Mateus 27:1-66
27 Tawamhã awẽm na mararé, ma tô uburé sasedoti ipire norĩ hã duré Zudeu norĩ ma rotiꞌwa norĩ zama sisaze zaꞌra, Zezusihi hâiba na hã, te te dama ꞌru zaꞌra da, da te dasiwi wĩrĩ da.
2 Tahawa ma tô Zezusi hã siwi pawasisi. Pilatuhu u, ma tô siwi saprõ, Zudéa ãma daꞌmadâꞌâꞌwai u.
Zudasi hã idâꞌâzé
3 Tawamhã Zudasi ihâiba zaꞌréiꞌwa hã, Zezusi te te ꞌmadâꞌâ wamhã, da te wĩrĩ da, da te iꞌru na hã ma tô siꞌruiwapari pese. Tahawa, ma tô mo, 30 na robꞌuiprazé isapotore prata ꞌmanharĩ hã apâ te te sõmri zaꞌra da, sasedoti ipire norĩ ma, duré Zudeu norĩ ma rotiꞌwa norĩ ma zama.
4 Ãne ma tô tãma nharĩ zaꞌra:
— Ĩwasédé hã wa tô ꞌmanha, aibâ marĩ te te iꞌupai õ hã te hâiba zaꞌréi wa, da te wĩrĩ da hã.
Tawamhã ãne ma tô sadaꞌâbâ zaꞌra:
— Wa norĩ hãi õ di oto, ta hã. Ate ta hã, oto.
5 Tawamhã Zudasi hã robꞌuiprazé isapotore hã ma tô sãmra, ꞌRe ihâimana uꞌâsi mono nhorõwa ꞌri ꞌrãihâ ꞌri para u. Taha pari ma tô watobro. Morĩ wamhã oto, ma tô sisõꞌreti.
6 Tawamhã sacedoti ipire norĩ hã ma tô robꞌuiprazé isapotore hã waibu zaꞌra. Ãne te nharĩ zaꞌra:
— ꞌRe ihâimana uꞌâsi mono nhimiroti zahi na Mozési te te ãma irobꞌuiꞌérézéb zarinai õ di, ã hã robꞌuiprazé, wa te iséme zaꞌra da hã ꞌRe ihâimana uꞌâsi mono nhorõwa ꞌri te, danhoprubzéb ꞌremhã, dahâiba waꞌâbâ wa.
7 Tahawa, ma tô ãma sisaze zaꞌra, tô ta hã robꞌuiprazém na tiꞌa hã te te ãma siwi uipra da, “Tiꞌai uꞌẽtẽ na piza ꞌmanharĩꞌwa” te hã, ꞌre hâimana mono da, zudeuꞌõ norĩ te, adâꞌâ ꞌru da hã.
8 Tahawa, ãwa bâtâ u hã, te tiꞌa hã da te ꞌre sisi zaꞌra: “Tiꞌa hã dahâiba waꞌâbâ na, da te iꞌuipra” na.
9 Ãne wa, ma tô sina uwaimra, ꞌRe ihâimana uꞌâsi mono zadawa ꞌmahârâꞌwa Zeremia te te ãma irobꞌuiꞌérézé hã, ãne: “Ma tô waibu zaꞌra 30 na robꞌuiprazé isapotore prata ꞌmanharĩ hã, Izaraéu nhihudu norĩ ãma isisaze zaꞌra zé hã, te te ãma siwi ihâiba waꞌâbâ da hã.
10 Taha na ma tô tiꞌa hã siwi uipra, tiꞌai uꞌẽtẽ na piza ꞌmanharĩꞌwa te hã, Uburé Danhibꞌapito te te ĩma iꞌruzéb zarina.”
Zezusi hã apito Pilatuhu nhoꞌre isabzé
11 Tawamhã Zezusi hã te hâiwi za, Zudéa ãma daꞌmadâꞌâꞌwa nhoꞌremhã. Ta hã te ãne sadanha:
— E a hã, Zudeu norĩ nhibꞌapito.
Tawamhã Zezusi hã ma sadaꞌâ, ãne:
— A hã te tane hã inha.
12 Tane nherẽ, sasedoti ipire norĩ hã duré dama rotiꞌwa norĩ hã, Zezusihi ãma iwasédé hã te te hiri zaꞌra wamhã, te te sadaꞌâbâ zaꞌra õ di.
13 Tahawa, te Pilatu hã ãne tãma tinha:
— E wapari ã bâ, aiwasuꞌu wasédé hã te te aiꞌãma isaꞌra zaꞌra na hã.
14 Tane nherẽ, Zezusi hã niha hã te te nharĩ õ di. Tahawa Pilatu hã ma tô ãma titobꞌuzu.
Pilatu hã Zezusi te te dama iꞌruzé, da te dasiwi wĩrĩ da
15 Tawamhã Pascoa na dato nhisi hã ꞌre hâimana mono sidâpâ, te Pilatu hã misi si te te ꞌre azani, dazazéb ꞌre, ꞌre isimasa mono hã, da te ꞌre iwaptẽrẽ zaꞌra mono zéb zarina.
16 Taha wahub ꞌremhã, aibâ Barabas na isisi hã te dazazéb ꞌre za, dama iwaihuꞌu pese uptabi hã.
17 Tawamhã Pilatu hã ma tô sadanharĩ zaꞌra, daꞌahâ uptabi na da te iꞌubumro hã, ãne:
— E ma hã te asima iwẽ zaꞌra waꞌwa, te tãma irobꞌru da hã morĩ da. E Barabas, e niwamhã Zezusi, Cristu na da te ꞌre isisi mono.
18 Tawamhã Pilatu hã te te waihuꞌu pese di, Zudeu norĩ ma ipire norĩ hã, Zezusi te te siwi ꞌre sõꞌrui mono wa, te te siwi ihâiba zaꞌré na hã tãma. Tahawa ma tô ãne hã anha.
19 Tawamhã Pilatu hã daꞌãma rowairébézéb ãma sãmra ré, ma tô imro hã romreme tãma tisõ, ãne:
— Dame aihâimana tõ, ã hã aibâ marĩ te te iꞌupai õ na, iromhâimanazém na hã. Barana hã wa ãma rosawẽ. Saꞌẽtẽ na wa robzépata, iꞌuꞌâbâ.
20 Tane nherẽ, sasedoti ipire norĩ hã duré Zudeu norĩ ma rotiꞌwa norĩ hã ma tô tizadawa zaꞌréi õ zaꞌra, daꞌahâ uptabi idahâimana zaꞌra norĩ ma hã, Pilatuhu wi, da te waptẽrẽ zaꞌra da, Barabasihi ma si, te te robꞌru da, morĩ da, duré Zezusihi si te te dama hâiba nhomri da, taha si da te dasiwi wĩrĩ da, isadawa para.
21 Tawamhã Pilatu hã ma tô duré daꞌaꞌmahâ, ãne:
— E ꞌwa hã te asima iwẽ zaꞌra waꞌwa, te tãma irobꞌru da hã, morĩ da.
Tawamhã ma sadaꞌâbâ zaꞌra ni, ãne:
— Barabasihi ma si, robꞌru na, morĩ da.
22 Tawamhã Pilatu hã te duré dazadanha, ãne:
— E marĩ, wa za bété tawamhã ꞌmanha, Zezusi, Cristu na da te ꞌre isisi mono ãma hã.
Tawamhã uburé ma dasiwi sadaꞌâbâ ni, ãne:
— Wedepoꞌo nhonhiꞌrãmi na sasõmri!
23 — E marĩ wa. E marĩ iꞌupa, ma ꞌmanharĩ wasété.
— Ãne te Pilatu hã daꞌaꞌmahâ.
Tane nherẽ, ma tô oto tahãsi ni, dârâ ꞌrãihâ uptabi na, ãne:
— Wedepoꞌo nhonhiꞌrãmi na sasõmri!
24 Tawamhã za te te idaꞌapizari õ na duré oto ꞌre idasiwaꞌrãmi mono na hã, Pilatu te te oto sina waihuꞌu wamhã, ma tô tiꞌru, â hã da te tãma ꞌmaiꞌâri da. Tahawa ma tô sisibꞌrata upsõ, daꞌahâ uptabi na idahâimana zaꞌra norĩ nhoꞌa. Ãne ma tô tinha:
— Wa hã te ãma upai õ di za, ã hã aibâ idâꞌâzém na hã. Ate zaꞌra waꞌwa, za iꞌupa.
25 Tawamhã uburé ma tô sadaꞌâbâ zaꞌra ni, ãne:
— Idâꞌâzém na wa te ãma iꞌupa zaꞌra zé hã tô wanhisiwi waptãꞌã zaꞌra, robzépada hã, duré waꞌra norĩ nhisiwi!
26 Tawamhã Pilatu hã ma tô Barabas hã waze, morĩ da, da te iwaptẽrẽ zaꞌra zéb zarina. Taha parimhã ma tô Zezusi dama tiꞌru, da te ꞌre préꞌé mono da. Ma tô duré tiꞌru, wedepoꞌo nhonhiꞌrãmi na da te sasõmri da.
Dasiꞌwapéi ꞌmanharĩꞌwa norĩ hã Zezusihi ãma iwaꞌẽ zaꞌra zé
27 Tawamhã Pilatuhu te, dasiꞌwapéi ꞌmanharĩꞌwa norĩ hã ma tô Zezusi hã siwi saprõ, apito Pilatuhu nhorõwa ꞌriꞌre waꞌwa nhoꞌõmo u. Tame ma tô uburé dasiꞌwapéi ꞌmanharĩꞌwa norĩ hã siwi uirĩ.
28 Iꞌuza hã ma tô tiwi wazere zaꞌra. Taha pari ma tô siwi uza, daꞌuza ihâpa ihâpré na.
29 ꞌWabzéré panhipti iꞌwa ahâ hã ma duré sada ꞌmaꞌmanharĩ zaꞌra. Taha na ma siwi sõpre. Taha pari, wedehu hã ma duré tãma sõmri zaꞌra, isimire niwĩ. Hiꞌrãtitõ ma duré nasi tãma asimro, ãma waꞌẽ zaꞌra sina. Ãne te nasi tãma nharĩ zaꞌra:
— Wa wasiwi asawi ni, Zudeu norĩ Nhibꞌapito!
30 Tizadaipro na te duré nasi siwi upto. Wedehu te duré nasi tiwi mrami zaꞌra. Iꞌrãi wi, ma tô nasi ãma siwi ahâ.
31 Nasi ãma waꞌẽ zaꞌra parimhã, ma tô iꞌuza ihâpa ihâpré hã apâ tiwi wazere zaꞌra. Taha pari ma tô siwi uza, iꞌuza na. Taha pari, te oto siwi saprõ, wedepoꞌo nhonhiꞌrãmi na te te siwi sasõmri da.
Zezusi hã da te isasõmrizé, wedepoꞌo nhonhiꞌrãmi na
32 ꞌRi nhoꞌõmo hawi oto wairébé wamhã, ma tô siwi sõpẽtẽ Simau na aibâ nhisi hã, Cireni ãma iprédu hã. Taha ma, ma tô ꞌru zahi zaꞌra, wedepoꞌo nhonhiꞌrãmi hã te te âri da, Zezusihi ma.
33 Tawamhã ma tô aihutu, Gougota na romnhisi u. (Gougota hã “Daꞌrãihi Ubumrozé” te wasuꞌu.)
34 Tame uva ꞌrãi waꞌu isé hã ma tô tãma õb zaꞌra, wedewaꞌu isé na iwazari hã, te te hâꞌrẽne da. Tane nherẽ, te te téiwai parimhã, te te oto sima wẽ õ di, te te ihâꞌrẽne da hã.
35 Taha pari, ma tô oto siwi sasõ, wedepoꞌo nhonhiꞌrãmi na. Iꞌuza hã ma tô te te sima hâi waꞌõtõ. Ẽtẽ zapotore iꞌuiꞌéré ré hã te nasi sô sima sãmra, niꞌwam norĩ hã te te ãma iꞌuwaimrami zaꞌra zarina, iꞌuza waꞌõno hã te te nasi sima waibu da, hâiba mono bâ.
36 Taha pari, te duré iꞌrata asimro. Ma tô siwi ꞌmadâ, Zezusi hã dawi.
37 Iꞌrã nhisiwimhã ma tô wedepoꞌo na robꞌuiꞌéré hã siwi sasõ, iwasédé, da te ãma ihirizé hã, ãne: “Ã hã Zezusi, Zudeu norĩ nhibꞌapito.”
38 Zezusihi siré, maparane aibâ isimisaihuri norĩ hã ma tô sasõmri zahuré ni, isimire niwĩ duré ihâiba amo hã isimiꞌe niwĩ.
39 Tawamhã iwaꞌwaibaba, da te nasi iroꞌrahâri zaꞌra hã ma tô nasi ãma tawaꞌẽ zaꞌra ni. Ma tô duré nasi tãma ꞌrãihaiwamnarĩ zaꞌra ni.
40 Ãne te nasi tãma nharĩ zaꞌra ni:
— Oro a hã asina nharĩ za, ꞌRe ihâimana uꞌâsi mono nhorõwa ꞌri prub da hã, duré siꞌubdatõ bâtâ ãma apâ ꞌri da hã. Maꞌãpé asisõꞌreptu na. A hã sena ꞌRe ihâimana uꞌâsi mono ꞌra wamhã, wedepoꞌo nhonhiꞌrãmi hawi siꞌra na!
41 Tane duré sasedoti ipire norĩ hã duré ꞌRe ihâimana uꞌâsi mono nhimiroti zahi na robꞌuiꞌéré na dama rowahutuꞌwa norĩ hã duré Zudeu norĩ ma rotiꞌwa norĩ zama, ma tô ãma tiwaꞌẽ zaꞌra. Ãne ma tô tãma nharĩ zaꞌra:
42 — Ta hã ma tô te te ꞌre daꞌanhoꞌreptu. Tane nherẽ, ꞌrâwimhã sisõꞌreptui waihuꞌu õ di. Oro õ hã Izaraéu nhihudu norĩ nhibꞌapito za. Ãhã na wedepoꞌo nhonhiꞌrãmi hawi, te te siꞌrai wamhã, wa za saze zaꞌra ni!
43 ꞌRe ihâimana uꞌâsi mono si ma tô te te sina ꞌre umnhasi. Ma tô duré dama ꞌre siwasuꞌu, ꞌRe ihâimana uꞌâsi mono ꞌra na. Pé, ꞌRe ihâimana uꞌâsi mono hã te te sõꞌreptu zô, ãhã na hã.
44 Tane duré isimisaihuri norĩ, isiré da te isasõmri zahuré hã ma tô ãma tiwaꞌẽ zahuré.
Zezusi hã idâꞌâzé
45 Tawamhã abzuma waꞌwa ma tô tirobra, uburé daro mono bâ. Bâdâ isiprazéb u siꞌubdatõ na bâtâ pibuzéb u, te robra na tiromhâiba.
46 Tawamhã siꞌubdatõ na bâtâ pibuzéb ãma, Zezusi hã hârâ ꞌrãihâ na ma tô hâ, ãne:
— Eloi, Eloi, lema sabactani*. Ã hã imreme ãma isaprĩzé hã ãne: “Ĩte ꞌRe ihâimana uꞌâsi mono, Ĩte ꞌRe ihâimana uꞌâsi mono, e marĩ wa, ma tô ĩsiwaprosi ĩrẽ.”
47 Tawamhã niꞌwam norĩ iꞌrata isimasa hã Zezusihi hârâ te te wapari zaꞌra wamhã, ma tô ãne nharĩ zaꞌra:
— Eliasihi zô, te hâ.
48 Tawamhã niꞌwa dame isa hã siꞌabaꞌré na ma tô piza upsõzé hã ꞌmaiꞌâ. Ta hã ma tô uva ꞌrãi waꞌu isé prã na diꞌi. Wedewaré ꞌrãsutu na ma tô Zezusihi ma wẽ, te te hâꞌrẽne da.
49 Tane nherẽ, te niꞌwam norĩ hã ãne sima nharĩ zaꞌra:
— Aꞌâ pé, wa te robꞌmadâꞌâ zaꞌra na, Elias we sô morĩ õꞌumnhasite, te te sõꞌreptu da.
50 Tawamhã Zezusi hã ma tô duré hârâ ꞌrãihâ na tihârâ zahu. Taha pari ma tô oto pẽꞌẽhaiꞌutõ.
51 Tawamhã Zezusi hã pẽꞌẽ siꞌutõrĩ pari, awaꞌawi ma tô zazahâ ihâpa hã hâihaipoꞌo, ꞌRe ihâimana uꞌâsi mono nhorõwa ãma ꞌriꞌre waꞌwa nhitobzé hã, hâimo hawi piꞌreba, maparane aiwa ihâiwaꞌõtõ na. Tiꞌa hã ma tô duré sãsã. Ẽtẽ tõmo wawẽ norĩ hã ma duré tõmo sipoꞌo.
52 Adâꞌâ ꞌru norĩ hã ma tô siꞌridawa zaꞌra. Tawamhã ꞌRe ihâimana uꞌâsi mono nhibꞌaꞌuwẽ ꞌre idâꞌâ zaꞌra mono hã ma tô ahâ uptabi na apâ ahâiwaꞌutu, ꞌRe ihâimana uꞌâsi mono hã.
53 Ta norĩ hã ma tô wairé, abꞌre hawi. Zezusi hã hâiwaꞌutu parimhã, ma tô asisi, Zeruzalẽ ꞌri nhoꞌu iwazéb zahi u. Tame ma tô ꞌmadâꞌâ zaꞌra ni, daꞌahâ na dama sihâiꞌré zaꞌra wa.
54 Tawamhã romanu na dawamri na dasiꞌwapéi ꞌmanharĩꞌwa norĩ wadaꞌuriꞌwa hã duré ite dasiꞌwapéi ꞌmanharĩꞌwa norĩ hã, Zezusi te te siwi iꞌmadâ hã ma tô tiꞌai popo hã ꞌmadâꞌâ zaꞌra, duré uburé iromhâimanazé hã. Tahawa ma tô tipahi pese zaꞌra. Ãne te nharĩ zaꞌra:
— Tô sena uptabi, ã hã aibâ hã, ꞌRe ihâimana uꞌâsi mono ꞌra.
55 Tawamhã nima norĩ piꞌõ norĩ hã te tame tihâimana zaꞌra. Romhâ na te robꞌmadâꞌâ zaꞌra. Ta norĩ hã Zezusihi siré ma tô ꞌre nomro Galiléia hawim haré, te te tãma ꞌre romhuri zaꞌra mono da.
56 Isiré zaꞌra hã ma tô dame tihâimana zaꞌra, Maria Madalena, duré Maria, Tiagu duré Zuzé norĩ na, duré Zebedeu ꞌra norĩ na zama.
Zezusi hã dâꞌâ pari, da te dasiwi isẽrẽzé
57 Tawamhã marazéb u oto, ma tô aibâ isibro pe Zuzé na isisi hã wi, Arimatéia na ꞌri waꞌõtõ nhisi hawi. Ta hã duré Zezusihi zazeiꞌwa.
58 Tawamhã Zuzé hã ma tô mo Pilatuhu u. Zezusihi hâiba hã ma tô tiwi waptẽ. Tahawa Pilatu ma tô tiꞌru, dasiꞌwapéi ꞌmanharĩꞌwa norĩ hã te te tãma siꞌra zaꞌra da.
59 Tawamhã Zuzé hã ma tô tiꞌâ, Zezusihi hâiba hã. Zazahâ ihâirã na ma tô ubu.
60 Tawamhã ma tô tisẽ, tite abꞌre ité wa, ẽtẽ zahâpâ ãma te te iꞌabꞌre wa. Taha pari ma tô ẽtẽ tõmo wawẽ hã te te pizari, te te ãma sitob da. Te te ãma sito pari, ma tô oto mo.
61 Maria Madalena, duré Maria ihâiba amoi me, te tame aimasisi zahuré, abꞌre nhoꞌre na.
Dasiꞌwapéi ꞌmanharĩꞌwa norĩ hã, abꞌre te te siwi iꞌmadâꞌâzé
62 Tawamhã awẽm na hã sabadu na, sasedoti ipire norĩ hã duré farizeu norĩ hã ma tô Pilatuhu u aiꞌabaꞌré.
63 Ãne ma tô tãma nharĩ zaꞌra:
— Apito, wa ãma wapoꞌre puꞌu zaꞌra ni, ta hã isadawa nhipe hã ꞌre morĩ ré, te te inharĩzém na hã, ãne: “Bâdâ siꞌubdatõ ĩꞌãma siꞌutõrĩ õ ré, apâ wa za hâiwaꞌudu.”
64 Tahawa, maꞌãpé ꞌru na, siꞌubdatõ bâdâ isiꞌutõrĩzéb u, abꞌre hã ꞌmadâꞌâ pese na hâimana da, isiré ꞌre inomro mono norĩ hã ihâiba te te siwi simiꞌuri tõ da, te te siwi simiꞌuri wa, te te dama wasuꞌu zaꞌra tõ da, apâ ihâiwaꞌutu na hã. Tawamhã iꞌrãsutu ãma te te dama irobꞌrãmi zaꞌra zé hã wasété uptabi di za, imorĩꞌrata nhipai u.
65 Tawamhã Pilatu hã ma tô asa ãne tãma nharĩ zaꞌra:
— Tane tô. Ã hã dasiꞌwapéi ꞌmanharĩꞌwa norĩ hã ãma asiré simroi waꞌaba mono. Mo oto aiꞌabaꞌréi waꞌaba. ꞌMadâꞌâ pese zaꞌra waꞌaba abꞌre hã, irobꞌmadâꞌâ zaꞌra waꞌaba zéb zarina.
66 Tawamhã ma tô oto aiꞌabaꞌré, abꞌre u. Ma tô duré siwi tobꞌratato ẽne hã. Tame ma tô dasiꞌwapéi ꞌmanharĩꞌwa norĩ hã sõré zaꞌra, abꞌre hã te te siwi ꞌmadâꞌâ da.
Ĩwaꞌõtõ piꞌreba watsuꞌu mono
^ 27:46 Eloi, Eloi, lema sabactani. Ã hã hebraicu mreme na hã
