré tisisãnawã norĩ, duré tihidiba norĩ duré tihâimanazéb zama te te sima ꞌre azawi mono wamhã, ta hã ĩsiré ꞌre imorĩ da hã waihuꞌu õ di.
27 Niꞌwa hã tizaꞌozé wedepoꞌo nhonhiꞌrãmi te te âri õ wamhã, duré ĩzarina ꞌre morĩ õ wamhã, ta hã ĩsiré ꞌre imorĩ da hã waihuꞌu õ di.
28 — Niꞌwa hã ꞌri ꞌrãihâ te te ꞌri da wamhã, e imorĩꞌrata na za sãmra ã bâ aꞌâ, te te saꞌrata wẽ da, niha iwaꞌâ hã za watobro zô, duré robꞌuiprazé hã iwa za siꞌutõrĩ zô.
29 Ãne hã niꞌwa te te ꞌmanharĩ õ wamhã, ꞌri naꞌrata nhanaꞌrada hã te te ꞌmanharĩ nherẽ, ꞌri hã te te uprosi waihuꞌu õ di za. Tawamhã uburé nasi te te iꞌmadâꞌâ zaꞌra hã te za nasi ãma tito zaꞌra za. Ãne te za nasi tãma nharĩ zaꞌra:
30 “Ã hã aibâ hã ꞌri ꞌmanharĩ na ma ãma sãnaꞌrata. Tane nherẽ, te te ꞌri ꞌmanharĩ uprosi waihuꞌu õ di.”
31 — Duré niwamhã apito hã, tite dasiꞌwapéi ꞌmanharĩꞌwa norĩ 10 miu na ihâiba zaꞌra ré dasiꞌwapé zô watobro da wamhã, tane nherẽ, iꞌwapéiꞌwa da hã, 20 miu na dasiꞌwapéi ꞌmanharĩꞌwa sada hâimana zaꞌra wamhã, e za aꞌâ sãmra ã bâ, te te ãma rosaꞌrata pese da hã, 10 miu na te te ãma aiꞌuté waihuꞌu pese zô, 20 miu na ihâimana zaꞌra ãma hã.
32 Ãne hã te te ꞌmanharĩ õ wamhã, sada ihâimana ma hã romhâ na hâimana ré, te za tite romreme ꞌwapéiꞌwa hã itẽme satõ, apâ rowẽ na siré ꞌre hâimana zahuré mono da, siꞌwapéi ãna.
33 — Ãne za duré a norĩ waꞌwa hã, uburé asibro hã ꞌre rẽme zaꞌra waꞌaba mono õ wamhã, ĩsiré ꞌre anomro waihuꞌu aba mono õ di za.
Sa dasai warĩrĩzé
34 Tawamhã Zezusi hã te duré dama rowasuꞌu, ãne:
— Sa hã iwẽ, dasai warĩrĩzéb da hã. Tane nherẽ, siwamnarĩ wamhã, e niha apâ iꞌmanharĩzé hã, wẽ na apâ hâimana da hã.
35 Tiꞌai ma hã wasété di za, oto duré tiꞌai wazarizé ma zama. Tawamhã taré te za oto me ni. Asimiparizé hã aima hâimana zaꞌra waꞌaba wamhã, maꞌãpé wapari zaꞌra waꞌaba!
