Neemia 13:1-31
13 Tawamhã taha bâtâ na Mozésihi nhimiꞌuiꞌéré, saꞌẽtẽ damreme ꞌrãihâ na da te dasima sõré zaꞌra wa, ma tô amonita norĩ hã duré moabita norĩ hã ꞌRe ihâimana uꞌâsi mono nhibꞌaꞌuwẽ norĩ me, za niwamhã sina zaꞌra isihâibatobꞌõzém na robꞌuiꞌéré hã siwi sõpẽtẽ.
2 E marĩ wa. Aꞌuwẽ norĩ Amo ãma hã duré Moabi ãma hã, Izaraéu nhihudu norĩ Ezitu hawi wairébé wa, oto siꞌabaꞌréi wamhã, â hã duré dasa hã te te tãma sõmri zaꞌra õ wa. Taha waꞌrãmi, ma tô ta norĩ hã Balaãhã ma, waꞌâbâ zaꞌra, niha hã iwasédé te te tãma pisutu zaꞌra da. Tane nherẽ, ma tô ꞌRe ihâimana uꞌâsi mono hã te te aré dama irobꞌmanharĩ wasété zaꞌra zé, iwẽ u hã ãma tiwi saprĩ zaꞌra.
3 Tawamhã ãne hã Izaraéu nhihudu norĩ, roti na robꞌuiꞌéré nhoré te te wapari zaꞌra wamhã, ma tô tisiré aꞌuwẽꞌõ norĩ, isiré ꞌre ihâimana zaꞌra mono zém hawimhã sani zaꞌra.
Neemia, romhâimanazé te te ipesezé wasuꞌu
4 Tawamhã ãne na romhâimana wana ré, sasedoti Eriasibe, ꞌRe ihâimana uꞌâsi mono nhorõwa ꞌri ãma marĩ ꞌre isimiꞌwara mono ꞌmadâꞌâꞌwa hã te Tobiaha sisãnawã siwadi na ꞌre hâimana.
5 Tahawa ma tô ꞌri ꞌre waꞌõtõ zaꞌẽne hã tãma saꞌré, amnho na danhoprubzé, iroꞌo da, wede waꞌu zadaze na danhoprubzé iwa ꞌre isimiꞌwara mono hã, ꞌRe ihâimana uꞌâsi mono nhorõwa ꞌri ꞌre, marĩ da te ãma ꞌre iꞌmanharĩ zaꞌra mono iwa ꞌre isimiꞌwara mono hã, sasedoti ma danhoprubzé nhimiꞌwarazé hã, 10 na amnho tehâri wasi, misi iwasi iwa ꞌre isimiꞌwara mono hã, duré uva ꞌrãi waꞌu isé nhimiꞌwarazé hã, levita norĩ ma, azeitona waꞌu to, da te tãma ꞌre isõmri zaꞌra mono iwa ꞌre isimiꞌwara mono hã, isõꞌreꞌwa norĩ ma hã, duré ꞌRe ihâimana uꞌâsi mono nhorõwa ꞌri ꞌmadâꞌâꞌwa norĩ ma hã.
6 Tane nherẽ, ãne na romhâimana wamhã, wa hã Zeruzalẽ ãma ĩhâimana õ di. E marĩ wa. Babilonia te, apito Artazesi ãma iꞌrãnhoꞌõmo na ꞌre ihâimana mono zém na 32 na ãma iwahub ãma, wa tô õwamhã apâ ĩsina siri, ĩsiꞌuihâ na te tãma ĩsina robzanhamri da, apito ma. Tawamhã niha bâdâ we siꞌutõrĩ mono pari, ma tô bâdâ hã ĩma saꞌré, apâ ĩmorĩzéb da hã.
7 Tahawa Zeruzalẽ u apâ te ĩsina siri wamhã, wa tô Eriasibe tiwasédé te te iꞌmanharĩzé hã waihuꞌu, ꞌRe ihâimana uꞌâsi mono nhorõwa ꞌri ꞌre waꞌõno, Tobia iwa hâimana da, te te tãma isaꞌrézém na hã.
8 Tahawa, wa hã ĩnhibꞌrui pese wa, wa tô ꞌri ꞌre waꞌõtõ hawimhã Tobiaha nhimarĩ hã, rob u sãmra.
9 Taha pari, wa tô dama tiꞌru, ꞌri ꞌre waꞌõno da te dasiwi pese da, ꞌRe ihâimana uꞌâsi mono nhorõwa ꞌri ꞌremhã uburé marĩ iwaipo norĩ, amnho na ꞌre idanhoprub zaꞌra mono hã, duré wede waꞌu zadaze hã iwa apâ da te dasiwi saꞌra zaꞌra da.
10 Tawamhã ꞌRe ihâimana uꞌâsi mono nhorõwa ꞌri ꞌre, dama ꞌre isõꞌre zaꞌra mono, duré Zeruzalẽ hawi levita norĩ iwairébézém na, apâ rom na te te ꞌre irobzuri mono u, isiꞌabaꞌrézém na zama wa tô waihuꞌu. E marĩ wa, ma tô apâ aiꞌabaꞌré. Aꞌuwẽ norĩ, õ norĩ uparizé, ibâ na te te tãma ꞌre sõmri zaꞌra mono õ wa, ihâimana zaꞌra zéb da hã.
11 Tahawa wa hã, dama ipire norĩ, ꞌRe ihâimana uꞌâsi mono nhorõwa ꞌri, te te siwi rẽme zaꞌra wa, wa tô tãma pẽtẽ zaꞌra. Taha pari levita norĩ zô, duré dama isõꞌreꞌwa norĩ zô, wa tô ĩhârâ zaꞌra, apâ ꞌRe ihâimana uꞌâsi mono nhorõwa ꞌri u sihutu da hã. Tawamhã wa tô apâ we te te ꞌre irobꞌmaꞌwamarĩ mono zé mono bâ hã te anhoré.
12 Tawamhã uburé Izaraéu nhihudu norĩ, ma tô apâ roꞌwasari na ãma sãnaꞌrata zaꞌra, ꞌRe ihâimana uꞌâsi mono nhorõwa ꞌri ꞌre, ꞌre iromnhimiꞌwara mono zéb u 10 na amnho wasi misi iwasi mrami na hã, uva ꞌrãi waꞌu isé mrami na hã, duré azeitona waꞌu to mrami na hã.
13 Tahawa, romnhimiꞌwarazé ꞌmadâꞌâꞌwa da hã wa tô aibâ norĩ hã waibu zaꞌra: sasedoti Selemia, Zadoqui dama romnhihâtâ ꞌmanharĩꞌwa hã, duré levita Pedaia na isisi hã. Tawamhã ipawaptob zaꞌra ꞌwa na tãma ꞌre ihâimana zaꞌra mono da hã wa tô duré pisutu, Hana Zacuhu ꞌra, Mataniaha nhihudu hã. Tawamhã wa tô waihuꞌu siro, za aibâ norĩ, te ꞌre iꞌumnhasi zaꞌra mono na hã, tisiré romhuriꞌwa norĩ ma, dasa na duré robꞌuiprazém na iꞌuwaibaba na za ãma tãma ꞌre isipoꞌo zaꞌra mono na hã.
14 “Ĩte ꞌRe ihâimana uꞌâsi mono, maꞌãpé asõrõwa ꞌri ꞌre ma, duré iwa aiꞌãma ꞌre idawata zaꞌra mono zé ma, uburé marĩ te ꞌre iꞌabꞌmanharĩ mono zém na ĩꞌãma aipoꞌre puꞌu.”
15 Tawamhã Zeruzalẽ ãma tô taha bâtâ mono na niꞌwam norĩ hã wa tô nasi ꞌmadâꞌâ zaꞌra, uva ꞌru ꞌrã iwaꞌu zô tipara na sabadu na nherẽ, te te ꞌre iwati zaꞌra mono hã. Niꞌwam norĩ hã te tite awaru poꞌre pore na amnho hã, uva ꞌrãi waꞌu isé hã, uva hã, robꞌrã figu hã, duré aimawi tinhimarĩ hã Zeruzalẽ u, te te ꞌre ꞌwasari. Tahawa, wa tô tãma waihuꞌu zaꞌra, sabadu na nherẽ, te te ꞌre rowede tõ zaꞌra mono da hã oto.
16 Tawamhã niꞌwam norĩ aibâ, Tiru na ꞌri nhoꞌõmo nhisi hawimhã Zeruzalẽ ãma ꞌre ihâimana zaꞌra mono hã ma tô tepe norĩ hã duré sipuꞌu pese na marĩ norĩ hã ꞌri nhoꞌõmo ꞌre ma, te te ꞌre ꞌwasari, wanhibꞌaꞌuwẽ norĩ ma, sabadu na te te ꞌre wede zaꞌra mono da hã.
17 Tawamhã wa hã wa tô Zudeu norĩ ma, ipire norĩ ma tãma pẽtẽ zaꞌra. Tahawa, wa tô tãma nharĩ zaꞌra, ãne:
— E niha ma tô iwasédé hã asiwi iꞌmanharĩ ꞌwa! Sabadu bâdâ hã ma tô duré asiwi iwasété ꞌwa!
18 Ãne wa, ma tô duré tô ꞌRe ihâimana uꞌâsi mono hã aihiꞌrata zaꞌra waꞌwa hã hâ zaꞌra, ꞌri nhoꞌu da te prub da, te te dama saꞌréi wamhã. Tane nherẽ, te awaꞌawi na sabadu hã nasi duré asiwi iwasété ꞌwa. Taha zarina ma tô ꞌRe ihâimana uꞌâsi mono, Izaraéu nhihudu norĩ zada ꞌre isitiꞌrui pusi mono zé hã te te sina ꞌre hâimo.
19 Tahawa, sabadu bâdâ ꞌre sãnaꞌrata mono wana ré, robra wi ꞌri nhoꞌõmo te, ꞌridawa zaꞌẽtẽ mono hã da te ꞌre sitob zaꞌra mono da, duré sabadu bâdâ siꞌutõrĩ wapsi apâ da te ꞌre ꞌridawa zaꞌra mono da hã wa tô dama waihuꞌu. Tahawa, ĩte aibâ norĩ ꞌridawa zaꞌẽtẽ norĩ ãmamhã wa tô sõré, te te robꞌmadâꞌâ zaꞌra da hã, ꞌri nhoꞌõmo u hã sabadu na hã da te oto ꞌre roꞌmazasi zaꞌra mono tõ da.
20 Tawamhã sipuꞌu pese na marĩ wedeꞌwa norĩ, sexta romhuri ꞌrãsudu barana ꞌri nhoꞌõmo ꞌwawi waꞌra ꞌrãihâ babarã na hã ma tô ãma tiꞌawẽ zaꞌra, misi mara na niha wamhã, maparane mara na.
21 Tane nherẽ, wa tô poꞌre puꞌu zaꞌra ãne:
— ꞌRi ꞌwawi waꞌra ꞌrãihâ babarã na aiꞌãma awẽ zaꞌra waꞌaba õ di za. Ãne hã duré asiwi ꞌmanharĩ aba wamhã, ĩnhiptede hã wa za tô ꞌmanha, asada zaꞌra waꞌaba hã.
Tawamhã tahawim haré sabadu na hã te te sina siri zaꞌra õ di apâ hã.
22 Tawamhã levita norĩ, sipese zaꞌra da, duré ꞌridawa zaꞌẽtẽ norĩ hã te te ꞌmadâꞌâ zaꞌra da, wa tô tãma waihuꞌu zaꞌra, wazé pese na sabadu bâdâ hã hâimana da, wẽ uptabi na.
“Ĩte ꞌRe ihâimana uꞌâsi mono, maꞌãpé ãhã wab zama ĩꞌãma aipoꞌre puꞌu. Duré maꞌãpé asimizawizéb zaꞌẽtẽ zarina hã ĩꞌãma aiwamri na.”
23 Tô taha bâtâ mono na hã, Zudeu norĩ ahâ uptabi na, Asidodi norĩ sipiꞌõ na, amonita norĩ sipiꞌõ na duré moabita norĩ sipiꞌõ na ꞌre imro zaꞌra mono zéb zama hã wa tô aꞌupsibi me.
24 Tahawa iꞌra norĩ aiwa ãma isipoꞌo na, te Asidodi mreme na hã, duré damreme ihâiba amo na hã ꞌre mreme zusi. Tahawa duré Zudeu norĩ mreme na hã ꞌre mreme zusi waihuꞌu mono õ di.
25 Tahawa aibâ norĩ ma, wa tô pẽtẽ zaꞌra. Wa tô duré ꞌRe ihâimana uꞌâsi mono nhimiꞌahârizé hã sada waptẽrẽ zaꞌra. Tahawa, wa tô duré hâ zaꞌra. Wa tô duré séré zano zaꞌra. Tawamhã ꞌRe ihâimana uꞌâsi mono nhisi na wa tô tiwi waptẽrẽ zaꞌra, niwamhã iꞌra norĩ hã wasiré aꞌuwẽꞌõ norĩ nhipiꞌõ na hã ꞌre mro zahu zaꞌra mono tõ da.
26 Tahawa wa tô tãma nharĩ zaꞌra ãne:
— Wasiré aꞌuwẽꞌõ norĩ sipiꞌõ na ꞌre imro zaꞌra mono zarina, ma tô apito Saloma tiwasédé hã te te ꞌre ꞌmanharĩ. Aré dama isaꞌrese zaꞌẽtẽ uptabi, uburé daro mono bâ dama ꞌre isiꞌapito zaꞌra mono norĩ nhipai u hã. ꞌRe ihâimana uꞌâsi mono hã te te ꞌre sawi pese mono wa, ma tô uburé Izaraéu nhihudu norĩ ma siꞌapito da hã pisutu. Tane nherẽ, ma tô tiwasété u waptãrã.
27 E wa norĩ zama, wa za ãne na hã bété duré ꞌre wanomro wasété, wate ꞌRe ihâimana uꞌâsi mono, wa te ꞌre iwapari zaꞌra mono õ zarina, wasiré aꞌuwẽꞌõ norĩ sipiꞌõ na ãma ꞌre wamro zaꞌra mono da hã.
28 Zoiada hã, Eriasibe sasedoti ipire ꞌra, te ꞌre hâimana. Tane nherẽ, Zoiadaha ꞌra hã ma tô Sãbalatihi ꞌra na hã timro, ꞌri nhoꞌu Bete-Horõ na isisi hawib ꞌra na. Tahawa, wa tô Zoiada, Zeruzalẽ hawimhã waze.
29 “Ĩte ꞌRe ihâimana uꞌâsi mono, maꞌãpé aꞌuwẽ norĩ ãmamhã aipoꞌre siꞌâri zaꞌra tõ. E marĩ wa. Sasedoti nhimiromhuri na te te wasété zaꞌra wa, duré sasedoti norĩ ma, levita norĩ me asimiropisutu zahi tãma iꞌmanharĩ zaꞌra zém na zama te te duré wasété zaꞌra wa.”
30 Ãne wa tô sasedoti norĩ hã levita norĩ me, uburé wasiré aꞌuwẽꞌõ norĩ te na ꞌre ihâimana wasété zaꞌra mono zém hawimhã oto pese zaꞌra. Duré tahawa, wa tô roti hã tãma ꞌmanharĩ zaꞌra, tite mono bâ romhuri na hã te te ꞌre robꞌmaꞌwamarĩ mono da.
31 Wa tô roti hã tãma ꞌmanharĩ zaꞌra, bâdâ iwa ꞌre tobro mono wa, mi da te ꞌre iꞌwasari mono na hã, za danhimizama da te ãma ꞌre izata zaꞌra mono zém na hã. Tawamhã duré amnho imorĩꞌrata na ãma danhoprubzém na, wa tô rowaihu hã tãma ꞌmanharĩ zaꞌra, duré rowede ꞌrã, imorĩꞌrata na da te ꞌre isinarĩ zaꞌra mono na hã.
“Ĩte ꞌRe ihâimana uꞌâsi mono, maꞌãpé, uburé marĩ na hã ĩꞌãma ꞌre aipoꞌre puꞌu uꞌâsi mono. Maꞌãpé duré iwẽ na si we ꞌre ĩpawaptob uꞌâsi mono!”
