Marcus 13:1-37
13 Tawamhã Zezusi hã ꞌRe ihâimana uꞌâsi mono nhorõwa ꞌri ꞌrãihâ hawi watobro wamhã oto, misi isiré ꞌre imorĩ hã te ꞌmahâ, ãne:
— Rowahutuꞌwa, ꞌmadâꞌâ pé! E niha hã ẽne itõmo wẽ uptabi si hã. E niha hã duré iꞌri ꞌmanharĩ wẽ uptabi si hã.
2 Tawamhã Zezusi hã ma ãma sadaꞌâ, ãne:
— E ã hã ꞌri zaꞌẽne te iꞌaꞌmadâ. Niwapsi ẽtẽ norĩ hã sisisiwi simiꞌwara õ di za. Uburé te za prub zaꞌra ni za.
Zezusi hã robzépata na, duré daꞌruiwapari na te te irowasuꞌuzé
3 Tawamhã Zezusi hã te oto nhamra, Olivera na ẽtẽ ꞌrãihâ nhisi ãma, ꞌRe ihâimana uꞌâsi mono nhorõwa ꞌri ꞌrãihâ u ma tô ti nhoꞌre. Tame te siwi sadanha, hâiba pisutu Pedru norĩ hã, duré Tiagu, duré Zuwã duré Ãdré norĩ me:
4 — Rowahutuꞌwa. Maꞌãpé wama waihuꞌu zaꞌra na. E niwa te za ãne hã tiromhâiba. E marĩ te za watobro, ãma iwaihuꞌuzéb da hã, te te sina iꞌuwaimrami da hã.
5 Tawamhã Zezusi hã ma tãma waihuꞌu zaꞌra, ãne:
— Maꞌãpé, ꞌre asiꞌmadâꞌâ pese zaꞌra waꞌaba mono, niꞌwa hã te te aima robꞌrãmi zaꞌra waꞌaba tõ da.
6 Niꞌwam norĩ hã ahâ uptabi na te za ĩnhisi na datẽme ꞌre nomro. Ãne te za dama ꞌre siwasuꞌu zaꞌra: “Wa hã Danhoꞌreptuiꞌwa!” Tawamhã ta norĩ hã daꞌahâ uptabi na, te za te te dama ꞌre robꞌrãmi zaꞌra.
7 Duré dasiꞌwapéi wasuꞌu hã ꞌre wapari zaꞌra waꞌaba mono wamhã, tãma ꞌre aipahi zaꞌra waꞌaba mono tõ. Ã norĩ hã te za tô aꞌâ ꞌre wairébé. Tane nherẽ, zahadu robꞌrãsutu õ di za.
8 Dawamri mono bâ te za ꞌre dasiꞌwapé zaꞌra. Duré tiꞌai waꞌõtõ nhoꞌõmo ꞌre rotiꞌwa norĩ hã te za ihâiba amoi u rotiꞌwa norĩ hã te te ꞌre ꞌwapé zaꞌra. Nima niwĩmhã te za tiꞌa hã daré ꞌre popoꞌo zaꞌra. Te za duré mra hã da te ꞌre sépata zaꞌra. Ã norĩ hã robzépata nhanaꞌrada, piꞌõi ãma iwasã hã ꞌre isépuꞌu naꞌrata zaꞌra mono ne.
9 — Maꞌãpé, asimizaꞌrese ꞌre aihâimana zaꞌra waꞌaba mono. E marĩ wa. Daꞌãma rowairébézéb u te za da te ꞌre asimroi waꞌwa. Romhâ nhorõ ꞌmanharĩ na, dapréꞌézém na te za da te ꞌre aihâ zaꞌra waꞌwa, Zudeu norĩ te rowahutuzém norĩ ꞌremhã. Ĩꞌuꞌâbâ te za da te ꞌre asimroi waꞌwa, rotiꞌwa norĩ nhoꞌre u, duré apito norĩ nhoꞌre u hã. Tawamhã te za tãma ꞌre asiwasuꞌu zaꞌra waꞌaba mo, ĩzazeiꞌwa ꞌre iꞌanomro aba mono na hã.
10 Tawamhã robꞌrãsutu õ ré hã, iꞌru zahi tô Rowasuꞌuwẽ ité hã dawamri mono bâ da te iwapari zaꞌra da hã.
11 Tawamhã da te ꞌre aiwaibui waꞌaba mono wamhã, duré daꞌãma rowairébézéb u, da te ꞌre asimroi waꞌaba mono wamhã, ꞌre aihâtâꞌâ zaꞌra waꞌaba mono tõ, za ꞌre inharĩ zaꞌra waꞌaba mono zém na hã. Taha bâtâ ꞌremhã, ꞌRe ihâimana uꞌâsi mono te te aima ꞌre iwaihuꞌu zaꞌra waꞌaba mono zém na si, ꞌre nharĩ zaꞌra waꞌaba mono za. E marĩ wa. A norĩ waꞌwa ꞌre nharĩ zaꞌra waꞌaba mono õ wa za. Tazahã ꞌRe ihâimana uꞌâsi mono Pẽꞌẽzani.
12 Dasisãnawã nherẽ, te za da te ꞌre hâiba zaꞌré zaꞌra, da te ꞌre simroi mono da hã. Damama norĩ zama te za tiꞌra hã te te ꞌre hâiba zaꞌré zaꞌra. Daꞌra norĩ hã timama norĩ da, te za ꞌre hâimana zaꞌra. Te za duré te te ꞌre simro.
13 Uburé te za da te ꞌre aiꞌruiwapari zaꞌra waꞌwa ĩꞌuꞌâbâ. Tane nherẽ, niꞌwa hã siptete sina ĩꞌãma ꞌre hâimana uꞌâsi mono wamhã, ro iꞌrãsutuzéb u, ta hã te za tinhoꞌreptuzé hã sina uwaimra.
Robzépata zaꞌẽne
14 Tawamhã Zezusi hã ma ãma uzusi, ãne:
— Nimahã na hã, te za iꞌmadâꞌâ zaꞌra waꞌwa, ꞌRe ihâimana uꞌâsi mono nhorõwa ꞌri ꞌrãihâ, da te dasiwi rẽme da, “marĩ ipipa iwasété uptabi hã” watobro ré hã, tame hâimana dai õ nherẽ. (Ãhã wasuꞌu na robꞌuiꞌéré hã, isõréꞌwa hã te te isadaihuꞌu da si, iwẽ hã.) Tahawa, Zudéa ãma ꞌre isiꞌubumroi mono norĩ hã sisaꞌrei mono, simani zaꞌra da, ẽtẽ ꞌrãihâ u.
15 Duré niꞌwa hã tinhorõwa ꞌri nhisiwi sãmra ré wamhã, te te siꞌrai õ di za, ꞌri para u sébré da hã, tinhimarĩ te te waibu da aꞌâ.
16 Duré niꞌwa hã rom na hâimana ré wamhã, tinhorõwa u hã te te sina siri õ di za, tiꞌuza ihâpa te te âri da hã.
17 Taha bâtâ mono na hã, piꞌõ iwasã ré norĩ ma hã ropipa uptabi di za, duré tiꞌra te te iwapsõmri ré norĩ ma zama!
18 Tahawa ꞌRe ihâimana uꞌâsi mono wi, ꞌre rowaptẽrẽ zaꞌra waꞌaba mono, ãne hã romhâimana tõ da, rowaꞌuꞌu wahâ ꞌrowi.
19 E marĩ wa. Bâdâ robzépata ré ihâimana zaꞌra ꞌremhã te za robzépata zaꞌẽtẽ uptabi zaꞌra ni, ãne na hã niwa iromhâimana õ, ꞌRe ihâimana uꞌâsi mono te te iꞌaropoto naꞌrata mono zém hawim haré, ãwa bâtâ u hã. Duré niwa ãne ihâimana zahu da hã mare di.
20 Uburé Danhibꞌapito hã, robzépatazé hã bâdâ te te asuru õ ꞌwaꞌâhã, niꞌwa hã te te aré ꞌwapéi õ di. Tane nherẽ, tinhibꞌaꞌuwẽ da, te te sima ipisutu zaꞌra norĩ uꞌâbâ, ma tô pisutu, bâdâ ꞌrutu na hâimana da.
21 — Tahawa niꞌwa hã te te aima rowasuꞌu aba wamhã, ãne: “Maꞌãpé, ꞌmadâꞌâ zaꞌra waꞌaba! Ãme te tihâiba, Danhoꞌreptuiꞌwa hã” niwamhã duré ãne: “Maꞌãpé, ꞌmadâꞌâ zaꞌra waꞌaba! Danhoꞌreptuiꞌwa, õhõta te nhamra”, ãne wamhã, ꞌre dazaze zaꞌra waꞌaba mono tõ.
22 E marĩ wa. Senai õ na ꞌRe ihâimana uꞌâsi mono zadawa ꞌmahârâꞌwa norĩ hã te za sihâiꞌré zaꞌra, duré senai õ danhoꞌreptuiꞌwa norĩ hã, marĩ dama iꞌmanharĩ waihuꞌuꞌõ, za te te ꞌre iꞌmanharĩ zaꞌra mono hã, duré marĩ, za te te dama ꞌre irowẽ zani zaꞌra mono zama, te te dama ꞌre robꞌrãmi zaꞌra mono da, duré wapu wamhã, ꞌRe ihâimana uꞌâsi mono te te sima ipisutu zaꞌra norĩ ma zama, te te robꞌrãmi zaꞌra da.
23 Tahawa, maꞌãpé asimizaꞌrese ꞌre aihâimana zaꞌra waꞌaba mono. Wa aipoꞌre puꞌu zaꞌra waꞌwa, ãne hã romhâimana wana ré.
Tiꞌai ãma Dasiré Ipodo hã, apâ za we imorĩzé
24 Tawamhã Zezusi hã ma duré tãma waihuꞌu zaꞌra, ãne:
— Robzépata zaꞌẽtẽ zéb ré hã, bâdâ siꞌutõrĩ zaꞌra parimhã, bâdâ hã te za titobra. Te te oto robꞌuiwẽ õ di za. Aꞌamo zama te te duré oto robꞌuiwẽ õ di za.
25 Wasi norĩ hã te za duré hâiwa hawi rere. Uburé hâiwa na siptete uptabi na ꞌre isimasa mono hã te za oto tisãsãꞌã zaꞌra.
26 Tawamhã Tiꞌai ãma Dasiré Ipodo hã te za dasiwi ꞌmadâꞌâ ni, hâiwaꞌa na wei morĩ ré apâ, waihuꞌu pese uptabi na duré ihâiba na rowaꞌa isaꞌẽtẽ uptabi ré.
27 Tawamhã ta hã te za tite hâiwa hawi romhuriꞌwa norĩ hã we satõrĩ zaꞌra, daro mono bâ ꞌRe ihâimana uꞌâsi mono te te sima ipisutu zaꞌra norĩ hã te te sitẽme ꞌrãꞌõtõ da, maparane siꞌuiwa na tiꞌa zadaꞌré ihâimana zaꞌra norĩ hawimhã.
Robꞌrã figu wede na romnhimiré
28 Tawamhã Zezusi hã te duré tãma rowasuꞌu zaꞌra, ãne:
— Maꞌãpé, waihuꞌu zaꞌra waꞌaba, robꞌrã figu wede na romnhimiréꞌézé hã: Figu wede panhipti uzéi wẽ wamhã, duré su té wamhã, te za iwaihuꞌu zaꞌra waꞌwa, tã itaꞌazéb u oto iromhuture na hã.
29 Tane duré, ã hã iromhâimanazé ꞌmadâꞌâ zaꞌra waꞌaba wamhã, te za ãma iwaihuꞌu zaꞌra waꞌwa, iromhuture na hã apâ za we imorĩzé, Tiꞌai ãma Dasiré Ipodo hã.
30 Tô sena wa ãne hã aima waihuꞌu zaꞌra waꞌwa. Uburé ã hã iromhâimana mono zé hã te za tihâimana zaꞌra, ã bâtâ na dahâiba ré idahâimana zaꞌra hã dadâꞌâ zaꞌra õ ré.
31 Hâiwa duré tiꞌai me, te za aiꞌutõrĩ zahuré. Tane nherẽ, ĩmreme hã niwa siꞌutõrĩ waihuꞌu õ di za.
Zezusi hã, apâ za we imorĩzéb da hã, niꞌwa bâdâ te te waihuꞌu õ di
32 Tawamhã Zezusi hã ma ãne tãma ꞌrãsutu zaꞌra:
— Ãne hã iromhâimana mono zéb da hã, niꞌwa bâdâ hã te te waihuꞌu õ di, duré bâtâ pibuzé hã. Hâiwa hawi romhuriꞌwa norĩ zama te te duré waihuꞌu zaꞌra õ di, duré Iꞌra zama. Imama si te te waihuꞌu pese di.
33 Tahawa, maꞌãpé asimizaꞌrese ꞌre aihâimana zaꞌra waꞌaba mono. Duré asiꞌwawi ꞌre asõpré uꞌâsi aba mono, waihuꞌu õ wa, bâdâ iwisizé hã.
34 Ta hã bâdâ hã, aiwa aibâ hã tinhorõwa te te irẽme ne romhâ na morĩ da, tinhimiromhuri tite romhuriꞌwa norĩ ma, te te iꞌapisutu ne hâiba mono bâ, ꞌridawa ꞌmadâꞌâꞌwai ma, te te ĩꞌru ne, te te sô ꞌre robꞌmadâꞌâ uꞌâsi mono da.
35 Tahawa, maꞌãpé ꞌre asõpré uꞌâsi aba mono, waihuꞌu õ wa, ꞌri tedeꞌwa hã apâ za we iwisizé hã, ãté hâiwahâ, niwamhã mara waꞌwa, duré niwamhã siꞌa hârâ wi, ãté duré niwamhã awẽ wi.
36 Tahawa ꞌre asõpré uꞌâsi aba mono, rosaꞌrese õ ré wei wisi wa, asõtõ ré te te asõpẽtẽ zaꞌra waꞌaba tõ da
37 Ãne hã te aima iwaihuꞌu zaꞌra waꞌaba zé hã, uburé ĩzazeiꞌwa norĩ ma, wa waihuꞌu siro: Maꞌãpé, asimizaꞌrese ꞌre asõpré uꞌâsi aba mono!
