Marcus 8:1-38
8 Tawamhã suru na ãma ronomro pari, ma tô duré apâ itẽme tasiꞌrãꞌõtõ ni, daꞌahâ uptabi na. Tawamhã marĩ, da te ihuri da hã hâimana õ wa, Zezusi hã isiré ꞌre inomro mono norĩ zô ma tô hâ. Ãne te tãma nharĩ zaꞌra:
2 — Wa daꞌãma aiwamri pese, ã hã uburé idahâimana zaꞌra norĩ ãma hã. Siꞌubdatõ bâdâ ma tô daꞌãma aiꞌutõ, ĩsiré idahâimana zaꞌra na hã. Tane nherẽ, marĩ õ di, da te ihuri da hã.
3 Mram nherẽ, te dama robꞌrui wamhã, bâdâdi na te za simizaꞌreseꞌõ haiꞌutõrĩ zaꞌra ni, niꞌwam norĩ hã romhâ hawi we sihutu wa.
4 Tawamhã isiré ꞌre inomro mono norĩ hã ma tô siwi sadaꞌâ, ãne:
— E niha wa za dasa hã wasiwi ꞌmasãmri ni, ã hã uburé idahâimana zaꞌra norĩ ma hã, ãme aꞌubuniwimhã.
5 Tawamhã Zezusi hã te sadanharĩ zaꞌra, ãne:
— E niha te iꞌuꞌẽtẽ wapu hã aima tihâimana zaꞌra waꞌwa.
— 7 na te wama tihâimana zaꞌra. — Ãne ma tô siwi sadaꞌâ.
6 Tawamhã Zezusi hã ma tô dama robꞌru, tiꞌai wa, dasiꞌubumroi mono da. Taha pari, ma tô waibu 7 na iꞌuꞌẽtẽ wapu hã. ꞌRe ihâimana uꞌâsi mono ãma te tiwata. Tawamhã ma tô te te wẽꞌẽ. Taha pari isiré ꞌre inomro mono norĩ ma, ma tô te te sõmri, te te dama sõmri zaꞌra mono da.
7 Tebe ĩsurure zama duré tãma ꞌmaihâimana wa, taha na te duré ꞌRe ihâimana uꞌâsi mono ãma tiwata. Taha pari, isiré ꞌre inomro mono norĩ ma, te tiꞌru, te te duré dama sõmri zaꞌra mono da.
8 Tawamhã uburé ma tô tasaihuri ni, da te iꞌmahâpãrĩ mono zéb u. Tawamhã isiré ꞌre inomro mono norĩ hã, iwẽꞌẽi ré hã 7 na siꞌõno hã ma tô ubumro zaꞌra, isiꞌatarẽme ré hã.
9 Tawamhã aibâ norĩ hã 4 miu na ihâiba zaꞌra, isaihuri hã.
Taha pari Zezusi hã ma tô dama robꞌru.
10 Te te dama robꞌrui parimhã, ubaꞌre wa, ma tô asisi, Daumanuta na tiꞌa nhisi u te te saprĩ zaꞌra da.
Zezusihi wi, marĩ dama iꞌmanharĩ waihuꞌuꞌõ Farizeu norĩ hã te te iwaptẽrẽ zaꞌra zé
11 Farizeu norĩ hã Zezusihi u ma tô aihutu. Tawamhã ma tô siwi sadaꞌâ. Te sima wẽ zaꞌra, te te siwi pibu da. Tahawa ma tô tiwi waptẽrẽ zaꞌra, marĩ te te ꞌmanharĩ da, iwaihuꞌuꞌõ hâiwa hawimhã sõꞌawi.
12 Tawamhã Zezusi hã, ma saꞌẽtẽ pẽꞌẽwaze. Tahawa te ãne tãma nharĩ zaꞌra:
— Pra. E marĩ da bâ, te awaꞌawi na aꞌuwẽ norĩ hã siwi ĩwadaꞌu, marĩ dama iꞌmanharĩ waihuꞌuꞌõ hã, te ꞌmanharĩ da. Tô sena wa za aima waihuꞌu zaꞌra waꞌwa, ãne: Marĩ dama iꞌmanharĩ waihuꞌuꞌõ hã te aima iꞌmanharĩ zaꞌra waꞌaba da hã, mare uptabi di.
13 Taha pari, ihawib zaꞌra ma tô mo. Ubaꞌre wa, ma ãzé, zara u te te saprĩ da apâ.
Iꞌuꞌẽtẽ wapu mapuzé farizeu norĩ te, duré Erodihi te
14 Tawamhã isiré ꞌre inomro mono norĩ hã ma poꞌre haꞌâri zaꞌra iꞌuꞌẽtẽ wapu na. Te te siré ꞌmaiꞌâri zaꞌra õ di. Ubaꞌre ꞌrep si te misire nomro, iꞌuꞌẽtẽ wapu hã.
15 Tawamhã Zezusi hã ma poꞌre puꞌu zaꞌra, ãne:
— Maꞌãpé asimizaꞌrese sina ꞌre aihâimana zaꞌra waꞌaba mono. Duré ãma ꞌre pibui pese zaꞌra waꞌaba mono, farizeu norĩ te iꞌuꞌẽtẽ wapu mapuzé wi, duré Erodihi te iꞌuꞌẽtẽ wapu mapuzé wib zama.
16 Tawamhã isiré ꞌre inomro mono norĩ hã te sima nharĩ zaꞌra, ãne:
— Iꞌuꞌẽtẽ wapu hã wama hâimana zaꞌra õ wa, ma ãne hã wama waihuꞌu zaꞌra.
17 Tawamhã Zezusi hã ma tô wapa, te te sima inharĩ zaꞌra zé hã. Tahawa, te sadanharĩ zaꞌra, ãne:
— E marĩ da, te asima inharĩ zaꞌra waꞌwa, iꞌuꞌẽtẽ wapu ihâimana õ na hã aima zaꞌra waꞌaba. E ãma robꞌmadâꞌâ waihuꞌu zaꞌra waꞌaba õ di. E duré asiwi ĩzadaihuꞌu aba õ di. E aipẽꞌẽ tete zaꞌra waꞌaba di.
18 Atõmo ré nherẽ, e ꞌmadâꞌâ waihuꞌu zaꞌra waꞌaba õ di. Aipoꞌre ré nherẽ, e wapari waihuꞌu zaꞌra waꞌaba õ di. E ãma aipoꞌre puꞌu zaꞌra waꞌaba ã bâ,
19 imrotõ na iꞌuꞌẽtẽ wapu te iwẽꞌẽi mono na hã, 5 miu na dahâiba ma hã. E niha siꞌõno ma iꞌubumro zaꞌra waꞌwa, isiꞌazazâri ré hã.
Tawamhã ma sadaꞌâbâ zaꞌra, ãne:
— 12 na siꞌõno hã.
20 Tawamhã Zezusi hã te duré sadanharĩ zaꞌra, ãne:
— Duré, 7 na iꞌuꞌẽtẽ wapu te iwẽꞌẽi mono hã 4 miu na dahâiba ma hã, e niha siꞌõno iꞌmasi isiꞌazazâri ré hã ma tô iꞌubumro zaꞌra waꞌwa.
— 7 na siꞌõno hã. — Ãne ma sadaꞌâbâ zaꞌra.
21 Tawamhã Zezusi hã te duré tãma nharĩ zaꞌra, ãne:
— E niha bâ bété zahadu sadaihuꞌu zaꞌra waꞌaba õ di.
Zezusi hã itobꞌa te te ipesezé, Betisaida ãma hã
22 Tawamhã Zezusi hã duré isiré ꞌre inomro mono norĩ me, ma tô aihutu, Betisaida u. Tame ma tô itẽme dasiwi ãwisi ni, aibâ itobꞌa hã. Tawamhã Zezusihi wi, ma tô waptẽrẽ zaꞌra, te te upi da.
23 Tawamhã Zezusi hã itobꞌa ma paꞌâ. ꞌRi waꞌõtõ nhiti ma tô saprõ. Tame tizadaipro na ma tõmo uꞌré zahuré. Tinhibꞌrada hã ma duré ãma tihi. Taha pari, te sadanha, ãne:
— E ma tô marĩ hã iꞌmadâ.
24 Tawamhã aibâ hã ma tô robꞌmadâꞌâ. Tahawa te Zezusihi ma tinha, ãne:
— Wa daꞌaꞌmadâ oto. Tane nherẽ, wede norĩ isiꞌabaꞌré ne hã.
25 Tahawa, Zezusi hã tinhibꞌrada ma tô duré ãma tino, itõmo ãma. Itobꞌa hã ma tô oto robꞌmadâ wẽ. Ma tô oto tipese. Tahawa te te oto robꞌmadâꞌâ wẽ uptabi di.
26 Taha pari Zezusi hã te aibâ ma robꞌru, tinhorõwa u morĩ da. Ãne te tãma tinha:
— ꞌRi waꞌõtõ u hã apâ aimorĩ tõ, datẽme!
Zezusi hã Danhoꞌreptuiꞌwa na, Pedru te te iwaihuꞌuzé
27 Taha pari, Zezusi hã duré isiré ꞌre inomro mono norĩ me, ma tô aiꞌabaꞌré, apito Filipihi te Cézaréia ꞌrata ꞌri waꞌõno ꞌre isimasa mono u. Tawamhã bâdâdi na siꞌabaꞌré sina, te Zezusi hã sina sadanharĩ zaꞌra, ãne:
— E ꞌwa hã, wa hã ꞌre ĩmorĩ na te da te dasima ꞌre ĩwasuꞌu zaꞌra.
28 Tawamhã isiré ꞌre inomro mono norĩ hã ma sadaꞌâbâ zaꞌra, ãne:
— Niꞌwam norĩ ma hã, a hã u, Zuwã Batista. Duré u a hã, Elias. Duré niꞌwam norĩ ma hã, a hã u, nima hã ꞌRe ihâimana uꞌâsi mono zadawa ꞌmahârâꞌwa.
29 Tawamhã Zezusi hã te sina sadanharĩ zaꞌra, ãne:
— A norĩ waꞌwa hã bété, e niha ma tô asima ꞌre ĩwasuꞌu zaꞌra waꞌaba mo.
Tawamhã Pedru hã ma tô sadaꞌâ, ãne:
— A hã Cristu*.
30 Tawamhã Zezusi hã ma tô sina sadawa uwati pese zaꞌra, te te dama wasuꞌu zaꞌra tõ da.
Zezusi hã, tidâꞌâzém na isiwasuꞌuzé, duré za apâ ihâiwaꞌutuzém na zama
31 Tawamhã Zezusi hã isiré ꞌre inomro mono norĩ ma, te siwasuꞌu, ãne:
— Tiꞌai ãma Dasiré Ipodo hã te za robzépata zaꞌẽtẽ. Zudeu norĩ dama rotiꞌwa norĩ hã te za siwi wẽꞌõ. Sasedoti dama ipire norĩ zama, duré ꞌRe ihâimana uꞌâsi mono nhimiroti zahi na robꞌuiꞌéré na dama rowahutuꞌwa norĩ zama, te za siwi wẽꞌõ zaꞌra. Tahawa te za dasiwi wĩrĩ ni. Tane nherẽ, siꞌubdatõ bâtâ pari, te za apâ hâiwaꞌudu.
32 Zezusi hã sõꞌawi ma tô ãne hã tãma siwasuꞌu zaꞌra. Tawamhã Pedru hã ma tô saprõ, tisiré norĩ nhiti. Tame ma tô mreme tete na tãma tinha, siwasuꞌu zahu tõ da.
33 Tawamhã Zezusi hã ma aipiꞌra. Ma tô ꞌmadâꞌâ zaꞌra, isiré ꞌre inomro mono norĩ hã. Tahawa te Pedruhu ma, mreme tete na tinha, ãne:
— Satanasi, ĩnhiti aimorĩ! A hã ꞌRe ihâimana uꞌâsi mono nhimirosaꞌrata zarina rosaꞌrata õ di. Tiꞌai ãma danhimirosaꞌrata na te irosaꞌra.
34 Taha pari, te Zezusi hã duré sima dazô hâ, isiré ꞌre inomro mono norĩ zô zama. Ãne te dama tinha:
— Niꞌwa hã ĩzarina ꞌre morĩ da, te te sima wẽ wamhã, poꞌre siꞌâri te te sima ꞌre iwẽ mono zéb zarina ꞌre ihâimana mono zém na hã, wedepoꞌo nhonhiꞌrãmi te te âri, ĩzarina morĩ da.
35 E marĩ wa. Niꞌwa hã sisõꞌreptu da wamhã, tihâimanazé hã te za simini. Tane nherẽ, niꞌwa hã ĩꞌuꞌâbâ duré Rowasuꞌu wẽ itéb uꞌâbâ, tihâimanazé te te simini wamhã, ta hã te za sõꞌreptu, tihâimanazé hã.
36 E marĩ da bâ, niꞌwai ma uburé marĩ tiꞌai ꞌremhã tãma ꞌre hâimana zaꞌra mono nherẽ, tô sena dahâimanazé hã te te simini wamhã.
37 E marĩ na te te waꞌâbâ da bâ, te te isiminizé, apâ ihâimanazé tãma ꞌre hâimana mono da hã.
38 Niꞌwa hã ã hã dapoto téb ꞌre, senaiꞌõ duré dawasété na si ꞌre idahâimana zaꞌra mono ꞌre, ĩma ꞌre sisé mono wamhã, duré ĩmreme ma sisé wamhã, Tiꞌai ãma Dasiré Ipodo hã te za tãma asé za, niwa apâ wei morĩ wamhã, Timama te rowaꞌa ré, duré tite hâiwa hawi romhuriꞌwa norĩ wẽ uꞌâsi ꞌre ihâimana zaꞌra mono norĩ siré.
Ĩwaꞌõtõ piꞌreba watsuꞌu mono
^ 8:29 Cristu hã “ꞌRe ihâimana uꞌâsi mono te te ipisudu, Danhoꞌreptuiꞌwa da” te wasuꞌu.
