Marcus 16:1-20
16 Tawamhã sabadu hawi oto awẽ wamhã, Maria Madalena, Salomé duré Maria Tiaguhu na norĩ me, ma tô ꞌmaiꞌuipra zaꞌra, dadâꞌâ wa, dahâiba zadazezé isadazei uptabi hã, Zezusi te te ãma siwi hâiba uꞌré da.
2 Tawamhã dumigu mararé uptabi bâdâ ꞌrãiwatobro wi, ma tô aiꞌabaꞌré abꞌre u, piꞌõ norĩ hã.
3 Tawamhã bâdâdi na siꞌabaꞌré sina te te sima nharĩ zaꞌra, ãne:
— E ꞌwa te za ẽne hã wama saꞌré zaꞌra, abꞌre nhitobzé hã.
4 Abꞌre nhitobzé hã ẽne hã tõmo wawẽ uptabi di. Tane nherẽ, sihutu wamhã, ma ꞌmadâꞌâ zaꞌra, ẽne niꞌwa te te isaꞌré na hã.
5 Tawamhã abꞌre ꞌre sisisi wamhã, ma tô siwi ꞌmadâ, aibâ ihâiba té iꞌuza ihâirã ré isãmra hã, inomrozém nhimire niwĩ. Taha ma, piꞌõ norĩ hã ma tô tipẽꞌẽwara pese zaꞌra.
6 Tane nherẽ, te ãne tãma nharĩ zaꞌra, piꞌõ norĩ ma:
— Aipahi zaꞌra waꞌaba tõ. Zezusihi zô te we airĩtĩ zaꞌra waꞌwa, Nazaré ãma iprédu wedepoꞌo nhonhiꞌrãmi na, da te dasiwi isasõmri zô. Ta hã apâ ma tô hâiwaꞌudu. Ãme hâimana õ di. Maꞌãpé ꞌmadâꞌâ zaꞌra waꞌaba, da te dasiwi isẽrẽzé hã.
7 Mo oto apâ aiꞌabaꞌréi waꞌaba. Isiré ꞌre inomro mono norĩ ma, rowasuꞌu zaꞌra waꞌaba, duré Pedruhu ma, ãne: “Asõwa te za timorĩ zaꞌra waꞌwa, Galiléia u. Tame te za asiwi iꞌmadâꞌâ ꞌwa, te te aima iwaihuꞌu siromo zaꞌra waꞌaba zéb zarina.”
8 Tawamhã tãma pahi pese zaꞌra sina duré rẽrẽꞌẽ sina, ma tô wairé. Abꞌre hawi ma tô sisaꞌre. Niꞌwai ma te te rowasuꞌu zaꞌra õ di, pahi pese zaꞌra wa.
Zezusi hã, Maria Madalenahã ma isihâiꞌrézé
9 Tawamhã Zezusi hã dumigu iwa waptãꞌã wi mararé uptabi apâ hâiwaꞌutu wamhã, imorĩꞌrata na ma tô sihâiꞌré Maria Madalenahã ma, waꞌuburé 7 na te te tãma isãmra ma.
10 Ta hã ma tô mo isiré ꞌre inomro mono norĩ u, te te tãma wasuꞌu zaꞌra da. Ta norĩ ma, robzeiꞌõ uptabi zaꞌra di. Te duré aiwaꞌõ zaꞌra.
11 Tawamhã Zezusi hã apâ ihâiwaꞌutu na iwasuꞌu duré tãma isihâiꞌré na te te wapari zaꞌra wamhã, te te siwi sazei õ di.
Zezusi hã maparane tizazeiꞌwa norĩ ma, isihâiꞌrézé
12 Taha parimhã, Zezusi hã ma tô duré aimawi tihâiba na sihâiꞌré, maparane tizazeiꞌwa norĩ ma, rom na bâdâdi na neb ré.
13 Ta norĩ hã apâ ma tô tineb zahuré, tisiré norĩ ma, te te rowasuꞌu zahuré da. Tane nherẽ, ta norĩ hã te te duré siwi saze zahuré õ di.
Zezusi hã isihâiꞌrézé, 11 na isiré ꞌre inomro mono norĩ ma
14 Tawamhã daꞌrãirẽme hã, Zezusi hã ma tô sihâiꞌré, 11 na ihâiba zaꞌra isiré ꞌre inomro mono norĩ ma, saihuri ré. Tawamhã timreme ma tô tãma pẽtẽ zaꞌra, isimiꞌumnhasi zaꞌra zé hã tãma hâimana zaꞌra õ wa, duré pẽꞌẽ tete zaꞌra wa, isabuiꞌwa norĩ nhimirowasuꞌu hã te te saze zaꞌra õ wa, apâ ihâiwaꞌutuzém na te te iwasuꞌu zaꞌra zé hã.
15 Tawamhã ãne te tãma nharĩ zaꞌra:
— Daro mono bâ ropéi waꞌaba mono, Rowasuꞌuwẽ itém na dama rowasuꞌu zaꞌra waꞌaba da, dapoto mono bâ.
16 Niꞌwa hã te te sazei wamhã, duré â dawabzuri te te ꞌmanharĩ wamhã, ta hã tinhoꞌreptuzé te za sina uwaimra. Tazahã niꞌwa hã te te sazei õ wamhã, ꞌRe ihâimana uꞌâsi mono hã te za siwi wẽꞌõ. Te za tãma pisutu, robzépada hã.
17 Te te ꞌre isaze zaꞌra mono norĩ ma si, te za ꞌre hâimana zaꞌra, ãma iwaihuꞌuzé hã: Ta norĩ hã Ĩnhisi na waꞌuburé ma, te za te te ꞌre robꞌru zaꞌra. Duré damreme itém na te za ꞌre mreme zusi.
18 Wahi hã te za te te ꞌre waibu, tinhibꞌrata na. Duré dapãrĩzé veneno hã te te ꞌre â huri mono wamhã, niha hã te te tãma ꞌre irobꞌmanharĩ zaꞌra mono da hã, mare di. Ihâzé ré norĩ ãma te za tinhibꞌrada hã te te ꞌre saꞌra zaꞌra. Tawamhã ta norĩ hã, te za ꞌre pese zaꞌra.
Zezusi hã hâiwa u imorĩzé
19 Tawamhã ãne na te te tãma waihuꞌu zaꞌra parimhã, Wanhibꞌapito Zezusi hã hâiwa u ma tô tiwi âri zaꞌra, ꞌRe ihâimana uꞌâsi mono hã. Tame ma tô isimire niwĩ oto nhamra.
20 Tawamhã isiré ꞌre inomro mono norĩ hã Rowasuꞌu wẽ itém na te te dama rowasuꞌu zaꞌra mono da, ma tô te te ropé, daro mono bâ. Wanhibꞌapito hã ma tô te te pawaptob zaꞌra, marĩ dama iꞌmanharĩ waihuꞌuꞌõ na. Taha na ma tô da te waihuꞌu zaꞌra, isimirowasuꞌu zaꞌra hã tô sena uptabi na hã.
