Marcus 4:1-41
4 Tawamhã Zezusi hã te duré dama rowahutu, Galiléia isõꞌu zaihâ na. Daꞌahâ uptabi na imana wawi dasito wa, ma ubaꞌre wa ãzé. Ma tô nhamra, ubaꞌre wa. Â zadaꞌré ãma, te iré za, pazaihâ na dahâimana zaꞌra ré hã.
2 Tawamhã rowasuꞌu na romnhimiréꞌé na si ma tô ahâ na dama rowahutu. Ãne te dama rowasuꞌu:
3 — Maꞌãpé ĩwapari pese zaꞌra waꞌaba. Robꞌreꞌwa hã ma tô mo, te te robꞌre da.
4 Tawamhã romnhamare te te anhamra mono wamhã, nima norĩ hã ma tô rereꞌe, bâdâdi zababa. Tane nherẽ, si norĩ hã ma tô sô sina. Ma tô te te huri, uburé.
5 Tawamhã nima norĩ hã tiꞌa surure na ẽtẽ wazari ꞌre ihâimana zaꞌra mono na ma duré rereꞌe. Ta norĩ hã ma ꞌwanhipré suꞌu, tiꞌai baihâire wa.
6 Tane nherẽ, bâdâ oto ꞌrãiwatobro wamhã, ma tô tiꞌwanhipré ꞌré zaꞌra, sari õ wa.
7 Tawamhã nima norĩ hã ma duré rereꞌe, wabꞌru waꞌwa. Ta norĩ hã prédub zaꞌra wamhã, ma tô wapre zaꞌra, robꞌre hã. Tahawa, ꞌrãi waihuꞌu zaꞌra õ di, ta norĩ hã.
8 Tanei õ di, romnhamare tiꞌai wẽ wa irereꞌe mono hã wẽ na ma ꞌwanhipré. Ma tô tiprédub zaꞌra. ꞌRã zaꞌra wamhã, ma tô tiꞌrã zaꞌra, 30 na iꞌrã na, nima norĩ hã 60 na, duré nima norĩ hã misi iwede nherẽ, 100 na iꞌrã hã.
9 Tawamhã Zezusi hã ma tô ãne ãma ꞌrãsutu, timreme na:
— Asimiparizé aima hâimana zaꞌra waꞌaba wamhã, maꞌãpé wapari zaꞌra waꞌaba!
10 Tawamhã Zezusi hã siwaprosi hâimana wamhã oto, niꞌwam norĩ dame ihâimana zaꞌra hã ma tô itẽme sina rotété zaꞌra dawaꞌrãmi, 12 na ihâiba zaꞌra norĩ siré, te te siwi sadanharĩ da, rowasuꞌu na romnhimiréꞌé na te te irowasuꞌuzém na hã.
11 Tahawa, Zezusi hã ma tô tãma nharĩ zaꞌra, ãne:
— Aima zaꞌra waꞌaba hã ꞌRe ihâimana uꞌâsi mono, ma tô aima hâiꞌré zaꞌra waꞌwa, dama iwaihuꞌuꞌõ hã daꞌãma ꞌre isibꞌaꞌuwẽ mono zém na hã, sõꞌawi te te dama waihuꞌu õ nherẽ. Tanei õ di, daꞌãma ꞌre isibꞌaꞌuwẽ mono zém nhiti rowi ꞌre ihâimana mono norĩ ma hã. Rowasuꞌu na romnhimiréꞌé na si te ta norĩ ma te te ꞌre awaihuꞌu.
12 Titõmo na te te ꞌre ꞌmadâꞌâ zaꞌra mono nherẽ, te te ꞌre ꞌmadâꞌâ waihuꞌu zaꞌra mono õ di. Te te duré ꞌre wapari zaꞌra mono nherẽ, te te ꞌre sadaihuꞌu zaꞌra mono õ di. Te te waihuꞌu zaꞌra ꞌwaꞌâhã, te aré ꞌRe ihâimana uꞌâsi mono u ꞌre sipizari zaꞌra. Tawamhã iwasété zaꞌra hã te te aré ãma ꞌre aꞌmadâꞌâ mono õ di.
13 Tawamhã Zezusi hã ma tô sadanharĩ zaꞌra, ãne:
— Ã hã rowasuꞌu na romnhimiré hã sadaihuꞌu zaꞌra waꞌaba õ wamhã, e niha te za bété ihâiba amo norĩ hã isadaihuꞌu zaꞌra waꞌwa.
14 Zezusi hã ma ãma tãma uzusi zaꞌra, ãne:
— Robꞌreꞌwa hã, ꞌRe ihâimana uꞌâsi mono mreme te te ꞌre iꞌre zaꞌra mono te wasuꞌu.
15 Niꞌwam norĩ hã ꞌRe ihâimana uꞌâsi mono mreme te te ꞌre iwapari zaꞌra mono hã, aiwa romnhamare bâdâdi zababa irereꞌe mono ne. Te te wapari zaꞌra wi, Satanasi hã te za tiwi sô timorĩ zaꞌra. Te za tiwi wazere zaꞌra, ipẽꞌẽ ꞌre, da te tãma iꞌaꞌre zaꞌra hã.
16 Niꞌwam norĩ hã aiwa romnhamare tiꞌa ẽtẽ wazari ꞌre ihâimana zaꞌra mono na, aibâ te te iꞌanhamra mono ne. ꞌRe ihâimana uꞌâsi mono mreme te za wapari zaꞌra. Waptu na te za saze zaꞌra, to sina.
17 Tane nherẽ, sari õ wa, ãma ronomro prãi wi, te za sazei utõrĩ zaꞌra. ꞌRe ihâimana uꞌâsi mono mreme te te iwapari uꞌâbâmhã, robzépada duré dama robꞌmanharĩ wasété zé hã, sô wisi zaꞌra wamhã, tahawa, te za rẽme zaꞌra, te te isaze zaꞌra zé hã.
18 Niꞌwam norĩ hã aiwa romnhamare wabꞌru wazari, aibâ te te iꞌanhamra mono ne. ꞌRe ihâimana uꞌâsi mono mreme te za wapari zaꞌra.
19 Tane nherẽ, tiꞌai ꞌrem na si, ꞌre hâtâꞌâ zaꞌra mono wamhã, tinhimarĩ na si duré marĩ na si te te ꞌre rosaꞌrata zaꞌra mono wamhã, te za te te tiwi ꞌre ꞌwaꞌrutu zaꞌra, ꞌRe ihâimana uꞌâsi mono mreme hã. Tawamhã ꞌrãi waihuꞌu zaꞌra õ di za.
20 Tanei õ di, niꞌwam norĩ hã romnhamare tiꞌai wẽ wa, irereꞌe mono ne. Ta norĩ hã ꞌRe ihâimana uꞌâsi mono mreme te za wapari zaꞌra. Te za saze zaꞌra. Tawamhã ꞌrã zaꞌra wamhã, ꞌrãi pese na te za tiꞌrã zaꞌra. 30 na iꞌrã na, 60 na, duré 100 na te za ãma sisiwi zaꞌra, te te iwapari zaꞌra zém nhipai u.
Robꞌuiwẽzé
21 Tawamhã Zezusi hã ma duré ãma uzusi, ãne:
— E niꞌwa hã te te sãrĩ waihuꞌu pese di robꞌuiwẽzé hã, pizaꞌa ꞌrowimhã duré niwamhã waptâ ꞌrowimhã. Mare di. Te te robꞌuiwẽ da hã romnhiwasi te za sãrĩ ni.
22 Tahawa, uburé marĩ simiꞌuri na ihâimana zaꞌra hã te za upsibi me zaꞌra ni. Duré uburé marĩ piꞌuriwi ihâimana zaꞌra hã sõꞌawi te za oto tihâimana zaꞌra.
23 Ãne wa, asimiparizé hã aima hâimana zaꞌra waꞌaba wamhã, maꞌãpé wapari zaꞌra waꞌaba!
24 Ma duré ãma uzusi, ãne:
— Ãma rosaꞌrata pese zaꞌra waꞌaba, ꞌre iwapari zaꞌra waꞌaba mono hã! Marĩ hã dama ꞌre iꞌmanharĩ zaꞌra waꞌaba mono zéb zarina, te za ꞌRe ihâimana uꞌâsi mono hã te te aima ꞌre ꞌmanharĩ zara waꞌwa, pire uptabi na.
25 Niꞌwai ma hâimana wamhã, saꞌẽtẽ na te za ãma tãma sisiwi. Tazahã niꞌwa te baba wamhã, suru na tãma hâimana nherẽ, te za tô tiwi waze.
Romnhamare
26 Tawamhã Zezusi hã ma duré ãma uzusi, ãne:
— ꞌRe ihâimana uꞌâsi mono daꞌãma ꞌre isibꞌaꞌuwẽ mono zé hã, aiwa aibâ romnhamare tiꞌai u te te iꞌanhamra mono ne.
27 Tawamhã barana duré bâtâ na sõtõ ré duré rĩtĩ ré zama, te za tiꞌwanhipré zaꞌra. Amnho hã te za duré tiprédub zaꞌra, te te waihuꞌu ãna, e niha ma ãne hã tiprédub zaꞌra.
28 Tiꞌa hã te za tô prédu. Imorĩꞌrata na hã robꞌre te za podo. Taha parimhã te za sihiti. Taha parip si iꞌrã hã te za sina su nhito.
29 Tawamhã ꞌrãi ꞌré wapsi, te za oto ꞌrãihâ, roꞌwa na aibâ hã, bâdâ oto iwa waptãꞌã wa, te te itehârizé hã.
Romnhamare mostarda na isisi
30 Tawamhã Zezusi hã ma duré ãma uzusi, ãne:
— E marĩ na wa za ãma simiréꞌé, ꞌRe ihâimana uꞌâsi mono, daꞌãma ꞌre isibꞌaꞌuwẽ mono zém na hã. E ma hã wa za wasuꞌu, rowasuꞌu na romnhimiré hã.
31 Ta hã aiwa romnhamare mostarda ne hã. Romnhamare dama hã ĩsurure, ta hã.
32 Tane nherẽ, da te ꞌre zuri mono wamhã, oto ꞌwanhipré wamhã, te za tiꞌrãihâ pese, uburé rowede norĩ nhipai u. Papo zaꞌẽtẽ uptabi wa, te za si norĩ hã te te iwa sima ꞌre zasi zaꞌra.
33 Ãne ma tô Zezusi hã ahâ na te te ꞌre rowasuꞌu romnhimiréꞌé na, da te ꞌre sadaihuꞌu zaꞌra mono da.
34 Taha ãna hã te te dama ꞌre rowasuꞌu mono õ di. Tane nherẽ, isiré ꞌre inomro mono norĩ ma si, ma tô hâiba pisutu, te te tãma ꞌre awaihuꞌu pese, sõꞌawi.
Zezusi hã, rowaꞌuꞌu zaꞌẽne te te iwaꞌu utuzé
35 Tawamhã taha bâtâ na hã hâiwahâ pesere Zezusi hã ma tô isiré ꞌre inomro mono norĩ ma tinha, ãne:
— Oto â zara u*, wa te saprĩ zaꞌra na.
36 Tawamhã sisaꞌu ma tô darẽme zaꞌra. Ma tô asisi, ubaꞌre Zezusi iwa isébrézéb ꞌre. Ma tô isiré sisaꞌre. Ubaꞌre aimawi norĩ hã ma tô duré isiré sisaꞌre.
37 Tawamhã waptu na rowaꞌu hã ma tô watobro, saꞌẽtẽ na. Âsisasi hã ubaꞌre ma tô nasi ahâ. Tahawa ma tiꞌâꞌmasisi, ubaꞌre wa.
38 Taha ré hã, Zezusi hã te nhono, ubaꞌre naꞌre ãma. Daꞌrã zaparizém na te ꞌrã zapa. Tawamhã isiré ꞌre inomro mono norĩ hã ma tô siwi utu. Ãne te siwi ꞌmahâ:
— Rowahutuꞌwa, wa za aiꞌutõrĩ ni. E waꞌãma rosaꞌrata zaꞌra õ di.
39 Tawamhã Zezusi hã ma tô wahudu. Rowaꞌuꞌu ma, te tinha, mreme tete na. Âsisasisi ma zama te duré tinha, ãne:
— Maꞌãpé asimizazâri! Airési ãna aihâimana!
Tawamhã rowaꞌu hã ma tô mazazâ. Robrési ãna ma tô oto tiromhâiba.
40 Taha pari Zezusi hã ma tô sadanharĩ zaꞌra, ãne:
— Pra! E marĩ da bâ, ma aipahi zaꞌra waꞌwa. E zahadu asiwi ĩꞌumnhasi aba õ di.
41 Tawamhã isiré ꞌre inomro mono norĩ hã, pahi uptabi zaꞌra di. Tahawa te ãne sima nharĩ zaꞌra:
— E ꞌwa hã, ã hã aibâ, rowaꞌu duré â poré zama te te iwapari pe.
Ĩwaꞌõtõ piꞌreba watsuꞌu mono
^ 4:35 â zara u bâtâ pusizém niwĩ
