Marcus 1:1-45
1 Ã hã ꞌRe ihâimana uꞌâsi mono ꞌra, Zezu Cristuhu wasuꞌuwẽ na robꞌuiꞌéré isãnaꞌratazém na wa za aima rowasuꞌu zaꞌra waꞌwa,
2 ꞌRe ihâimana uꞌâsi mono zadawa ꞌmahârâꞌwa Izaias hã te te ãma irobꞌuiꞌérézéb zarina, ãne:
“Wa hã wa za satõ aiwana ĩmreme ꞌwapéiꞌwa hã. Ta hã te za ate bâdâdi hã aiwana asô ropese.”
3 “Niꞌwa hã te hârâ ꞌrãihâ na dama robꞌmahâ, rop si ꞌre irosaꞌwari mono ãma:Saꞌra pese aba mono bâdâdi hã, Uburé Danhibꞌapito ma.Imana ꞌrãmi bâdâdi hã awaꞌawi sô saꞌra aba mono.”
4 Tawamhã ãne zarina, ma tô oto Zuwã Batista hã sihâiꞌré. Tahawa, te â dawabzuri hã te te dama ꞌre abꞌmanharĩ, rop si ꞌre irosaꞌwari mono ãma. Te duré te te dama ꞌre robꞌmahârâ, dawasété na ꞌre dasisãmri zaꞌra mono wa, ꞌRe ihâimana uꞌâsi mono ma, ꞌre dasiwẽꞌõ zaꞌra mono da, te te oto daꞌãma ꞌre aꞌmadâꞌâ mono tõ da, taha zarina â dawabzuri hã da te ꞌre ꞌmanharĩ zaꞌra mono da.
5 Tawamhã daꞌahâ uptabi na te itẽme ꞌre dasito, Zudéa na tiꞌa nhisi hawimhã, duré Zeruzalẽ na ꞌri nhoꞌõmo nhisi hawib zama. Tame dasisõꞌa dawasété na, ꞌre dasiwasuꞌu zaꞌra mono wa, ma tô â dawabzuri hã te te dama ꞌre abꞌmanharĩ Zuwã hã, Zodã pa na â nhisi ãma.
6 Tawamhã Zuwã hã te ꞌre siꞌuza, awaru baꞌõmore zéré ꞌmanharĩ na. Duré abazei hâ ꞌmanharĩ waré na iꞌusisizé hã. Te duré ꞌre sa ꞌriti na, ropĩni na zama.
7 Ãne te te dama ꞌre robꞌmahârâ:
— Ĩzaꞌu si te za wei wi, ĩma ipire uptabi hã. Tahawa, wa hã e ĩwẽ bâ, sô ĩsiwẽꞌẽ da hã, iparaꞌuza wasisizé te tãma iwasihu da hã.
8 Wa hã wa tô â na si te ꞌre aihâiba ubu zaꞌra waꞌwa, â dawabzuri hã te aima ꞌre abꞌmanharĩ aba mono wamhã. Tanei õ di za oto. Ĩma ipire hã wei wisi wamhã, te za oto ꞌRe ihâimana uꞌâsi mono Pẽꞌẽzani na te te ꞌre aihâiba ubu zaꞌra waꞌwa.
Zezusi hã â dawabzuri te te iꞌmanharĩzé
9 Tawamhã ãne te te dama ꞌre wasuꞌu mono ré, ma tô Zezusi hã itẽme mo, Nazaré na ꞌri waꞌõtõ nhisi hawi, Galiléia na tiꞌa nhisi hawimhã. Itẽme wisi wamhã, Zuwã hã ma tô â dawabzuri hã Zezusihi ma ꞌmanha, Zodã pa na â nhisi ãma.
10 Tawamhã Zezusi hã â hawi watobro wi, ma tô ꞌmadâ, hâiwa isiꞌridawa na. Ta hawi, ꞌRe ihâimana uꞌâsi mono Pẽꞌẽzani, ma we isõꞌõmoi baba siꞌra, utuꞌu ne.
11 Tawamhã hâiwa hawi, te we damreme hã tinha, ãne:
— A hã ĩꞌra, ĩma iꞌasawi uptabi. Aiꞌãma ĩma rowẽ zaꞌẽtẽ di.
Waꞌuburé hã Zezusi te te ipibuzé
12 Tawamhã Zezusihi ãma ronomro õ ré, ma tô ꞌRe ihâimana uꞌâsi mono Pẽꞌẽzani hã saprõ, rop si ꞌre irosaꞌwari mono u.
13 Tame ma tô Zezusi hã tihâiba, 40 bâtâ na. Taha ré, te Satanasi hã nasi pibu. Tamemhã abaze zahi hã te ꞌre hâimana zaꞌra. Tane nherẽ, te hâiwa hawi romhuriꞌwa norĩ hã siwi ꞌmadâꞌâ pese.
Zezusi hã romhuri na te te isãnaꞌratazé
14 Tawamhã Zuwã Batista hã dazazéb ꞌre, da te sẽrẽ pari, te Zezusi hã mo, Galiléia u. Tame ma tô Rowasuꞌu wẽ ité, ꞌRe ihâimana uꞌâsi mono te te tãma isõmri na, te te dama ꞌre robꞌmahârâ.
15 Ãne ma tô te te dama ꞌre rowasuꞌu:
— Bâdâ hã ma tô oto iwa waptãrã, ꞌRe ihâimana uꞌâsi mono, daꞌãma ꞌre isibꞌaꞌuwẽ mono zéb da hã. Maꞌãpé aiwasété na asisãmri zaꞌra waꞌaba, ꞌRe ihâimana uꞌâsi mono ma, asiwẽꞌõ zaꞌra waꞌaba da, duré Rowasuꞌuwẽ ité hã saze zaꞌra waꞌaba.
16 Tawamhã Zezusi hã Galiléia isõꞌu zaihâ na morĩ ré, ma tô tepe mramiꞌwa norĩ hã ꞌmadâꞌâ zahuré, Simau Pedru isisãnawã Ãdréhé me. Ta norĩ hã te abazipara hã nasi wabzuri zahuré isõꞌui wa, tepe zô.
17 Tawamhã ãne te Zezusi hã ꞌmahârâ zahuré:
— Ĩzarina we ane waꞌaba. Ĩma ꞌre daꞌawaibui waꞌaba mono da oto, wa za ãma aima asanho waꞌwa.
18 Tahawa ma õne haré marẽme zahuré, abazipara ma. Zezusihi siré te oto tineb zahuré.
19 Tawamhã suru na morĩ na pahâ wi, Zezusi hã ma tô duré ꞌmadâꞌâ zahuré, Zebedeu ꞌra norĩ hã Tiagu duré Zuwãhã me. Ta norĩ hã te ubaꞌre ꞌre, aimasisi zahuré. Abazipara sisinarĩ hã te apâ te te ãma aꞌrãꞌõtõ zahuré.
20 Tawamhã Zezusi hã te duré ta norĩ zô tihârâ zahuré. Tahawa ma tô õne haré timama Zebedeu hã sisaꞌu rẽme zahuré, duré imama ma, romhuriꞌwa norĩ ubaꞌre ꞌre isiꞌubumro norĩ zama. Zezusihi siré te oto tineb zahuré.
Zezusi hã aibâ hawi, waꞌuburé ma, te te irobꞌruzé
21 Tawamhã Zezusi norĩ hã ma tô aihutu, Cafarnau na ꞌri nhoꞌõmo nhisi u. Tawamhã sabadu oto iwa waptãꞌã wa, ma ãzé Zezusi hã, Zudeu norĩ te rowahutuzéb u, te te dama rowahutu da.
22 Te te dama irowahutuzém na da te wapari zaꞌra wamhã, ma tô ãma tatobꞌuzu zaꞌra ni, Zezusi hã sada ipisutu wa, simirowahutu pire na te te dama rowahutu wa, ꞌRe ihâimana uꞌâsi mono nhimiroti zahi na robꞌuiꞌéré na dama rowahutuꞌwa norĩ nhimirowasuꞌu nei õ wa.
23 Tame te te dama rowasuꞌu ré, ma aibâ hã ãzé, rowahutuzéb u, waꞌuburé ré ꞌre imorĩ hã. Sébré wi, te saꞌẽtẽ ꞌmahâ ãne:
24 — Zezusi, Nazaré ãma iꞌaiprédu, e marĩ te asima iwẽ, waꞌãma zaꞌra hã. E waꞌuprosi da, te we aimo. Ĩma aiwaihuꞌu pese uptabi di, a hã niꞌwa na hã. A hã ꞌRe ihâimana uꞌâsi mono te te iꞌaipisudu, aimawi tãma ꞌre aihâimana mono da.
25 Tawamhã Zezusi hã te saꞌẽtẽ tãma tinha, waꞌuburé ma, ãne:
— Ariꞌiwi! Mo oto aibâ hawi aiwatobro!
26 Tawamhã sisaꞌu te saꞌẽtẽ hâiba sãsãꞌã, waꞌuburé hã. Taha pari sadari sina, ma aibâ hawi watobro.
27 Tawamhã uburé ãma datobꞌuzu zaꞌra wa, te ꞌrâwi ãma tasisadanharĩ zaꞌra ni, ãne:
— E niha, õ hã. Rowasuꞌu itém na te simiroti pire na wama rowahutu zaꞌra. Waꞌuburé norĩ ma, te te duré robꞌrui wamhã, ma tô imreme hã wapari zaꞌra.
28 Tahawa, ma tô waptu na ropé Zezusihi wasuꞌu hã, Galiléia tiꞌai ꞌre, daro mono bâ.
Zezusi hã Pedruhu maprewa, te te ipesezé
29 Tawamhã rowahutuzém hawi wairébé parimhã, Zezusi norĩ hã ma tô aiꞌabaꞌré, Simau Pedru norĩ nhorõwa u, Ãdréhé me.
30 Tame te Simahã maprewa hã hâzé ré nomro, waꞌro zaꞌẽtẽ na. Tawamhã sisisi wi, te Zezusihi ma wasuꞌu zaꞌra, ihâzé na hã.
31 Tahawa, ma tô itẽme sina rotété. Ma tô paꞌâ. Tawamhã ma tô ãma aime, wahutu da. Tame ma awaꞌawi tiwahâ. Taha pari ma tô tãma a zaꞌra, Zezusi norĩ ma, saihuri da.
Zezusi hã daꞌahâ uptabi na te te idaꞌapesezé
32 Tawamhã ꞌmaꞌrã wi, bâdâ sébré pari*, ma tô itẽme tasiꞌãwisi zaꞌra ni, Zezusihi u, uburé ihâzé ré norĩ hã, duré waꞌuburé, daꞌãma ꞌre ihâimana zaꞌra mono norĩ zama.
33 Uburé ꞌri ahâ ꞌre, ꞌre idasiꞌubumroi mono norĩ hã ma itẽme tasiꞌrãꞌõtõ ni, ꞌridawa nhoꞌre u.
34 Tawamhã Zezusi hã dahâzé mono bâ, ma daꞌapese, daꞌahâ na. Duré waꞌuburé hã ma dama anhamra, ahâ na. Ma tô duré waꞌuburé norĩ hã sina sadawa uwati zaꞌra, te te dama wasuꞌu zaꞌra tõ da, te te siwi waihuꞌu pese wa, Zezusi hã ꞌRe ihâimana uꞌâsi mono ꞌra na hã.
Zezusi hã aꞌubuni wi, te te irowaptẽrẽzé
35 Tawamhã zahadu robzaꞌrã ré, ma tô udu Zezusi hã, ꞌri nhoꞌõmo nhiti morĩ da, aꞌubuni u. Tame ma tô tihâiba, te te rowaptẽrẽ da.
36 Tawamhã Simau duré tisiré norĩ me, te Zezusihi zô hã sõpré ropâ.
37 Tawamhã te te siwi sõpẽtẽ wamhã, te tãma rowasuꞌu zaꞌra, ãne:
— Rowahutuꞌwa. Daꞌahâ uptabi na te asô tarĩtĩ zaꞌra ni.
38 Tawamhã Zezusi hã ma tô sadaꞌâbâ zaꞌra, ãne:
— Oto wasiꞌabaꞌréi waꞌaba, ꞌri waꞌõno ꞌrâwi ꞌre ihâimana zaꞌra mono u, tamomob zama te dama ꞌre rowahutu mono da. Taha da, wa tô wei mo, wa hã.
39 Tawamhã Zezusi hã daro mono bâ ma tô oto ꞌre mo, Galiléia ꞌre, ꞌre idasiꞌubumroi mono norĩ u, te te dama ꞌre rowahutu mono da, Zudeu norĩ te rowahutuzé mono bâ. Waꞌuburé zama te te dama ꞌre anhamra.
Zezusi hã, aibâ iꞌwaꞌre ré te te ipesezé
40 Tawamhã aibâ lepra* na iꞌwaꞌre nhisi ré hã ma wi, Zezusihi u. Hiꞌrãtitõ ma aime ipapara. Te tãma tinha, ãne:
— Apito, ĩma waihuꞌu pese di, za ĩpese waihuꞌu pese na hã, asima wẽ wamhã.
41 Tawamhã Zezusi hã ãma pẽꞌẽzé uptabi wa, ma tô sô mawẽ, te te upi da. Te te upi wamhã, te ãne tãma tinha:
— Wa ĩsima wẽ tô. Aihâiba pese oto.
42 Tawamhã awaꞌawi pesere ma iꞌwaꞌre hã tãma apa. Ma tô oto tihâiba pese.
43 Tawamhã Zezusi hã ma tô satõ, mreme tete na te te sina sadawa uwati pese pari, te te dama sina wasuꞌu tõ da. Ãne te tãma tinha:
44 — Ĩwapari pese. Niꞌwai ma, ãne na hã rowasuꞌu tõ. ꞌRe ihâimana uꞌâsi mono ma, daꞌãma romhuriꞌwa sasedoti u si aimorĩ, iꞌaihâiba pese zém na te te aiwaihuꞌu da. Taha parip si, ꞌRe ihâimana uꞌâsi mono ma asõprubzé marĩ mono hã te za isõmri zaꞌra sacedoti ma, Mozésihi nhimiꞌuiꞌéré zarina, iꞌaihâiba pese zém na da te aiwaihuꞌu zaꞌra da, sena na.
45 Tane nherẽ, aibâ morĩ wi, ma rowasuꞌu na ropé. Tahawa, Zezusi hã sima iwẽ na ꞌre zasi waihuꞌu mono õ di oto, ꞌri nhoꞌõmo mono u hã. Aꞌubuni wip si te ꞌre hâimana, danhiti. Tame ꞌre hâimana mono ré, te itẽme ꞌre dasihutu, dazaꞌrui mono hawimhã.
