Marcus 2:1-28
2 Tawamhã bâdâ umro na ãma siꞌutõrĩ pari, ma Zezusi hã apâ wi, Cafarnau u. Tawamhã ma iwasuꞌu hã ropé, ꞌri, ꞌre ihâimana pese mono zéb ꞌre, ihâimana na hã.
2 Tame ma daꞌahâ na itẽme dasito. Tahawa, rowib zama ꞌridawa ãma hã daꞌmasisi di. Tawamhã Zezusi hã ꞌRe ihâimana uꞌâsi mono mreme na te te dama rowasuꞌu ré,
3 ma tô aibâ norĩ maparane siꞌuiwa na ihâiba zaꞌra hã imorĩꞌõ siwi ãwisi.
4 Tane nherẽ, daꞌahâ uptabi wamhã, te te siwi ꞌmazébré waihuꞌu õ di, Zezusihi u hã. Tahawa, sipapara ma tô ꞌri nhisi hawi sada ꞌri ꞌre puꞌu zaꞌra, Zezusihi nhoꞌõmoi baba. Tawamhã ꞌri ꞌre puꞌu ãma ma tô ãma siwi siꞌra, ihiꞌré hã tizaꞌwarizé wa inomro na.
5 Tawamhã Zezusi hã ma tô ꞌmadâ, aibâ norĩ ma, isimiꞌumnhasizé hã tãma ihâimana zaꞌra na hã. Tahawa ma tô imorĩꞌõ ma tinha, ãne:
— Ĩsiwaihu, aiwasédé hã, ꞌRe ihâimana uꞌâsi mono te te oto aiꞌãma ꞌre abꞌmadâꞌâ mono õ di za.
6 Tawamhã tame dame isisimro, nima norĩ ꞌRe ihâimana uꞌâsi mono nhimiroti zahi na robꞌuiꞌéré na dama rowahutuꞌwa norĩ hã te ꞌrâwi sima ãma rosaꞌrata zaꞌra, ãne:
7 “E niha te õne õ hã aibâ tinha. ꞌRe ihâimana uꞌâsi mono ãma, te wasété. Dawasédé hã niꞌwa te te pari waihuꞌu õ di. ꞌRe ihâimana uꞌâsi mono si, sada hã waihuꞌu pese di.”
8 Tawamhã Zezusi hã ta norĩ te te ãma irosaꞌrata zaꞌra zém na, awaꞌawi te te sina waihuꞌu wamhã, ma tô tãma nharĩ zaꞌra, ãne:
— E marĩ da, te ãne aipẽꞌẽ ꞌremhã irosaꞌrata zaꞌra waꞌwa.
9 E ma hã iwapu, imorĩꞌõ ma, te inharĩzéb da hã, e ã hã: “Aiwasédé hã ꞌRe ihâimana uꞌâsi mono te te oto aiꞌãma ꞌre abꞌmadâꞌâ mono õ di za”, e niwamhã duré ã hã “Aiwahutu. Asaꞌwarizé âri, aimorĩ da oto.”
10 Tane nherẽ, Tiꞌai ãma Dasiré Ipodo hã tiꞌai ãma isimiroti pire uptabi na, dawasédé hã te te daꞌãma ꞌre iꞌabꞌmadâꞌâ mono õ zé hã waihuꞌu zaꞌra waꞌaba da, wa za ãne hã ꞌmanha.
Tawamhã imorĩꞌõ ma, ma tô ãne tinha:
11 — Ãne wa za aima tinha: Aiwahutu. Asaꞌwarizé hã âri, aimorĩ da oto, asõrõwa u.
12 Tawamhã awaꞌawi ma tô aibâ hã wahudu, daꞌahâ nhoꞌa. Tizaꞌwarizé hã ma tô tiꞌâ. Rob u, ma tô iré watobro. Tahawa, uburé, ma ãma tatobꞌuzu zaꞌra ni. ꞌRe ihâimana uꞌâsi mono ãma, te duré tawata zaꞌra ni. Ãne ma tô dasima rowasuꞌu zaꞌra ni:
— Ãne hã niwa, wa te iꞌmadâꞌâ zaꞌra õ.
Zezusi hã Levihi zô ihârâzé
13 Tawamhã Zezusi hã te duré apâ mo, Galiléia isõꞌu zaihâ u. Daꞌahâ na ma tô itẽme aihutu ni. Tame te uburé dama rowahutu.
14 Tawamhã Zezusi hã zahadu morĩ ré, ma tô Afeuhu ꞌra tisã Levi* hã, danhibꞌapito ma, robꞌuiprazé arĩ ubumroiꞌwa hã. Robꞌuiprazé arĩ te te dawi ꞌre iꞌaꞌubumroi mono zéb ãma, te nhamra. Tawamhã Zezusi hã te tãma tinha, ãne:
— We ĩsiré aimorĩ.
Tahawa awaꞌawi ma wahudu Levi hã, isiré ꞌre morĩ da oto.
15 Tawamhã suru na ãma ronomro pari, te Zezusi hã tisa, Levihi nhorõwa ãma. Tawamhã Zezusi duré isiré ꞌre inomro mono norĩ me hã te robꞌuiprazé arĩ ubumroiꞌwa norĩ hã* ahâ na tihâimana zaꞌra, duré aimawi dawasété na ꞌre idanomro mono norĩ zama.
16 Nima norĩ ꞌRe ihâimana uꞌâsi mono nhimiroti zahi na robꞌuiꞌéré na dama rowahutuꞌwa norĩ, ta norĩ hã tô farizeu, Zezusi hã te te siwi ꞌmadâꞌâ wamhã, dawasété norĩ siré duré robꞌuiprazé arĩ ubumroiꞌwa norĩ siré ĩsa na, ma tô isiré ꞌre inomro mono norĩ ma nharĩ zaꞌra, ãne:
— E niha bâ, te bété robꞌuiprazé arĩ ubumroiꞌwa norĩ siré, duré dawasété norĩ siré zama hã tisa.
17 Tawamhã Zezusi ãne hã te te wapari wamhã, ma tô tãma nharĩ zaꞌra, ãne:
— Ihâzéꞌõ norĩ hã dawedeꞌwa zô ꞌre simnhasi waihuꞌu zaꞌra mono õ di. Ihâzé ré norĩ si, te sô ꞌre simnhasi zaꞌra. Tane duré wa hã. Dawasété na ꞌre idanomro mono norĩ zô ꞌre ĩhârâ mono da, wa tô wei mo. Mare di, dawẽ na ꞌre idanomro mono norĩ zô hã.
Dasai ãna, rowaptẽrẽzé
18 Tawamhã Zuwã Batistaha siré ꞌre inomro mono norĩ hã, duré farizeu norĩ hã te sai ãna aꞌâ tihâimana zaꞌra. Tahawa, niꞌwam norĩ hã ma tô Zezusihi u aihutu, te te siwi sadanharĩ da, ãne:
— Zuwãhã siré ꞌre inomro mono norĩ hã duré farizeu norĩ hã, sai ãna te tihâimana zaꞌra. E niha bâ bété, asiré ꞌre inomro mono norĩ hã, sai ãna aꞌâ hâimana zaꞌra õ di.
19 Tawamhã Zezusi hã ma ãma sadaꞌâbâ zaꞌra, ãne:
— Aibâ hã imrozéb u, sô ihârâ zaꞌra norĩ hã e sai ãna, te za aꞌâ tihâimana zaꞌra, aibâ imro da hã isiré hâimana zaꞌra ré hã. Mare di. Sai ãna hâimana zaꞌra õ di za aꞌâ, iꞌrata sãmra zaꞌra ré hã.
20 Niwapsi te za bâdâ hã iwa waptãrã, aibâ imro da hã iwaꞌwa hawi, da te tiwi iꞌâri zaꞌra zéb da hã. Tawapsi te za tô oto sai ãna ꞌre hâimana zaꞌra, te te oto ꞌre rowaptẽrẽ zaꞌra mono da hã.
21 — Niꞌwa hã zazahâ ihâ tém na daꞌuza ihâ ꞌratare hã te te hâiwaꞌaba waihuꞌu õ di. Te te ãma hâiwaꞌaba wamhã, daꞌuza ihâ té hã te za hâta, ihâ ꞌratare hã. Ãne wamhã, te za tihâ ꞌrepuꞌu zaꞌẽtẽ.
22 Tane duré niꞌwa hã uva ꞌrãi waꞌu isé iwaꞌu té hã romhâ ꞌmanharĩ isémezé iꞌratare ꞌremhã, te te sẽrẽ waihuꞌu õ di. Te te sẽrẽ wamhã, romhâ ꞌmanharĩ iꞌratare hã te za hâihaipoꞌo. Tawamhã uva ꞌrãi waꞌu isé hã te za taré asaꞌwa. Romhâ ꞌmanharĩ isémezéb zama te za duré hâihaiwamna. Ãne wa, isémezé itéb ꞌrep si, te za robꞌrãi waꞌu ité hã da te ꞌre sé.
Zezusihi nhimiroti, sabadu na roti nhipai u pire uptabi di
23 Tawamhã sabadu na ma tô buru na amnho trigu ꞌre waꞌwaibaba roꞌrazâ, Zezusi hã. Iwaꞌwaibaba siꞌabaꞌréi ré hã ma tô isiré ꞌre inomro mono norĩ hã amnho trigu ꞌrã hã te te sima sinarĩ zaꞌra.
24 Tawamhã farizeu norĩ hã te Zezusi siwi sadanha, ãne:
— E niha bâ, te ãne hã ꞌmanharĩ zaꞌra, asiré ꞌre inomro mono norĩ hã, sabadu na, wa te ꞌre ꞌmanharĩ zaꞌra mono tõ da, wama iꞌru zahi õ hã.
25 Tawamhã Zezusi hã ma sadaꞌâbâ zaꞌra:
— E apito Davihi wasuꞌu na robꞌuiꞌéré hã sõré zaꞌra waꞌaba ã bâ, te te irobꞌmanharĩzém na, tisiré norĩ me hã, mra te te simroi wamhã.
26 Apito Davi hã ma tô ãzé ꞌRe ihâimana uꞌâsi mono nhorõwa u, Abiata hã ꞌre hâimana mono ré. Ta hã sacedoti, ꞌRe ihâimana uꞌâsi mono ma daꞌãma romhuriꞌwa ipire uptabi. Tawamhã Davi hã tamomo sébré wamhã, iꞌuꞌẽne hã ma tô ꞌmaiꞌrẽ, ꞌRe ihâimana uꞌâsi mono ma, aré ãma idanhoprub zaꞌra hã. Ta hã ma tô duré tisiré norĩ ma a zaꞌra, sacedoti norĩ si, te te ꞌre huri mono da, aré iꞌru zahi hã.
27 Tawamhã ãne ma Zezusi hã tãma ꞌrãsutu zaꞌra, timreme hã:
— Sabadu hã ipisutu zahi te ꞌre hâimana, daꞌuꞌâbâ. Sabadu uꞌâbâp si, ꞌre dahâimana zaꞌra mono da hãi õ di.
28 Tazahã, Tiꞌai ãma Dasiré Ipodo hã simiroti pire di, sabadu na tô duré roti zahi ihâimana nhipai u.
