Marcus 9:1-50
9 Tawamhã Zezusi hã ma duré dama waihuꞌu, ãne:
— Tô sena wa za aima waihuꞌu zaꞌra waꞌwa, ãne: Niꞌwam norĩ hã te ãme tihâimana zaꞌra dawazari, dâꞌâ zaꞌra õ ré, za te te iꞌmadâꞌâ zaꞌra hã, ꞌRe ihâimana uꞌâsi mono daꞌãma ꞌre isibꞌaꞌuwẽ mono zé hã siptete uptabi na wei wisi wamhã.
Zezusihi hâiba isisaprĩzé
2 Tawamhã bâdâ imropâ na siꞌutõrĩ pari, Zezusi hã ma tô te te siré simro Pedru, Tiagu duré Zuwãhã zama ẽtẽ ꞌrãihâ u, siwaprosi hâimana zaꞌra da. Tame ma tô siwi ꞌmadâ Zezusi hã, sisaprĩ ré hã.
3 Tawamhã iꞌuza hã hâirã uptabi di. Hâ siꞌubuzi uptabi di. Daꞌuza hâ upsõiꞌwa hã isine hã te te ꞌmanharĩ waihuꞌu õ di.
4 Tawamhã isõꞌa zaꞌra ma tô sihâiꞌré zahuré, Elias duré Mozésihi me. Ta norĩ hã te Zezusihi ma robzanhamri zahuré.
5 Tawamhã Pedru hã te Zezusihi ma tinha, ãne:
— Rowahutuꞌwa, irowẽ, ãme wahâimana zaꞌra wa. Siꞌubdatõ, wa za ꞌri zaꞌra ni, romhâ ꞌmanharĩ na. Misi za ate da hã, misi za Mozésihi te da hã, duré Eliasihi te da hã.
6 Tawamhã Pedru hã sisaꞌrese õ di, te te inharĩzém na hã, pahi uptabi zaꞌra wa.
7 Taha pari ma tô hâiwaꞌa hã upsibi zaꞌra. Ta hawi ma tô damreme hã we tinha, ãne:
— Ã hã ĩꞌra, ĩma isawi uptabi. ꞌRe wapari pese zaꞌra waꞌaba mono.
8 Tawamhã waptu na isiré ꞌre inomro mono norĩ hã simana wawi te te sô robꞌmadâꞌâ zaꞌra nherẽ, niꞌwa hã te te siwi ꞌmadâꞌâ õ di. Zezusihi si ma tô siwi ꞌmadâ.
9 Tawamhã ẽtẽ ꞌrãihâ hawi te te siꞌra zaꞌra ré hã, Zezusi ma tô isiré ꞌre inomro mono norĩ hã sadawa uwati pese zaꞌra, te te rowasuꞌu zaꞌra tõ da, te te irobꞌmadâꞌâ zaꞌra zém na hã, Tiꞌai ãma Dasiré Ipodo hã apâ hâiwaꞌutu õ ré hã.
10 Tawamhã siꞌrep si ma tô iré tihâimana zaꞌra, imreme ré hã. Tane nherẽ, ma tô ãma sima robzanhamri zaꞌra, te te iwasuꞌuzém na, apâ za ihâiwaꞌutuzém na hã.
11 Tahawa te Zezusi hã siwi sadanha, ãne:
— Rowahutuꞌwa, e marĩ wa, te bété ꞌRe ihâimana uꞌâsi mono nhimiroti zahi na robꞌuiꞌéré na dama rowahutuꞌwa norĩ hã te te ꞌre rowasuꞌu zaꞌra, iꞌru zahi na, Elias za we imorĩ na hã imorĩꞌrata na.
12 Tawamhã Zezusi hã ma ãma sadaꞌâbâ zaꞌra, ãne:
— Tô sena te za Elias hã wei mo imorĩꞌrata na, te te robzaꞌra pese da. Tane nherẽ, e marĩ wa bété, te ꞌRe ihâimana uꞌâsi mono mreme na Ibaihâ iwazé pese na robꞌuiꞌéré iꞌuwaibaba na hã tinha, Tiꞌai ãma Dasiré Ipodo hã za te te irobzépata zaꞌẽtẽ na hã duré za da te dasiwi iwẽꞌõ na hã.
13 Tane nherẽ, wa za ãne aima waihuꞌu zaꞌra waꞌwa: Elias hã ma tô we timorĩ pa. Da te dasima iwẽ zaꞌra zéb zarina, ma tô tãma robꞌmanharĩ wasété zaꞌra ni, ãma irobꞌuiꞌéré zarina.
Zezusi hã aiꞌrepudu te te ipesezé
14 Tawamhã, tisiré norĩ u apâ sihutu wamhã, ma tô daꞌmadâꞌâ zaꞌra imana wawi, daꞌahâ uptabi na idahâimana zaꞌra na hã, duré ꞌRe ihâimana uꞌâsi mono nhimiroti zahi na robꞌuiꞌéré na dama rowahutuꞌwa norĩ hã te te isadaꞌrãmi zaꞌra na hã.
15 Tawamhã Zezusi hã da te dasiwi ꞌmadâꞌâ wamhã, uburé ma tô ãma tatobꞌuzu zaꞌra ni. Ma tô itẽme dasisaꞌre, da te sawi zaꞌra da.
16 Tawamhã Zezusi hã te anha, ãne:
— E marĩ na, te asiwasu zaꞌra waꞌwa.
17 Tawamhã aibâ hã dawazari isa hã te ꞌmahâ, ãne:
— Rowahutuꞌwa, ĩꞌra ꞌwatébrémi hã wa we atẽme saprõ. Waꞌuburé hã te te ꞌre mreme nhito, ꞌre mreme mono tõ da.
18 Duré Waꞌuburé hã te te ꞌre ahâri mono wamhã, tiꞌai u te te ꞌre wabzuri. Tawamhã te za sadaiproi watobro. Te za duré ꞌwahi sitete. Tahawa te sibꞌuwa uꞌâsi. Wa tô aré waptẽ, asiré ꞌre inomro mono norĩ hã waꞌuburé te te siwi me da. Tane nherẽ, te te siwi mei waihuꞌu õ di.
19 Tawamhã Zezusi hã te tãma nharĩ zaꞌra, ãne:
— E niha bété iꞌasimiꞌumnhasi zaꞌra waꞌaba õ. E mahã bâtâ u aiꞌrata ꞌre ĩnhamra uꞌâsi aba mono da bâ. E mahã bâtâ u te duré ꞌre asapari ze zaꞌra waꞌaba mono da bâ. Maꞌãpé we ĩma saprõni waꞌaba, aiꞌrepudu hã.
20 Tawamhã ma tô itẽme saprõni zaꞌra. Waꞌuburé hã Zezusi te te ꞌmadâꞌâ wamhã, aiꞌrepudu ma tô hâiba sãsãꞌã. Tahawa, aiꞌrepudu hã tiꞌai u ma tô waptãrã. Ma tô ꞌre sipizari. Ma tô duré saiproi watobro.
21 Tawamhã Zezusi hã te aiꞌreputu mama hã sadanha, ãne:
— E niha wahum na te ꞌre hâimana, aiꞌra ãne hã.
Ãne ma sadaꞌâ, imama hã:
— Sapore hawim haré.
22 Nimahã na hã waꞌuburé hã unhama u te za time, duré âi ba, te te wĩrĩ da. Tane nherẽ, aima wapu wamhã, maꞌãpé waꞌãma aime na. Waꞌãma aipẽꞌẽzé na!
23 Tawamhã Zezusi hã ma sadaꞌâ, ãne:
— Te ĩma inha, ĩma wapu zô. Uburé marĩ hã wapu di, te te ꞌre ĩzaze zaꞌra mono norĩ ma hã.
24 Tawamhã awaꞌawi pesere te imama hã hârâ ꞌrãihâ na hâ, ãne:
— Wa aiꞌumnhasi. Maꞌãpé ĩpawapto na, te oto aiꞌumnhasi zaꞌẽtẽ da.
25 Tawamhã Zezusi hã itẽme idasiꞌrãꞌõtõ na daꞌahâ na te te daꞌaꞌmadâꞌâ wamhã, ma tô waꞌuburé ma robꞌru, ãne:
— Waꞌuburé damremeꞌõ ꞌmanharĩꞌwa duré dapoꞌreptõ ꞌmanharĩꞌwa, aiꞌrepudu hawi aiwatobro. Niwamhã apâ asébré zahu tõ.
26 Tawamhã waꞌuburé hã, ma tizadari. Sisaꞌu ma tô aiꞌrepudu hã hâiba sãsãꞌã. Taha pari ma tô tirẽ. Dâꞌâ ne te nomro, isaꞌu. Tahawa, daꞌahâ na te nharĩ zaꞌra ni, idâꞌâ na hã.
27 Tane nherẽ, Zezusi hã aiꞌrepudu ma tô paꞌâ. Ma wahutu, para na sab da.
28 Tawamhã Zezusi hã ꞌri para u sébré wamhã, isiré ꞌre inomro mono norĩ hã ma tô siwi sadanha hâiba pisutu, ãne:
— E niha bâ, wa norĩ hã, wa te bété wasiwi mei waihuꞌu õ di, waꞌuburé hã.
29 Tawamhã Zezusi hã ma sadaꞌâbâ zaꞌra, ãne:
— Ãne hã waꞌuburé hã rowaptẽrẽ na si te za ꞌre wairébé.
Zezusi hã duré apâ isiwasuꞌuzé, tidâꞌâzém na duré apâ za ihâiwaꞌutuzém na zama
30 Tawamhã ta hawi ma tô aiꞌabaꞌré. Galiléia waꞌwaibaba ma tô roꞌrahâri zaꞌra. Tawamhã Zezusi hã te te sima wẽ õ di, da te iwaihuꞌu zaꞌra da hã nimame ihâimana na hã,
31 isiré ꞌre inomro mono norĩ ma, hâiba pisutu te te tãma sina nharĩ zaꞌra wa, ãne:
— Tiꞌai ãma Dasiré Ipodo hã te za dasima hâiba nhomri zaꞌra ni za. Tawamhã aibâ norĩ hã te za siwi tiwĩ. Tane nherẽ, siꞌubdatõ bâdâ siꞌutõrĩ õ ré, te za apâ hâiwaꞌudu.
32 Tawamhã Zezusi hã tãma isiwasuꞌu zaꞌra zém na hã te te siwi sadaihuꞌu õ di. Tane nherẽ, te te duré siwi sadanharĩ waihuꞌu õ di, tãma pahi zaꞌra wa.
E ꞌwa hã danhipai u dama ipire
33 Tawamhã Zezusi hã duré isiré ꞌre inomro mono norĩ me ma tô aihutu, Cafarnau na ꞌri nhoꞌõmo nhisi u. Tame ꞌri para u sisisi wamhã, Zezusi hã ma tô isiré ꞌre inomro mono norĩ hã sadanharĩ zaꞌra, ãne:
— E marĩ na te bâdâdi na hã we asima irobzanhamri zaꞌra waꞌaba mo.
34 Tane nherẽ, te ariꞌiwi tihâimana zaꞌra, bâdâdi na hã te te sima robzanhamri zaꞌra mono wa, niꞌwa hã danhipai u dama pire zô.
35 Tawamhã Zezusi hã ma tô nhamra. Isiré ꞌre inomro mono norĩ zô ma tô hâ. Ãne te tãma nharĩ zaꞌra:
— Niꞌwa hã danhipai u dama pire da wamhã, daꞌrãsutu u ꞌre hâimana mono. Duré dama romhuriꞌwa na ꞌre hâimana mono.
36 Tawamhã aiꞌuté hã ma tô paꞌâ. Iwaꞌwab zaꞌra ma tisã. Tinhoꞌutu ma duré tiꞌâ. Taha pari, te isiré ꞌre inomro mono norĩ ma tinha, ãne:
37 — Niꞌwa hã ĩnhisi na, aiꞌuté te te âri wẽ wamhã, ta hã te za ĩꞌâri wẽ, iꞌuꞌâbâ. Niꞌwa hã te te ĩꞌâri wẽ wamhã, ĩwétési te te ĩꞌâri wẽ õ di za. We ĩzatõrĩꞌwa zama te za âri wẽ.
Niꞌwa hã wazada ihâimana õ hã, ta hã waniwĩmhã
38 Tawamhã Zuwã hã te Zezusihi ma rowasuꞌu, ãne:
— Rowahutuꞌwa, aibâ hã wa tô wasiwi ꞌmadâꞌâ ni, asisi na waꞌuburé ma, te te irobꞌru hã. Tane nherẽ, wa tô tiwi sawi zaꞌra ni, te te ꞌmanharĩ tõ da, wasiré ꞌre morĩ õ wa.
39 Tawamhã Zezusi hã ma ãma sadaꞌâ, ãne:
— Mare di. Tiwi sawi zaꞌra waꞌaba tõ. Niꞌwa hã ĩnhisi na marĩ dama iꞌmanharĩ waihuꞌuꞌõ te te ꞌmanharĩ wamhã, taha pari te te ĩꞌãma wasété dai õ di.
40 E marĩ wa. Niꞌwa hã wazada ihâimana õ hã, ta hã waniwĩmhã.
41 Tô sena wa za aima waihuꞌu zaꞌra waꞌwa, ãne: A norĩ waꞌwa Cristuhu zazeiꞌwai wa, niꞌwa hã misi hâsizéb ré, â te te aima õ waꞌaba wamhã, ꞌRe ihâimana uꞌâsi mono hã te te tãma iwaꞌâbâzé te te isimini da hã mare di za.
Ipipa uptabi, za dawasédé, da te ꞌre iꞌmanharĩ zaꞌra mono zé hã
42 Tawamhã Zezusi hã ma ãma uzusi, ãne:
— Niꞌwa hã tiwasédé te te iꞌmanharĩ uꞌâbâ, ã hã aiꞌuté norĩ ĩzazeiꞌwa na ꞌre ihâimana zaꞌra mono hã nima hã te te ĩrẽme wamhã, iwẽ hã aré niꞌwa, da te ime da hã âporé wa, ẽtẽ tõmo wawẽ na butu wazi ré. Tane nherẽ, ꞌRe ihâimana uꞌâsi mono za te te tãma irobꞌmanharĩzé hã isipai u pipa uptabi di.
43 Tawamhã duré asibꞌrata hâiba amo hã ꞌre aiwasété mono da, te te ꞌre ꞌmanharĩ mono wamhã, maꞌãpé sizâri, asisiti me da. Iwẽ hã dahâimanazé isiꞌutõrĩꞌõ u asibꞌrata misi ré, iꞌasébré da hã, asibꞌrata zahuré ré ropipa u iꞌaimorĩ nhipai u, uzâ idâꞌâꞌõ u.
44 [Tamemhã dahâiba uprosiꞌwa hã dâꞌâ õ di. Duré uzâ hã dâꞌâ waihuꞌu õ di.]
45 Duré aipara hâiba amo hã ꞌre aiwasété mono da, te te ꞌre ꞌmanharĩ mono wamhã, maꞌãpé sizâri, asisiti me da. Iwẽ hã aipara misi ré iꞌasébré da hã, dahâimanazé isiꞌutõrĩꞌõ u, aipara zahuré ré ropipa u ꞌRe ihâimana uꞌâsi mono te te iꞌaime nhipai u.
46 [Tamemhã dahâiba uprosiꞌwa hã dâꞌâ õ di. Duré uzâ hã dâꞌâ waihuꞌu õ di.]
47 Duré atõmo hâiba amo hã ꞌre aiwasété mono da, te te ꞌre ꞌmanharĩ mono wamhã, maꞌãpé wazere. Iwẽ hã ꞌRe ihâimana uꞌâsi mono daꞌãma ꞌre isibꞌaꞌuwẽ mono zéb u atõmo misi ré iꞌasébré da hã, atõmo zahuré ré ropipa u ꞌRe ihâimana uꞌâsi mono te te iꞌaime nhipai u.
48 Tamemhã dahâiba uprosiꞌwa hã dâꞌâ õ di. Duré uzâ hã dâꞌâ waihuꞌu õ di.
49 — Dahâiba mono bâ te za ꞌre dahâimana zaꞌra, ꞌRe ihâimana uꞌâsi mono ma danhoprubzé, sa na da te ꞌre iwarĩrĩ zaꞌra mono ne, taha pari da te ꞌre izata zaꞌra mono ne.
50 Sa na dasai warĩrĩzé hã wẽ di. Tane nherẽ, siwamnarĩ wamhã, e niha te za ihiri wẽ waꞌwa apâ, wẽ na hâimana da hã. Ãne wa, ꞌre aihâimana zaꞌra waꞌaba mono, dasa hã sa na warĩrĩ wa, se na ꞌre ihâimana zaꞌra mono ne. Duré ato sina rowẽ na asiré ꞌre aihâimana zaꞌra waꞌaba mono.
