Lucas 8:1-56
8 Tawamhã ãma ronomro parimhã, Zezusi hã ma tô datẽme ꞌre mo, ꞌri nhoꞌõmo mono na duré ꞌri waꞌõtõ mono na. Rowasuꞌuwẽ itém na ma tô te te dama ꞌre robꞌmahârâ, ꞌRe ihâimana uꞌâsi mono daꞌãma ꞌre isibꞌaꞌuwẽ mono zém na hã. Isiré ꞌre inomro mono 12 na ihâiba zaꞌra norĩ hã ma tô isiré ꞌre nomro.
2 Duré nima norĩ piꞌõ norĩ zama ma tô isiré ꞌre nomro, waꞌuburé te te tãma isãmra zaꞌra hã duré hâzé ré ꞌre hâimana zaꞌra mono nherẽ, te te ipese zaꞌra norĩ zama. Ta norĩ hã Maria, da te ꞌre isisi mono Madalena na, waꞌuburé 7 na te te tãma isãmra,
3 duré, Zuãna, Cuzaha mro, apito Erodihi nhorõwa ꞌmadâꞌâꞌwai mro, duré Suzana, duré aimawi piꞌõ norĩ zama. Ta norĩ hã tinhimarĩ na ma tô Zezusi norĩ hã te te ꞌre pawaptob zaꞌra.
Robꞌreꞌwai wasuꞌu
4 Tawamhã Zezusihi u, daꞌahâ uptabi na ma tô itẽme ubumro ni, ꞌri waꞌõno ꞌre isimasa mono hawimhã. Itẽme dasiꞌrãꞌõtõ wamhã, ma tô romnhimiréꞌé na dama rowasuꞌu, ãne:
5 — Robꞌreꞌwa hã ma tô mo, te te robꞌre da. Tawamhã romnhamare te te anhamra mono wamhã, nima norĩ hã ma tô rereꞌe, bâdâdi zababa. Ta norĩ hã dapara na ma tô nasi watiꞌi zaꞌra ni. Duré si norĩ hã ma tô te te huri.
6 Nima norĩ hã ẽtẽ nhisiwi, ma duré rereꞌe, tiꞌai baihâire wa. Ta norĩ hã ꞌwanhipré mono wamhã, ma tô tiꞌwanhipré ꞌré zaꞌra, tiꞌa hã satébré õ wa, waꞌro wa.
7 Nima norĩ hã ma duré rereꞌe, wabꞌru waꞌwa. Ta norĩ hã siré prédub zaꞌra wamhã, ma tô te te wapre zaꞌra, robꞌre hã.
8 Tane nherẽ, nima norĩ hã tiꞌai wẽ wa, ma tô rereꞌe. Ta norĩ hã ꞌwanhipré zaꞌra wamhã, ma tô tiprédu wẽ zaꞌra. ꞌRã zaꞌra wamhã, ma tô tiꞌrã zaꞌra, 100 na iꞌrã na.
Tawamhã Zezusi hã ãne na te te dama rowasuꞌu parimhã, ma tô dama tinha, ãne:
— Asimiparizé aima hâimana zaꞌra waꞌaba wamhã, maꞌãpé wapari zaꞌra waꞌaba!
9 Tawamhã isiré ꞌre inomro mono norĩ hã ma tô siwi sadanha, marĩ na te te rowasuꞌu zô, rowasuꞌu na romnhimiréꞌé na hã.
10 Tahawa Zezusi hã ma tô tãma waihuꞌu zaꞌra, ãne:
— Aima zaꞌra waꞌaba hã ꞌRe ihâimana uꞌâsi mono ma tô rowaihu aima sõmri zaꞌra waꞌwa, iwaihuꞌuꞌõ daꞌãma ꞌre isibꞌaꞌuwẽ mono zé hã ꞌre waihuꞌu zaꞌra waꞌaba mono da. Tanei õ di, aiꞌupana zaꞌra waꞌaba hã. Rowasuꞌu na romnhimiréꞌé na si te te dama ꞌre arowahutu, datõmo na da te ꞌre ꞌmadâꞌâ zaꞌra mono nherẽ, da te ꞌre ꞌmadâꞌâ waihuꞌu zaꞌra mono tõ da, duré dapoꞌre na da te ꞌre wapari zaꞌra mono nherẽ, da te ꞌre sadaihuꞌu zaꞌra mono tõ da.
11 — Ã hã rowasuꞌu na romnhimiré hã te wasuꞌu, ãne: Romnhamare hã, ꞌRe ihâimana uꞌâsi mono mreme, te wasuꞌu.
12 Romnhamare bâdâdi zababa irereꞌe mono hã, niꞌwam norĩ ꞌRe ihâimana uꞌâsi mono nhimiroti te te ꞌre iwapari zaꞌra mono, te wasuꞌu. Tane nherẽ, Waꞌuburé hã sô wisi zaꞌra wamhã, te za tiwi sani zaꞌra, ipẽꞌẽ hawi, te te ꞌre saze zaꞌra mono tõ da, duré tinhoꞌreptuzé hã te te sina ꞌre uwaimrami zaꞌra mono tõ da.
13 Romnhamare ẽtẽ nhisiwi tiꞌai baihâire wa, irereꞌe mono hã niꞌwam norĩ ꞌRe ihâimana uꞌâsi mono nhimiroti te te ꞌre iwapari zaꞌra mono, to sina te te sima ꞌre iwaibui mono, te wasuꞌu. Tane nherẽ, sari õ wa, te te ꞌre sazei hutu zaꞌra mono di za. Ipibuzé tãma ꞌre hâimana zaꞌra mono wamhã, te za te te ꞌre sazei utõrĩ zaꞌra.
14 Duré romnhamare wabꞌru wazari irereꞌe mono hã, niꞌwam norĩ ꞌRe ihâimana uꞌâsi mono nhimiroti te te ꞌre iwapari zaꞌra mono. Tane nherẽ, marĩ na ꞌre ihâtâꞌâ zaꞌra mono zé hã, duré tinhimarĩ zô te te ꞌre irobꞌruiwapari zaꞌra mono zé hã, duré tiꞌai ãma marĩ te te sima ꞌre iwẽ zaꞌra mono zéb zô si, sima ꞌre isõpré mono zé hã te za te te ꞌre sõꞌreti zaꞌra. Tahawa ꞌre iꞌrã zaꞌra mono zé hã, niwa ipré zaꞌra da hã, mare di.
15 Tanei õ di, romnhamare tiꞌai wẽ wa irereꞌe mono hã: Ta norĩ hã, niꞌwam norĩ ꞌRe ihâimana uꞌâsi mono nhimiroti te te ꞌre wapari zaꞌra mono wamhã, tipẽꞌẽ wẽ ꞌre, te te sima ꞌre itété zaꞌra mono, te wasuꞌu, duré te te ꞌre iꞌmadâꞌâ pese zaꞌra mono. Tahawa tô sena na ãma ꞌre hâimana zaꞌra mono wa, te ꞌre ꞌrãi wẽ zaꞌra.
Robꞌuiwẽzé
16 Tawamhã Zezusi hã ma duré ãma uzusi, ãne:
— Niꞌwa hã robꞌuiwẽzé te te roꞌo parimhã, te te sãrĩ waihuꞌu õ di, piza zéꞌa ꞌmanharĩ ꞌrowimhã, niwamhã duré waptâ ꞌrowimhã. Tazahã, sõꞌawi isabzéb ãma si, te za da te ꞌre sõré, ꞌripara u ꞌre idanhisisi mono hã rowaꞌa, da te ꞌre ꞌmadâꞌâ zaꞌra mono da.
17 E marĩ wa. Uburé marĩ simiꞌuri na ꞌre ihâimana zaꞌra mono hã te za upsibi me zaꞌra ni. Duré uburé marĩ piꞌuriwi ꞌre ihâimana zaꞌra mono hã sõꞌawi te za oto ꞌre hâimana zaꞌra.
18 — Tahawa, maꞌãpé ãma ꞌre pibui pese zaꞌra waꞌaba mono, ĩmreme ꞌre iwapari zaꞌra waꞌaba mono zém na hã. E marĩ wa. Niꞌwa te, marĩ iré wamhã, te za duré ãma tãma sisiwi ni. Oto niꞌwa te, marĩ baba wamhã, tãma ihâimana na te te sina rosaꞌrata nherẽ, te za tô tiwi wazere ni, ta hã.
Zezusihi na, duré ino norĩ
19 Tawamhã Zezusihi u ma tô ina duré isisãnawã norĩ zama aiꞌabaꞌré. Tane nherẽ, daꞌahâ uptabi wamhã, itẽme te te sina rotété waihuꞌu zaꞌra õ di.
20 Tawamhã Zezusihi ma, ma tô niꞌwa hã rowasuꞌu, ãne:
— Ana duré ano norĩ hã te rowi aimasa. Te sima wẽ zaꞌra, te te siwi aiꞌmadâꞌâ da.
21 Tawamhã Zezusi hã ma sadaꞌâ, ãne:
— Ĩna hã duré ĩsisãnawã norĩ hã, niꞌwam norĩ ꞌRe ihâimana uꞌâsi mono nhimiroti tipoꞌre na te te ꞌre iwapari zaꞌra mono, duré taha zarina ãma ꞌre ihâimana zaꞌra mono.
Zezusi hã rowaꞌuꞌu zaꞌẽne te te iwaꞌuꞌutuzé
22 Nimahã bâtâ na, Zezusi norĩ hã ma tô ubaꞌre wa asisi, isiré ꞌre inomro mono norĩ me. Ãne ma tô Zezusi hã tãma nharĩ zaꞌra:
— Oto isõꞌu zara u, wa te saprĩ zaꞌra na.
Tahawa â zara u ma tô oto wairé.
23 Tawamhã sisaꞌrei mono ré, ma tô Zezusi hã nhono. Taha ré, ma tô rowaꞌuꞌu zaꞌẽne hã rowapõ. Â sisasisi zaꞌẽtẽ wa, ma tô ubaꞌre wa tiꞌâ ꞌmasisi. Tahawa romnhimimnhasi di, iré sébré zaꞌra õꞌumnhasite.
24 Tahawa, Zezusihi siré ꞌre inomro mono norĩ hã ma tô itẽme sina rotété zaꞌra. Ma tô siwi utu. Ãne te siwi ꞌmahâ:
— Rowahutuꞌwa, Rowahutuꞌwa, wa za aiꞌutõrĩ ni!
Tawamhã Zezusi hã ma tô wahudu. Taha pari, mreme tete na ma tô tinha, rowaꞌuꞌu ma, duré â sisasisi ma zama. Tahawa ma tô oto uburé tiromremeꞌõ. Ma tô duré tirobrésiꞌõ.
25 Taha pari, Zezusi hã ma tô isiré ꞌre inomro mono norĩ ma tinha, ãne:
— E mahãta asimiꞌumnhasi zaꞌra waꞌaba zé hã.
Tane nherẽ, ãma tobꞌuzu zaꞌra wa, duré pahi zaꞌra wab zama, ma tô ãne sima nharĩ zaꞌra:
— E ꞌwa hã ã hã aibâ. Rowaꞌuꞌu ma, duré â sisasisi ma zama te te robꞌrui wamhã, ma tô wapari zahuré.
Zezusi hã, aibâ hawi waꞌuburé ma, te te irobꞌruzé
26 Tawamhã Zezusi hã duré isiré ꞌre inomro mono norĩ zama ma tô sisaꞌre ubaꞌre na, Zeraza na tiꞌa nhisi u, Galiléia na isõꞌu nhisi nhoꞌre u.
27 Tamomo sihutu wamhã, Zezusi hã ubaꞌre hawi te te siꞌrai wi, ma tô aibâ hã waꞌuburé ré ꞌre imorĩ hã sina uzusi, tame ꞌri waꞌõtõ hawimhã. Ta hã aibâ hã duréi ꞌre siꞌuza mono õ di oto. Duré ꞌri ꞌremhã ꞌre sãmra mono õ di. Adâꞌâ ꞌru ãma si, te ꞌre sãmra.
28 Tawamhã aibâ hã, Zezusi te te ꞌmadâꞌâ wamhã, ma tô ꞌmahâ, hârâ ꞌrãihâ na. Tiꞌai u ma tô waptãrã isõꞌre. Ãne te tãma tinha, mreme ꞌrãihâ na:
— Zezusi, ꞌRe ihâimana uꞌâsi mono, danhipai u ꞌre Isãmra mono ꞌra, e marĩ te ĩꞌãma hã asima iwẽ. Wa za aiwi waptẽ. Maꞌãpé ĩꞌazâri tõ.
29 Ãne hã ma tô aibâ tãma tinha, Zezusi hã waꞌuburé ma, te te robꞌrui wa, ihawi watobro da. Waꞌuburé hã bâtâ ahâ na ma tô te te ꞌre wabzuri. Tahawa isiꞌuwazi nhorõ rutu na ma tô aré da te dasiwi ꞌre pawasisi, duré ipara zama. Tane nherẽ, ma tô te te sina ꞌre anhinarĩ. Duré waꞌuburé hã ma tô aibâ te te ꞌre saprõni, aꞌubuni u.
30 Tawamhã Zezusi hã ma tô sadanha, ãne:
— E niha asisi hã.
— Ahâ na, ĩnhisi hã. — Ãne ma tô aibâ hã tãma sisisi, waꞌuburé hã ahâ na iwa sisisi wa.
31 Tawamhã waꞌuburé norĩ hã sadahutu ãna, ma tô Zezusihi wi rowaptẽrẽ zaꞌra, te te satõrĩ zaꞌra tõ da, abꞌre u hã.
32 Tamemhã ꞌrâwi te uhâbâ zari hã tisa te te ꞌre huri. Tahawa waꞌuburé norĩ hã sadahutu ãna ma tô Zezusihi wi waptẽrẽ zaꞌra, te te tãma robꞌru zaꞌra da, uhâbâi wa sisisi da. Tahawa Zezusi hã ma tô tãma waprosi zaꞌra.
33 Tawamhã waꞌuburé norĩ hã ma tô wairé, aibâ hawi. Uhâbâi wa, ma tô asisi. Tahawa uhâbâ hã saꞌa hawi ma tô saꞌẽtẽ sisaꞌre, iꞌrãsipra u. Âi ba ma tô rere. Tame ma tô aiꞌutõ, â ꞌrowi.
34 Tawamhã aibâ norĩ, uhâbâ te te iꞌmadâꞌâ zaꞌra hã, iromhâimanazé te te ꞌmadâꞌâ zaꞌra wamhã, ma tô sisaꞌre. Ta norĩ hã ma tô rowasuꞌu na ropé zaꞌra ꞌri nhoꞌõmo ꞌremhã, duré isababa daro ꞌre isimasa mono na zama.
35 Tahawa daꞌahâ na ma tô tawairébé ni, iromhâimanazé hã da te ꞌmadâꞌâ zaꞌra da. ꞌRâwi Zezusihi u da te dasina rotété zaꞌra wamhã, aibâ hã ma tô dasiwi ꞌmadâꞌâ ni, waꞌuburé ihawi iwairébé hã. Tawamhã ma tô tãma tapahi zaꞌra ni, Zezusi papara sãmra wa, uza ré duré tãma rowẽ na oto.
36 Tawamhã te te iꞌmadâꞌâ zaꞌra norĩ hã ma tô dama rowasuꞌu zaꞌra, aibâ waꞌuburé ré ꞌre imorĩ hã ipesezém na hã.
37 Tawamhã Zeraza tiꞌai ꞌremhã uburé ma tô tapahi pese zaꞌra ni. Tahawa, Zezusi wi ma tô waptẽrẽ zaꞌra, isiptiꞌa zaꞌra hawi morĩ da. Tahawa Zezusi hã ubaꞌre wa, ma tô ãzé. Dahawi ma tô oto mo.
38 Tawamhã aibâ, waꞌuburé ihawi iwairébé hã sadahutu ãna ma tô Zezusihi wi waptẽ, isiré morĩ da.
Tane nherẽ, Zezusi hã ma tô tãma tinha, apâ morĩ da, ãne:
39 — Mo oto aimorĩ apâ asõrõwa u, ꞌRe ihâimana uꞌâsi mono te te aima iꞌmanharĩzé hã dama wasuꞌu mono da.
Tahawa aibâ hã ma tô mo, ꞌri nhoꞌõmo u. Tame ma tô te te dama rowasuꞌu, Zezusi te te tãma iꞌmanharĩzém na hã.
Zezusi hã, piꞌõ te te ipesezé, duré Zairuhu ꞌra
40 Tawamhã Zezusi hã isõꞌu zara u apâ te te saprĩ wamhã, daꞌahâ uptabi hã ma tô dato sina dasiwi âri ni, sô danhimipari siromo zaꞌra wa.
41 Tame ma tô aibâ hã itẽme wi, Zairu na isisi hã. Ta hã Zudeu norĩ te, rowahutuzé ꞌmadâꞌâꞌwa. Itẽme wisi wamhã, ipapara ma tô aime. Zezusihi wi, ma tô sadahutu ãna waptẽ, isõrõwa u morĩ da,
42 iꞌra sipiꞌõ pisi, 12 na ãma iwahu, idâꞌâzéb u oto hâimana wa.
Tawamhã Zezusi hã isiré morĩ wamhã, daꞌahâ uptabi wa, ma tô dasiwi hõti pese ni.
43 Tamemhã daꞌahâ uptabi wazarimhã, piꞌõ hã te dame tihâiba, 12 na ãma iwahu hã piꞌõi hâzé ãma ꞌre hâimana mono ré hã. Ta hã ma tô uburé tinhibro hã uprosi, dawedeꞌwa norĩ na. Tane nherẽ, niꞌwa hã te te pese waihuꞌu õ di.
44 Tawamhã piꞌõ hã Zezusihi babarãi hawi ma tô itẽme sina rotété. Ma tô upi, iꞌuza ihâpa hânhisudu hã. Tahawa awaꞌawi pesere ma tô ihâzé hã tãma mazazâ.
45 Tahawa Zezusi hã ma tô anha, ãne:
— E ꞌwa hã ma ĩꞌupi.
Tane nherẽ, te tãma amrami zaꞌra ni. Tawamhã Pedru hã ma tô tãma tinha, ãne:
— Rowahutuꞌwa, daꞌahâ uptabi hã ma tô dasiwi aiꞌuirĩ ni. Ma duré dasiwi aihõti pese ni.
46 Tane nherẽ, Zezusi hã ma tô ãne tãma tinha:
— Niꞌwa hã ma ĩꞌupi. Wa waihuꞌu, ĩhawi ĩwaihuꞌu pe iwatobro na.
47 Tawamhã piꞌõ hã piꞌuriwi za ihâimana uꞌâsi õ na te te waihuꞌu wamhã, ma tô mo Zezusihi u. Ipapara ma tô aime, rẽrẽꞌẽ sina. Tahawa uburé danhoꞌa ma tô siwasuꞌu Zezusihi ma, te te iꞌupizém na duré tô awaꞌawi ipesezém na hã.
48 Tawamhã Zezusi hã ma tô tãma tinha, ãne:
— Ĩꞌra, asina ĩꞌumnhasizé hã ma tô aipese! Mo oto rowẽ sina aimorĩ.
49 Tawamhã Zezusi hã zahadu piꞌõi ma, te te nharĩ ré, ma tô ꞌmaiwi, Zairuhu u, tãma iromhuriꞌwa hã. Ãne ma tô tãma rowasuꞌu, Zairuhu ma:
— Aiꞌra azarudu hã ma tô aiꞌutõ. Maꞌãpé, Rowahutuꞌwai wi hã roꞌwaꞌrutu zahu tõ.
50 Tawamhã Zezusi ãne hã te te wapari wamhã, ma tô Zairuhu ma tinha, ãne:
— Aipahi tõ. Maꞌãpé ĩꞌumnhasi. Tawamhã rowẽ na te za aima ꞌre sãmra.
51 Tawamhã Zezusi hã Zairuhu nhorõwa u oto wisi wamhã, ma tô Pedru norĩ si pisutu zaꞌra, Zuwã duré Tiagu norĩ me isiré sisisi da, duré azarutu mama, ina zama. Ta norĩ nhipai u hã, niꞌwa isiré isébré zaꞌra da hã te te rowairébé õ di.
52 Tawamhã tame daꞌahâ na idahâimana zaꞌra hã te azarutu zô taꞌruꞌru ni, robzé te. Tahawa Zezusi hã ma tô dama tinha, ãne:
— Azarutu zô aiꞌruꞌru waꞌaba tõ. Dâꞌâ õ di. Taré te nhono.
53 Tawamhã ma tô ãma tato zaꞌra ni, da te waihuꞌu pese zaꞌra wa, isiꞌutõrĩ na hã.
54 Tane nherẽ, Zezusi hã ma tô paꞌâ. Mreme ꞌrãihâ na ma tô tãma tinha, ãne:
— Azaruture, aiwahutu!
55 Tawamhã ipẽꞌẽzani hã apâ ma tô iwab ãzé. Tahawa awaꞌawi pesere ma tô wahudu. Taha pari Zezusi hã ma tô tiꞌru, isa te te tãma a zaꞌra da.
56 Tawamhã imama norĩ hã ma tô ãma titobꞌuzu zahuré. Tane nherẽ, Zezusi hã ma tô tiwi sawi zahi zahuré, niꞌwai ma, te te rowasuꞌu zahuré tõ da, iromhâimanazém na hã.
