Neemia 3:1-32
3 Tawamhã ꞌri nhoꞌõmo ꞌwawi waꞌra ma tô ãne apâ dasiwi ꞌmanharĩ ni: Sasedoti tisiré norĩ nhipai u ipire uptabi Eriasibe na isisi hã, duré sasedoti isiré norĩ ma tô Poneꞌẽrebâ na ꞌridawa zaꞌẽtẽ nhisi hã siwi ꞌmanha apâ. Tahawa, ma tô ãma sima romhuꞌu zaꞌra, te te siwi isaiwĩrĩzém na. Taha pari ma tô oto ãma siwi te te sasõmri ꞌridawa zaꞌẽtẽ mono hã, ꞌri ꞌwawi waꞌra ꞌrãihâ na. Cem na ꞌri ꞌrãihâ nhisi u ma tô duré ꞌri ꞌwawi waꞌra wahutu na hã ãma siwi tita, duré Hananeu na ꞌri ꞌrãihâ nhisi u zama.
2 Tawamhã taha nhanaꞌre iwaꞌõno hã ma tô Zerico hawi aibâ norĩ hã siwi ꞌmanha apâ, ꞌri ꞌwawi waꞌra hã. Duré Zacu, Ĩri ꞌra hã ma tô duré taha nhanaꞌre iwaꞌõno ihâiba hã ꞌmanha.
3 Hasenahã ꞌra norĩ ma tô Tepe na ꞌridawa zaꞌẽtẽ wamri hã siwi ꞌmanha. Tawamhã wedepoꞌo hâzaꞌõno hã taha na ma tô te te ãma saꞌra zaꞌra. ꞌRidawa isurure zama ma duré taha na te te ãma siwi tété, isimasabzé mono bâ. Taha pari ma tô duré isiꞌuwazi na itété mono zé hã te te ãma saꞌra zaꞌra.
4 Tawamhã taha nhanaꞌremhã siꞌubdatõ iwaꞌõtõ mono hã ma tô aibâ norĩ hã siwi ꞌmanha: Imorĩꞌrada Meremote na isisi, Uriasihi ꞌra, Hacozihi nhihudu hã ma tô ꞌmanha. Duré maparane ãma hã ma tô Mesulã, Berequiaha ꞌra, Mesezabehe nhihudu hã ꞌmanha. Duré siꞌubdatõ ãma hã ma tô Zadoqui, Baꞌanahã ꞌra hã ꞌmanha.
5 Taha nhanaꞌremhã ma tô duré ꞌrinhoꞌu Tecoa na isisi hawi aibâ ꞌre ihâimana zaꞌra mono norĩ hã siwi ꞌmanha, ꞌri ꞌwawi waꞌra waꞌõno hã. Tane nherẽ, ꞌri nhoꞌõmo ãma dama ipire norĩ romhuri na tipa te te dame isarõtõ zaꞌra da hã te te sima wẽ zaꞌra õ di, romhuri na dawadaꞌuriꞌwa te te tãma iꞌru zaꞌra hã.
6 Tawamhã Zoiada, Paséiaha ꞌra, Mesulã, Bezodiaha ꞌra me ma tô ꞌRidawa ꞌrata na ꞌridawa zaꞌẽtẽ nhisi hã apâ ꞌmanharĩ zahuré. Tawamhã wedepoꞌo hâzaꞌõno taha na ma tô ãma te te azaꞌra zahuré. ꞌRidawa isurure zama ma duré taha na te te ãma atété zahuré, isimasabzé mono bâ. Taha pari ma tô duré isiꞌuwazi na itété mono zé hã te te ãma azaꞌra zahuré.
7 Tawamhã Melatiza, Gibiã hawi aibâ hã duré Zadõ, Meronote na ꞌri waꞌõtõ nhisi hawi aibâ hã, Gibiã hawi aibâ norĩ me, duré Mispa hawi aibâ norĩ me hã ma tô Zoiada norĩ nhanaꞌremhã iwaꞌõtõ na ãma romhuri zaꞌra, ꞌri ꞌwawi waꞌra na Eufrati-Oeste na romnhisi te danhibꞌihâꞌa nhorõwa u.
8 Tawamhã taha nhanaꞌremhã ꞌri ꞌwawi waꞌra na iwaꞌõtõ na hã Haraiaha ꞌra, Uziꞌé na isisi ꞌre ihâimana mono hã ma tô ãma romhu, oru na isiꞌuwazi ꞌmanharĩꞌwa hã. Hanania wedewaꞌu zadaze ꞌmanharĩꞌwa ma tô taha nhanaꞌremhã duré ꞌmanha, iwaꞌõno hã, ꞌRi ꞌWawi Waꞌra Isitõmo zaꞌẽtẽ na isisi u.
9 Refaia, Hur na isisi ꞌra, Zeruzalẽ ãma ꞌri waꞌõno aiwa ãma isipoꞌo wa dama iꞌrãnhoꞌu ꞌre ihâimana mono hã ma tô duré taha nhanaꞌremhã ꞌri ꞌwawi waꞌra isipru hã apâ ꞌmanharĩ pese.
10 Taha nhanaꞌremhã ma tô Zedaia, Haramufehe ꞌra tinhorõwa ꞌratamhã iwaꞌõno hã ꞌmanha. Taha nhanaꞌremhã ma tô duré Hatusi, Hasabnéiaha ꞌra, isababamhã ꞌri ꞌwawi waꞌra hã ꞌmanharĩ pese.
11 Taha nhanaꞌremhã ma tô Malquia, Harĩhĩ ꞌra, Hasube, Paate-Moabihi ꞌra me ꞌmanharĩ zahuré ꞌri naꞌrata ꞌwawi waꞌra waꞌõno hã. Forno na ꞌri ꞌrãihâ nhisi zama ma tô duré ꞌmanharĩ zahuré.
12 Taha nhanaꞌremhã ma tô Salu, Haloéhé ꞌra, Zeruzalẽ ãma ꞌri waꞌõno aiwa isipoꞌo hâiba amoi ãma dama iꞌrãnhoꞌu hã ꞌmanha, iwaꞌõno hã. Tahawa iꞌra sipiꞌõ norĩ hã ma tô romhuri na pawaptob zaꞌra.
13 Tawamhã Hanu, Zanoa na ꞌri waꞌõtõ ãma ꞌre ihâimana zaꞌra mono norĩ me ma tô Romharé na ꞌridawa zaꞌẽtẽ nhisi hã apâ siwi ꞌmanha. Tahawa, ma tô ꞌridawa mono hã te te ãma sasõmri zaꞌra. Ma tô duré isiꞌuwazi na itétézé hã te te ãma saꞌra zaꞌra. Tawamhã ꞌri ꞌwawi waꞌra zama 500 metru na ipibuzém na ma tô duré siwi ꞌmanharĩ pese, Roprum na ꞌridawa zaꞌẽtẽ nhisi u.
14 Malquia, Recabihi ꞌra, ꞌri waꞌõno Bete-Haquere na isisi ãma dama iꞌrãnhoꞌu hã ma tô Roprum na ꞌridawa zaꞌẽtẽ nhisi hã apâ ꞌmanha. Tahawa, ꞌridawa mono hã ma tô te te ãma azasõmri. Ma tô duré isiꞌuwazi na itétézé hã te te ãma azaꞌra apâ.
15 Salu, Col-Hozéhé ꞌra, ꞌri waꞌõno Mispa na ꞌri waꞌõtõ nhisi ãma dama iꞌrãnhoꞌu ma tô Âꞌaꞌa na ꞌridawa zaꞌẽtẽ nhisi hã apâ ꞌmanha. Tawamhã taha nhisiwimhã ꞌridawa upsibizé hã ma tô duré ꞌmanha. Tahawa, ma duré ꞌridawa mono hã te te ãma azasõmri. Ma tô duré isiꞌuwazi na itétézé hã te te ãma azaꞌra. Tawamhã duré apito te robꞌre ꞌre ihâimana mono zababa Siroé na â nhowada nhisi ãma ma tô ꞌri ꞌwawi waꞌra ꞌrãihâ hã ꞌmanharĩ pese Salu hã, saiꞌurizé Davihi te ꞌri nhoꞌõmo hawi te te isiꞌra tẽme.
16 Tawamhã Neemia, Azbuquehe ꞌra, Bete-zu na ꞌri waꞌõno aiwa ãma isipoꞌo na dama iꞌrãnhoꞌu hã ma tô isãnaꞌre iwaꞌõno hã ꞌmanha, Davihi ãma da te itiꞌazéb u, duré â nhowada u, duré dasiꞌwapéi ꞌmanharĩꞌwa norĩ te, romhâ ꞌmanharĩ na ꞌri, isisõré mono u.
Levita norĩ, ꞌri ꞌwawi waꞌra ꞌrãihâ na te te irobꞌmaꞌwamarĩ zaꞌra zé wasuꞌu
17 Tawamhã levita norĩ zama ma tô ꞌri ꞌwawi waꞌra ꞌrãihâ ꞌmanharĩ pese na hã dapawaptob zaꞌra. Ãne isisi na ãma irobꞌuiꞌéré zaꞌra hã:
Reum, Banihi ꞌra, ma tô isãnaꞌre iwaꞌõno hã ꞌmanharĩ pese.
Duré isãnaꞌre iwaꞌõno hã ma tô Hasabiasi, Queira na ꞌri waꞌõno aiwa ãma isipoꞌo ãma dama iꞌrãnhoꞌu hã ꞌmanharĩ pese.
18 Bavai, Henadadehe ꞌra, Queira na ꞌri waꞌõno aiwa isipoꞌo hâiba amoi ãma dama iꞌrãnhoꞌu hã ma tô isãnaꞌremhã ꞌri ꞌwawi waꞌra ꞌrãihâ waꞌõno hã ꞌmanharĩ pese.
19 Tawamhã ihâiba amo iwaꞌõno hã ma tô duré Ézé, Zesuaha ꞌra, Mispa na ꞌri waꞌõtõ ãma dama iꞌrãnhoꞌu hã ꞌmanharĩ pese, dasiꞌwapéi ꞌmanharĩzé nhimiꞌwarazém nhoꞌremhã, ꞌri ꞌwawi waꞌra wẽꞌẽzéb u.
20 Isãnaꞌre iwaꞌõno hã ma tô duré Baruqui, Zabaꞌihi ꞌra hã ꞌmanharĩ pese, ꞌri ꞌwawi waꞌra wẽꞌẽzém hawi, Eriasibe sasedoti tisiré norĩ nhipai u ipire uptabi nhibꞌridawa ihâimana u.
21 Tawamhã taha nhanaꞌremhã iwaꞌõno hã ma tô duré Meremote, Uriasihi ꞌra, Hacozi na isisi nhihudu hã ꞌmanharĩ pese, Eriasibehe nhorõwa hawi, ꞌri ꞌrãsudu ihâimana u hã.
Sasedoti norĩ, ꞌri ꞌwawi waꞌra na te te irobꞌmaꞌwamarĩ zaꞌra zé wasuꞌu
22 Tawamhã sasedoti norĩ zama ma tô ꞌri ꞌwawi waꞌra ꞌmanharĩ pese na dapawaptob zaꞌra. Ãne ãma irobꞌuiꞌéré zaꞌra norĩ hã isisi na:
Sasedoti norĩ, Zeruzalẽ waptoma ꞌre ihâimana zaꞌra mono norĩ hã ma tô isãnaꞌre iwaꞌõno hã duré siwi ꞌmanharĩ pese, ꞌri ꞌwawi waꞌrazé hã.
23 Taha nhanaꞌremhã iwaꞌõno hã ma tô Bẽzami norĩ, Hasubehe me hã tinhorõwa zahuré ꞌri nhoꞌre waꞌwaibaba hã ꞌmanharĩ pese zahuré.
Azaria, Maaséiaha ꞌra, Ananiaha nhihudu hã tinhorõwa nhoꞌre waꞌwaibaba hã ma tô ꞌmanharĩ pese.
24 Taha nhanaꞌremhã iwaꞌõno hã ma tô Binuꞌi, Henadadehe ꞌra hã Azariaha nhorõwa hawimhã ꞌmanharĩ pese, ꞌri ꞌwawi waꞌra ꞌrãihâ wẽꞌẽzéb u.
25 3:25-26 Tawamhã taha nhanaꞌremhã iwaꞌõno hã ma tô Palaꞌu, Uzaꞌihi ꞌra hã ꞌmanharĩ pese. Ta hã ma tô ꞌri ꞌwawi waꞌra ꞌrãihâ wẽꞌẽzém hawi iꞌmanharĩ na romhuri hã ãma sãnaꞌrata, apito nhimiromhurizé ꞌri hawi, apito ꞌmadâꞌâꞌwa norĩ ꞌri zahâpâ wa, ꞌre isiꞌubumroi mono zéb ꞌrata.
26 ꞌMadâꞌâ 3:25
Taha nhanaꞌremhã iwaꞌõno hã ma tô Pedaia, Paroho ꞌra hã ꞌmanharĩ pese, bâtâ pusizém niwĩ ro ꞌre ihâimana mono u hã, Â na ꞌridawa zaꞌẽtẽ nhisi ꞌrata, duré ꞌri ꞌrãihâ ꞌrata, ꞌRe ihâimana uꞌâsi mono nhorõwa ꞌmadâꞌâzéb ãmamhã. Ãhã ꞌri hã te Ofeꞌu na ꞌri nhoꞌõmo waꞌõtõre ꞌrata ꞌre sa, aibâ norĩ ꞌRe ihâimana uꞌâsi mono nhorõwa ꞌre, romhuriꞌwa norĩ ꞌre ihâimana zaꞌra mono zéb ãma.
Ihâiba amo ꞌri ꞌwawi waꞌra na romhuriꞌwa norĩ wasuꞌu
27 Taha nhanaꞌremhã ma tô ꞌrinhoꞌu Tecoa na isisi ãma aibâ ꞌre ihâimana zaꞌra mono norĩ hã duré iwaꞌõtõ hâiba amo hã siwi ꞌmanharĩ pese, ꞌri ꞌrãihâ ꞌRe ihâimana uꞌâsi mono nhorõwa ꞌmadâꞌâzém nhoꞌre hawi, Ofeꞌu na ꞌri waꞌõtõre ꞌrata ꞌri ꞌwawi waꞌra u hã.
28 Tawamhã taha nhanaꞌremhã ma tô sasedoti norĩ hã iwaꞌõno hã siwi ꞌmanharĩ pese, Awaru na ꞌridawa zaꞌẽtẽ nhisi hawi, hâiwa nhimiꞌe niwĩb u hã. Ta norĩ hã ma tô hâiba mono bâ tinhorõwa nhoꞌre mono na hã te te ãma robꞌmaꞌwamarĩ.
29 Taha nhanaꞌremhã ma tô Zadoqui, Imehe ꞌra hã tinhorõwa nhoꞌre waꞌwaibaba hã ꞌmanharĩ pese.
Isababamhã iwaꞌõno hã ma tô duré Semaia, Secaniasihi ꞌra Bâtâ Pusizém Niwĩm na ꞌridawa zaꞌẽtẽ nhisi ꞌmadâꞌâꞌwa hã ꞌmanharĩ pese.
30 Taha nhanaꞌremhã ma tô Hanania Selemiaha ꞌra, Hanu Zalafehe ꞌra 6 ãma ipoto me iwaꞌõtõ hâiba amo hã ꞌmanharĩ pese zahuré.
Tawamhã duré isababab zahuré hã Mesulã, Berequiaha ꞌra, ma tô tinhorõwa nhoꞌremhã ꞌmanharĩ pese, ꞌri ꞌwawi waꞌra ꞌrãihâ waꞌõno hã.
31 Taha nhanaꞌremhã iwaꞌõno hã ma tô Malquia oru na isiꞌuwazi ꞌmanharĩꞌwa hã ꞌmanharĩ pese, ꞌRe ihâimana uꞌâsi mono nhorõwa ꞌri ꞌre, romhuriꞌwa norĩ duré rowedeꞌwa norĩ iwa ꞌre ihâimana zaꞌra mono zéb u. Ã hã ꞌri te Robꞌmadâꞌâzém na ꞌridawa zaꞌẽtẽ nhisib zababa ꞌre sa, hâiwa nhimiꞌe niwĩ ꞌri ꞌwawi waꞌra ꞌrãihâ ãma, robꞌmadâꞌâzé ꞌri ꞌwawi waꞌra zaséꞌre ꞌrata.
32 Taha nhanaꞌremhã iwaꞌõno hã ma tô Oru na isiꞌuwazi ꞌmanharĩꞌwa norĩ hã rowedeꞌwa norĩ me ꞌri ꞌwawi waꞌra ꞌrãihâ waꞌõtõ ꞌrãsudu hã siwi ꞌmanharĩ pese, ꞌri naꞌrata zaséꞌre ãma ꞌriꞌre waꞌwa hawi, Poneꞌẽrebâ na ꞌridawa zaꞌẽtẽ nhisi u hã.
