Neemia 10:1-39
10 Tawamhã imorĩꞌrata na dama iꞌrãnhoꞌu, Neemia, Hacaliasihi ꞌra hã ma tô sisihâtâ. Taha parimhã ma tô duré Zedequia hã sisihâtâ. Taha nhanaꞌremhã isiré norĩ zama ma tô oto sisihâtâ zaꞌra. Ãne isisi zaꞌra hã.
2 10:2-8 Sasedoti hã: Seraia, Azaria, Zeremia, Pasu, Amaria, Malquia, Hatusi, Sebania, Maluque, Harĩ, Meremote, Obadia, Daniéu, Ginetõ, Baruqui, Mesulã, Abias, Miꞌami, Maazia, Bilgai duré Semaia.
3 ꞌMadâꞌâ 10:2
4 ꞌMadâꞌâ 10:2
5 ꞌMadâꞌâ 10:2
6 ꞌMadâꞌâ 10:2
7 ꞌMadâꞌâ 10:2
8 ꞌMadâꞌâ 10:2
9 10:9-13 Levita norĩ hã: Zesua, Azaniaha ꞌra, Binuꞌi, duré Henadadehe ꞌra norĩ, Cadmiꞌé, Sebania, Hodia, Quelita, Pelaia, Hana, Mica, Reobe, Hasabiasi, Zacu, Serebia, Sebania, Hodia, Bani duré Beninu.
10 ꞌMadâꞌâ 10:9
11 ꞌMadâꞌâ 10:9
12 ꞌMadâꞌâ 10:9
13 ꞌMadâꞌâ 10:9
14 10:14-27 Dama ipire norĩ hã: Paro, Paate-Moabi, Elã, Zatu, Bani, Buni, Azgade, Bebaꞌi, Adonia, Bivaꞌi, Adĩ, Ate, Ezequia, Azur, Hodia, Hasu, Bezaꞌi, Harife, Anatoti, Nobaꞌi, Magpia, Mesulã, Hezi, Mesezabe, Zadoqui, Zadua, Pelatia, Hana, Anaia, Oséia, Hanania, Hasube, Haloé, Pilea, Sobeque, Reum, Hasabna, Maaséia, Aiꞌasi, Hana, Anam, Maluque, Harĩ duré Baꞌana.
15 ꞌMadâꞌâ 10:14
16 ꞌMadâꞌâ 10:14
17 ꞌMadâꞌâ 10:14
18 ꞌMadâꞌâ 10:14
19 ꞌMadâꞌâ 10:14
20 ꞌMadâꞌâ 10:14
21 ꞌMadâꞌâ 10:14
22 ꞌMadâꞌâ 10:14
23 ꞌMadâꞌâ 10:14
24 ꞌMadâꞌâ 10:14
25 ꞌMadâꞌâ 10:14
26 ꞌMadâꞌâ 10:14
27 ꞌMadâꞌâ 10:14
Izaraéu nhihudu norĩ, ꞌrâwi sima ropisutu na isisaze zaꞌra zé wasuꞌu
28 Wa norĩ hã Izaraéu nhihudu, sasedoti norĩ hã, levita norĩ hã, ꞌRe ihâimana uꞌâsi mono nhorõwa ꞌri ꞌmadâꞌâꞌwa norĩ hã, tô taha ꞌriꞌre romhuriꞌwa norĩ hã, isõꞌreꞌwa norĩ tô taha ꞌri ꞌremhã, duré uburé ꞌRe ihâimana uꞌâsi mono nhimiroti te te ꞌre iwapari pese zaꞌra mono norĩ hã, wasiré aꞌuwẽꞌõ wanhiptiꞌai ꞌre, iwazarib zaꞌra wahâimana ãna ꞌre iwahâimana zaꞌra mono norĩ hã wamro norĩ me, duré uburé waꞌra isimizaꞌrese prã norĩ me,
29 wa ãhã na wama ipire zaꞌra norĩ me ropisudu hã romnhihâtâ ꞌremhã ãne na hã wasiwi ꞌmanharĩ zaꞌra ni:
Wa norĩ, tinhibꞌaꞌuwẽ Mozésihi ma, ꞌRe ihâimana uꞌâsi mono tinhimiroti te te isõmri na si wa za ꞌre wahâimana zaꞌra. Duré Wanhibꞌapito, wate ꞌRe ihâimana uꞌâsi mono timreme uburé te te wama ꞌre iꞌru zaꞌra mono zém na si, wa za duré ꞌre wahâimana zaꞌra. Wa za duré wapoꞌre pese na ꞌre iwahâimana zaꞌra mono zém na imreme hã wa te ãma tãma ꞌre uwaimrami zaꞌra. Tawamhã wa te iropisutu zaꞌra zé, wa te duré ãma ꞌre uwaimrami zaꞌra mono õ wamhã, te za iwẽꞌõ hã te te wama ꞌre apisutu.
30 Waꞌra sipiꞌõ norĩ, wasiré aꞌuwẽꞌõ norĩ wanhiptiꞌai ꞌre, ꞌre ihâimana zaꞌra mono norĩ ma, ãma ꞌre mro zaꞌra mono da, wa te duré tãma ꞌre isõmri zaꞌra mono da hã mare di za. Duré iꞌra sipiꞌõ norĩ hã, waꞌra siꞌaibâ norĩ ma, wa te duré tãma ꞌre ipisutu zaꞌra mono da hã mare di za, ãma ꞌre mro zaꞌra mono da.
31 Wasiré aꞌuwẽꞌõ norĩ, sabadu na duré siwaꞌru nimahã bâdâ iwazéb zahi na, amnho trigu hã duré siwaꞌru marĩ te te ꞌre wede zaꞌra mono da, we te te ꞌre iꞌwasari mono hã, wa te tiwi ꞌre iꞌuipra zaꞌra mono da hã mare di za.
Duré 7 wahu iwa ꞌre tobro mono sidâpâsi, wanhibꞌrata na wa te ꞌre robzuri zaꞌra mono õ di za. Wa za duré taré marĩ, wa te wasiwi ꞌre iwaibui mono zé hã wa te wasima ꞌre sisisi zaꞌra.
32 Tawamhã wahâiba mono bâ, wahup sidâpâsi wa za ꞌRe ihâimana uꞌâsi mono nhorõwa ma, marĩ waꞌâbâzéb da, wa te ꞌre sõmri zaꞌra, ẽtẽ waipo prã prata 4 grama na ipire pibuzém na hã.
33 Isadawa wasuꞌuzé ꞌri ꞌre, ãma ꞌre idawata zaꞌra mono zéb ãma romhurizéb da hã, wa za ã norĩ wa te ꞌre sõmri zaꞌra: Iꞌuꞌẽtẽ wapu mapu õ ꞌRe ihâimana uꞌâsi mono ma, danhoprubzéb da hã, bâtâ sidâpâsi trigu na, cevada na danhoprubzéb da hã, danhimizama bâtâ sidâpâsi da te tãma ꞌre izata zaꞌra mono na danhoprubzéb da hã, sabadu na danhoprubzé iwazéb zahi da hã, Aꞌamo itém na dasima iromhuꞌu nhisi da hã, dato ihâiba amo norĩ da hã, danhoprubzé ihâiba amo norĩ da hã, Izaraéu nhihudu norĩ wasété pari zéb da, danhoprubzéb da hã, duré siwaꞌru isadawa wasuꞌuzé ꞌri ꞌre, marĩ zô ꞌre irowaptâꞌâ mono norĩ da hã.
34 Tawamhã Uburé Danhibꞌapito, wate ꞌRe ihâimana uꞌâsi mono nhimiroti na robꞌuiꞌéré te te wama iꞌru zaꞌra zéb zarina, wa za wahub sidâpâsi uburé wa norĩ aꞌuwẽ, sasedoti norĩ, levita norĩ me datozébre hã wa te ꞌre sãmra, nimahã te aꞌuwẽ waꞌõno, te te wama ꞌre ipisutu zaꞌra mono zéb da hã, ꞌRe ihâimana uꞌâsi mono nhorõwa ꞌri ꞌre, danhimizama na danhoprubzé zata zéb da, mi te te sada ꞌre iꞌãwisi zaꞌra mono da hã.
35 Tawamhã wahup sidâpâsi wa te ꞌre iroptehâri naꞌrata mono hã duré robꞌrã norĩ wa te ꞌre isinarĩ ꞌrata mono hã wa za isõrõwa ꞌri u wa te ꞌre ãwisi zaꞌra.
36 ꞌRe ihâimana uꞌâsi mono nhimiroti zarina, wa za duré wawaꞌõtõ mono bâ waꞌra norĩ imorĩꞌrada hã wa te ꞌre ãwisi zaꞌra, isõrõwa ꞌri u, tame sasedoti norĩ te te tãma ꞌre hâiba nhomri zaꞌra mono da. Wanhimizama powawẽ zapu imorĩꞌrata na ꞌre ipoto zaꞌra mono na, poneꞌẽrebâ zéré mapure imorĩꞌrata na, duré poneꞌẽrebâ zéré uzé imorĩꞌrata na, wa za duré ãma tãma ꞌre wanhoprub zaꞌra.
37 Sasedoti norĩ ma, wa za duré amnho trigu wahup sidâpâsi wa te ꞌre itehâri ꞌrata mono ꞌrã zu pese waiꞌo ꞌmanharĩ hã ꞌRe ihâimana uꞌâsi mono nhorõwa ꞌri u wa te ꞌre ãwisi zaꞌra. Duré ihâiba amo na wanhoprubzé hã wa za duré wa te tãma ꞌre sõmri zaꞌra, uva ꞌrãi waꞌu isé hã, azeitona waꞌu to hã, duré uburé robꞌrã isipuꞌu pese norĩ zama. Levita norĩ ma, wa za duré wanhimitehâri zaꞌra 10 na isaꞌrata ãmamhã wa te ꞌre sani zaꞌra, wa te tãma ꞌre sõmri zaꞌra mono da. E marĩ wa. Ta norĩ hã ꞌri nhoꞌõmo mono na wa te ꞌre iromhuri zaꞌra mono zéb ãma, danhoprubzé apoꞌo waibuiꞌwa wa.
38 Tawamhã amnho tehâri 10 na isaꞌrata ãma za te te ꞌre iwaibui mono zéb da ãma, te za nimahã sasedoti Arãhã nhihudu, levita norĩ siré hã ꞌre ꞌmaihâimana. Duré tô 10 na isaꞌrata ãma te te siwi ꞌre ipoꞌo siromo mono hawimhã, te za duré 10 na isaꞌrata ãmamhã levita norĩ te te siwi ꞌre ꞌwasari, ꞌRe ihâimana uꞌâsi mono nhorõwa ꞌri ꞌre, romnhimiꞌwarazéb u.
39 ꞌRe ihâimana uꞌâsi mono nhorõwa ꞌri wa, marĩ mono siwazari ꞌre isimiꞌwara mono ãma, sasedoti norĩ niha bâtâ na te te ꞌre romhuri zaꞌra mono wa, ꞌre isimiꞌwara mono zéb ãma, ꞌri ꞌmadâꞌâꞌwa norĩ ꞌre isimiꞌwara mono zéb ãma, tô taha ꞌri wa, isõꞌreꞌwa norĩ ꞌre isimiꞌwara mono zéb ãma, te za Izaraéu nhihudu norĩ hã, levita norĩ hã amnho, duré uva ꞌrãi waꞌu isé hã te te ꞌre sõmri zaꞌra.
Ãhã nherẽ, wate ꞌRe ihâimana uꞌâsi mono nhorõwa ꞌri hã ꞌri pese ãna wa te wasiwi ꞌre irẽme mono da hã mare di za.
