Marcus 12:1-44
12 Tawamhã Zezusi hã rowasuꞌu na romnhimiréꞌé na ma tô duré ãma dama sãnaꞌrata, ãne:
— Aibâ hã uvaꞌru ma tô aꞌre. Iꞌwawi ma tô waꞌra. Ma duré ꞌmanha iwatizéb da hã, iwaꞌu zô. Tawamhã ꞌri ꞌrãihâ ma duré ꞌmanha, buru ꞌwawi robꞌmadâꞌâzéb da hã. Taha pari ma tô tisõ iwaꞌâbâ zô, nima norĩ buru na romhuriꞌwa norĩ ma. Taha pari ma tô romhâ na mo, darob amoi u.
2 Oto ꞌrãi prédu mono wa, iꞌrãnhinarĩzé bâdâ wisi wamhã, tite romhuriꞌwa hã ma tô ꞌmazatõ buru na romhuriꞌwa norĩ u, uva ꞌrãi apo te te tãma sõmri zaꞌra da, ite hã.
3 Tane nherẽ, ma tô siwi tiꞌâ. Ma tô duré siwi azâ. Taha pari ma tô siwi satõ, ubana.
4 Tawamhã buru tedeꞌwa ma duré ꞌmazatõ, romhuriꞌwa aimawi hã. Tane nherẽ, iꞌrãi wi ma tô siwi azâ. Ma duré tãma rowazém hiri zaꞌra.
5 Tawamhã aimawi hã ma tô duré ꞌmazatõ. Ta hã ma tô siwi tiwĩ. Ahâ na ma tô nasi azatõ, nima norĩ hã. Ma tô nasi hâ zaꞌra. Duré nima norĩ hã ma tô nasi simro.
6 Buru tedeꞌwa hã misire te te oto isatõrĩ da hã, ta hã iꞌra tãma isawi uptabi. Tawamhã tiꞌra hã ma tô oto satõ, ãne te te rosaꞌrata sina: “Ĩꞌra wamhã, te za siwi wazé.”
7 Tane nherẽ, buru na romhuriꞌwa norĩ hã te ãne ãma sima nharĩ zaꞌra: “Õhõ buru tedeꞌwai ꞌra, timama uirĩ na ãma isite da hã. Oto wa te wasiwi wĩrĩ aba. Tawamhã buru hã wate zaꞌra za.”
8 — Ãne wa, ma tô siwi tiꞌâ, buru tedeꞌwai ꞌra hã. Ma tô siwi tiwĩ. Taha pari, ihâiba hã ma tô siwi time, buru nhiti.
9 — Ãhã wamhã, e marĩ te za ꞌmanha, buru tedeꞌwa hã. Te za sô timorĩ zaꞌra, te te uprosi da, buru na romhuriꞌwa norĩ hã. Taha pari te za tisõ buru hã, aimawi romhuriꞌwa norĩ ma.
10 — E niwa sõré zaꞌra waꞌaba ã bâ, ꞌRe ihâimana uꞌâsi mono mreme na Ibaihâ iwazé pese na robꞌuiꞌéré hã. Ãne te te inharĩ hã:“Ẽne hã ꞌriꞌwa norĩ te te siwi iwẽꞌõ, ta hã danhipai u pire na te za ꞌre hâimana.
11 Ta hã Uburé Danhibꞌapito ma tô pisutu.Isimiꞌmanharĩzé hã wẽ uptabi di wama zaꞌra hã.”
12 Tawamhã Zudeu norĩ, pire na dama ꞌre ihâimana zaꞌra mono norĩ hã te tirĩtĩ zaꞌra, Zezusi hã te te siwi âri da, te te ãma romnhimiréꞌé zaꞌra wa, te te siwi sadaihuꞌu wa, õ norĩ na te te irowasuꞌu na hã. Tane nherẽ, daꞌahâ uptabi ma hã pahi zaꞌra di. Tahawa ma tô siwi tirẽ. Õne haré te aiꞌabaꞌré.
Cézaha ma, robꞌuiprazé arĩ, da te ꞌre isõmri zaꞌra mono zé
13 Taha pari, Zezusihi u ma tô ꞌmazatõrĩ zaꞌra, nima norĩ farizeu norĩ hã duré Erodihi niwĩ ꞌre ihâimana zaꞌra mono norĩ zama te te siwi wapari da, tinhimiroti na te te iꞌupazéb zô.
14 Itẽme sihutu wamhã, te ãne siwi sadanha:
— Rowahutuꞌwa, wama aiwaihuꞌu pese zaꞌra di, iꞌuwaibaba si ꞌre iꞌaihâimana mono na hã duré danhimirosaꞌrata zarina ꞌre iꞌaihâimana mono õ na hã. Duré ꞌre daꞌaꞌmadâꞌâ mono õ di, daꞌmadâꞌâ ze zarina. Tazahã ma tô ꞌre irowasuꞌu mo, tô sena dahâimanazém na ꞌRe ihâimana uꞌâsi mono te te sima ꞌre iwẽ mono zéb zarina. Tahawa maꞌãpé wama waihuꞌu zaꞌra na. E iꞌuwaibaba robꞌuiprazé arĩ hã, apito Cézaha* ma, wa te ꞌre iwaꞌâbâ zaꞌra mono da hã. E mare di.
15 Tane nherẽ, Zezusi hã ma tô waihuꞌu zaꞌra, te te waihuꞌu pese zaꞌra nherẽ, senai õ na te te siwi isadanharĩ na hã. Tahawa, te ãne tãma nharĩ zaꞌra:
— E marĩ da, te asiwi ĩpibui waꞌwa, te iꞌupazéb zô. We asiwi ꞌmaiꞌâri aba robꞌuiprazé isapotore hã, te ꞌmadâꞌâ da.
16 Ma tô niꞌwam norĩ hã tãma sõmri zaꞌra, robꞌuiprazé isapotore hã. Tahawa te ãma sadanharĩ zaꞌra, ãne:
— E ꞌwai podo, robꞌuiprazé isapotore na hã. E ꞌwa sisi na duré robꞌuiꞌéré.
Ma ãma siwi sadaꞌâ, ãne:
— Apito Cézaha podo. Duré taha nhisi uiꞌéré.
17 Tawamhã Zezusi hã te tãma nharĩ zaꞌra, ãne:
— Apito Cézaha ma sõmri zaꞌra waꞌaba, marĩ hã Cézaha te hã. Tane, ꞌRe ihâimana uꞌâsi mono ma sõmri zaꞌra waꞌaba, marĩ hã ꞌRe ihâimana uꞌâsi mono te hã.
Tawamhã ma tô ãma titobꞌuzu zaꞌra, Zezusi hã te te tãma iwaihuꞌu zaꞌra zém na.
Zezusi hã, dama ipire norĩ saduceu na iwamri, dahâiwaꞌutuzém na te te siwi isadanharĩzé
18 Taha pari, nima norĩ saduceu norĩ hã ma aihutu, Zezusihi u, te te dama ꞌre iroti zaꞌra mono hã apâ ꞌre idahâiwaꞌutu zaꞌra mono õ na hã. Tahawa te siwi sadanha, ãne:
19 — Rowahutuꞌwa, Mozési hã ma tô robꞌuiꞌéré hã ãne tihi: “Aibâ hã dâꞌâ wamhã, timro hã ꞌra ãna te te rẽme wamhã, isisãnawã te za ãma timro iꞌamo aba ãma, iꞌra hã isisãnawã idâꞌâ ꞌra ne ꞌre hâimana zaꞌra mono da.”
20 Wa za oto aima rowasuꞌu zaꞌra ni. Te ꞌre hâimana zaꞌra, 7 na ihâiba zaꞌra aibâ norĩ hã sisãnawã si. Ipotoꞌrada hã ma tô timro. Tane nherẽ, ma tô dârâ, ꞌra õ ré.
21 Ipotoꞌrata nhosi hã ma tô ãma timro, iꞌamo aba ãma. Tane nherẽ, ta hã ma tô duré dârâ, ꞌra õ ré. Tane ma tô duré tãma tiromhâiba siꞌubdatõ ãma, ãma imro ma hã.
22 Aibâ norĩ 7 na ihâiba zaꞌra hã ma uburé tô õhõ piꞌõ na timro zaꞌra. Tane nherẽ, ma tô uburé tidâꞌâ zaꞌra, ꞌmaiꞌra ãna. Tawamhã piꞌõ hã ma tô duré dârâ oto.
23 ꞌRe ihâimana uꞌâsi mono te te idaꞌahâiwaꞌutuzé bâtâ ãma, piꞌõ hã e ꞌwai mro na te za tihâiba, 7 na uburé ãma imro zaꞌra ꞌremhã.
24 Zezusi hã ma sadaꞌâbâ zaꞌra:
— Ma ãma iꞌupa zaꞌra waꞌwa, aima waihuꞌu zaꞌra waꞌaba õ wa, ꞌRe ihâimana uꞌâsi mono mreme na Ibaihâ iwazé pese na robꞌuiꞌéré hã duré ꞌRe ihâimana uꞌâsi mono waihuꞌu pe hã.
25 ꞌRe ihâimana uꞌâsi mono hã idâꞌâ zaꞌra norĩ te te ahâiwaꞌutu wamhã, niꞌwa hã oto mro õ di za. Dasina damro hâimana õ di za. E marĩ wa. Hâiwa ãma romhuriꞌwa norĩ ne, te za oto ꞌre dahâimana zaꞌra.
26 E niha bâ, sõré zaꞌra waꞌaba õ di, Mozési te te irobꞌuiꞌérézé hã apâ ꞌre idahâiwaꞌutu zaꞌra mono zém na hã, wede zapore hawi, ꞌRe ihâimana uꞌâsi mono te te tãma inharĩzé hã, ãne: “Wa hã Abraꞌãhã te ꞌRe ihâimana uꞌâsi mono, Izaquihi te ꞌRe ihâimana uꞌâsi mono duré Zacoho te ꞌRe ihâimana uꞌâsi mono.”
27 ꞌRe ihâimana uꞌâsi mono hã idâꞌâ norĩ tei õ di. Dâꞌâ ãna ꞌre ihâimana zaꞌra mono norĩ te si, ta hã. Tahawa ma ãma iꞌupai pese zaꞌra waꞌwa.
ꞌRe ihâimana uꞌâsi mono nhimiroti danhipai u ipire uptabi
28 ꞌRe ihâimana uꞌâsi mono nhimiroti zahi na robꞌuiꞌéré na dama rowahutuꞌwa te te sina irotédé hã ma tô mreme wapari zaꞌra, isiwasu zaꞌra zé hã. Iꞌuwaibaba na Zezusi hã te te sadaꞌâbâ wa, te ãne sadanha:
— E ma hã ipire danhipai u ꞌRe ihâimana uꞌâsi mono nhimiroti, uburé ihâimana zaꞌra nhipai u hã.
29 Zezusi hã ma sadaꞌâ:
— ꞌRe ihâimana uꞌâsi mono nhimiroti, danhipai u ipire uptabi hã ã hã: “Izaraéu nhihudu norĩ, wapari zaꞌra waꞌaba! Uburé Danhibꞌapito, wate ꞌRe ihâimana uꞌâsi mono hã, ta hã misire Uburé Danhibꞌapito uptabi hã.
30 Sawi pese zaꞌra waꞌaba, Uburé Danhibꞌapito ate zaꞌra waꞌwa ꞌRe ihâimana uꞌâsi mono hã, uburé aipẽꞌẽ zaꞌra waꞌaba na, uburé aihâimana zaꞌra waꞌaba zé iꞌrowi uptabi na, uburé asimirowaihuꞌu zaꞌra waꞌaba na duré uburé asiptede aima ꞌre ihâimana zaꞌra waꞌaba mono na.”
31 Maparane ãma hã, ã hã duré ipire: “ꞌRe dazawi pese zaꞌra waꞌaba mono, ꞌrâwi ꞌre iꞌasisawi pese zaꞌra waꞌaba mono ne.” Ã norĩ nhipai u hã, isimiroti ipire uptabi hã ꞌmaihâimana õ di.
32 Tawamhã ꞌRe ihâimana uꞌâsi mono nhimiroti zahi na robꞌuiꞌéré na dama rowahutuꞌwa te ãne tinha, Zezusihi ma:
— Tane tô, Rowahutuꞌwa. Tô sena uptabi, asimirowasuꞌu hã. Misire ꞌRe ihâimana uꞌâsi mono hã. Ihâibaꞌõ aimawi hã ꞌmaihâimana õ di, isine hã.
33 Tahawa, wa za tô wa te ꞌre sawi pese zaꞌra, ꞌRe ihâimana uꞌâsi mono hã uburé wapẽꞌẽ na, uburé wanhimirowaihuꞌu na, duré uburé wanhiptete na. Wa za duré wa te ꞌre dazawi pese zaꞌra, ꞌrâwi ꞌre iwasisawi pese zaꞌra mono ne. Ã hã ipire, abaze da te ꞌre izata zaꞌra mono, abaze zata zéb ãma duré ꞌRe ihâimana uꞌâsi mono ma, isiré norĩ danhoprubzé nhipai u.
34 Iꞌuwaibaba na te te isadaꞌâbâ na, Zezusi hã te te wapari wamhã, ma tô ãne tãma tinha:
— Tane tô. ꞌRe ihâimana uꞌâsi mono, daꞌãma ꞌre isibꞌaꞌuwẽ mono zém nhiti, romhâ na aihâimana õ di.
Ta hawim haré, niꞌwa isibꞌru hã hâimana õ di, Zezusi te te isadanharĩ da, marĩ na hã.
Zezusi hã apito Davihi nhipai u ipire
35 Zezusi hã ꞌRe ihâimana uꞌâsi mono nhorõwa ꞌri ꞌrãihâ ꞌwawi waꞌra ꞌre, te te dama rowahutu ré, te ãne daꞌazadanha:
— ꞌRe ihâimana uꞌâsi mono nhimiroti zahi na robꞌuiꞌéré na dama rowahutuꞌwa norĩ hã te te dama ꞌre rowasuꞌu zaꞌra, Davihi nhihudu na Danhoꞌreptuiꞌwa hã. E marĩ wa, te te ãne ꞌre rowasuꞌu zaꞌra.
36 Apito Davi hã ꞌRe ihâimana uꞌâsi mono Pẽꞌẽzani te te tãma iwaihuꞌuzéb zarina, ma tô ãne ãma robꞌuiꞌéré:“Uburé Danhibꞌapito hã ma tô Ĩnhibꞌapito ma tinha, ãne:‘Ĩnhimire niwĩ asãmra, asitobꞌru norĩ hã te isõrézéb u, aipara zahâpâ.’ ”
37 Davi hã, tinhibꞌapito na ma tô sisi, Danhoꞌreptuiꞌwa hã. E niha tawamhã merẽ Davihi nhihudu, Danhoꞌreptuiꞌwa hã.
Tawamhã daꞌahâ uptabi na idahâimana zaꞌra norĩ ma hã Zezusi hã wapari zei uptabi di.
Zezusi duré ꞌRe ihâimana uꞌâsi mono nhimiroti zahi na robꞌuiꞌéré na dama rowahutuꞌwa norĩ
38 Zezusi hã te dama rowahutu, ãne:
— Ãma ꞌre pibui pese zaꞌra waꞌaba mono, ꞌRe ihâimana uꞌâsi mono nhimiroti zahi na robꞌuiꞌéré na dama rowahutuꞌwa norĩ hâimanazé wi hã. Ta norĩ ma hã wẽ di, uza hâi wẽ na ꞌre inomro mono da hã. Duré da te dasina ꞌre iꞌubumroi mono zéb ãma, wazép sina, da te ꞌre iwaibui wẽ zaꞌra mono da si, tãma iwẽ zaꞌra hã.
39 Dama ipire norĩ simasisizém na ꞌre siꞌubumroi mono da si, tãma iwẽ zaꞌra hã, Zudeu norĩ te rowahutuzéb ãma hã duré dasiré ꞌre idasaihuri mono zéb ãma hã.
40 Piꞌõi mrotõ norĩ wi hã, te isimarĩ na ꞌre sipsaihuri zaꞌra. ꞌRe hâimana wẽ zaꞌra mono newa, te hâimana nhipese na rowaptẽrẽ hã pa na te te ꞌre ꞌmanharĩ zaꞌra. Tahawa te za ta norĩ ma, danhipai u ꞌRe ihâimana uꞌâsi mono hã te te tãma ꞌre arobꞌmanharĩ wasété uptabi.
Piꞌõi mrotõ isõprubzé
41 Zezusi hã te nhamra, ꞌRe ihâimana uꞌâsi mono ma danhoprubzé, da te ꞌre iséme mono zéb ꞌrata. Robꞌuiprazé, da te nasi séme ré, te daꞌaꞌmadâ. Isibro pese norĩ hã ahâ na te nasi sé, robꞌuiprazé hã saꞌẽtẽ na.
42 Taha ré, piꞌõi mrotõ isibrobꞌõ hã ma tô wi. Ma tô tiza maparane robꞌuiprazé isapotore hã surure nherẽ, da te ãma irobꞌuipra da hã.
43 Tawamhã tisiré ꞌre inomro mono norĩ zô, te hâ, Zezusi hã. Ãne te tãma nharĩ zaꞌra:
— Tô sena wa za aima waihuꞌu zaꞌra waꞌwa, ãne: Ã hã piꞌõi mrotõ sibrobꞌõ nherẽ, ma tô tinhoprubzém na uburé daꞌanhipa.
44 Uburé da te isõmri zaꞌra norĩ hã, isiꞌatarẽme si ma sõmri zaꞌra ni. Tazahã piꞌõi mrotõ hã simarĩꞌõ uptabi nherẽ, ma tô uburé tisõ, ãma ihâimanazéb da hã.
Ĩwaꞌõtõ piꞌreba watsuꞌu mono
^ 12:14 Céza hã Roma ãma danhipai u danhibꞌapito wamri
