Lucas 5:1-39
5 Nimahã bâtâ na Zezusi hã ma tô tihâiba, isõꞌu Zenezaré ãma. Tawamhã daꞌahâ uptabi hã ma tô duré tasiwati pese zaꞌra ni, ꞌRe ihâimana uꞌâsi mono nhimiroti hã da te wapari wẽ zaꞌra da.
2 Tame Zezusi hã ma tô ꞌmadâ, maparane ubaꞌre supara ꞌré ꞌrata isaꞌwari hã, tepe mramiꞌwa norĩ te te siwi inomri hã, abazipara te te siwi upsõi ré.
3 Tawamhã Zezusi hã ma tô ãzé, ubaꞌre ihâiba amoi wa, Simahã te ꞌre. Ma tô tãma tinha, suru na te te azaꞌré da, supara nhiti. Tame ma tô ubaꞌre wa nhamra. Rowahutu na ma tô oto dama sãnaꞌrata.
4 Tawamhã te te dama rowahutu parimhã, Zezusi hã ma tô Simahã ma tinha, ãne:
— Maꞌãpé ubaꞌre hã sari, iꞌâ ꞌrehâ u. Tawamhã tame te za abazipara hã asiwi isãmra ꞌwa asiré norĩ me, tepe zô.
5 Tawamhã Simahã te asa tãma tinha, ãne:
— Rowahutuꞌwa, mara bâre wa tô wa te sô sãmra. Tane nherẽ, wa te ꞌmaiꞌâri zaꞌra õ di. Tane nherẽ, a hã wama iꞌru zaꞌra zéb zarina, wa za wasiwi sãmra ni, abazipara hã.
6 Tawamhã abazipara hã te te sô sãmra zaꞌra wamhã, tebe hã ahâ uptabi na ma tô waibu zaꞌra. Tahawa te abazipara hã oto iré sisinarĩ zaꞌra.
7 Tahawa tisiré tepe mramiꞌwa norĩ zô te sô pahamrimi zaꞌra, ubaꞌre ihâiba amoi u, itẽme sisaꞌrei mono da, ãma sime zaꞌra da. Tahawa ma tô itẽme sisaꞌre. Ubaꞌre hã ma tô ãma ꞌmasisi pese zaꞌra, tepe na. Ahâ uptabi wa, ma tô aré sina ꞌmazasi zahuré.
8 Tawamhã Simau Pedru, ãne iromhâimanazé te te ꞌmadâꞌâ wamhã, hiꞌrãtitõ ma tô aime, Zezusihi papara. Ãne te tãma tinha:
— Wanhibꞌapito, ĩnhiti aimorĩ! Wa hã ĩwasétére di.
9 Tawamhã Simau hã duré isiré norĩ zama ma tô ãma titobꞌuzu zaꞌra, tebe hã ahâ uptabi na te te waibu zaꞌra wa.
10 Tiagu duré Zuwãhã me, ta norĩ hã Zebedeu ꞌra zahuré, Simahã siré tepe mramiꞌwa zahuré, ta norĩ zama ma tô ãma titobꞌuzu zahuré. Tawamhã Zezusi hã te Simahã ma tinha, ãne:
— Aipahi tõ! Ã hawimhã te za oto ĩma ꞌre idaꞌawaibui mo.
11 Tawamhã ubaꞌre hã ma tô siwi sari zahuré, supara ai u. Tame ma tô uburé marĩ hã rẽme zaꞌra. Zezusihi zarina te oto aiꞌabaꞌré.
Zezusi hã, aibâ iꞌwaꞌre ré te te ipesezé
12 Tawamhã Zezusi hã nima hã ꞌri waꞌõtõ ãma sãmra ré, aibâ hã ma tô roꞌrazâ, iꞌwaꞌre ré hã. Uburé ihâiba na te iꞌwaꞌre isimihâiba upro hã ãma tihâiba. Tawamhã aibâ hã, Zezusi te te ꞌmadâꞌâ wamhã, ma tô hiꞌrãtitõ tãma aime. Tiꞌubu na ma tô duré tiꞌai u hã ropto. Ãne te tiwi saꞌẽtẽ sina rowaptẽ:
— Apito, ĩma waihuꞌu pese di, za ĩpese waihuꞌu pese na hã, asima wẽ wamhã.
13 Tawamhã Zezusi hã ma tô sô mawẽ. Ma tô upi. Ãne te tãma tinha:
— Wa ĩsima wẽ tô. Aihâiba pese oto.
Tawamhã awaꞌawi pesere ma tô iꞌwaꞌre isimihâiba upro hã tãma aimani.
14 Tawamhã Zezusi hã ma tô aibâ sadawa uwati pese, ãne:
— Niꞌwai ma hã rowasuꞌu tõ. Sasedoti u si aimorĩ, te te aihâiba zabu da. Taha parimhã, iꞌaihâiba pese zém na hã ꞌRe ihâimana uꞌâsi mono ma asõpru na, Mozési te te ãma irobꞌuiꞌérézéb zarina, da te ãma iꞌaiwaihuꞌu zaꞌra zéb da hã.
15 Tane nherẽ, Zezusihi wasuꞌu hã ma tô te te sina hâimo uꞌâsi, daro mono bâ. Tahawa ma tô daꞌahâ uptabi na itẽme ꞌre dasihutu, da te ꞌre wapari zaꞌra mono da, duré dahâzé daꞌãma ꞌre ihâimana zaꞌra mono wi, te te ꞌre daꞌapese mono da.
16 Tane nherẽ, Zezusi hã ma tô ꞌre ne, aꞌubuni u, te te ꞌre rowaptẽrẽ mono da.
Zezusi hã, aibâ ihiꞌré te te ipesezé
17 Nimahã bâtâ na, Zezusi hã te te dama rowahutu ré, nima norĩ farizeu norĩ duré nima norĩ ꞌRe ihâimana uꞌâsi mono nhimiroti zahi na robꞌuiꞌéré na dama rowahutuꞌwa norĩ hã, te dame aiꞌubumro. Ta norĩ hã ꞌri waꞌõno Galiléia ãma, ꞌre ihâimana zaꞌra mono hawimhã ma tô itẽme sito, duré Zudéa na tiꞌa nhisi hawimhã duré Zeruzalẽ hawib zama. Tawamhã Uburé Danhibꞌapito waihuꞌu pe hã te Zezusihi siré ꞌre hâimana, ihâzé ré norĩ hã te te ꞌre apese mono da hã.
18 Tawamhã nima norĩ aibâ norĩ hã ma tô siwi ãwisi, aibâ ihiꞌré isaꞌwarizé wa, inomro hã. Ta norĩ hã ma tô aré sima wẽ zaꞌra, Zezusihi u te te siwi ꞌmazébré da, isõꞌre te te siwi hiri da.
19 Tane nherẽ, daꞌahâ uptabi wa, iré sisisi waihuꞌu õ di, aibâ ihiꞌré ré hã. Tahawa ma tô ãma siwi saiꞌu ꞌri nhisi u. Ta hawi ma tô sada ꞌri ꞌrepuꞌu zaꞌra. Ma tô ãma siwi siꞌra, dawaꞌwa u isaꞌwarizé wa, Zezusihi nhoꞌre u.
20 Tawamhã Zezusi hã ma tô ꞌmadâ, aibâ norĩ ma, isimiꞌumnhasizé tãma ihâimana zaꞌra na hã. Tahawa ma tô ihiꞌré ma tinha, ãne:
— Ĩsiwaihu, ꞌRe ihâimana uꞌâsi mono hã aiwasédé te te oto aiꞌãma ꞌre abꞌmadâꞌâ mono õ di za!
21 Tawamhã ꞌRe ihâimana uꞌâsi mono nhimiroti zahi na robꞌuiꞌéré na dama rowahutuꞌwa norĩ hã duré farizeu norĩ me, ma tô rosaꞌrata na ãma sãnaꞌrata zaꞌra, ãne:
— E marĩ na hâimana bâ, te ãne ã hã aibâ hã sina rosaꞌrata. Ãne wamhã, ꞌRe ihâimana uꞌâsi mono ãma te wasété. Niꞌwa hã hâimana õ di, dawasédé te te dama ꞌre iꞌapari mono da hã. ꞌRe ihâimana uꞌâsi mono si waihuꞌu pese di.
22 Tane nherẽ, Zezusi hã te te waihuꞌu pese di, te te ãma irosaꞌrata zaꞌra zé hã. Tahawa ma tô ãne tãma nharĩ zaꞌra:
— E marĩ da, te tane ĩꞌãma irosaꞌrata zaꞌra waꞌwa.
23 E ma hã iwapu, imorĩꞌõ ma, te inharĩzéb da hã, e ã hã: “Aiwasédé hã ꞌRe ihâimana uꞌâsi mono te te oto aiꞌãma ꞌre abꞌmadâꞌâ mono õ di za”, e niwamhã duré ã hã “Aiwahutu. Aimorĩ oto.”
24 Tane nherẽ, Tiꞌai ãma Dasiré Ipodo hã, isimiroti ipire uptabi na, dawasédé te te daꞌãma ꞌre iꞌabꞌmadâꞌâ mono õ zé hã waihuꞌu zaꞌra waꞌaba da, wa za ãne hã ꞌmanha.
Tawamhã imorĩꞌõ ma, ma tô ãne tinha:
— Ãne wa za aima tinha: Aiwahutu. Asaꞌwarizé hã âri, aimorĩ da oto, asõrõwa u.
25 Tawamhã awaꞌawi pesere ma tô aibâ hã wahudu, danhoꞌre. Tizaꞌwarizé hã ma tô tiꞌâ, iwa inomro hã. Taha pari tinhorõwa u ma tô mo, ꞌRe ihâimana uꞌâsi mono ãma wata mono sina.
26 Tawamhã uburé ma tô ãma tatobꞌuzu zaꞌra ni. Ma tô duré tapahi zaꞌra ni. Tahawa te ꞌRe ihâimana uꞌâsi mono ãma tawata zaꞌra ni. Ãne te nharĩ zaꞌra ni:
— Ãhã na hã marĩ dama iꞌmanharĩ waihuꞌuꞌõ iwẽ uptabi, wa ꞌmadâꞌâ zaꞌra ni.
Zezusi hã Levihi zô ihârâzé
27 Taha parimhã Zezusi hã ma tô oto watobro, rob u. Tawamhã danhibꞌapito ma robꞌuiprazé arĩ ubumroiꞌwa hã ma tô ꞌmadâ, Levi na isisi hã robꞌuiprazé arĩ te te ꞌre iꞌaꞌubumroi mono zéb ãma sãmra ré. Tawamhã Zezusi ma tô ꞌmahâ, ãne:
— We aimorĩ, ĩsiré ꞌre aimorĩ da oto.
28 Tahawa Levi hã ma tô wahudu. Uburé marĩ hã ma tô arẽ. Zezusihi siré te oto mo.
29 Taha parimhã Levi hã, Zezusi te te sawi da, ma tô dasa isaꞌẽne hã tãma ꞌmanha, tinhorõwa ãma. Tame te daꞌahâ uptabi na isiré tasaihuri ni, robꞌuiprazé arĩ ubumroiꞌwa norĩ hã, duré niꞌwam norĩ zama.
30 Tawamhã farizeu norĩ hã duré ꞌRe ihâimana uꞌâsi mono nhimiroti zahi na robꞌuiꞌéré na dama rowahutuꞌwa norĩ hã, siré ꞌre ihâimana zaꞌra mono hã ma tô tãma pẽtẽ zaꞌra, Zezusihi siré ꞌre inomro mono norĩ ma, ãne:
— E niha bâ te asaihuri ꞌwa, te duré iꞌâhuri ꞌwa, robꞌuiprazé arĩ ubumroiꞌwa norĩ siré, duré dawasété na ꞌre idanomro mono norĩ siré zama.
31 Tahawa, te Zezusi hã tãma nharĩ zaꞌra, ãne:
— Ihâzéꞌõ norĩ hã ꞌre simnhasi waihuꞌu zaꞌra mono õ di, dawedeꞌwa zô hã. Ihâzé ré norĩ si te sô ꞌre simnhasi zaꞌra.
32 Tane duré, wa hã. Dawẽ na ꞌre idanomro mono norĩ zô, ꞌre ĩhârâ mono da, we ĩmorĩ õ di. Dawasété na ꞌre idanomro mono norĩ zô si, ꞌre ĩhârâ mono da, wa tô wei mo, tiwasété na ꞌre siꞌruiwapari zaꞌra mono wa, ꞌRe ihâimana uꞌâsi mono u ꞌre sipizari zaꞌra mono da.
33 Tawamhã niꞌwam norĩ hã ma tô Zezusihi ma nharĩ zaꞌra, ãne:
— Zuwã Batistaha siré ꞌre inomro mono norĩ hã, te sai ãna ꞌre siꞌubumro nimahã bâtâ na hã, te te ꞌre rowaptẽrẽ zaꞌra mono da hã. Tane farizeu norĩ siré ꞌre inomro mono norĩ hã te te duré ꞌre ꞌmanharĩ zaꞌra. Tanei õ di, asiré ꞌre inomro mono norĩ hã. Tisa hã te te aꞌâ ꞌre sahâri zaꞌra mono õ di, duré hâsi zama.
34 Tahawa, te Zezusi hã asa tãma nharĩ zaꞌra, ãne:
— E aibâ imrozéb u, sô ihârâ zaꞌra norĩ ma, tãma ꞌrui waihuꞌu pese zaꞌra waꞌaba di, sai ãna aꞌâ hâimana zaꞌra da, te te rowaptẽrẽ zaꞌra da, isiré hâimana zaꞌra ré hã. Tãma ꞌrui waihuꞌu zaꞌra waꞌaba õ di.
35 Tane nherẽ, bâdâ hã te za iwa waptãrã, aibâ imro da hã, za iwaꞌwa hawib zaꞌra, da te tiwi iwazere zaꞌra zé hã. Tawapsi te za oto sai ãna ꞌre hâimana zaꞌra aꞌâ, te te ꞌre rowaptẽrẽ zaꞌra mono da hã.
36 Tawamhã Zezusi hã ma tô duré romnhimiréꞌé na tãma rowasuꞌu zaꞌra ãne:
— E niꞌwa hã te za hâ nhizâ, zazahâ ité hã, ihâ ꞌratare na te te ãma hâiwaꞌaba da. Ãne hã te te ꞌmanharĩ wamhã, zazahâ ihâ té hã te za hâiwamna. Zazahâ ihâ té hã aiwamhã hâimana waihuꞌu zahuré õ di za, zazahâ ihâ ꞌratare me hã.
37 Tane duré niꞌwa hã uva ꞌrãi waꞌu isé iwaꞌu té hã, romhâ ꞌmanharĩ isémezé iꞌratare ꞌremhã, te te sẽrẽ waihuꞌu õ di. Te te sẽrẽ wamhã, romhâ ꞌmanharĩ iꞌratare hã te za hâihaipoꞌo. Tawamhã uva ꞌrãi waꞌu isé hã te za taré asaꞌwa. Romhâ ꞌmanharĩ isémezéb zama te za duré hâihaiwamna.
38 Tazahã, uva ꞌrãi waꞌu isé hã isémezé itéb ꞌrep si, te za da te ꞌre sé.
39 E niꞌwa hã te za sima wẽ, uva ꞌrãi waꞌu ité hã, iꞌratare te te hâꞌrẽne parimhã. Mare di. Ãne te za tinha: “Uva ꞌrãi waꞌu iꞌratare si danhipai u iwẽ hã.”
