Neemia 1:1-11
1 Ã hã Neemia, Hacaliasihi ꞌra wasuꞌu. Tawamhã aꞌamo zaꞌratazé 9 ãma, apito Artazesi, Persia te, 20 na iwahum na te te ꞌre daꞌaꞌmadâꞌâ mono ré, wa tô ꞌri nhoꞌu isaꞌẽne Susã na isisi ãma nhamra, ĩte tiꞌai waꞌõtõ nhoꞌõmo ãma.
2 Tawamhã ĩsisãnawã Hanani, ma tô Zuda na romnhisi hawimhã we ĩtẽme wi, aimawi Zudeu norĩ nhiꞌaibâ ré. Tawamhã wa hã wa tô waptẽ, ꞌri nhoꞌu Zeruzalẽ na romreme hã, Babilonia ãma Zudeu norĩ aré sito pese na ꞌre ihâimana zaꞌra mono norĩ, Zeruzalẽ u apâ oto isihutu na hã.
3 Tawamhã ta norĩ hã ma tô ĩma wasuꞌu zaꞌra, isiꞌutõrĩꞌõ norĩ Zuda u isihutu norĩ tãma ropire uptabi zaꞌra na isiꞌubumro na hã. Ma tô duré ĩma wasuꞌu zaꞌra, aꞌuwẽ zudeuꞌõ norĩ iwaptoma ꞌre ihâimana zaꞌra mono norĩ te te ꞌre iꞌruiwapari zaꞌra mono na hã. Tawamhã te duré ĩma wasuꞌu zaꞌra ãne: “Zahadu Zeruzalẽ ꞌwawi waꞌra ꞌrãihâ hã siprum haré te duré ꞌre saꞌwari. ꞌRidawa zaꞌẽtẽ zama da te ãma sazu zaꞌra haré te zahadu õne haré ꞌre hâimana, da te dasiwi ꞌmanharĩ téb ãna.”
4 Tawamhã ãne hã te wapari wamhã, wa tô nhamra. Ãhã wa, wa tô aiwaꞌõ.
Tawamhã niha bâtâ na wa tô nasi aiwaꞌõ, ĩsai ãna. Ãhã ré, wa tô mre, ꞌRe ihâimana uꞌâsi mono ma ãne:
5 — Wanhibꞌapito ꞌRe ihâimana uꞌâsi mono, hâiwa ãma ꞌre iꞌasãmra mono, aiwaihuꞌu pese uptabi di. Tahawa, te da te dasiwi ꞌre iꞌaiwazé pese mono zé hã asina ꞌre isani mo. Te duré te te ꞌre iꞌasawi pese zaꞌra mono norĩ siré, duré asimiroti te te ꞌre iwapari pese zaꞌra mono norĩ siré, asimiroti na asisaze zaꞌra waꞌaba zém na tãma ãma ꞌre iꞌaꞌuwaimrami uꞌâsi mo.
6 ꞌRe ihâimana uꞌâsi mono, maꞌãpé we ĩꞌmadâꞌâ. Bâtâ na duré mara na zama ĩmreme na te aiwi ꞌre irowaptẽrẽ mono zé hã maꞌãpé ꞌre wapari mono, asibꞌaꞌuwẽ Izaraéu nhihudu norĩ hâiba na hã. Wa hã Izaraéu nhihudu norĩ me wawasédé wa te ꞌre iꞌmanharĩ zaꞌra mono na hã wa aima ĩsiwasuꞌu. Wahiꞌrata norĩ hawim na wa wawasété na hã ꞌre wahâimana zaꞌra tô.
7 Wa te ꞌre iꞌmanharĩ zaꞌra mono zém na hã, wa tô aiwi ꞌre wawasété zaꞌra tô. Duré asimiroti hã wa te wasiwi ꞌre wapari mono õ di. Duré Mozési asibꞌaꞌuwẽ ma, asimiroti ihiri zarina ꞌre wanomro wẽ pese mono õ na wa tô ꞌre wahâimana zaꞌra.
8 Tahawa maꞌãpé ãhã na awaꞌawi na ãma aipoꞌre puꞌu, tãma iwaihuꞌuzém na hã ãne: “Izaraéu nhihudu norĩ, a norĩ waꞌwa hã ĩꞌãma si ꞌre anomro aba mono õ wamhã, wa za aimawi aꞌuwẽ norĩ tẽmemhã aiꞌãma ropéi waꞌwa za.
9 Tane nherẽ, apâ ĩtẽme ꞌre aipizari zaꞌra waꞌaba mono wamhã, duré ĩnhimiroti ꞌre wapari pese zaꞌra waꞌaba mono wamhã, wa hã wa za apâ duré te asimroi waꞌwa, ro te ipisutu u hã, tame ĩꞌãma ꞌre aiwata zaꞌra waꞌaba mono da, daro mono bâ asisiti ꞌre aihâimana zaꞌra waꞌaba mono nherẽ.”
10 — Wanhibꞌapito, ã norĩ hã aima romhuriꞌwa, asibꞌaꞌuwẽ norĩ. A hã ma tô ta norĩ hã isani zaꞌra, sito pese na ꞌre isiꞌubumroi mono zém hawi, aiwaihuꞌu pese na, duré asiptete na zama.
11 Tahawa, maꞌãpé ĩmreme na te ãma aiwi ꞌre irowaptẽrẽ mono zé hã wapari ãhã na hã. Duré aima romhuriꞌwa hâiba amo norĩ aiꞌãma ꞌre iwata ze zaꞌra mono nhimirowaptẽrẽ zama te za iwapa. Maꞌãpé duré ĩma ꞌmanharĩ, iwẽ na si ĩma romhâimana da, apito hã iwẽ na te te ĩma rowairébé da.
Tô taha wamhã, wa tô uva ꞌrãi waꞌu isé zaꞌwariꞌwa na aré ꞌre ĩhâimana, apito ma hã.
