Neemia 11:1-36
11 Tawamhã Izaraéu nhihudu norĩ ma, iꞌrãnhoꞌõmo norĩ hã Zeruzalẽ ãma ꞌre rob zaꞌra mono da, ma tô sima pisutu zaꞌra. Duré aꞌuwẽ isõꞌuma norĩ, ꞌrinhoꞌu Zeruzalẽ, ꞌRe ihâimana uꞌâsi mono tite da, te te ipisutu wa, daꞌra norĩ ré misi si 10 na dawaꞌõtõ zaꞌrata ãma, nima norĩ iwa ꞌre rob zaꞌra mono da, te te dapisutu zaꞌra da hã ma tô datozébre nasi siwi wabzu. Duré 9 na daꞌra norĩ ré dawaꞌõtõ na ma tô, ꞌri nhoꞌu ihâiba amo norĩ ãma ꞌre dahâimana zaꞌra.
2 Tawamhã Zeruzalẽ ãma ꞌre hâimana zaꞌra mono da, te te sima irowairébé zaꞌra norĩ hã, ma tô dapẽꞌẽ to sina dasima wasuꞌu wẽ zaꞌra ni.
3 Niꞌwam norĩ Izaraéu nhihudu, sasedoti norĩ, levita norĩ, duré Salomahã nhibꞌaꞌuwẽ nhihudu ꞌRe ihâimana uꞌâsi mono nhorõwa ꞌri ꞌre te te ꞌre iromhuri zaꞌra mono, ma tô ꞌri nhoꞌu ihâiba amo norĩ ãma tite tiꞌai waꞌõtõ mono wa, ꞌre siꞌubumro.
à hã Zuda na dazaꞌrui waꞌõtõ nhisi ãma dama ipire Zeruzalẽ ãma ꞌre isiꞌubumroi mono norĩ nhisi na irobꞌuiꞌéré hã:
4 Zudaha nhihudu ꞌrem norĩ hã ãne:
Ataia, Uziasihi ꞌra, Zacariaha nhihudu. Taha hiꞌrata norĩ hã duré ãne; Amaria, Sefatia, Maꞌalaléu duré Periz Zudaha ꞌra nhihudu hã.
5 Maaséia, Baruquihi ꞌra, Col-Hozéhe nhihudu. Taha hiꞌrata norĩ hã duré ãne; Hazaia, Adaia, Zoiaribe, Zacaria duré Sela Zudaha ꞌra nhihudu hã.
6 Perizihi nhihudu Zeruzalẽ ãma ꞌre ihâimana zaꞌra mono norĩ, 468 na ihâiba zaꞌrata zaꞌra isiptete norĩ hã.
7 Bẽzamihĩ nhihudu ꞌrem norĩ hã duré ãne:
Salu, Mesulãhã ꞌra, Zoedehe nhihudu. Taha hiꞌrata norĩ hã ãne duré; Pedaia, Colaia, Maaséia, Itiꞌé, duré Zesaiasi.
8 Gabaihi norĩ, Salaꞌihi me, Saluhu siwapru zahuré ꞌrâwi pesere hã.
Tawamhã Bẽzamihĩ nhihudu aibâ norĩ Zeruzalẽ ãma ꞌre isiꞌubumroi mono zaꞌrada hã, ma tô uburé hã watobro, 928 na.
9 Zoéu, Zicrihi ꞌra, ma tô ta norĩ nhibꞌihâꞌa na hã tãma ꞌre hâimana zaꞌra. Duré Zuda, Senuaha ꞌra, ma tô taha zapari danhibꞌihâꞌa na tãma ꞌre sab zaꞌra, Zeruzalẽ ãma.
10 Sasedoti ꞌrem norĩ hã ãne:
Zedaia, Zoiaribehe ꞌra, duré Zaqui.
11 Seraia, Hilquiaha ꞌra, Mesulãhã nhihudu. Taha hiꞌrata norĩ hã duré ãne; Zadoqui, Meraiote, duré Aitubi, ꞌRe ihâimana uꞌâsi mono nhorõwa ꞌri ꞌre romhuri ꞌmadâꞌâꞌwa hã.
12 Ã hã uburé ãma isitom na simisutu isaꞌrada hã 822 na, ꞌRe ihâimana uꞌâsi mono nhorõwa ꞌri na romhuriꞌwa norĩ hã.
Duré Adaia, Zeroꞌãhã ꞌra hã, Pelaliaha nhihudu. Taha hiꞌrata norĩ hã duré ãne; Anzi, Zacaria, Pasu, duré Malquia.
13 Ã hã uburé ãma isitom na simisutu isaꞌrada hã 242 na, aꞌuwẽ iwaꞌõtõ mono bâ danhibꞌihâꞌa mono hã.
Amasai, Azareuhu ꞌra, Azaꞌihi nhihudu. Taha hiꞌrata zahuré hã, Mesilemote norĩ, Imehe me.
14 Ã hã aꞌuwẽ waꞌõtõ ꞌremhã te aibâ norĩ dasiꞌwapéi ꞌmanharĩꞌwa isibꞌru hã ꞌre hâimana zaꞌra, 128 na. Ta norĩ nhibꞌihâꞌa hã Zabdiꞌé na isisi, dawaꞌõno ipire ꞌremhã ꞌre ihâimana mono.
15 Levihi nhihudu ꞌrem norĩ hã ãne:
Semaia, Hasubehe ꞌra, Azricãhã nhihudu. Taha hiꞌrata zahuré hã Hasabiasi norĩ, Bunihi me.
16 Levita tisiré norĩ ma, ipire norĩ, Sabetaꞌihi norĩ, Zozabadehe me, ꞌRe ihâimana uꞌâsi mono nhorõwa ꞌri ãma rowi romhuri ꞌmadâꞌâꞌwa dama zahuré.
17 Matania, Micaha ꞌra, Zabdihi nhihudu, duré Asafihi nhihudu hawimhã aꞌuwẽ. Ta hã ma tô ꞌRe ihâimana uꞌâsi mono nhorõwa ꞌri ꞌre tãma ꞌre idamreme zusi mono zéb ãma danhoꞌre na ãma ꞌre iwata zaꞌra mono da hã, danhoꞌre te te dama ꞌre ꞌwani.
Duré Baquebuquia hã, Mataniaha pawaptoꞌwa na ꞌre ihâimana mono.
Abda, Samuaha ꞌra, Galaꞌoho nhihudu hã, Zedutu nhihudu hawimhã aꞌuwẽ.
18 Tawamhã ꞌrinhoꞌu Zeruzalẽ, ꞌRe ihâimana uꞌâsi mono tite da, te te ipisutu ãma ꞌre ihâimana zaꞌra mono norĩ zaꞌrada hã, ma tô uburé hã watobro 284 na, levita norĩ hã.
19 ꞌRe ihâimana uꞌâsi mono nhorõwa ꞌri ꞌmadâꞌâꞌwa norĩ hã ãne:
Acube, duré Talmo tisisãnawãi me hã. Ã hã uburé 172 na isaꞌrata zaꞌra hã ma tô watobro.
20 Tawamhã Izaraéu nhihudu norĩ, sasedoti norĩ, duré levita norĩ isõꞌuma hã ma tô tite tiꞌai waꞌõtõ mono bâ ꞌri nhoꞌõmo mono na ꞌre hâimana zaꞌra, Zuda tiꞌai ꞌremhã.
21 Zeruzalẽ ãma ꞌRe ihâimana uꞌâsi mono nhorõwa ꞌri na romhuriꞌwa norĩ, ma tô Zeruzalẽ ꞌre Ofeꞌu na ꞌri waꞌõtõ ꞌrare nhisi ãma ꞌre hâimana zaꞌra. Ta norĩ ma tô Zia norĩ nhimiꞌmadâꞌâ zapari Gispaha me te te ꞌre romhuri zaꞌra.
22 Levita norĩ nhibꞌihâꞌa Zeruzalẽ ãma ꞌre ihâimana mono, Uzi na isisi, Banihi ꞌra, Hasabiasihi nhihudu. Taha hiꞌrata zahuré hã Matania, duré Mica. Ta hã ma tô Asafihi te aꞌuwẽ waꞌõtõ ãma hã ꞌre hâimana, ꞌRe ihâimana uꞌâsi mono nhorõwa ꞌri ꞌre dama isõꞌreꞌwa na.
23 Tawamhã niha, bâtâ sidâpâsi ꞌRe ihâimana uꞌâsi mono nhorõwa ꞌri ꞌre, danhoꞌre nhamra na, da te dasima ꞌre irẽme zaꞌra mono da, te apito nhimiroti hã ãma tihâiba.
24 Petaia, Mesezabehe ꞌra, Zeraha nhihudu, Zudaha ꞌra. Ta hã ma tô Izaraéu nhihudu norĩ ma rowaihuꞌuꞌwa na Persia ãma apito nhimiromhurizéb ãma te te ꞌre romhuri.
ꞌRi nhoꞌõmo norĩ ihâiba amoi ãma, duré tiꞌai waꞌõtõ ãma ꞌre idasiꞌubumroi mono zé wasuꞌu
25 Izaraéu nhihudu norĩ hã te ahâ uptabi na rom na tiburu ꞌrata ꞌre siꞌubumro, ꞌri nhoꞌõmo mono bâ. Tawamhã Zudaha nhihudu norĩ hã ꞌri nhoꞌu Quiriate-Arba ãma, Dibõ ãma, Zecabzeeꞌu ãma, duré tiꞌai waꞌõtõ mono bâ ꞌri nhoꞌõmo norĩ ꞌrata ma tô ꞌre hâimana zaꞌra.
26 Tawamhã ꞌri nhoꞌu Zesua ãma, Molada ãma, Bete-Palete ãma,
27 Haza-Sual ãma, Beseba ãma, duré taha uirĩ na tiꞌai waꞌõtõ mono na te duré ꞌre hâimana zaꞌra.
28 ꞌRinhoꞌu Zicradi ãma, Mecona ãma, taha uirĩ na tiꞌai waꞌõtõ mono na,
29 ꞌri nhoꞌu En-Rimo ãma, Zora ãma, Zamute ãma,
30 Zanoa ãma, Adulã ãma, duré taha ꞌri nhoꞌõmo norĩ ꞌrata ꞌri waꞌõtõ mono na ma tô ꞌre siꞌubumro. Ma tô duré Laqui na ꞌri nhoꞌõmo nhisi ãma, duré taha ꞌrata rom na tiburu ãma ꞌre hâimana zaꞌra. ꞌRi nhoꞌu Azeca ãma, taha uirĩ na ꞌri waꞌõtõ mono na te duré ꞌre siꞌubumro. Ãne ma tô Zudaha nhihudu norĩ hã hâiwa nhimiꞌe niwĩ Beseba norĩ waꞌwamhã, hâiwa nhimire niwĩ Hino na ẽtẽ siwaꞌaba nhisi waꞌwa me ꞌre hâimana zaꞌra.
31 Tawamhã Bẽzamihĩ nhihudu norĩ, ma tô hâiwa nhimiꞌe niwĩmhã Geba ãma ꞌre hâimana zaꞌra, Mitima ãma, Aia ãma, Bétéu ãma duré taha uirĩ na ꞌri waꞌõtõ mono na,
32 Anatoti ãma, Nobi ãma, Anania ãma,
33 Hazo ãma, Rama ãma, Gitaꞌĩ ãma,
34 Hadide ãma, Zeboꞌĩ ãma, Nebalate ãma,
35 Rode ãma, duré Ono ãma, Artesã na ẽtẽ siwaꞌaba wamri ꞌre isaꞌwari mono ãma.
36 Tawamhã nima norĩ levita, Zuda ãma ꞌre ihâimana zaꞌra mono hã ma tô pisutu zaꞌra ni, Bẽzamihĩ nhihudu norĩ siré oto ꞌre siꞌubumroi mono da.
