Marcus 14:1-72
14 Tawamhã maparane bâdâ hã te oto sô rowaptâ, Pascoa na dato nhisi ihâimana da hã, duré da te ꞌre ihuri mono zé iꞌuꞌẽtẽ wapu mapu õ hã. Tawamhã sasedoti ipire norĩ duré ꞌRe ihâimana uꞌâsi mono nhimiroti zahi na robꞌuiꞌéré na dama rowahutuꞌwa norĩ hã te tirĩtĩ zaꞌra Zezusihi zô, piꞌuriwi te te siwi âri da, te te siwi wĩrĩ da.
2 Ãne te sima ãma roti zaꞌra:
— Dato hâimana ré hã, wa te wasiwi âri õ di za, ãne hã wa te wasiwi ꞌmanharĩ wamhã, roꞌwaꞌrudu hã watobro õꞌumnhasite, dasisapẽtẽ zaꞌra wa.
Zezusihi ꞌrã nhisiwi, piꞌõ dasisadazezé isadazei uptabi te te isaꞌwarizé, Betãnia ãma hã
3 Tawamhã Zezusi hã Betãnia ãma te tihâiba. Tame te tisai ma nhamra, Simahã nhorõwa ꞌre, ta hã iꞌwaꞌre, ãma ꞌre ihâimana mono aré. Taha ré, piꞌõ hã ma tô itẽme ãzé. Wedewaꞌu zadaze ẽtẽ ꞌmanharĩ ꞌremhã ma siré ꞌmazé, nardu na wedewaꞌu nhisi iwaꞌâbâ zaꞌẽne hã. Tawamhã isé hã ma tô sô pru. Taha pari, ma tô saꞌwa Zezusihi ꞌrã nhisiwi.
4 Tawamhã tame idahâimana zaꞌra hã da te ãma dasiwi wẽꞌõ pese wa, ma tô ãne dasima nharĩ zaꞌra ni:
— E marĩ da, ma taré saꞌwa wedewaꞌu zadaze hã.
5 Te te dama wede ꞌwaꞌâhã, 300 na aré robꞌuiprazé isapotore hã, isibrobꞌõ norĩ ma, te te isõmri mono da hã.
Tawamhã piꞌõi ma, ma tô duré mreme tete na nharĩ zaꞌra.
6 Tane nherẽ, Zezusi hã te tãma nharĩ zaꞌra, ãne:
— Tôꞌã. Tane hã piꞌõi ma, ꞌmanharĩ aba tõ. Rowẽ na si hâimana. E marĩ da, ma sada asahi zaꞌra waꞌwa. Iwẽ uptabi hã ma tô ĩma ꞌmanha.
7 Isibrobꞌõ norĩ hã aiꞌrata te za ꞌre siꞌubumroi uꞌâsi ꞌwa. Asima iwẽzéb zarina, te za ꞌre ipawaptob zaꞌra waꞌaba mo. Tanei õ di wa hã. Aiꞌrata ꞌre ĩnhamra uꞌâsi aba mono dai õ di.
8 Piꞌõ hã ma tô ĩma ꞌmanha, pire nherẽ, te te iꞌmanharĩ da hã. Dasisadazezé wedewaꞌu to isadazei uptabi hã ma tô ĩhâiba nhisiwi saꞌwa. Ĩdâꞌâ wana ré, ma tô ĩhâiba zadaze, abꞌre ꞌre, da te ĩnherẽ wana ré.
9 Tô sena, wa za ãne aima waihuꞌu zaꞌra waꞌwa. Daro mono bâ Rowasuꞌuwẽ itém na da te ꞌre dapoꞌre puꞌu zaꞌra mono wamhã, te za da te ꞌre wasuꞌu zaꞌra, ã hã piꞌõ te te ĩma iꞌmanharĩ wẽ zé hã. Te za duré ãma ꞌre dasipoꞌre puꞌu uꞌâsi zaꞌra.
Zudasi hã, Zezusi za te te dama ihâiba zaꞌrézé
10 Tawamhã Zudasi Iscarioti hã ma tô mo, Zezusihi siré 12 na ꞌre inomro mono norĩ siré ꞌre imorĩ hã, sasedoti ipire norĩ u, Zezusi hã te te tãma hâiba nhomri zaꞌra da.
11 Tawamhã Zudaha mreme te te wapari zaꞌra wamhã, ma tô tãma rowẽ pese zaꞌra. Tahawa, ma tô robꞌuiprazém na tãma ropisutu zaꞌra. Tawamhã Zudasi hã te oto robꞌmadâ, bâdâ iꞌuwaibaba hã tãma iwisizéb zô, Zezusi hã te te ihâiba nhomrizéb da hã.
Zezusi norĩ hã, Pascoa na dato nhisi na isaihurizé
12 Tawamhã iꞌuꞌẽtẽ wapu mapu õ na ꞌre idasaihuri mono zéb ãma imorĩꞌrata na bâdâ ihâimana ãma, ma tô Zudeu norĩ hã te te ꞌre simro poneꞌẽrebâ iꞌrare hã, Pascoa na dato nhisi na ãma ꞌre isaihuri mono zéb da hã. Tahawa Zezusi hã ma tô siwi sadanha, isiré ꞌre inomro mono norĩ hã, ãne:
— Rowahutuꞌwa. E momo ma tô asima iwẽ, iwanhipi zaꞌra zéb da hã, Pascoa na dato nhisi na iwasaihuri da hã.
13 Tawamhã Zezusi hã ma tô maparane satõrĩ zahuré, isiré ꞌre ine hã. Ãne te tãma robꞌru zahuré:
— ꞌRi nhoꞌõmo u, ane waꞌaba. Tamemhã te za aibâ hã asõpẽtẽ ꞌwa, pizaꞌa te te iꞌâri hã, â ré. Isarina ane waꞌaba za.
14 Tawamhã aibâ isébrézéb ãma, tame ꞌri tedeꞌwa hã sadanharĩ aba za, ãne: “Rowahutuꞌwa hã te wei wama tiꞌru, wa te asadanharĩ da: E mame te tihâiba ꞌri ꞌre waꞌwa hã, ĩsiré ꞌre inomro mono norĩ me, iwa iwasaihurizéb da hã, Pascoa na dato nhisi na.”
15 Tawamhã te za aima wasuꞌu waꞌwa, hâimo ꞌri ꞌre waꞌwa isaꞌẽne hã. Tamemhã uburé marĩ hã te iwa aimasa, dasai ꞌmanharĩzéb da hã. Tame wazô robzaꞌra pese aba za.
16 Tawamhã Zezusihi siré ꞌre ine hã neb zahuré wamhã, ꞌri waꞌõtõ u ma tô tizasi zahuré. Tame ma tô anhopẽtẽ zahuré, uburé marĩ hã Zezusi te te tãma iwaihuꞌu siromo zahuré zéb uwaibaba. Tawamhã tame ma tô robzaꞌra pese zahuré, Pascoa na dato nhisi na isaihurizéb da hã.
17 Tawamhã mara wamhã oto, Zezusi hã ma tô ãwisi zaꞌra, isiré ꞌre inomro mono 12 na ihâiba zaꞌra norĩ hã.
18 Tawamhã saihuri ré, Zezusi hã ma tô tãma nharĩ zaꞌra, ãne:
— Tô sena, wa za aima waihuꞌu zaꞌra waꞌwa, ãne: Asiré zaꞌra waꞌaba hã niꞌwa misi te za dama ĩhâiba nho, ĩsiré isa hã.
19 Ãne wa, ma tô tiwi tirobzeiꞌõ pese zaꞌra. Tahawa, ma tô hâiba mono bâ sina sadanharĩ zaꞌra, ãne:
— E wa hã te dama aihâiba nhomri da bâ.
20 Tawamhã Zezusi hã ma duré tãma waihuꞌu zaꞌra:
— Asiré zaꞌra waꞌaba hã, niꞌwa ĩsiré isa pratu ꞌre.
21 Tiꞌai ãma Dasiré Ipodo hã te za dârâ. Te za sina uwaimra, ꞌRe ihâimana uꞌâsi mono mreme na Ibaihâ iwazé pese na robꞌuiꞌéré ãma inomro siromo hã. Tazahã, tãma ropipa uptabi di za, Tiꞌai ãma Dasiré Ipodo te te dama ihâiba nhomri ma hã! Wẽ di aré tãma hã, niwa poto õ ꞌwaꞌâhã, ta hã.
22 Tawamhã saihuri ré, Zezusi hã ma tô tiꞌâ, iꞌuꞌẽtẽ wapu hã. ꞌRe ihâimana uꞌâsi mono ãma te tiwata. Taha pari, ma tô te te wẽꞌẽ, iꞌuꞌẽtẽ wapu hã. Tawamhã isiré ꞌre inomro mono norĩ ma, ma tô te te sõmri. Ãne te tãma nharĩ zaꞌra:
— Waibui waꞌaba. Ã hã ĩhâiba.
23 Taha parimhã ma tô duré tiꞌâ hâsizé hã, uva ꞌrãi waꞌui ré hã. ꞌRe ihâimana uꞌâsi mono ãma te duré tiwata. Taha pari, isiré ꞌre inomro mono norĩ ma, ma tô tãma sõmri zaꞌra. Ta norĩ hã uburé ma tô âhu.
24 Tawamhã Zezusi hã ma duré tãma waihuꞌu zaꞌra, ãne:
— Ã hã ĩwapru. Daꞌahâ uptabi zada, te za asaꞌwa. Ĩwapru hã te za uwaimra ropisudu, ꞌRe ihâimana uꞌâsi mono hã te te iꞌmanharĩzé, tinhibꞌaꞌuwẽ norĩ ma.
25 Tô sena wa za aima ĩsiwasuꞌu zaꞌra waꞌwa, ãne: Ã hã robꞌrãi waꞌu hã te hâꞌrẽne zahu õ di za. Niwapsi wa za hâꞌrẽ, robꞌrãi waꞌu ité hã ꞌRe ihâimana uꞌâsi mono daꞌãma ꞌre isibꞌaꞌuwẽ mono zéb ãma si.
26 Tawamhã Zezusi norĩ hã tinhoꞌre na* ꞌRe ihâimana uꞌâsi mono ãma wata zaꞌra parimhã, ma tô wairé, Olivera na ẽtẽ ꞌrãihâ nhisi u.
Zezusi hã, Pedruhu ma te te iwaihuꞌu siromo zé, za te te dawi iꞌudâzém na hã
27 Tawamhã Zezusi hã ma tô isiré ꞌre inomro mono norĩ ma waihuꞌu siromo zaꞌra, ãne:
— Uburé te za asiwi ĩrẽme ꞌwa za, duréihã ꞌRe ihâimana uꞌâsi mono mreme na Ibaihâ iwazé pese na robꞌuiꞌéré siromo zarina, ãne: “Poneꞌẽrebâ ꞌmadâꞌâꞌwa hã wa za tiwĩ. Tawamhã poneꞌẽrebâ norĩ hã te za ropé.”
28 Tane nherẽ, apâ ĩhâiwaꞌutu parimhã, asõwa wa za ĩmorĩ ꞌwa, Galiléia u.
29 Tawamhã Pedru hã te Zezusihi ma tinha, ãne:
— Uburé te te airẽme zaꞌra nherẽ, wa hã niwa te airẽme õ di za.
30 Tane nherẽ, te Zezusi hã tãma tinha, ãne:
— Tô sena wa za aima waihuꞌu. Ã mara na, maparane ãma siꞌa hã tihârâ na te te sahu õ ré, te za dawi ĩꞌudâ za siꞌubdatõ, aima ĩwaihuꞌu õ na hã.
31 Tane nherẽ, Pedru hã sadahutu ãna te nasi tãma tinha, ãne:
— Asiré ĩdâꞌâ da nherẽ, niwa te aiꞌudâ õ di za.
Tawamhã uburé isiré ꞌre inomro mono norĩ hã ma tô õne si nharĩ zaꞌra, za te te dawi iꞌudâ zaꞌra õ na hã.
Zezusi hã, Zétisemani ãma isãmrazé
32 Tawamhã Zezusi norĩ hã ma tô aiꞌabaꞌré, Zétisemani na robꞌre nhisi u. Tame te isiré ꞌre inomro mono norĩ ma nharĩ zaꞌra, ãne:
— Ãme asimroi waꞌaba, te rowaptẽrẽ da, za ĩmorĩ ré.
33 Tawamhã siré ma tô te te simro Pedru norĩ hã, Tiagu duré Zuwã norĩ me. Tame ma tô robzeiꞌõ hã azâ, saꞌẽtẽ uptabi na. Ma tô duré saꞌẽtẽ uptabi na robzépata.
34 Tahawa te tãma nharĩ zaꞌra, ãne:
— Robzeiꞌõ hã te saꞌẽtẽ uptabi na ĩma tihâiba, ta hã za ãté te te ĩwĩrĩ ne hã. Ãme asimroi waꞌaba. Maꞌãpé asõpré waꞌaba.
35 Tawamhã romhâ prã na ma tô isiti timorĩ zaꞌra. Tame ma tõ hiꞌrãtitõ nhamra, tiꞌai u siwẽꞌẽ sina. Timama wi te rowaptẽ, wapu wamhã, te te irobzépatazé hã za bâdâ te te tãma baꞌa da.
36 Ãne ma tô rowaptẽ:
— Ĩmama ĩma iꞌasawi uptabi, uburé marĩ hã aima waihuꞌu pese di. Tahawa, maꞌãpé ĩma baꞌa, robzépada isé uptabi hã. Tane nherẽ, mare di te ĩsima iwẽzéb zarina hã. Asima iwẽzéb zarina si.
37 Taha pari tisiré ꞌre inomro mono norĩ u, apâ ma tô sina siri. Tane nherẽ, sõtõ zaꞌra ré, ma sõpẽtẽ zaꞌra. Tahawa te Pedruhu ma tinha, ãne:
— Simau, e te asõ. E asõtõ ãna, misi bâtâ pibuzé hã aiꞌãma isiꞌutõrĩ da hã waihuꞌu õ di.
38 Maꞌãpé, asõpré waꞌaba, duré rowaptẽrẽ zaꞌra waꞌaba, Satanasi hã te te aipibu zaꞌra waꞌaba wa, airereꞌe aba tõ da. Aipẽꞌẽ ꞌremhã marĩ iwẽ hã ꞌre ꞌmanharĩ zaꞌra waꞌaba mono da, te asima ꞌre iwẽ zaꞌra waꞌaba mono. Tane nherẽ, aihâiba zaꞌra waꞌwa hã sibꞌuware di.
39 Tawamhã Zezusi hã apâ ma tô duré mo. Ma tô rowaptẽ, tô õhõ na te te irowaptẽrẽ ꞌrata zém na, te te irobzépatazé hã te te tãma baꞌa da.
40 Tawamhã apâ te te sina siri wamhã, ma tô duré sõpẽtẽ zaꞌra, sõtõ zaꞌra ré, tomhâ pire zaꞌra wa. Tahawa Zezusi hã te te siwi sadaꞌâbâ waihuꞌu õ di.
41 Tawamhã siꞌubdatõ ãma te te sina isiri ãma hã, ma tô tãma nharĩ zaꞌra, ãne:
— E niha te zahadu asõtõ zaꞌra waꞌwa. Te duré aiwaꞌutu siroptub zaꞌra waꞌwa. Tôꞌã oto. Bâdâ ma tô oto iwa waptãrã. Tiꞌai ãma Dasiré Ipodo, te za oto hâiba nhomri ni, aibâ iwasété norĩ nhibꞌrata.
42 Maꞌãpé, aiwahutu zaꞌra waꞌaba, oto wasiꞌabaꞌré da. Õhõta te wei mo, dama ĩhâiba nhomriꞌwa da hã.
Zezusi hã da te dasiwi iꞌârizé
43 Tawamhã Zezusi hã tãma siwasuꞌu zaꞌra ré, Zudasi hã ma tô wi, isiré ꞌre imorĩ hã aré. Isiré hã daꞌahâ uptabi di, danhiꞌwa ré duré danhiwãi ré, sasedoti ipire norĩ te te sô isatõrĩ zaꞌra hã duré ꞌRe ihâimana uꞌâsi mono nhimiroti zahi na robꞌuiꞌéré na dama rowahutuꞌwa norĩ zama.
44 Taha wana ré hã, Zudasi hã ma tô waihuꞌu siro, dama ipire norĩ ma, pibui pese na da, za te te iꞌmanharĩzé hã, ãne: “Tobꞌrata hârâ na za te isawi hã, tô ta hã asiwi âri aba. Asiptete sina, asiwi saprõni aba.”
45 Tawamhã Zudasi hã Zezusihi u wisi wi, te ãne tãma tinha:
— Rowahutuꞌwa.
Taha pari ma tô sawi, tobꞌrata hârâ na.
46 Tawamhã Zezusi hã ma tô oto dasiwi âri ni. Ma tô duré dasiwi tété ni.
47 Tawamhã niꞌwa tame iꞌrata isa hã ma tô sibꞌézé ꞌwapa hã waze. Ma tô poꞌre nhizâ, sasedoti ipire uptabi ma romhuriꞌwa hã.
48 Tawamhã Zezusi hã sô idasihutu norĩ ma, te tinha, ãne:
— E wa hã dapãrĩꞌwa pâ, ma we ĩzô aihutu ꞌwa, sibꞌézé ꞌwapa ré, duré wede wãi ré.
49 Bâtâ sidâpâsi wa tô asiré ꞌre ĩhâimana zaꞌra waꞌwa. Wa tô te ꞌre rowahutu ꞌRe ihâimana uꞌâsi mono nhorõwa ꞌri ꞌwawi waꞌra ꞌre. Tane nherẽ, tamemhã asiwi ĩꞌâri aba õ di. Tane nherẽ, ꞌRe ihâimana uꞌâsi mono mreme na Ibaihâ iwazé pese na ĩꞌãma robꞌuiꞌéré hã te ĩsina iꞌuwaimrami da hã, tô ĩꞌru zahi.
50 Tawamhã uburé isiré ꞌre inomro mono norĩ hã ma tô siwi tirẽ. Ma tô sisaꞌre.
51 Tawamhã aibâ ihâiba té hã zazahâ hâirã na si isiꞌubu hã ma tô Zezusihi zarina mo. Ta hã da te dasiwi âri da aré.
52 Tane nherẽ, sisaꞌu ma tô tirẽ, tisiꞌubuzé zazahâ hâirã hã. Aiꞌuréiwi ma tô wara.
Zezusi hã rotiꞌwa norĩ dama ipire norĩ nhoꞌre isabzé
53 Taha parimhã Zezusi hã ma tô dasiwi saprõni ni, sasedoti ꞌRe ihâimana uꞌâsi mono ma daꞌãma romhuriꞌwa tisiré norĩ nhipai u ipire uptabi u. Tame ma tô siꞌrãꞌõtõ, sasedoti ipire norĩ hã, Zudeu norĩ ma rotiꞌwa norĩ hã, duré ꞌRe ihâimana uꞌâsi mono nhimiroti zahi na robꞌuiꞌéré na dama rowahutuꞌwa norĩ zama.
54 Tawamhã Pedru hã ma tô Zezusi hã te te pibu romhâ na, sasedoti ipire uptabi nhorõwa ꞌwawi waꞌra u. Tame ꞌridawa ꞌmadâꞌâꞌwa norĩ siré ma tô nhamra, unhama dawa, hâiꞌro da.
55 Tawamhã sasedoti ipire norĩ hã duré uburé Zudeu norĩ ma rotiꞌwa norĩ hã te tinhopré niꞌwam norĩ zô, Zezusi hã marĩ te te ꞌre iꞌabꞌmanharĩ wasété mono zém na te te siwi wasuꞌu da, taha zarina te te siwi ꞌru da, da te dasiwi wĩrĩ da. Tane nherẽ, niꞌwai õ di, iwasuꞌu wasétéꞌwa da hã.
56 Tawamhã daꞌahâ na dazadawa nhipese na ma tô wasuꞌu zaꞌra ni. Tane nherẽ, da te iwasuꞌu wasété zaꞌra zé hã siꞌuwaimrami zaꞌra õ di.
57 Tawamhã niꞌwam norĩ hã ma tiwahutu zaꞌra hâiwi, sadawa nhipese sina Zezusihi ãma iwasédé te te hiri zaꞌra da. Ãne te dama wasuꞌu zaꞌra:
58 — Wa wapari zaꞌra ni, ãne te te nharĩ ré hã: “Wa za ꞌri pru, ã hã ꞌRe ihâimana uꞌâsi mono nhorõwa ꞌri ꞌrãihâ hã, danhibꞌrata na da te dasiwi iꞌri hã. Tawamhã aimawi hã wa za ꞌri siꞌubdatõ bâtâ ꞌre, danhibꞌrata na da te dasiwi iꞌri õ hã za.”
59 Tane nherẽ, isimirowasuꞌu zaꞌra hã sipuꞌu pese di. Siꞌuwaimrami zaꞌra õ di.
60 Tawamhã sacedoti ipire uptabi hã dawaꞌwa ma tô hâiwi za. Ta hã te Zezusi sadanha, ãne:
— E sadaꞌâbâ zaꞌra õ di za, aiwasuꞌu wasété ꞌwa norĩ hã.
61 Tane nherẽ, te Zezusi hã ariꞌiwi zab uꞌâ. Te te sadaꞌâbâ õ di. Tawamhã sacedoti ipire uptabi hã te duré sadanharĩ zahu, ãne:
— E a hã Danhoꞌreptuiꞌwa, ꞌRe ihâimana uꞌâsi mono ãma ꞌre iwawata zaꞌra mono ꞌra.
62 Tawamhã Zezusi hã te tãma siwasuꞌu, ãne:
— Ĩhe, wa hã. Tiꞌai ãma Dasiré Ipodo hã te za asiwi iꞌmadâꞌâ ꞌwa, ꞌRe ihâimana uꞌâsi mono Iwaihuꞌu Pese nhimire niwĩ isãmra na, duré hâiwaꞌa na apâ wei morĩ wamhã.
63 Tawamhã sasedoti ipire uptabi hã te te sadawa ꞌrui wa, ma tô tiꞌuza hã hâiwazu. Ãne ma tô daꞌmahâ:
— Wanhimnhasi zaꞌra õ di za oto, iwasuꞌu wasété ꞌwa norĩ zô hã.
64 Ma tô iwapari zaꞌra waꞌwa, ꞌRe ihâimana uꞌâsi mono ãma te te iwasétézé hã. E niha te ãma irosaꞌrata zaꞌra waꞌwa.
Tawamhã uburé ma tô ãma rowairébé zaꞌra, da te dasiwi wĩrĩ da.
65 Tawamhã niꞌwam norĩ hã ma tô nasi siwi ubu upto, tizadaipro na. Zazahâ na ma duré siwi ubu ubu. Taha ré, te nasi siwi ahâ. Ãne te nasi siwi ꞌmahâ:
— E ꞌwa hã ma aiꞌazâ. Maꞌãpé ãma uwaimrami.
Tawamhã ꞌRe ihâimana uꞌâsi mono nhorõwa ꞌri ꞌmadâꞌâꞌwa norĩ zama, ma tô siwi tiꞌâ, te te nasi siwi ahâri da hã.
Pedru hã, Zezusi te te iꞌudâzé
66 Tawamhã Pedru hã ꞌri ꞌwawi waꞌra ꞌre, piꞌreba ꞌri zahâpâ ãma zahadu dame sãmra ré, ma piꞌõ hã sihâiꞌré, sasedoti ipire uptabi ma romhuriꞌwa hã.
67 Tame ma ꞌmadâ Pedru, hâiꞌro ré. Ma tô ꞌmadâꞌâ pese. Tahawa te ãne tãma tinha:
— Azama te Zezusihi siré ꞌre aimo, Nazaré ãma iprédup siré.
68 Tane nherẽ, Pedru hã te aiꞌudâ:
— Ĩma waihuꞌu õ di. Ĩma inharĩzé hã ĩma saꞌrese õ di.
Taha pari ꞌri nhiꞌriti u ma watobro. Tame awaꞌawi siꞌa hã ma tô hâ.
69 Tawamhã romhuriꞌwa sipiꞌõ hã Pedru, ꞌri nhiꞌriti ãma te te duré ꞌmadâꞌâ wamhã, iꞌrata idasimasam norĩ ma, te duré wasuꞌu, ãne:
— Ã hã aibâ hã Zezusi norĩ siré, ꞌre imorĩ.
70 Tane nherẽ, Pedru hã te duré aiꞌudâ. Taha pari ãma ronomro õ ré, te duré tãma nharĩ zaꞌra, iꞌrata isimasam norĩ hã, ãne:
— Tô sena, a hã Zezusi norĩ siré, ꞌre iꞌaimorĩ. A hã duré Galiléia ãma ꞌre iꞌasãmra mono.
71 Tawamhã Pedru hã ma tô sina ropisutu, ꞌRe ihâimana uꞌâsi mono ma, marĩ iwasédé hã te te tãma pisutu da, tô sena dama siwasuꞌu õ wamhã. Ãne te tãma ropisutu zaꞌra:
— Ĩma waihuꞌu õ di ã hã aibâ hã, ĩma iwasuꞌu zaꞌra waꞌwa hã.
72 Tawamhã awaꞌawi siꞌa hã ma tihârâ na sahu, maparane ãma oto. Tahawa Pedru hã ma tô sipoꞌre puꞌu, Zezusi te te tãma iwaihuꞌu siromo zém na hã, ãne: “Maparane ãma siꞌa hã tihârâ na te te sahu õ ré, siꞌubdatõ te za ĩꞌudâ za.”
Tahawa Pedru hã ma tô oto aiwaꞌõ.
Ĩwaꞌõtõ piꞌreba watsuꞌu mono
^ 14:26 Pascoa na dato nhisi ãma hã te ꞌre dazadawaꞌaꞌa, Salmus 113-118 ãma ihâimana zaꞌra na.
